ნათხოვარი ინკუბატორით დაწყებული საქმიანობა და საკმარისი თანხის არქონის გამო შეცვლილი ბიზნესგეგმები – სოფელ მსუხის შესასვლელში მდებარე სულიკო ინასარიძის ფერმაში დღეისათვის საქონლისა და ცხვრის ნაცვლად, ბინა სოფლის ქათმებმა დაიდეს. ფრინველების მოშენება პირველ ცდაზე წარუმატებლად დასრულდა – ბაზარში ნაყიდი 2 000 კვერცხიდან ნახევარზე მეტი არ გამოიჩეკა. მიუხედავად ამისა ახალგაზრდა ფერმერი არ დანებდა და საქმიანობა მაინც გააგრძელა. დღეისათვის ფერმაში 500 ქათამს უვლის.
არ აქვს საკუთარი ინკუბატორი, თუმცა აქვს გეგმები – ფერმაში ქათმის გარდა იხვი, ინდაური და მწყერი მოაშენოს. ამბობს, რომ სპეციალური დანადგარი 5 200 ლარი ჯდება. საქმიანობაში ჩადებული ათობით ათასი ლარის გასტუმრება ვალუტის კურსის ცვლილების გამო გაუჭირდა, ახალი შეღავათიანი აგრო კრედიტის გაცემაზე კი ბანკმა უარი უთხრა. ფერმერი ამბობს, რომ მხოლოდ საკუთარი სახსრებით წინ ძალიან ნელა მიიწევს.
ფერმაში ამ დროისათვის ორი ადამიანია დასაქმებული. ისინი ქათმების მოვლა–პატრონობაზე არიან პასუხისმგებელნი.
სულიკო ინასარიძე ახალციხის ბაზარში ძირითადად კვერცხსა და ცოცხალ ქათმებს ჰყიდის. ინკუბატორის შეძენის შემდეგ შეეძლება წიწილები მიმდებარე სოფლებში სეზონურად გაყიდოს. შედეგად ყოველდღიური შემოსავალი გაიზრდება. მისი თქმით, ამ ეტაპზე დღეში მხოლოდ კვერცხის რეალიზებიდან 100 ლარი რჩება, წიწილების შემთხვევაში ყოველდღიური შემოსავალი 400 ლარამდე მიაღწევს.
ახალგაზრდა ფერმერი იმ უპირატესობებზე საუბრობს, რაც მის ფერმაში გაზრდილი ქათმებისთვისაა დამახასიათებელი. ამბობს რომ ფრინველებს მხოლოდ მარცვლეულითა და კარტოფილით კვებავს. ქიმიური დანამატების გამოყენებაზე უარს ამბობს. ნატურალური და ეკოლოგიურად სუფთა პროდუქტი კი ბევრად მოთხოვნადია.
ნათხოვარ ინკუბატორში ახლა მწყერი იჩეკება. ათასობით კვერცხიდან გამოჩეკილი ჩოჩორისთვის ახალგაზრდა ფერმერი გალიებს ამზადებს. დანადგარში მწყრის კვერცხებს ქათმის კვერცხით ჩაანაცვლებს. სანამ პატრონი ინკუბატორს უკან წაიღებს, ფიქრობს რომ რამდენიმე თაობას დააფრთიანებს. მისი თქმით, დანადგარს დაფინანსებით ან საკუთარი ხარჯებით მაინც შეიძენს, თუმცა სახელმწიფოსგან მცირეოდენი დახმარების შემთხვევაშიც კი საქმიანობას მეტი მოტივაციით შეუდგება. გარდა იმისა, რომ საკუთარ ბიზნესს განავითარებს, ადგილობრივების დასაქმების პრობლემასაც გადაჭრის. იმედი აქვს, რომ გარკვეული პერიოდის შემდეგ თავდაპირველ გეგმასაც დაუბრუნდება და ფერმაში საქონელსა და ცხვარს მოაშენებს.