კალათბურთის ტურნირში გამარჯვებულები ცნობილია. დღეს სასკოლო ოლიმპიადის ფარგლებში გოგონებსა და ვაჟებში ახალციხის პირველობისათვის პირველი, მეორე და მეხუთე საჯარო სკოლების გუნდებმა იბრძოლეს. თუმცა გამარჯვება წილად მხოლოდ ორ მათგანს ხვდა.
სასკოლო ოლიმპიადაში, კალათბურთის ტურნირში გოგონათა გუნდებიდან გამარჯვებული ცნობილია. ანაკლიაში რესპუბლიკის მასშტაბით გამართულ შეჯიბრზე მეორე სკოლის გუნდი გაემგზავრება და პირველობისათვის იბრძოლებს.
7–3 დასრულდა ვაჟებს შორის შეხვედრა კალათბურთში. ერთმანეთს პირველობისათის პირველი და მეხუთე საჯარო სკოლის გუნდები დაუპირისპირდნენ. გამარჯვება პირველი სკოლის ვაჟთა გუნდმა მოიპოვა.
სასკოლო ოლიმპიადის კალათბურთის ფინალურ შეხვედრას ორგანიზება ახალციხის კულტურის სამსახურმა გაუწია. შეხვედრის დასრულების შემდეგ პირველ და მეორე ადგილზე გასულ გუნდებსა და მათ მწვრთნელებს მედლები, თასები და სიმბოლური საჩუქრები გადაეცათ.
ახალციხის პირველობისათვის კალათბურთის ტურნირში ქალაქის ექვსივე საჯარო სკოლა მონაწილეობდა, რომელიც 30 მარტს დაიწყო და დღეს დასრულდა. შეგახსნებეთ, რომ საქართველოში, სასკოლო ოლიმპიადას ორგანიზებას სპორტისა და ახალგაზრდობის საქმეთა და საქართველოს განალებისა და მეცნიერების სამინისტროს უწევს. ჩემპიონატის მიზანს კი ახალგაზრდების გააქტიურება და ჯანსაღი ცხოვრების პოპულარიზაცია წარმოადგენს. პროექტის ფარგლებში გამარჯვებული სკოლა ანაკლიაში გაემგზავრება, სადაც მონაწილეობას ფინალურ შეჯიბრში მიიღებს. რესპუბლიკის მასშტაბით გამარჯვებულები კი 2016 წლის სასკოლო მსოფლიო ჩემპიონატზე გაემგზავრებიან, რომლებიც ხორვატიაში, ესტონეთში, ისრაელსა და უნგრეთში გაიმართება.
