ბოლო პერიოდში ძლიერმა წვიმამ და სეტყვამ სამცხე–ჯავახეთის მუნიციპალიტეტები მნიშვნელოვნად აზარალა. დაზიანებულ სოფლებში კი მოსავლის დაზღვევის სტატისტიკა დაბალია. 

ასე გამოიყურება მინაძეების საკარმიდამო ნაკვეთი 29 მაისის სტიქიის შემდეგ. სოფელ ვარხანში, დაახლოებით 25 მეასედი ტერიტორია, სადაც მეპატრონე ბოსტნეული კულტურებისა და ნათესების დიდ მოსავალს ელოდა, ადიდებულმა წყალმა ლოდებითა და მოგლეჯილი ხეებით გაავსო. ოჯახი სარჩოს გარეშე დარჩა. მინაძეებმა მიწის ნაკვეთის ლოდებისგან გაწმენდა ამ დრომდე ვერ შეძლეს.

მოსავალი დაზღვეული არ აქვს, თუმცა ფიქრობს, რომ დაზარალებულ გლეხს სახელმწიფოს გვერდში დგომა სჭირდება. ადიგენის მუნიციპალიტეტის სოფელ ვარხანში, შოთა ბიჩახჩიანს ღვარცოფმა ექვსი გოჭი და  რვა ქათამი დაუხრჩო. წყლით აივსო სახლი და სარდაფი. გარდა ამისა, სტიქიამ მიწის სამი ნაკვეთი დატბორა, სადაც 20 ტონა ჭარხალს ელოდებოდა, თუმცა ფიქრობს, რომ სტიქიის შემდეგ მხოლოდ 5 ტონამდე მოსავალს მიიღებს.

მიუხედავად იმისა, რომ მინაძეებისა და ბიჩახჩიანების ოჯახები  სტიქიამ პირველად არ აზარალა, არც ერთ მათგანს მოსავლის დაზღვევაზე არასოდეს უფიქრია.

დაზარალებულებისგან განსხვავებით, მათივე თანასოფლელი არსენ ნატრიაშვილი აგროდაზღვევით მეორე წელია სარგებლობს. 29 მაისის სტიქიამ, ოჯახს ხორბლის ყანა გაუნადგურა. დაზარალებულები ამბობენ, რომ ჯეჯილი გაყვითლდა და ხმება, ამიტომ ფიქრობენ, რომ წელს ხორბლის მოსავალს ვერ მიიღებენ. ფერმერი ამბობს, რომ სადაზღვევო კომპანიის წარმომადგენლებმა ხორბლის ყანაში ზარალი აღწერეს. ოჯახი ხელშეკრულებით გათვალისწინებულ კომპენსაციას ელის.

სოფელ ვარხანში, დაზარალებული მოსახლეობის ნაწილი ამბობს, რომ მოსავლის დაზღვევის მექანიზმებზე არაფერი სმენიათ. ნაწილი კი განმარტავს, რომ აგროდაზღვევა მათთვის კარგი გამოსავალია, თუმცა მისი პირობების გამო ვერ სარგებლობენ.

ადიგენში მომხდარი სტიქიის შედეგად დაზარალებულებიდან, რამდენი ფერმერი სარგებლობდა აგროდაზღვევით – სოფლის მეურნეობის სამინისტროს სამცხე–ჯავახეთის რეგიონულ სამმართველოში ჯერ არ იციან, თუმცა ამბობენ, რომ პროგრამით მოსარგებლე რეგიონში 500–მდე ფერმერია. შეღავათიანი აგროდაზღვევის პროგრამა გასულ წელს დაიწყო და მის ფარგლებში ნებისმიერ პირს, ნებისმიერი ფართობისა და კულტურის დაზღვევა სეტყვაზე, ქარიშხალსა და წყალმოვარდნაზე შეუძლია. გადასახდელი თანხის 60–80% სახელმწიფო იხდის.

ზარალის დამთვლელმა კომისიამ, 29 მაისის სტიქიის შედეგად დატბორილი და განადგურებული სასოფლო–სამეურნეო სავარგულები და ნათესები შეისწავლა. სოფლის მეურნეობის მიმართულებით, ძლიერმა წვიმამ და სეტყვამ,  ვარხანსა და უნწაში 40–მდე ოჯახი, 65 015 ლარით აზარალა. ადიგენის გამგეობაში ამბობენ, რომ მწირი ბიუჯეტის გამო, მოსახლეობას ზარალს ვერ აუნაზღაურებენ. სოფლის მეურნეობის სპეციალისტები კი გლეხებს აგროდაზღვევისკენ მიუთითებენ.