ახალციხეში ოპოზიციური პარტიების მიერ, საარჩევნო სისტემასთან დაკავშირებით მომზადებული საკონსტიტუციო ცვლილებების განხილვა მოეწყო. 12 პოლიტიკური ძალის მიერ შედგენილი  ცვლილებები პროპორციულ არჩევნებს, პროპორციულ–რეგიონულ სიებს გულისხმობს. ,,ნაციონალური მოძრაობის“ წევრმა გიგი წერეთელმა ადგილობრივებს განუმარტა, ხელისუფლებამ მიიღო გადაწყვეტილება, რომ გააუქმოს ამჟამად მოქმედი სისტემა, რომლის მიხედვითაც გარკვეულ რეგიონებში მაჟრიტარული არჩევნები არ ჩატარდება და 5 რეგიონს ერთი დეპუტატი ეყოლება.

საქართველოს სახალხო დამცველი უჩა ნანუაშვილი შეშფოთებას გამოთქვამს 2016 წლის 10 იანვარს, ბორჯომში, 17 წლის არასრულწლოვანის თვითმკვლელობის გამო და უსამძიმრებს გარდაცვლილის ოჯახს. ომბუდსმენის აპარატის ინფორმაციით, საქართველოს შინაგან საქმეთა სამინისტრომ დაიწყო გამოძიება საქართველოს სისხლის სამართლის კოდექსის 115–ე მუხლის საფუძველზე, რაც თვითმკვლელობამდე მიყვანას გულისხმობს. ფაქტთან დაკავშირებით, სახალხო დამცველის აპარატში  საქმის წარმოება დაიწყო. “აღსანიშნავია, რომ სახელმწიფოს არ გააჩნია ბავშვთა თვითმკვლელობის პრევენციის ერთიანი დოკუმენტი. ამდენად, ვერ ხერხდება პრობლემის გამომწვევი მიზეზებისა და რისკ–ფაქტორების შესწავლა და აღნიშნული ფენომენის აღმოსაფხვრელი პრევენციული ზომების მიღება. სახალხო დამცველის აპარატის საქმისწარმოების შედეგებიდან იკვეთება, რომ შესწავლილი საქმეებიდან, არცერთ შემთხვევაში არ მომხდარა სსკ–ს 115–ე მუხლით გათვალისწინებულ ქმედებაზე ბრალდებული პირის იდენტიფიცირება და მის მიმართ სისხლისსამართლებრივი დევნის დაწყება. გაეროს ბავშვის უფლებათა კონვენციის მე–6 მუხლის მეორე პუნქტის შესაბამისად, საქართველოს ეკისრება სიცოცხლის უფლების დაცვის პოზიტიური ვალდებულება. კერძოდ,  მან მაქსიმალურად უნდა უზრუნველყოს ბავშვის სიცოცხლის შენარჩუნება და მისი ჯანსაღი განვითარება” – ნათქვამია სახალხო დამცველის მიერ გავრცელებულ განცხადებაში. სახალხო დამცველი  საქართველოს მთავრობას მოუწოდებს, განსაკუთრებული ყურადღება გაამახვილოს ბავშვთა თვითმკვლელობის გამომწვევი მიზეზების შესწავლაზე და გაატაროს პრევენციული ღონისძიებები აღნიშნულის აღმოსაფხვრელად – დაიწყოს მუშაობა არასრულწლოვნებში სუიციდის პრევენციის პოლიტიკის შესამუშავებლად და უზრუნველყოს ამ პროცესში ექსპერტების, სპეციალისტებისა თუ დაინტერესებული მხარეების ჩართულობა. ასევე, მოუწოდებს შინაგან საქმეთა სამინისტროს, არასრულწლოვანთა თვითმკვლელობის ფაქტებთან დაკავშირებით, განახორციელოს სწრაფი და  ეფექტიანი გამოძიება. საქართველოს სახალხო დამცველი აცხადებს, რომ პასუხისმგებელი ორგანოების მუშაობის ეფექტურობას დააკვირდება. შეგახსენებთ, რომ ბორჯომში 10 იანვარს ღამით, მეთორმეტეკლასელმა ბიჭმა თვითმკვლელობა სცადა. მეგობრის მიერ გამოძახებული სასწრაფო სამედიცინო დახმარების ჯგუფმა იგი თბილისში გადაიყვანა, თუმცა მისი გადარჩენა ვეღარ მოხერხდა.  

ჯავახეთში საავტომობილო გზებზე მოძრაობა ნაწილობრივ აღდგა. საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ინფორმაციით, ამ დროისათვის შეზღუდვებია მხოლოდ როდიონოვკა–ნინოწმინდის გზის მონაკვეთზე, სადაც ყველა სახის ავტოტრანსპორტის გადაადგილება აკრძალულია. მოძრაობა აღდგენილია შემდეგ მიმართულებებზე:  სომხეთის საზღვართან, ახალციხე-ნინოწმინდის საავტომობილო გზაზე და ნინოწმინდა-სომხეთის საზღვარზე. ასევე, ახალქალაქი-კარწახის (თურქეთის რესპუბლიკის საზღვარი) საავტომობილო გზის მონაკვეთზე.

ახალციხეში ტრადიციული საშობაო ალილო მოეწყო. მსვლელობა მაცხოვრის ამაღლების სახელობის ტაძრიდან, დღის პირველი საათზე დაიწყო. ახალციხისა და ტაო–კლარჯეთის მიტროპოლიტმა ეკლესიაში ალილოს მონაწილეები დალოცა და მრევლს შობა მიულოცა. „დღეს საოცარი დღეა, რადგან მაცხოვარი იშვა ბეთლემში და თითოეული ჩვენთაგანის გულებში“–აღნიშნა მეუფე თეოდორემ. მგალობლებთან, სტიქაროსნებთან და მრევლთან ერთად, ახალციხის წმინდა მარინეს, მაცხოვრის ამაღლებისა და  ივლიტის ღვთისმშობლის შობის სახელობის  ტაძრის მღდველმსახურებმა, უფლის შობის დღეს ქალაქი მოილოცეს.

ბაკურიანში ახალგაზრდა სნოუბორდისტი ნუგზარ დიაკონაშვილი გარდაიცვალა. იგი ვარჯიშის დროს ზვავმა მოიყოლა. შემთხვევა 5 იანვარს დღის პირველ საათზე მოხდა,  როგორც ჟურნალისტებთან საუბრისას სნოუბორდის ფედერაციის პრეზიდენტი აცხადებს,  სპორტსმენი ვარჯიშისას „ტატრაპუმის წვერიდან“, გაუკვალავ თოვლში „დიდველზე“ გადადიოდა, რა დროსაც ზვავი ჩამოწვა და ქვეშ მოიყოლა. ლევან მშვილდაძის თქმით, მაშველები ნუგზარ დიაკონაშვილს სამი საათის განმავლობაში ეძებდნენ, თუმცა მისი გადარჩენა ვერ მოხერხდა. ახალგაზრდა სპორტსმენი ბაკურიანის სნოუბორდის გუნდს ხელმძღვანელობდა. იგი საქართველოს მრავალგზის ჩემპიონი იყო. ერთ–ერთი ბოლო წარმატება 2015 წელს მოიპოვა, სადაც სნოუბორდ–კროსში საქართველოს ჩემპიონი გახდა.

მართლმადიდებელი სამყარო დღეს მაცხოვრის შობის ბრწყინვალე დღესასწაულს აღნიშნავს. ამასთან დაკავშირებით ყველა მოქმედ  ტაძრებში საზეიმო ღვთისმსახურება ღამისთევით ჩატარდა. სადღესასწაულო წირვა–ლოცვა აღევლინა ახალციხის მაცხოვრის ამაღლების ტაძარშიც. ღამის თორმეტ საათზე პატრიარქის საშობაო ეპისტოლეს წაკითხვის შემდეგ, მამა დავითვა საზეიმო  წირვა აღავლინა.  სადღესასწაულო ლიტურგიას მორწმუნეები ღამისთევით დაესწრნენ. წმინდა სახარების მიხედვით, უფალი იესო ქრისტე უდიდესი თავმდაბლობის ნიშნად, ბეთლემში, გამოქვაბულში იშვა, სადაც მწყემსები უამინდობისას საქონელს აფარებდნენ. განკაცებული უფლის შობა იქ მყოფ მწყემსებს უფლის ანგელოზებმა ახარეს. პირველად სწორედ მათ იხილეს ყრმა მაცხოვარი. 

სომხურმა სამოციქულო ეკლესიამ, ერთდროულად ორი დიდი დღესასწაული – შობა და ნათლისღება აღნიშნა. ახალციხის, გრიგოლ განმანათლებლის სახელობის ტაძარში სადღესასწაულო წირვა ლოცვა დილის 11:00 საათზე დაიწყო. საზეიმო ლიტურგია ეკლესიის წინამძღვარმა, დიაკონმა თორგომ ვარდანიანმა აღავლინა და მრველს დღესასწაული მიულოცა. წირვის დასრულების შემდეგ, იკურთხა წყალიც და მრევლს დაურიგდა. ნაკურთხ წყალს მომლოცველები მთელი წლის განმავლობაში ინახავენ.

ახალციხის რესურსცენტრმა, მუნიციპალიტეტის წარჩინებული კურსდამთავრებულები ოქროსა და ვერცხლის მედლებით დააჯილდოვა. განათლების სამინისტროსაგან ჯილდო საჯარო და კერძო სკოლების 60-მა ახალგაზრდამ მიიღო. მედლების გადაცემის ცერმონიაში მერიისა და გამგეობის ხელმძღვანელი პირებიც ჩაერთვნენ.

საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ინფორმაციით, რთული მეტეოროლოგიური პირობების – ინტენსიური თოვის, ქარბუქისა და შეზღუდული ხილვადობის გამო, მგზავრთა უსაფრთხოების დაცვის მიზნით, მოძრაობა შემდეგ მიმართულებებზე აიკრძალა: როდიონოვკა-ნინოწმინდის საავტომობილო გზის ერთ–ერთ მონაკვეთზე ყველა სახის ავტოტრანსპორტის მოძრაობა აკრძალულია. ანალოგიური მდგომარეობაა სომხეთის საზღვართან, ახალციხე-ნინოწმინდის საავტომობილო გზაზე და ნინოწმინდა-სომხეთის საზღვარზე. ასევე, ყველა სახის ავტოტრანსპორტის მოძრაობაა აკრძალული ახალქალაქი-კარწახის (თურქეთის რესპუბლიკის საზღვარი) საავტომობილო გზის მონაკვეთზე. საავტომობილო გზების დეპარტამენტის წარმომადგენლები, გზის გაწმენდით სამუშაოებს, საქართველოს მასშტაბით 24 საათის განმავლობაში ინტენსიურ რეჟიმში ახორციელებენ.

საქართველოს საზოგადოებრივი მაუწყებლის კონკურსის – “წლის საუკეთესო” – ნომინაციაში: “წლის ყველაზე მნიშვნელოვანი მოვლენა ახალ ინოვაციებსა და ტექნოლოგიებში” ახალციხელმა გამომგონებლებმა: კარლო ხუციშვილმა და ირაკლი კაპანაძემ გაიმარჯვეს. ირაკლი და კარლო პროექტით, “მულტიკლიმატიზატორი” 2014 -15 წლის ათასწლეულის ინოვაციის კონკურსის (Millennium Innovations Award – MIA) გამარჯვებულები არიან. 2015 წლის აპრილში, მათ მონაწილეობა მიიღეს აშშ-ის კონრადის ფონდის ინოვაციების სამიტში, ნასას კენედის კოსმოსურ ცენტრში. კონკურსს ათასწლეულის გამოწვევის ფონდი (Millennium Challenge Account – Georgia), ამერიკის შეერთებული შტატების საელჩოს დაფინანსებითა და საქართველოს განათლებისა და მეცნიერების სამინისტროსთან პარტნიორობით ახორციელებს.

ახალციხეში მესხეთის ქუჩაზე ხანძარი იყო. ცეცხლი ყოფილი სკოლა–ინტერნატის შენობას მოედო,  როგორც ადგილობრივებმა “მეცხრე არხს“ განუცხადეს, ხანძარი ანთებული ღუმლისგან გაჩნდა. შემთხვევის დროს ოთახში ახალგაზრდა მამაკაცი იმყოფებოდა,  რომელმაც ფეხზე დამწვრობა მიიღო. ადგილობრივების თქმით,  სასაწრაფო დახმარების ბრიგადა გვიან მივიდა, ამიტომ ახალგაზრდა,  სამედიცინო დაწესებულებაში, საპატრულო ეკიპაჟმა გადაიყვანა.

კადრები, რომელიც “მეცხრე არხის” ობიექტივში მოხვდა, მაგრამ მაყურებელს ამ დრომდე არ უნახავს. ჟურნალისტები კურიოზულ სიტუაციებში – მხოლოდ საახალწლო ეთერში.