15 თებერვარვალს ქრისტიანულმა ეკლესიამ  მირქმის საუფლო დღესასწაული იზეიმა. ეს დღე აღინიშნა რაბათის წმინდა მარინეს სახელობის ტაძარშიც, სადაც  საზეიმო წირვა დეკონოზმა სტეფანემ და მღვდელმსახურმა გიორგიმ აღავლინეს.წირვის დასასრულს ტაძრის მღვდელმსახურმა მამა გიორგიმ მორწმუნეებს დღესასწაული მიულოცა და მრევლს მისი მნიშვნელობა განუმარტა. მისი თქმით, ძველად შობიდან მეორმოცე დღეს  ტაძრად ყრმის მიყვანა და მის სახელზე მსხვერპლის შეწირვა ხდებოდა. მაცხოვრისათვის იოსებმა ორი მტრედი შესწირა. გადმოცემის თანახმად, ყრმა იესო სვიმეონ მიმრქმელმა გულში ჩაიკრა, რამეთუ მას ჩვენება ჰქონდა, რომ მანამ არ აღესრულებოდა, სანამ მაცხოვარს არ იხილავდა.

შსს-ს სამცხე-ჯავახეთის პოლიციის დეპარტამენტის ბორჯომის რაიონული სამმართველოს და ცენტრალური კრიმინალური პოლიციის დეპარტამენტის ნარკოტიკების უკანონო ბრუნვის წინააღმდეგ ბრძოლის მთავარი სამმართველოს თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, 1993 წელს დაბადებული გიორგი ქ. ახალი ფსიქოაქტიური ნივთიერების უკანონო შეძენა-შენახვის ბრალდებით ბაკურიანში, თამარ მეფის ქუჩაზე დააკავეს. სამართალდამცველებმა დაკავებულის პირადი ჩხრეკისას 0,00779 გრ ახალი ფსიქოაქტიური ნივთიერება – ე.წ. „ბიო“ ამოიღეს. დაკავებული ჩადენილ დანაშაულს აღიარებს. გამოძიება ახალი ფსიქოაქტიური ნივთიერების უკანონო შეძენა-შენახვის ფაქტზე მიმდინარეობს (საქართველოს სსკ-ს 260-ე მუხლის მე-2 ნაწილით).

კიევის საერთაშორისო ტურნირზე მესხმა სპორტსმენმა ვერცხლის მედალი მოიპოვა. გოგა აფრიამაშვილმა  71 კგ. წონით კატეგორიაში ბერძნულ-რომაული სტილით იასპარეზა. საქართველოს ჭიდაობის ეროვნული ფედერაციის ინფორმაციით, მან მოლდოველი დანიელ კატარაგა და უკრაინელი ოლეგ ანტონოვი 8-0 დაამარცხა, ნახევარფინალში,  თანაგუნდელ გიორგი ჯავახიას  ანგარიშით 3-2 მოუგო. გოგა აფრიამაშვილი ადიგენიდან, სოფელ არლიდან არის. 2005 წლიდან იგი ეროვნულ ნაკრებში  ჭიდაობს. კიევის საერთაშორისო ტურნირზე სპორტსმენი ეროვნული ფედერაციის სახელით იმყოფებოდა. 13 თებერვალს,  კიევის საერთაშორისო ტურნირის პირველ დღეს საქართველოს ბერძნულ-რომაული სტილით, ხალიჩაზე 5 მოჭიდავე გავიდა, აქედან ოთხმა მედალი მოიპოვა. ვერცხლის მედლები მფლობელები  გოგა აფრიამაშვილმა (71) და ვასილ იმერლიშვილმა (98),  ბრინჯაოს მედლების კი გიორგი ჯავახია (71) და თორნიკე ძამაშვილი (80) გახდნენ. საერთაშორისო ტურნირში მონაწილეობა 20–მა ქვეყანამ მიიღო.

მცირემიწიან ფერმერთა 2016 წლის საგაზაფხულო სამუშაოების ხელშეწყობის პროგრამის ფარგლებში, ახალციხის მუნიციპალიტეტის სოფლების მოსახლეობისთვის განკუთვნილი ბარათები დღეს, 12 თებერვალს, ადმინისტრაციული ერთეულების წარმომადგენლებს, მოსახლეობაში დასარიგებლად გადასცეს. სოფლის მეურნეობის სამინისტროს ინფორმაციით, ახალციხის მუნიციპალიტეტში, ხვნის ბარათს 8 391 ფერმერი იღებს. მათი რიცხვი, გასულ წელთან შედარებით, 300–ით გაიზარდა. ბენეფიციარებს ხვნის ბარათის გამოყენება პირველ დეკემბრამდე შეეძლებათ. მათი სურვილის შემთხვევაში, ისინი შეძლებენ, რომ ხვნის ბარათი აგრო ბარათში გადაცვალონ და მასზე დარიცხული ქულების საშუალებით, პესტიციდები ან საჭირო ინვენტარი შეიძინონ.

წნისში მცხოვრებმა ჟორა ჩადუნელმა საგაზაფხულო სამუშაოები უკვე დაიწყო. მან მხოლოდ მიწის ნაკვეთი დაამუშავა. ფერმერი ამბობს, რომ რეგიონის მკაცრი კლიმატური პირობების გამო, ჯერ არც ნერგები დაურგია და არც მარცვლოვანი კულტურები დაუთესია. მისი თქმით, აქტიური საგაზაფხულო სამუშაოები, მარტის თვიდან დაიწყება როცა მოსავალს ნიადაგში მოყინვის საფრთხე აღარ დაემუქრება. ჟორა ჩადუნელის მსგავსად, სამცხე–ჯავახეთში, ფერმერთა უმეტესობა, ჯერ მხოლოდ მიწის დახვნით შემოიფარგლა. აქტიური საგაზაფხულო სამუშაოების დასაწყებად, ისინიც დათბობას  და გაზაფხულის პირველი თვის დადგომას ელიან.

ევროატლანტიკურ კავშირში, საქართველოს გაწევრიანების პერსპექტივასთან ერთად, საზოგადოებაში არაერთგვაროვანი მოსაზრებებიც ჩნდება. მოსახლეობის ნაწილი ფიქრობს, რომ ნატოში გაწევრიანებით ქვეყანა სტაბილურობისა და უსაფრთხოების გარანტს მიიღებს. ამის მიუხესდავად, სამცხე–ჯავახეთში საუბრობენ, რომ საქართველოს ნატოში გაწევრიანებას  ხელს ოკუპიურებული ტერიტორიები შეუშლის. ევროატლანტიკური ინტეგრაციის შემდეგ, საქართველო, ეგრედწოდებული ,,ნატოს ჯარის“ ბაზად გადაიქცევა – ეს კიდევ ერთი მითია, რომელიც სამცხე–ჯავახეთის მოსახლეობას აღელვებს.  მესხეთში თვლიან, რომ ამ მხრივ საფრთხე სწორედ მათ რეგიონს დაემუქრება, რადგან სამხედრო ბაზები საზღვრისპირა რეგიონის ტერიტორიაზე განთავსდება. ამ მითის სჯერათ არა მხოლოდ რიგით მოქალაქეებს, არამედ ისტორიკოსებსა და კავკასიოლოგებს.

თაყაიშვილის ქუჩაზე ხანძარია. ცეცხლი ორსართულიანი საცხოვრებელი სახლის სახურავს გაუჩნდა. ამ წუთებში, ადგილზე მობილიზებულია სახანძრო სამსახურის ბრიგადები და საპატრულო პოლიცია. როგორც ,,მე–9 არხითვის” გახდა ცნობილი, ხანძარს მსხვერპლი არ მოჰყოლია. შემთხვევის ადგილზეა ტელევიზიის გადამღები ჯგუფი, დეტალებს მოგვიანებით მოგაწვდით.

ახალციხის გამგეობაში საჯარო მოხელეთა შესარჩევი კონკურსის მესამე ეტაპი დასრულდა. დღეს, 31 კონკურსანტიდან გასაუბრებაზე 12 მათგანი არ გამოცხადდა. გუშინ, 8 თებერვალს კი 27 კონკურსანტიდან გასაუბრებაზე მხოლოდ ხუთი მათგანი არ გამოცხადდა. შვიდ კაციანი საკონკურსო–საატესტაციო კომისია, რომელსაც გამგებელი ზაზა მელიქიძე ხელმძღვანელობდა, ადმინისტრაციისთვის კადრებს ორი დღის განმავლობაში არჩევდა. კონკურსის მესამე ეტაპზე სულ 58 პიროვნება გადავიდა.

ცენტრალური ბიუჯეტიდან, თანხები დაემატა ქალაქის 2016 წლის ბიუჯეტსაც. ამის შესახებ დადგენილება, საკრებულოს დეპუტატებმა მიიღეს. თავმჯდომარის განმარტებით, ადგილობრივი ბიუჯეტი მილიონ 800 ათასი ლარით გაიზარდა, რაც ქალაქში ინფრასტრუქტურული პროექტების განხორცილებას მოხმარდება.დავით ლომიძის თქმით, რეაბილიტაცია ჩაუტარდება ახალციხის 13 ქუჩას. ცნობილი გახდა, რომ თვითმართველობა ადგილობრივი ბიუჯეტიდან, 19 ათასი ლარის ფარგლებში „სათნოების სახლს“ ინვენტარს შეუძენს.

ახალციხის თემის საკრებულოში რიგით მესამე სხდომა გაიმართა. დეპუტატებმა კენჭი, დღის წესრიგით გათვალისწინებულ ერთ საკითხს უყარეს, რომელიც 2016 წლის ბიუჯეტში ცვლილების შეტანას შეეხო. გამგეობის საფინასო–საბიუჯეტო სამსახურის უფროსის განმარტებით, მიმდინარე წელს ინფარსტრუქტურული პროექტების განსახორციელებლად, ცენტრალური ბიუჯეტიდან, მუნიციპალიტეტისთვის   2 მილიონ 227 ათას ლარზე მეტი გამოიყო, რომელიც გელა ლომიძის თქმით, სარწყავის სისტემებისა და გზების მშენებლობისათვის დაიხარჯება.

თბილისის სააპელაციო სასამართლომ ადიგენის საკრებულოს სარჩელი არ დააკმაყოფილა და ახალციხის რაიონული სასამართლოს გადაწყვეტილება ძალაში დატოვა. მართლმსაჯულების ორგანომ ეს გადაწყვეტილება დღეს, 9 თებერვალს მიიღო. გადაწყვეტილების მიხედვით, ადიგენის საკრებულოს ყოფილი თავმჯდომარე ლევან ლობჯანიძე თანამდებობაზე უნდა აღდგეს, განაცდური 25 000 ლარის ოდენობით აუნაზღაურდეს და მოქმედმა  თავმჯდომარემ, იმედა მღებრიშვილმა თანმდებობა დატოვოს. ადიგენის საკრებულოს თავმჯდომარე იმედა მღებრიშვილი “მეცხრე არხთან” სატელეფონო ინტერვიუში აცხადებს, რომ გადაწყვეტილებას უზენაეს სასამართლოში გაასაჩივრებს. ადიგენის საკრებულომ, სააპელაციო სასამართლოში სარჩელი მას შემდეგ შეიტანა, რაც ახალციხის რაიონულმა სასამართლომ ლევან ლობჯანიძის მოთხოვნა დააკმაყოფილა და მისი თანამდებობაზე აღდგენა, განაცდურის ანაზღაურება და იმედა მღებრიშვილის თავმჯდომარედ, დანიშვნის ოქმის ბათილად ცნობა  მოითხოვა. იმის გამო რომ ადიგენის საკრებულოს იურისტს შესაბამისი კვალიფიკაცია არ ჰქონდა, თვითმმართველობამ სააპელაციო სასამართლოში საქმის განხილვისათვის, თბილისიდან ერთ–ერთი საადვოკატო ბიუროს იურისტი დაიქირავა.

  2016 წლის ერთიანი ეროვნული გამოცდებისათვის რეგისტრაცია 9 თებერვლიდან 15 მარტის ჩათვლით იწარმოებს. რეგისტრაციას აბიტურიენტები შეფასებისა და გამოცდების ეროვნული ცენტრის ვებგვერდზე გაივლიან (www.naec.gov.ge; online.naec.ge) აბიტურიენტთათვის განკუთვნილი ცნობარი დაიბეჭდება გაზეთში “ახალი განათლება”. შეფასებისა და გამოცდების ეროვნულ ცენტრში ამბობენ, რომ წელს მნიშვნელოვანი სიახლეა და ის სამ ეტაპად იწარმოებს. აბიტურიენტებს პირადი მონაცემების შეტანა, საგამოცდო ქალაქისა და ჩასაბარებელი საგნების არჩევა პირველ, ძირითად ეტაპზე, 9 თებერვლიდან 15 მარტამდე მოუწევთ. მათ ამ პერიოდში უნდა მიუთითონ ჩასაბარებელი საგნები – არანაკლებ 4 გამოცდისა (მხოლოდ სახელოვნებო/სასპორტო მიმართულების ფაკულტეტებზე ჩაბარების მსურველებმა -არანაკლებ 3 გამოცდისა, მხოლოდ მართლმადიდებლურ საღვთისმეტყველო უმაღლეს საგანმანათლებლო დაწესებულებაში ან ქართულ ენაში მომზადების პროგრამაზე სწავლის გაგრძელების მსურველებმა – არანაკლებ 1 გამოცდისა). 15 მარტის შემდეგ აბიტურიენტი ვეღარ შეცვლის საგამოცდო ქალაქს, თუმცა 1 ივნისამდე შეეძლება გამოცდის დამატება, საგნის შეცვლა. აბიტურიენტებს წელს პირველად ექნებათ შესაძლებლობა, რომ საგამოცდო ბარათი ნებისმიერი კომპიუტერიდან პირადი გვერდიდან ამობეჭდონ.

„საქართველოს განვითარების ფონდი” ახალციხეში – ორგანიზაციის ოფისი პაატა ბურჭულაძემ, ფონდის დამფუძნებლებთან და წევრებთან ერთად გახსნა. აქ ადგილობრივებს ორგანიზაციაში გაწევრიანება და ფონდის საქმიანობაში მონაწილეობის მიღება შეეძლებათ. ბურჭულაძემ, თანაგუნდელებთან ერთად, ქალაქში ფეხით მსვლელობა მოაწყო, ადგილობრივებს გაესაუბრა და მათი პრობლემები მოისმინა.

სოფელ ურაველს ახალი საბავშვო ბაღი აქვს. შენობა 50 აღსაზრდელზეა გათვლილი და ის  ურაველს, ახალშენს, წყორძასა და ხეოთს მოემსახურება. აქ 12 ადგილობრივია დასაქმებული. დღემდე, სოფელში მხოლოდ ალტერნატიული ბაღი არსებობდა, სადაც ერთი ჯგუფი ფუნქციონირებდა და დღის 2 საათამდე მუშაობდა.   პროექტი ახალციხის მუნიციპალიტეტმა, არასამთავრობო ორგანიზაცია ,,ვორლდ ვიჟენის“ თანადაფინანსებით განახორციელა. შენობის რეაბილიტაციასა და ინვენტარის შეძენას, 83 ათასი ლარი დასჭირდა, აქედან 50 ათასი ლარი მუნიციპალიტეტმა გამოყო, 33 ათასი ლარი კი არასამთავრობო ორგანიზაციამ.

ადიგენში, ყაჩაღობასა და გაუპატიურების მცდელობაში ბრალდებულს, ახალციხის რაიონულმა სასამართლომ აღკვეთ ღონისძიებად პატიმრობა შეუფარდა. შემდეგი სასამართლოს სხდომა, საქმის განხილვისათვის 24 მარტს ჩაინიშნა, სამართალდამცველებმა ვალის მკვიდრი ვიქტორ ლ. 30 იანვარს დააკავეს. იგი წარსულში რამდენჯერმე ნასამართლევია. გამოძიებამ დაადგინა, რომ ბრალდებული ადიგენის რაიონის სოფელ ზემო ენთელის საავტომობილო გზაზე ახალგაზრდა გოგონას თავს დაესხა და დანის გამოყენებით სიცოცხლისათვის და ჯანმრთელობისათვის საშიში ძალადობით და ასევე ძალადობის მუქარით წაართვა საფულე, მობილური ტელეფონი და სხვა პირადი ნივთები, რის შემდეგაც ასევე ძალადობით და ძალადობის მუქარით ჩაიყვანა იქვე არსებულ ხევში და სცადა მისი გაუპატიურება, რის შემდეგაც ბრალდებული შემთხვევის ადგილიდან მიიმალა. სამართალდამცველებმა, ჩატარებული სამძებრო-საგამოძიებო მოქმედებების შედეგად, ვიქტორ ლ. მომხდარიდან რამდენიმე საათში ახალციხის მუნიციპალიტეტის სოფელ სხვილისის მიმდებარე ტერიტორიაზე დააკავეს. პოლიციამ დანაშაულის ჩადენის იარაღი – დანა ნივთმტკიცებად ამოიღო. დაკავებული ჩადენილ დანაშაულს აღიარებს. გამოძიება გაუპატიურების მცდელობისა და ყაჩაღობის ფაქტზე მიმდინარეობს საქართველოს სისხლის სამართლის კოდექსის 19-137-ე მუხლის 1-ლი და 179-ე მუხლის 1-ლი ნაწილით.

შინაგან საქმეთა მინისტრის გიორგი მღებრიშვილის ინიციატივით, 2008 წლის რუსეთ-საქართველოს ომში დაღუპული შსს-ს თანამშრომლების შვილები, დედებთან ერთად, მთის კურორტზე, ბაკურიანში ისვენებენ. დაღუპული პოლიციელების ოჯახის წევრებს ბაკურიანში შსს-ს სამცხე-ჯავახეთის პოლიციის დეპარტამენტის დირექტორი თემურ კალანდაძე და ადგილობრივი სამართალდამცველები დახვდნენ. პოლიციელებმა ბავშვები თოვლმავლებით გაასეირნეს. დაღუპული პოლიციელების შვილები სხვადასხვა შემეცნებით და გასართობ ღონისძიებაშიც მონაწილეობენ. 10 დღის განმავლობაში ისინი სპორტულ სკოლაში სათხილამურო სპორტს დაეუფლებიან. სწავლების დასრულების შემდეგ, მოზარდებს შორის სათხილამურო შეჯიბრი გაიმართება და გამარჯვებულებს შს მინისტრი გიორგი მღებრიშვილი საჩუქრებს გადასცემს.

ადიგენის მუნიციპალიტეტში მომხდარი ყაჩაღობისა და გაუპატიურების მცდელობაში ბრალდებული 34 წლის მამაკაცი სამართალდამცველებმა ცხელ კვალზე დააკავეს. შსს-ს სამცხე-ჯავახეთის პოლიციის დეპარტამენტის დეტექტივების სამმართველოს თანამშრომლებმა, ჩატარებული ოპერატიულ-საგამოძიებო ღონისძიებების შედეგად, წარსულში მრავალჯერ ნასამართლევი 1981 წელს დაბადებული ვიქტორ ლ. გაუპატიურების მცდელობისა და ყაჩაღობის ბრალდებით, ცხელ კვალზე დააკავეს. გამოძიებამ დაადგინა, რომ ბრალდებული ადიგენის რაიონის სოფელ ზემო ენთელის საავტომობილო გზაზე ახალგაზრდა გოგონას თავს დაესხა და დანის გამოყენებით სიცოცხლისათვის და ჯანმრთელობისათვის საშიში ძალადობით და ასევე ძალადობის მუქარით წაართვა საფულე, მობილური ტელეფონი და სხვა პირადი ნივთები, რის შემდეგაც ასევე ძალადობით და ძალადობის მუქარით ჩაიყვანა იქვე არსებულ ხევში და სცადა მისი გაუპატიურება, რის შემდეგაც ბრალდებული შემთხვევის ადგილიდან მიიმალა. სამართალდამცველებმა, ჩატარებული სამძებრო-საგამოძიებო მოქმედებების შედეგად, ვიქტორ ლ. მომხდარიდან რამდენიმე საათში ახალციხის მუნიციპალიტეტის სოფელ სხვილისის მიმდებარე ტერიტორიაზე დააკავეს. პოლიციამ დანაშაულის ჩადენის იარაღი – დანა ნივთმტკიცებად ამოიღო. დაკავებული ჩადენილ დანაშაულს აღიარებს. გამოძიება გაუპატიურების მცდელობისა და ყაჩაღობის ფაქტზე მიმდინარეობს საქართველოს სისხლის სამართლის კოდექსის 19-137-ე მუხლის 1-ლი და 179-ე მუხლის 1-ლი ნაწილით.

ადიგენის მუნიციპალიტეტის სოფელ ფხეროში, ქალის დაყაჩაღებასა და გაუპატიურების მცდელობაში ბრალდებული,  სამართალდამცველებმა ცხელ კვალზე დააკავეს. როგორც “მეცხრე არხს” შსს–ში განუმარტეს, ძიება სისხლის სამართლის კოდექსის 179–ე ყაჩღობისა და 19–137–ე გაუპატიურების მცდელობის მუხლებით მიმდინარეობს. ადიგენის მუნიციპალიტეტის  სოფელ ფხეროში შემთხვევა, 29 იანვრის საღამოს მოხდა.    

,,გასულ წელს, დეპუტატებს ამომრჩეველთან ნაკლები კომუნიკაცია ჰქონდათ“ – ნათქვამია ქალაქ ახალციხის საკრებულოს თავმჯდომარის ანგარიშში, რომელიც დავით ლომიძემ დღეს, საკრებულოში, 2016 წლის პირველ სხდომაზე წარადგინა. ერთი თვის არჩეულმა თავმჯდომარემ პირობა დადო, რომ აღნიშნული სურათი, მიმდინარე წელს შეიცვლება. წარმომადგენლობითი ორგანოს მუშაობის ანგარიშის გარდა, დეპუტატებმა დღეს ცხრა საკითხს უყარეს კენჭი. ერთ–ერთი მათგანი, საკრებულოს უშტატო თანამშრომლებისთვის ხელფასის გაზრდა იყო. ხმათა უმრავლესობით გადაწყდა, რომ მიმდინარე წელს, სამი თანამშრომლის ანაზღაურება 3600 ლარით გაიზრდება.

რაბათის დასახლების მაცხოვრებლებს მეოთხე დღეა წყალი არ მიეწოდებათ. ისინი სასმელ წყალს სხვადასხვა უბნიდან მთელი დღის განმავლობაში ეზიდებიან. ადგილობრივები გაერთიანებული წყალმომარაგების კომპანიას უყურადღებობაში ადანაშაულებენ და ამბობენ,რომ არაერთი შეტყობინების მიუხედავად, კომპანიას პრობლემაზე რეაგირება არ მოუხდენია. საწინააღმდეგოს ამბობენ წყალმომარაგების კომპანიაში. რაბათის დასახლებაში მცხოვრებ მალხაზ თათოშვილის ოჯახს უკვე მეოთხე დღეა წყალი არ მიეწოდება. ამბობს, რომ ძლიერი ყინვების გამო, მილები გაიყინა, რის გამოც სასმელ წყალს სხვადასხვა უბნიდან ეზიდება.