ვალეში მცხოვრები თამაზ გოზალიშვილი წელიწადნახევარია მებოცვრეობას მისდევს. საქმიანობა სამი ბოცვრით დაიწყო და ცდილობს სამომავლოდ ბიზნესშიც ჩაერთოს. დამწყები ფერმერის გეგმები – რუბრიკაში “წარმატებული ფერმერი”.
თამაზ გოზალიშვილმა წელიწადნახევრის წინ სამი ბოცვერი შეიძინა და ოჯახისთვის მოშენებას შეეცადა, თუმცა ბოცვრები ისე სწრაფად და მარტივად გამრავლდნენ, გოზალიშვილებმა გადაწყვიტეს საქმიანობა გაეფართოვებინათ. დღეისათვის სპეციალურად მოწყობილ სადგომში 14 სრულწლოვანი „ბარანი“ და 7 ბაჭია ცხოვრობს.
ბოცვრის ხორცი დიეტური და სასარგებლოა – ფერმერმა მათი მოშენება თავდაპირველად, სწორედ ამის გამო გადაწყვიტა. სამომავლოდ კი, როცა ცხოველების რიცხვი 100–მდე გაიზდება, შეიძლება საქმიანობა დამატებითი შემოსავლის წყაროც გახდეს. ფერმერი ამბობს, რომ ერთი კილოგრამი ცოცხალი წონა 12–14 ლარია, სრულწლოვანი ბოცვერი კი 3–დან 5 კილოგრამამდე იწონის.
იმისთვის, რომ მებოცვრეობა განავითარო, აუცილებელია სისუფთავის დაცვა, საკვებთან ერთად ქვამარილი და ვიტამინები – ამბობს ადგილობრივი მკვიდრი სოსო გოზალიშვილი, რომელიც დარგის განვითარებით თავადაც იყო დაკავებული. ყოფილი მებოცვრე დამწყები ფერმერისთვის რჩევებს არ იშურებს.
თამაზ გოზალიშვილის ბოცვრების სადგომი მარტივადაა მოწყობილი. ცხოველები შემოღობილ ტერიტორიაზე პირდაპირ მიწაზე ცხოვრობენ. ფერმერი ამბობს რომ ეს თანამედროვე სტანდარტებს არ შეესაბამება, თუმცა მათი მოვლა ასეთ პირობებში ბევრად მარტივია, რადგან ბუნებრივ პირობებს ადვილად ეგუებიან. ერთადერთი სირთულე მათი გამოკვებაა, რომელიც მუდმივ ხელშეწყობას საჭიროებს.
ფერმერი სამომავლოდ გაფართოებას გეგმავს. ფიქრობს, რომ სადგომს იგივე პრინციპით უფრო დიდ ტერიტორიაზე მოაწყობს. ამის შემდეგ კი სახელმწიფო პროგრამაში ჩართვასაც შეეცდება, რაც მცირე ბიზნესის წამოწყებაში მნიშვნელოვნელოვან დახმარებას გაუწევს.
