პროექტი ,,ევა,“ რომელიც ქალთა გააქტიურებაზეა ორიენტირებული – სრულდება. ,,საზოგადოებრივი განვითარების ახალციხის ცენტრის“ წარმომადგენლები პროექტის ფარგლებში შესრულებული სამუშაოების მონიტორინგს იწყებენ. ისინი დაინტერესებულ პირებს ბიზნესის უნარ–ჩვევების გაძლიერებაში ტრენინგებისა და პრაქტიკული სამუშაოების განხორციელებით დაეხმარნენ.

აღნიშნული პროექტი სამი წელია სამცხე–ჯავახეთში, იმერეთსა და ქართლში ხორციელდება. სამცხე–ჯავახეთის რეგიონიდან ახალციხის, ასპინძისა და ადიგენის მუნიციპალიტეტების 30–მდე მაცხოვრებელი ჩაერთო. მის ფარგლებში, რამდენიმე სოფელში ცნობიერების ამაღლების დღეები ჩატარდა, რის შემდეგაც რეგიონის სამ მუნიციპალიტეტში 40–მდე ხილის საშრობი დამზადდა. ქალებმა მარტივი კონსტრუქცია ხისგან, მინისგან და ცინკისგან საკუთარი ხელით ააწყეს. მასში მატყლის, ხილისა და ბოსტნეულის გამოშრობაა შესაძლებელი.
პროექტი სრულდება, თუმცა ,,საზოგადოებრივი განვითარების ახალციხის ცენტრის“ წარმომადგენლები ამბობენ, რომ ბიზნესის წამოწყება–განვითარების, ალტერნეტიული და განახლებადი ენერგიების დანერგვის და ენერგოეფექტურობის კუთხით უფასო კონსულტაციები გაგრძელდება.