შემოსავლების სამსახურის თანამშრომლებმა 17 ივლისს, საბაჟო გამშვებ პუნქტზე „ნინოწმინდა“ 5 ამპულა ნარკოტიკული ნივთიერების შემცველი მედიკამენტი „ტრამადოლი“ აღმოაჩინეს. მედიკამენტი სომხეთის მხრიდან შემოსული რუსეთის მოქალაქე პ.ვ.-ის კუთვნილ ავტომანქანაში იყო დამალული. საქმე შემდგომი რეაგირებისთვის  შსს საპატრულო პოლიციის დეპარტამენტის სამცხე-ჯავახეთის მთავარი სამართველოს საგამოძიებო სამსახურს გადაეცა. ასევე ნარკოტიკული ნივთიერების შემცველი მედიკამენტების შემოტანის რამდენიმე მცდელობა გამოვლინდა 17-19 ივლისს საბაჟო გამშვებ პუნქტზე „ვალე“. კერძოდ, 17 ივლისს პუნქტის ტერიტორიაზე თურქეთის მხრიდან  გერმანიის მოქალაქე ვ.ე. შემოვიდა, რომლის ხელბარგის დათვალიერების შედეგად მებაჟე ოფიცრებმა Tramadolhydrochlorid-ის შემცველი მედიკამენტი „ტრამალი“ (10 კაფსულა) აღმოაჩინეს. აკრძალული მედიკამენტები აღმოაჩნდა 18 ივლისს თურქეთის მხრიდან შემოსულ ირანის ორ მოქალაქესაც. კერძოდ, ე.ც.-ის ხელბარგში 10 აბი ნარკოტიკული ნივთიერების შემცველი მედიკამენტი DIPHENOXYLATE, ხოლო ს.მ.-ის ხელბარგში ნარკოტიკული ნივთიერებისა (კოდეინის) და ფსიქოტროპული ნივთიერების (ფსევდოეფედრინის) შემცველი მედიკამენტები: ACETAMINOPHEN CODEINE – 5 აბი და COLDAX – 5 აბი აღმოაჩინეს. 17 აბი ნარკოტიკული და ფსიქოტროპული ნივთიერებების შემცველი მედიკამენტის „სედალგინ ნეოს“ შემოტანა  19 ივლისს აზერბაიჯანის მოქალაქე ჰ.ჰ.-მ სცადა. ყველა საქმე შემდგომი რეაგირებისთვის შსს სპდ სამცხე-ჯავახეთის მთავარი სამმართველოს საგამოძიებო განყოფილებას გადაეცა .

ახალციხეში, ე.წ ,,საბარგო სადგურზე“ ავტოსაგზაო შემთხვევა მოხდა. 19 ივლისს, დაახლოებით 15:00 საათზე ცენტრალურ მაგისტრალზე ერთმანეთს ,,ჰონდასა“ და ,,ტოიოტას“ მარკის ავტომანქანები შეეჯახნენ.

ახალციხეში ავტოსაგზაო შემთხვევისას   5–მდე  ადამიანი დაშავდა. ერთმანეთს ორი ავტომობილი შეეჯახა. ადგილზე მობილიზებულნი არიან სამაშველო, საპატრულო და კრიმინალური პოლიციის სამსახურები. დაშავებულების ამოყვანა ავტომობილებიდან  სამაშველო სამსახურის თანამშრომლებმა უზრუნველყვეს. ავტოსაგზაო შემთხვევა ცენტრალურ მაგისტრალზე, ახალციხის შემოსასვლელში მოხდა. დაზიანებულია “ჰონდას”  და “ტოიოტას” მარკის  ავტომობილები. ამ დროისათვის ცენტრალურ მაგისტრალზე მოძრაობა შეზღუდულია. დაშავებულები “უნიმედი სამცხე”–ს სამედიცინო დაწესებულებაში გადაიყვანეს. წინასწარი ინფორმაციით, მათ სხეულის მსუბუქი დაზიანება მიიღეეს. შინაგან საქმეთა სამინისტროს ინფორმაციით, გამოძიება საქართველოს სისხლის სამართლის კოდექსის 276–ე მუხლით მიმდინარეობს, რაც  ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

შინაგან საქმეთა სამინისტროს სამცხე-ჯავახეთის სამხარეო მთავარი სამმართველოს ადიგენის და ბორჯომის რაიონული სამმართველოების თანამშრომლებმა, ოპერატიული ინფორმაციის საფუძველზე ჩატარებული სამძებრო-საგამოძიებო ღონისძიებების შედეგად, 16 პირი: 1960 წელს დაბადებული თენგიზ ბ, 1987 წელს დაბადებული ზურაბ გ, 1963 წელს დაბადებული გურამ გ, 1989 წელს დაბადებული ჯაბა ს, 1985 წელს დაბადებული მერაბ ვ, 1990 წელს დაბადებული მალხაზ მ, 1973 წელს დაბადებული რევაზ ც, 1990 წელს დაბადებული თენგიზ ნ, 1977 წელს დაბადებული ალექსანდრე ჩ, 1960 წელს დაბადებული დავით გ, 1975 წელს დაბადებული ვეფხია ა, 1981 წელს დაბადებული პაატა ფ, 1976 წელს დაბადებული დავით კ, 1976 წელს დაბადებული გიორგი შ,1979 წელს დაბადებული ალექსანდრე გ. და 1983 წელს დაბადებული ვახტანგ ვ. ტყით უკანონოდ სარგებლობის, უკანონოდ მოპოვებული ხე-ტყის პირველადი გადამუშავების, საქართველოს ენერგეტიკისა და ბუნებრივი რესურსების მინისტრის ნორმატიული აქტით გათვალისწინებულ შემთხვევებში სათანადო დოკუმენტის ან სპეციალური ფირნიშით მარკირების გარეშე ხე-ტყის ტრანსპორტირების და შესაბამისი ორგანოს მიერ დადებული ბეჭდის (ლუქის) განზრახ დაზიანების, ხე-ტყის პირველადი გადამამუშავებელი ობიექტის ტექნიკური რეგლამენტის მოთხოვნების დარღვევის ფაქტებზე ამხილეს. სამართალდამცველებმა ბორჯომის მუნიციპალიტეტის სოფელ ჭობისხევში, მხილებულის საცხოვრებელი სახლის ეზოში, უკანონო სახერხი საამქრო დალუქეს.

სასტუმრო „ჯინო ველნესის“ ბუღალტერს ყოფილი თანამშრომელი ფიზიკურ შეურაცხყოფაში ადანაშაულებს. „მეცხრე არხთან“ დაზარალებული  აცხადებს, რომ   საჩივარი ახალციხის რაიონულ სასამართლოში უკვე შეიტანა. ცემის ფაქტზე გამოძიება 125-ე მუხლით მიმდინარეობს. სასტუმრო “ჯინო ველნესის” ყოფილი თანამშრომელი ამავე დაწესებულების ბუღალტერს სასამართლოში უჩივის.  ნინო ბერიძე  თამარ შაორშაძეს ფიზიკურ შეურაცხყოფაში ადანაშაულებს.

ახალციხის ციხის ტერიტორიაზე მდებარე სასტუმრო „ჯინო ველნესის“ ბუღალტერს ყოფილი თანამშრომელი ფიზიკურ შეურაცხყოფაში ადანაშაულებს. როგორც „მეცხრე არხს“ დაზარალებულმა განუცხადა, საჩივარი ახალციხის რაიონულ სასამართლოში უკვე შეიტანა.  ნინო ბერიძის თქმით, მან ბუღალტერთან იკამათა, რის შემდეგაც თამარ შაორშაძე ფიზიკურად გაუსწორდა. ნინო ბერიძე სასტუმრო “ჯინო ველნესში” მიმტანის პოზიციაზე მუშაობდა. მისი განმარტებით, ბუღალტერმა რამდენიმე დღის წინ  ჩანთა გაუჩხრიკა და ტელეფონი ამოიღო, რისი უფლებაც არ ჰქონდა. ამის შესახებ მან სასტუმროს მენეჯერს აცნობა, რომელმაც აღნიშნულის ფაქტებით დადასტურება მოთხოვა. ყოფილი თანამშრომელი აცხადებს, რომ კამერების ჩანაწერი ერთად ნახეს, თუმცა მენეჯერმა ეს არგუმენტად არ მიიღო. სამსახურეობრივი მოვალეობის არასათანადოდ შესრულების მოტივით, ნინო ბერიძე დაკავებული პოზიციიდან 12 ივლისს გაათავისუფლეს. „ჯინო ველნესში“  ყოფილი თანამშრომელის ბრალდებას აბსურდულს უწოდებენ, გარდა ამისა, ბერიძეს სიტყვიერ შეურაცხყოფაში ადანაშაულებენ. სასტუმროში „მეცხრე არხს“ ოფიციალურ კომენტარზე უარი განუცხადეს.”ჯინო ველნესის” წარმომადგენლები პირად საუბარში ყოფილი თანამშრომლის მიმართ ფიზიკური შეურაცხყოფის ფაქტს უარყოფენ. მათივე თქმით, ნინო ბერიძე დაკისრებულ მოვალეობას სათანადოდ არ ასრულებდა, რის გამოც ხელმძღვანელებისგან საყვედური არაერთხელ მიიღო და ბოლოს გათავისუფლდა კიდეც. ბუღალტერის მიერ ყოფილი თანამშრომლის ცემის ფაქტზე გამოძიება უკვე დაიწყო. საქმეს ახალციხის რაიონული პროკურატურა იძიებს. სამართალდამცველების ინფორმაციით, გამოძიება საქართველოს სისხლის სამართლის კოდექსის 125 მუხლის პირველი ნაწილით მიმდინარეობს. იგი ცემას ან სხვაგვარ ძალადობას გულისხმობს, რამაც დაზარალებულის ფიზიკური ტკივილი გამოიწვია, მაგრამ ფაქტს ჯანმრთელობის განზრახ მსუბუქი დაზიანება არ მოჰყოლია. ქმედება ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ანდა გამასწორებელი სამუშაოთი ვადით თხუთმეტ თვემდე. დეტალებს  “მეცხრე არხი” მოგვიანებით შემოგთავაზებთ.

შსს-ს სასაზღვრო პოლიციის საგამოძიებო-ოპერატიული მთავარი სამმართველოს თანამშრომლებმა, საქართველოს 2 და რუსეთის 1  მოქალაქე ახალციხის მუნიციპალიტეტში დააკავეს. გამოძიებამ დაადგინა, რომ საქართველოს მოქალაქეები გარკვეული თანხის სანაცვლოდ, სასაზღვრო-საკონტროლო გამტარი პუნქტის გვერდის ავლით, საქართველოს სახელმწიფო საზღვრის გადაკვეთას და მცირეწლოვან შვილებთან ერთად რუსეთის ორი მოქალაქის, საქართველოდან თურქეთის რესპუბლიკის მიმართულებით გადაყვანას ცდილობდნენ.

ახალციხის მუნიციპალიტეტის გამგეობისა და მერიის საჯარო მოხელეთა შესარჩევი საკონკურსო–საატესტაციო კომისიის წინააღმდეგ სარჩელი ,,სამართლიანმა არჩევნებმა“ შეიტანა. არასამთავრობო ორგანიზაცია გამგეობას ედავება, რომ 19 ივნისს, საჯარო მოხელეთა შესარჩევი კონკურსის შესახებ გამოთხოვილი ინფორმაცია ამ დრომდე არ მიუწოდებია. ახალციხის მერიის საჯარო მოხელეთა შესარჩევ საკონკურსო–საატესტაციო კომისიას კი სასამართლოში მოუწევს პასუხის გაცემა, რატომ არ დაუშვეს არასამთავრობო ორგანიზაციის წარმომადგენელი გასაუბრებაზე. ,,სამართლიანი არჩევნების“ იურისტებმა სარჩელი ახალციხის რაიონულ სასამართლოში შეიტანეს. სხდომა ჯერ არ ჩანიშნულა.ახალციხის მერიაში საჩივრის შესახებ არაფერი იციან და ამბობენ, რომ მათთან აღნიშნული ინფორმაციის დამადასტურებელი წერილი ჯერ არ მისულა. საკითხზე კომენტარი გააკეთეს გამგეობაში.

შინაგან საქმეთა სამინისტროს სასაზღვრო პოლიციის საგამოძიებო-ოპერატიული მთავარი სამმართველოს თანამშრომლებმა, საქართველოს საბაჟო საზღვარზე დიდი ოდენობით მოძრავი ნივთის საბაჟო კონტროლის გვერდის ავლით, მალულად გადატანის მცდელობის ფაქტზე, საქართველოს მოქალაქე, 1960 წელს დაბადებული გიორგი ლ. სასაზღვრო გამშვებ პუნქტ „ვალეს“ მიმდებარე ტერიტორიაზე დააკავეს. სასაზღვრო პოლიციის თანამშრომლებმა, დაკავებულის მართვის ქვეშ მყოფი ავტობუსის ჩხრეკისას, დიდი ოდენობით თამბაქოს ნაწარმი – 50984 კოლოფი სიგარეტი ამოიღეს. გამოძიებამ დაადგინა, რომ გიორგი ლ. საბაჟო კონტროლის გვერდის ავლით, თამბაქოს ნაწარმის საქართველოდან თურქეთის რესპუბლიკაში უკანონოდ გადატანას ცდილობდა.

გარემოსდაცვითი ზედამხედველობის დეპარტამენტის სამცხე-ჯავახეთის სამსახურის თანამშრომლება, ბორჯომისა და ადიგენის მუნიციპალიტეტებში ხე-ტყის გადამამუშავებელი, უკანონოდ მოქმედი 7 სახერხი საამქრო გამოავლინეს. აღმოჩენილია ასევე, ამავე საამქროების ტერიტორიაზე განთავსებული უკანონოდ მოპოვებული წიწოვანი ჯიშის მრგვალი მორები , რომელთა საერთო ოდენობა 21 კუბურ მეტრს აღწევს. მასალები შემდგომი რეაგიებისთვის გადაეგზავნა შესაბამის ორგანოებს. გარემოსდაცვითი ზედამხედველობის დეპარტამენტი ხე-ტყის გადამამუშავებელი სახერხი საამქროების მიერ გარემოსდაცვითი კანონმდებლობის დაცვის შესწავლის მიზნით, განაგრძობს პრევენციული ღონისძიებების განხორციელებას.

ავტოსაგზაო შემთხვევას რამდენიმე საათის წინ ბორჯომელი მამა-შვილის სიცოცხლე ემსხვერპლა. აღნიშნულის შესახებ ინფორმაციას ტელეკომპანია “ბორჯომი” ავრცელებს. 53 წლის ვახტანგ შენგელია 12 წლის ვაჟთან ერთად ბორჯომიდან ხაშურის მიმართულებით მსუბუქი ავტომანქანით მოძრაობდა, რა დროსაც ხეს შეეჯახა. შემთხვევა ხაშურთან ახლოს მოხდა. სავარაუდოდ, ორივე მათგანი შემთხვევის ადგილზე გარდაიცვალა. ცხედრები გორის საავადმყოფოში გადაასვენეს. ექსპერტიზის ჩატარების შემდეგ მამა-შვილს ბორჯომში გადაასვენებენ. შსს–ს ინფორმაციით, გამოძიება საქართველოს სისხლის სამართლის კოდექსის 276-ე მუხლის მეშვიდე ნაწილით მიმდინარეობს, რაც გულისხმობს ავტომობილის, ტრამვაის, ტროლეიბუსის, ტრაქტორის ან სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც ორი ან მეტი ადამიანის სიცოცხლის მოსპობა გამოიწვია.

ახალციხის რაიონულ  სასამართლოში, ადიგენის მუნიციპალიტეტის სოფელ ბოლაჯურის საბავშვო ბაღის ყოფილი მენეჯერის საჩივარის  განიხილვა გრძელდება. პროცესზე მოსარჩელე და მოპასუხე მხარეების მტკიცებულებების გამოკვლევა მიმდინარეობს. დღევანდელ სხდომაზე მოპასუხე მხარემ ოთხი მოწმე წარადგინა, თუმცა მათგან, მხოლოდ სამის დაკითხვა მოხერხდა. წარდგენილი მოწმეებიდან ყველა მათგანი სოფელ ბოლაჯურის საბავშო ბაღის თანამშრომლი იყო.

 4-5 ივლისს შემოსავლების სამსახურის თანამშრომლებმა ნარკოტიკული ნივთიერებების შემცველი პრეპარატების შემოტანის რამდენიმე მცდელობა აღკვეთეს. 4 ივლისს, საბაჟო გამშვებ პუნქტ „ვალეს“ კონტროლის ზონაში თურქეთის მხრიდან შემოსული კანადის მოქალაქე ე.ა.ჯ.-ს ხელბარგის დათვალიერების შედეგად, 10 აბი ნარკოტიკული საშუალების შემცველი პრეპარატი APO-TRAMADOL აღმოუჩინეს, ხოლო 5 ივლისს, თურქეთის მოქალაქე ჰ.ი.-ის ხელბარგის დათვალიერების შედეგად – 18 აბი ნარკოტიკული საშუალების შემცველი პრეპარატი GERALGINE-k. ორივე საქმე შემდგომი რეაგირების მიზნით,  საპატრულო პოლიციის სამცხე-ჯავახეთის მთავარი სამმართველოს საგამოძიებო სამსახურს გადაეცა.

შინაგან საქმეთა სამინისტროს ინიციატივით, სამცხე-ჯავახეთის სამხარეო მთავარი სამმართველოს თანამშრომლებმა, ახალქალქში მცხოვრებ სოციალურად დაუცველ ახალგაზრდებს, სავარჯიშოდ, სპორტული ინვენტარი გადასცეს. შინაგან საქმეთა სამინისტროს წარმომადგენლებმა და საქართველოს კრივის ფედერაციის ვიცე-პრეზიდენტმა მამუკა წიკლაურმა სპორტული აღჭურვილობა, მათ   სავარჯიშო დარბაზში მიუტანეს. ინვენტარის გადაცემის ცერემონიას ახალგაზრდებთან ერთად მათი ტრენერი ადომ ელიზბარიანი და ახალქალაქის მაჟორიტარი დეპუტატი სამველ პეტროსიანი დაესწრნენ.

საბაჟო გამშვებ პუნქტ “ვალეს” ტერიტორიაზე 29 ივნისს, თურქეთის მხრიდან შემოსულ ირანის მოქალაქე ე.ა.-ს ნარკოტიკული ნივთიერების შემცველი მედიკამენტი Ritalina (5 აბი) აღმოაჩნდა. საქმე შემდგომი რეაგირების მიზნით, საპატრულო პოლიციის სამცხე-ჯავახეთის მთავარი სამმართველოს საგამოძიებო სამსახურს გადაეცა. ასევე, 30 ივნისს, საბაჟო გამშვები პუნქტის „სარფის“ ტერიტორიაზე, თურქეთის მხრიდან შემოვიდა სომხეთის მოქალაქე ბ.ა., რომლის კუთვნილ ავტომანქანაში შემოსავლების სამსახურის თანამშრომლებმა ნარკოტიკული და ფსიქოტროპული ნივთიერების შემცველი მედიკამენტები აღმოაჩინეს, თავად მოქალაქის დათვალიერებისას კი – 0,55 გრ. მარიხუანა. საქმის მასალები შემდგომი რეაგირების მიზნით,  შსს საპატრულო პოლიციის დეპარტამენტის აჭარის ავტონომიური რესპუბლიკის მთავარ სამმართველოს გადაეცა.

შინაგან საქმეთა სამინისტროს სამცხე-ჯავახეთის სამხარეო მთავარ სამმართველოში მოქალაქეებმა, სხვადასხვა სახის საბრძოლო მასალა, ნებაყოფლობით ჩააბარეს. შსს–ს ინფორმაციით, სულ ჩაბარებულია: 8 გადაჭრილი თოფი, სხვადასხვა ტიპის იარაღისათვის განკუთვნილი 2 248 საბრძოლო ვაზნა, 57 ხელყუმბარა, 3 შაშხანა, 1 ამფეთქი, 2 სასიგნალო მაშხალა, 3 ტანკსაწინააღმდეგო ნაღმი, ყუმბარმტყორცნის 15 ჭურვი, 3 მჭიდი და 1 ქვეითსაწინააღმდეგო ნაღმი. გამოძიება ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის ფაქტზე საქართველოს სისხლის სამართლის კოდექსის 236-ე მუხლის 1-ლი ნაწილით მიმდინარეობს.

  საქართველოს ფინანსთა სამინისტროს საგამოძიებო სამსახურმა ქრთამის აღების ფაქტზე სსიპ „დაცული ტერიტორიების სააგენტოს“ ბორჯომ-ხარაგაულის ეროვნული პარკის ადმინისტრაციის უბნის უფროსი რეინჯერი ნიკოლოზ გელაშვილი დააკავა. გამოძიებით დადგენილია, რომ ნიკოლოზ გელაშვილმა მის დაქვემდებარებაში არსებული ბორჯომ-ხარაგაულის ტყის ფონდის ტერიტორიიდან უკანონოდ საშეშე მორის მოჭრის სანაცვლოდ მოქალაქეს მოსთხოვა და გამოართვა 300 ლარი. საგამოძიებო სამსახური აგრძელებს გამოძიებას საქართველოს სისხლის სამართლის კოდექსის 338-ე მუხლის პირველი ნაწილით, რაც ითვალისწინებს თავისუფლების აღკვეთას 6-დან 9 წლამდე.

28 ივნისს, საბჟპ გამშვებ პუნქტ „ვალეს“ ტერიტორიაზე თურქეთის რესპუბლიკის მხრიდან  ჩეხეთის მოქალაქე ე.ს. შემოვიდა, რომლის კუთვნილი ხელბარგის სკანერით დათვალიერების შედეგად,  ნარკოტიკული ნივთიერების (ტრამადოლი) შემცველობის პრეპარატი Tramal – 6 აბი აღმოაჩინეს. ნარკოტიკული ნივთიერების (კოდეინი) შემცველობის პრეპარატი Acetaminophen Codeine – 9 აბი და ფსიქოტროპული ნივთიერების (ფსევდოეფედრინი) შემცველობის პრეპარატი Goldax – 7 აბი აღმოაჩინეს სგპ „ვალეს“ მებაჟე ოფიცრებმა, ასევე, 29 ივნისს, ირანის ისლამური რესპუბლიკის მოქალაქე მ.ა.-ის კუთვნილი ხელბარგის ეჭვის საფუძველზე დათვალიერების შედეგად. ორივე საქმე შემდგომი რეაგირებისთვის გადაეცა საპატრულო პოლიციის სამცხე-ჯავახეთის მთავარი სამმართველოს საგამოძიებო სამსახურს.

შინაგან საქმეთა სამინისტროს სამცხე-ჯავახეთის სამხარეო მთავარი სამმართველოს ადიგენის, ახალციხის და ბორჯომის რაიონული სამმართველოების თანამშრომლებმა, ერთობლივად ჩატარებული საგამოძიებო ღონისძიებების შედეგად, 14 პირი ხე-ბუჩქნარის უკანონოდ გაჩეხვის, ტყით უკანონოდ სარგებლობის, უკანონოდ მოპოვებული ხე-ტყის პირველადი გადამუშავების, სათანადო დოკუმენტის ან სპეციალური ფირნიშით მარკირების გარეშე ხე-ტყის ტრანსპორტირებისა და პირველადი გადამამუშავებელი ობიექტის ტექნიკური რეგლამენტის მოთხოვნების დარღვევის ფაქტებზე ამხილეს. სამართალდამცველებმა ახალციხის მუნიციპალიტეტის სოფელ სვირის სატყეო უბანში სატვირთო ავტომანქანიდან წიწვოვანი ჯიშის, უკანონოდ მოჭრილი, 13 ცალი სამასალე მერქანი ამოიღეს. მხილებულმა შემთხვევის ადგილიდან მიმალვა სცადა.

ახალციხის რაიონულმა სასამართლომ ადიგენის მუნიციპალიტეტის სოფელ ბოლაჯურის საბავშვო ბაღის ყოფილი მენეჯერის საჩივარი, განიხილა. პროცესზე მოსარჩელე და მოპასუხე მხარეებმა მტკიცებულებები წარადგინეს. საქმეზე ერთი მოწმე – ბაღის მზარეული დაიკითხა.  მარეხი აფრიამაშვილმა  სხდომაზე განაცხადა, რომ ბაღის ყოფილმა მენეჯერმა  დაწესებულებიდან ორი პური წაიღო. რადგან ეს უკანონო საქციელი იყო, მან  ბაღების გაერთიანების უფროსს შეატყობინა.  სწორედ ეს გახდა ლალი მაისურაძის დაკავებული თანამდებობიდან გათავისუფლების ერთ–ერთი მიზეზი.