სოფლის მეურნეობის სამინისტროს ინფორმაციით, ქვეყნის მასშტაბით, ყველაზე მეტი კოოპერატივი სამცხე – ჯავახეთშია. მათი უმრავლესობა მეხორცეობაზე მოდის. კოოპერატივების ჩამოყალიბების მიზნით, ადგილობრივები უწყების რეგიონულ სამმართველოს ყოველდღიურად მიმართავენ.
ხაჩტურ ამბარიანი, სოფელ ჭაჭარაქში 9 კაციან კოოპერატივს ხელმძღვანელობს. ამბობს, რომ იგი 2014 წელს ჩამოაყალიბეს და მას შემდეგ მესაქონლეობასა და მემცენარეობას მიყვებიან. კოოპერატივში, რომლის სახელწოდებაც ,,ჭაჭარაქია“ ამ დრიოსათვის, 25 მეწველი ძროხა და 20 ჰექატი მიწის ნაკვეთი შედის. ადგილობრივებს, ერთობლივი ძალებით, ხორბალი, ქერი, კარტოფილი, სიმინდი, ლობიო და სხვა მარცვლეული თუ ბოსტნეული კულტურები მოჰყავთ.
მიმდინარე საგაზაფხულო სამუშაოებისათვის, ,,ჭაჭარაქის“ წევრებმა10 000 ლარის ფარგლებში კარტოფილის თესლი შეიძინეს. ამბარიანი მიიჩნევს, რომ კოოპერატივი ადგილობრივებს შრომას უადვილებს, რადგან სახელმწიფო პროგრამა მათთვის არაერთ შეღავათს აწესებს.
მესაქონლეობა–მემცენარეობის მიმართულებით შექმნილ კოოპერატივშია ჩართული ბესიკ გოქსაძის ოჯახიც. მათი გაერთიანება სოფელ ურაველში მდებარეობს და მასში ამჟამად 5 წევრია. გოქსაძე ამბობს, რომ კოოპერატივის შექმნის შესახებ ინფორმაცია სოფლის მეურნეობის სამინისტროს ადგილობრივი სამმართველოდან მიიღო, რომელსაც კონსულტაციის მიზნით, ხშირად სტუმრობს.
სასოფლო-სამეურნეო კოოპერატივების განვითარების სააგენტოს ინფორმაციით, ქვეყნის მასშტაბით, ყველაზე მეტი კოოპერატივი სამცხე – ჯავახეთშია ჩამოყალიბებული. როგორც უწყების სამცხე–ჯავახეთის რეგიონულ სამმართველოში განმარტავენ, კოოპერატივების უმრავლესობა რეგიონში მეხორცეულ–მერძეულ მიმართულებაზე მოდის, მათი რიცხვი 50–ს აღწევს. ხშირია გაეთიანებები მემცენარეობისა და მეფუტკრეობის დარგებშიც, კოოპერატივის ფარგლებში, რეგიონის მასშტაბით შექმნილია ყველის გადამამუშავებელი 12 საწარმო, რომელთაგან 8 ახალციხეში მდებარეობს.
კითხვაზე, რა გავლენა იქონია კოოპერატივების ჩამოყალიბებამ სამცხე–ჯავახეთში სოფლის მეურნეობის განვითარების კუთხით, ამაზე დოქტორი სოფლის მეურნეობის დარგში, თემურ გვარამაძე ამბობს, რომ შეფასებები ნაადრევია. მისი თქმით, პროგრამა გრძელვადიანია და რეალური შედეგზე საუბარი რთულია. თუმცა მიიჩნევს, რომ კოოპერატივების ჩამოყალიბება ფერმერებს სამუშაოს გაუადვილებს.
სასოფლო-სამეურნეო კოოპერატივების განვითარების სააგენტოს ინფორმაციით, დღეის მდგომარეობით, ქვეყნის მასშტაბით, კოოპერატივის სტატუსი 753 გაერთიანებას აქვს მინიჭებული. მათგან 119 სამცხე–ჯაავხეთშია. აღმოჩნდა, რომ რეგიონის მასშტაბით, კოოპერატივების ჩამოყალიბების პროცესში, ახალციხის მუნიციპალიტეტი ყველაზე აქტიურია. აქ 44 სტატუსის მქონე კოოპერატივი ფუნქციონირებს. ასევე, მაღალია აქტივობა ახალქალაქიშიც, სადაც ადგილობრივები, ძირითადად, მეკარტოფილეობის განვითარების მიზნით ერთიანდებიან.
