ვალელი ფერმერი ზარალის ანაზღაურებას ითხოვს. კობა ჩიტაშვილი, ადგილობრივ ხელისუფლებას სარწყავი არხის არასწორ მონატჟში ადანაშაულებს, რის გამოც მისი ნაკვეთი ყოველი წვიმის დროს იტბორება. შედეგად, 25 მეასედ ფართობზე დათესილი კარტოფილის მხოლოდ ნაწილი ამოვიდა. ფერმერი ვარაუდობს, რომ კულტურა ჭარბი ტენის გამო ნიადაგში დალპა. კობა ჩიტაშვილმა კომპენსაციის მიღების მოთხოვნით, ვალის წარმომადგენელს მიმართა, თუმცა ამბობს, რომ პასუხი ვერ მიიღო.
კობა ჩიტაშვილის მსგავსად, ვალის სხვა მკვიდრებიც ფიქრობენ, რომ სარწყავი არხი, არასწორად დამონტაჟდა. ამბობენ, რომ ზოგიერთ მონაკვეთზე წყალი, აღმართის გამო ღია მილებში გასვლას ვერ ახერხებს და ჟონავს, ან ზევიდან გადმოდის.
პლასტმასის მილები, რომ არასწორადაა დამონტაჟებული, ამაზე ახალციხის გამგებლის წარმომადგენელიც საუბრობს. ელიოზ ბარბლიშვილის განმარტებით, იქიდან გამომდინარე, რომ ტერიტორიაზე „ბი–პის“ მილსადენი გადის, კომპანიისგან ნებართვის გარეშე არხის მშენებლობა გამგეობამ განახორციელა. „ბრითიშ პეტროლიუმმა“ მათ მიმდინარე წლის გაზაფხულზე რკინის ნაცვლად პლასტმასის მილები გადასცა, რომელიც აღნიშნულ მონაკვეთზე დაამონტაჟეს.
პლასტმასის მილების ჩანაცვლებას ახალციხის გამგეობა ბეტონის არხებით გეგმავს. კითხვაზე – მიიღებს თუ არა დაზარალებული ფერმერი კომპენსაციას? – ელიოზ ბარბლიშვილი განმარტავს, რომ უხვმა ნალექმა ვალეში ნათესები სხვა ფერმერებსაც დაუზიანა და ეს სარწყავი სისტემის ხარვეზის გამო არ მომხდარა. მისივე თქმით, ნაკვეთში არსებული მდგომარეობა შესასწავლია, რის შემდეგაც გადაწყდება უნდა აუნაზღაურდეს, თუ არა კობა ჩიტაშვილს მიყენებული ზიანი.
