ახალციხის მერია არასამეწარმეო არაკომერციული იურიდიული პირების დიდ ნაწილს სუბსიდიას უმცირებს. რის ხარჯზე გააგრძელებენ საქმიანობას ა(ა)იპ–ები – ამაზე ხელმძღვანელები ჯერჯერობით ვერ საუბრობენ.
„ახალციხის ტბის“ წარმომადგენელი ამბობს, რომ მათი შემოსავლები 2016 წელს უმნიშვნელო იყო, თუმცაღა მერიამ მისი შენახვისთვის 134 000 ლარი დახარჯა. ა(ა)იპ–ის ამ ბიუჯეტიდან, 80 000–მდე აქ დასაქმებული18 ადამიანის ანაზღაურებას, ხოლო დანარჩენი კომუნალურ, სამეურნეო ხარჯებს და ჰიგიენური საშუალებების შეძენას მოხმარდა. ამავე თანხის ფარგლებში „ახალციხის ტბამ“ ნავები შეიძინა. 2017 წლის ბიუჯეტის პროექტის მიხედვით, მერია ა(ა)იპ–ს დაახლოებით, 3 000 ლარით ნაკლებით დააფინანსებს. გრიგოლ ღავთაძის თქმით, სუბსიდიის შემცირება, თანამშრომლების გათავისუფლებას არ გამოიწვევს, რადგან ადამიანური რესურსი ტბის მოვლისთვის ისედაც მცირეა.
ახალციხის ტბისგან განსხვავებით, სამუსიკო სკოლაში 40 ადამიანია დასაქმებული. მისი ბიუჯეტი კი ტბის სუბსიდიასთან შედარებით, 39 360 ლარით ნაკლებია. სამუსიკო სკოლას 2017 წლის ბიუჯეტის პროექტის მიხედვით ახალციხის მერია ისევ 94 000 ლარით დააფინანსებს. ეს თანხა ა(ა)იპ–მა 40 თანამშრომლის ანაზღაურებაზე, კომუნალურ ხარჯებზე, ჰიგიენურ საშუალებებზე, გასათბობად შეშის შეძენასა და ღონისძიებების გამრთვაზე უნდა გადაანაწილოს. სხვა ხარჯებისთვის სკოლას თანხები აღარ რჩება.
კიდევ ერთ არასამეწარმეო არაკომერციულ იურიდიულ პირს „მდგრადი განვითარების სააგენტოს“, მერია 2017 წლის ბიუჯეტის პროექტის მიხედვით, 32 500 ლარით დააფინანსებს. ა(ა)იპ–ის შემადგენლობაში 3 თანამშრომელი ირიცხება. 2016 წელს ექვსი თვის მანძილზე სააგენტომ მერიიდან 20 150 ლარი მიიღო. სააგენტოს თავმჯდომარე აცხადებს, რომ ა(ა)იპ–ის წლიური ბიუჯეტი დაახლოებით, 75 000 ლარს შედგენს. ამის მიხედვით, 2017 წელს მდგრადი განვითარების სააგენტოს ხარჯების თითქმის განახევრება მოუწევს.
ახალციხის მერიას ამ დროისათვის 11 არასამეწარმეო არაკომერციული იურიდიული პირი ექვემდებარება, ჯამში აქ 454 ადამიანია დასაქმებული. 11 ა(ა)იპ–ის შენახვა თვითმმართველობას 2016 წელს 2 541 000 ლარამდე დაუჯდა. რამდენით შეუმცირებს მათ ახალციხის მერია დაფინანსებას 2017 წელს – ეს მომავალი წლის ბიუჯეტის დამტკიცების შემდეგ გაირკვევა.
ავტორები: თიკო კურტანიძე, ნანა ინასარიძე.
