გზის ერთ მხარეს მოსახლეობა, მეორე მხარეს კი მძიმეწონიანი მანქანები – ვალის ე.წ. „მეორე შახტის“ მაცხოვრებლებმა პროტესტის ნიშნად გზა დილიდან გადაკეტეს. ადგილობრივები 600 მეტრიანი მონაკვეთის სასწრაფოდ რეაბილიტაციას ითხოვენ. გზა, სადაც მძიმეწონიანი მანქანები გადაადგილდება, შუა სოფელში გადის. მოსახლეობა ამბობს, რომ ასფალტისა და ბეტონის ქარხნების მიმართულებით მოძრაობა დილიდან საღამომდე არ წყდება. შედეგად მთელი დღის განმავლობაში დასახლებაში მტვერია, გარდა ამისა, მშობლები მცირეწლოვან ბავშვებს ეზოში ვერ უშვებენ.
აღნიშნული მოთხოვნით მოსახლეობა აქციას პირველად არ მართავს. ამბობენ, რომ ხელისუფლებისგან გზის რეაბილიტაციასთან დაკავშირებით დაპირება, არაერთხელ მიიღეს. თუმცა წლების მანძილზე მათთან მდგომარეობა არ გაუმჯობესებულა. თავის მხრივ, ზარალდებიან კომპანიები, რადგან ბეტონით დატვირთული მანქანების მძღოლებს პროტესტის გამო, შუა გზაში დგომა საათობით უწევთ.
„მეორე შატხის“ რეაბილიტაციისთვის სამწლიანი გეგმაა შემუშავებული – აცხადებს ახალციხის გამგებლის წარმომადგენელი ვალის ტერიტორიულ ერთეულში. ელიოზ ბარბლიშვილის თქმით, პირველ ეტაპზე დასახლებაში მრავალბინიანი საცხოვრებელი სახლების გადახურვა მიმდინარეობს. სამომავლოდ გათვალისწინებულია გზის ასფალო–ბეტონის საფარის დაგებაც, თუმცა წარმომამადგენელი სამუშაოების დაწყების კონკრეტულ თარიღს ვერ ასახელებს.
სამსაათიანი პროტესტის შემდეგ მოსახლეობასთან ახალციხის მუნიციპალიტეტის გამგებელი მივიდა. ზაზა მელიქიძე ე.წ. „მეორე შახტის“ დასახლების მაცხოვრებლებს გზის მოწესრიგებას 2017 წლის გაზაფხულისთვის დაპირდა. გაფიცულებმა მძიმეწონიანი მანქანები გზაზე, მხოლოდ ამის შემდეგ გაატარეს.
