2015-16 სასწავლო წლის სკოლის გამოცდების განრიგი მე-11 კლასის მოსწავლეებისთვის დამტკიცდა. გამოსაშვებ გამოცდებს ისინი 12–15 ივნისს ჩააბარებენ. გამოცდების განრიგი საგნების მიხედვით ასე გამოიყურება: 12 ივნისი – გეოგრაფია; 13 ივნისი – ბიოლოგია; 14 ივნისი – ფიზიკა და 15 ივნისი – ქიმია. რაც შეეხება პრეტესტს, გამოცდების ეროვნული ცენტრის ინფორმაციით, მიმდინარე წლის 11 ივნისს ჩატარდება.

ახალციხის მუნიციპალიტეტის სიმბოლიკის შესარჩევი კონკურსი ჩაიშალა. საკრებულოს აპარატში განაცხადი არ შევიდა. გერბისა და დროშის შესარჩევად კონკურსი მიმდინარე წლის 1 აპრილს გამოცხადდა. მასში მონაწილეობის მიღება ნებისმიერ მსურველს შეეძლო, გარდა კომისიაში შემავალი პირებისა. კონკურსანტებს საკრებულოს აპარატში ნამუშევრების წარდგენის უფლება 1 აპრილიდან 6 მაისის ჩათვლით, 18:00 საათამდე ჰქონდათ. ადმინისტრაციაში აცხადებენ, რომ კონკურსი ხელახლა გამოცხადდება.  გამარჯვებული ახალციხის გამგეობისგან 1 000 ლარს მიიღებს. თიკო კურტანიძე

ახალციხელი გამომგონებლები საქართველოს პრეზიდენტის ადმინისტრაციის უფროსსა და პირველ ლედის შეხვდნენ. გიორგი აბაშიშვილმა და მაკა ჩიჩუამ ახალგაზრდებს პრეზიდენტის ადმინისტრაციაში უმასპინძლეს. კარლო ხუციშვილის თქმით, მათ პრეზიდენტის მეუღლესა და ადმინისტრაციის უფროსს, პროექტი “Life Saver”-ი გააცნეს, რომლის მეშვეობითაც ისინი ნორჩ გამომგონებელთა და მეცნიერთა მეათე საეთაშორისო ოლიმპიადის – IYIPO 2016–ის ერთ–ერთი გამარჯვებულები გახდნენ. პრეზიდენტის ადმინისტრაციაში მათთან ერთად იმყოფებოდნენ ოლიმპიადის სხვა ოქროსმედალოსნებიც. “ჩვენი პროექტი  გავაცანით და უპილოტო გამნაღმველი სისტემის მუშაობის პრინციპი ავუხსენით. ძალიან მოეწონათ “ – აღნიშნა “მეცხრე არხთან” კარლო ხუციშვილმა. შეხვედრის შემდეგ ახალგაზრდებმა პრეზიდენტის ადმინისტრაცია დაათვალიერეს. შეგახსენებთ, რომ ახალციხელმა გამომგონებლემა კარლო და ანა ხუციშვილებმა და თორნიკე მაზმიშვილმა უპილოტო გამნაღმველი სისტემა “Life Saver”-ი შექმნეს, რომელიც Ipad-ის საშუალებით იმართება და მას სხვა მსგავს მოწყობილობებთან შედარებით უპირატესობები აქვს. აქამდე გამნაღმველი სისტემა, რომელშიც ადამიანები უშუალოდ არ არიან ჩართულები, არ არსებობდა. ახალციხელი ახალგაზრდების გამოგონებამ აღნიშნული პრობლემა გადაჭრა. თიკო კურტანიძე

ლაბორატორიული კვლევების აუცილებლობა სასოფლო–სამეურნეო საქმიანობაში – რა მიმართულებით ტარდება სამცხე–ჯავახეთში გამოვლევები და რამდენად დიდია პროცესში ფერმერების ჩართულობა – თემით “ფერმერის საათის” გადამღები ჯგუფი დაინტერესდა.

გზის ერთ მხარეს მოსახლეობა, მეორე მხარეს კი მძიმეწონიანი მანქანები – ვალის ე.წ.  „მეორე შახტის“ მაცხოვრებლებმა პროტესტის ნიშნად გზა დილიდან გადაკეტეს. ადგილობრივები  600  მეტრიანი მონაკვეთის სასწრაფოდ რეაბილიტაციას ითხოვენ. გზა, სადაც მძიმეწონიანი მანქანები გადაადგილდება, შუა სოფელში გადის. მოსახლეობა ამბობს, რომ  ასფალტისა და ბეტონის ქარხნების მიმართულებით მოძრაობა დილიდან საღამომდე არ წყდება.  შედეგად მთელი დღის განმავლობაში დასახლებაში მტვერია, გარდა ამისა, მშობლები მცირეწლოვან ბავშვებს ეზოში ვერ უშვებენ. აღნიშნული მოთხოვნით მოსახლეობა აქციას პირველად არ მართავს. ამბობენ, რომ ხელისუფლებისგან გზის რეაბილიტაციასთან დაკავშირებით დაპირება, არაერთხელ მიიღეს. თუმცა წლების მანძილზე მათთან მდგომარეობა არ გაუმჯობესებულა. 

მართლმადიდებლურმა ეკლესიამ 24 აპრილს უფლის იერუსალიმში შებრძანების დღე აღნიშნა. მორწმუნეები ბზობას დიდმარხვის მეექვსე კვირას ზეიმობენ. იგი 12 დიდ დღესასწაულთა შორის, პირველი მოძრავი დღესასწაულია, რომელიც ყოველთვის  აღდგომის წინა კვირა დღეს აღინიშნება. ამ დღესთან დაკავშირებით, როგორც სიმბოლო უფლისთვის მიგებებისა, ეკლესიებში ბზა იკურთხება, რომელსაც მრევლი ბარაქისა და სინათლის სიმბოლოდ ოჯახში  ბზობის მომავალ დღესასწაულამდე ინახავს.

კარლო და ანა ხუციშვილები ახალციხელი გამომგონებლები მსოფლიო ოლიმპიადის “იპო 2016” გამარჯვებულები გახდნენ. კარლო და ანა ხუციშვილებისა და თორნიკე მაზმიშვილის ერთობლივმა ნამუშევარმა პირველი ადგილი დაიკავა. უპილოტო საფრენი “Life Saver” -ი მსოფლიოს ახალგაზრდა გამოგონებლების მიერ შექმნილ მოწყობილობებს შორის უდავო ჩემპიონი გახდა. შედეგად, ახალციხელმა გამომგონებლებმა პროექტის ნაწილობრივი დაფინანსება მოიპოვეს. ასევე, მიიღეს ოქროს მედალი და ლეპტოპი. მსოფლიო ოლიმპიადა 22 და 23 აპრილს თბილისში გამართა, სადაც  25 ქვეყნის წარმომადგენლი იყო მოწვეული. უპილოტო საფრენი მოწყობილობა  “Life Saver”–ი  Ipad-ის საშუალებით იმართება და მას სხვა მსგავს მოწყობილობებთან შედარებით უპირატესობები აქვს. აქამდე გამნაღმველი სისტემა, რომელშიც ადამიანები უშუალოდ არ არიან ჩართულები, არ არსებობდა. ახალციხელი ახალგაზრდების გამოგონებამ აღნიშნული პრობლემა გადაჭრა. “Life Saver”-ი “Life Saver”–ი უპილოტო გამნაღმველი სისტემაა. Ipad-ში კოორდინატების მითითების შემდეგ, დრონის გაშვება ხდება. მოწყობილობა კონკრეტულ ადგილებს, სადაც ნაღმია, რუკაზე მონიშნავს. მას გადაადგილება ნებისმიერ სიტუაციაში შეუძლია. შეგახსენებთ, რომ კარლო ხუციშვილი სხვა გამოგონების თანაავტორიცაა. მისმა და ირაკლი კაპანაძის “მულტიკლიმატიზატორმა” მსოფლიოს მოწონება დაიმსახურა, რის საფუძველზეც ისინი აშშ-ს კოსმოსურ ცენტრში, ნასაში იყვნენ მიწვეულნი. თიკო კურტანიძე  

მართლმადიდებელი ეკლესია 23 აპრილს ლაზარეს შაბათს აღნიშნავს. ტაძრებში სადღესასწაულო წირვა-ლოცვა შესრულდა. სახარების მიხედვით, უფალმა მისი მეგობარი, ოთხი დღის მიცვალებული ლაზარე მკვდრეთით აღადგინა. ლაზარეს შაბათი გარდამავალია და ბზობის წინა შაბათს აღინიშნება. დღესასწაულთან დაკავშირებით დიდმარხვის ეს დღე თევზით ხსნილია. ლაზარეს შაბათს სრულიად საქართველო ასევე, ქართული ენის ზეიმს დღესასწაულობს. იოანე ზოსიმეს “ქებაჲ და დიდებაჲ ქართულისა ენისაჲ”-ს მიხედვით, “დამარხულ არს ენაჲ ქართული დღემდე მეორედ მოსვლისა მისისა საწამებლად, რაჲთა ყოველსა ენასა ღმერთმა ამხილოს ამით ენითა. და ესე ენაჲ მძინარე არს დღესამომდე, და სახარებასა შინა ამას ენასა ლაზარე ჰრქჳან!”

კარლენ მანასიანი, მასსა და ,,კადასტრი რეესტრი +“ის დირექტორს შორის მომხდარ ინციდენტს, მხოლოდ პირად საუბრებში იხსენებს. ახალციხის მუნიციპალიტეტის გამგებლის მოადგილე, კადრს მიღმა ამბობს, რომ პირველად დავით გოგოლაძემ დაარტყა. გოგოლაძეს დაზიანებები მარცხენა მხარეს ყელის მიდამოებში, ყურზე და ტუჩზე აქვს. მანასიანს მარჯვენა თვალთან აქვს გაკაწრული. სხეულზე არსებული დაზიანებების შესასწავლად, ექსპერტიზა ორივე მათგანს ჩაუტარდა. ,,კადასტრი რეესტრი +“ დირექტორი ირწმუნება, რომ ახალციხის მუნიციპალიტეტის გამგებლის მოადგილემ მას სიტყვიერი და ფიზიკური შეურაცხყოფა მიაყენა.

სოფელ მუსხში 1 200 მეტრიანი გზის სარეაბილიტაციო სამუშაოები დაიწყო. ახალციხის გამგეობის ინფორმაციით, პროექტი რეგიონული განვითარების ფონდიდან ფინანსდება. ამ ეტაპზე მიმდინარეობს გრუნტის დამუშავება, მიწის ვაკისის მოშანდაკება მექანიზებული წესით, შემასწორებელი ფენის მოწყობა ქვიშა-ხრეშოვანი ნარევით. პროექტით გათვალისწინებულია, 10 სმ სისქის საფუძვლის მოწყობა ქვიშა-ღორღოვანი ფენით, თხევადი ბიტუმის და 5 სმ სისქის ასფალტო-ბეტონის დასხმა , 3 სმ სისქის წვრილმარცვლოვანი ბეტონის დაგება. ასწევე, იგეგმება გზიდან ეზოების შესასვლელამდე მიერთებები და წყალგამშვები მილების მოწყობა. მუსხში წლების განმავლობაში, სოფლამდე მისასვლელი გზა დაზიანებული იყო. ადგილობროვებს გადაადგილება უჭირდათ, ამიტომ ისინი ადგილობრივი ხელისუფლების წარმომადგენლებისაგან გზის რეაბილიტაციას მუდმივად მოითხოვდნენ. 1200 მეტრიანი გზის მონაკვეთის რეაბილიტაცია, 2016 წლისათვის დასრულდება. პროექტის გაგრძელება მომავალ წელსაც იგეგმება.  

უნწელები ხელისუფლებას უყურადღებობაში ადანაშულებენ. ადგილობრივების თქმით, თვითმმართველობა მათი პრობლემებით არ ინტერესდება და სოფლის მოსახლეობა მხოლოდ არჩევნების წინ ხმების მისაღებად ახსენდება.

თანამდროვე ჟურნალისტიკის განვითარების პროგრამა დასრულდა. დასკვნითი შეხვედრა 17 აპრილს გაიმართა. ტრენინგ–კურსები, რომელიც სამოქალაქო ჩართულობის ცენტრმა განახორციელა,  ოთხი დღის განმავლობაში გაგრძელდა და მასში მონაწილეობა ათმა დამწყებმა და მოქმედმა ჟურნალისტმა მიიღო.  

18 აპრილი ისტორიული ძეგლების საერთაშორისო დღეა. დღესასწაულს ახალციხის მუნიციპალიტეტიც შეუერთდა. გამგეობის ადმინისტრაციის ინფორმციით,  კულტურის სამსახურმა საჯარო სკოლის მოსწავლეებთან ერთად, ისტორიული ძეგლების მიმდებარე ტერიტორიაზე დასუფთავების აქცია მოაწყეს. მასში მონაწილეობა გურკელისა და მინაძის საჯარო სკოლების 30-მდე მოსწავლემ მიიღო. ახალგაზრდებმა ღონისძიების ორგანიზატორებთან ერთად, ბიეთისა და ოხერის წმინდა გიორგის სახელობის ტაძრების მიმდებარე ტერიტორიები საყოფაცხოვრებო ნარჩენებისგან გაწმინდეს. ძეგლებისა და ისტორიული ადგილების საერთაშორისო დღე 1983 წელს იუნესკოსა და იკომოსის გადაწყვეტილებით დაწესდა და მას მთელ მსოფლიოში, 1984 წლიდან აღნიშნავენ.

ახალციხეში ინფრასრუქტურული პროექტები მიმდინარეობს. მებაღიშვილის, ანდრია პირველწოდებულისა და აბის დასახლების ორი ქუჩის რეაბილიტაცია რეგიონული განვითარების ფონდიდან ფინანსდება. ხოლო მესხეთის, გორგასლისა და წერეთლის ქუჩების შეკეთებას ახალციხის მუნიციპალიტეტის მერიის ბიუჯეტი უზრუნველყოფს. პროექტი საავტომობილო გზების შეკეთებასთან ერთად, სასმელი წყლის და კანალიზაციის გაყვანილობის გამოცვლასაც ითვალისწინებს. გარდა ამისა, დამონტაჟდება გარე განათებებიც. 

ადიგენი–მოხეს 12 კილომეტრიანი გზის მშენებლობა წელს დასრულდება. ადიგენის ადმინისტრაციის ინფორმაციით, ამ დროისთვის მიმდინარეობს ასფალტის საფარის დაგება, ეწყობა გაბიონები, მილხიდები და უსაფრთხოების ბარიერები. ამასთან ერთად დასახლებულ პუნქტებში თანამედროვე სტანდარტების მოსაცდელები შენდება. მიმდინარე სამუშაოები ადიგენის მუნიციპალიტეტის გამგებელმა ზაქარია ენდელაძემ და გამგებლის მოადგილემ მინდია ჯელიამ ადგილზე მოინახულეს. შეგახსენებთ, რომ პროექტი 2015 წელს დაიწყო და მიმდინარე წელს დასრულდება. დასრულებული პროექტი კი გაამარტივებს გადაადგილებას და შეამცირებს მგზავრობის დროს. თიკო კურტანიძე

 ახალციხეში ტიტები გაიშალა. მერაბ კოსტავას ქუჩაზე გამწვანების ადგილზე ათეულობით ტიტა ყვავის. იმისთვის, რომ ადგილობრივებს ნერგები არ დაეზიანებინათ, თითქმის ერთი თვის განმავლობაში ტერიტორია ლენტებით იყო შემოსაზღვრული. ფოტოებს ახალციხის მუნიციპალიტეტის მერიის facebook- გვერდი ავრცელებს.

იარაღის უკანონო შეძენა–შენახვაში მსჯავრდებულის გიორგი კაპანაძის ცემის ფაქტზე პროკურატურამ გამოძიება შეწყვიტა. ადვოკატი ირაკლი ბარძიმაძე მისი დაცვის ქვეშ მყოფის ცემაში სამცხე-ჯავახეთის პოლიციის დეპარტამენტის დირექტორს თეიმურაზ კალანდაძეს და მის ყოფილ მოადგილეს ალექსანდრე კენჭოშვილს ადანაშაულებს. მისივე მოთხოვნით, პროკურატურამ საქმეზე ძიება 333-ე მუხლით დაიწყო, რაც უფლებამოსილების გადამეტებას გულისხმობს, თუმცა პროკურატურამ გამოძიება მალევე  შეწყვიტა. “პროკურატურამ გამოძიება შეწყვიტა ისე, რომ ჩვენ არც გვაცნობა მიზეზი. პროკურატურიდან საქმე გამოვითხოვეთ. გავეცნობით და ვფიქრობ, რომ გავასაჩივრებთ” – აცხადებს ირაკლი ბარძიმაძე. შეგახსენებთ, რომ ახალციხის რაიონულმა სასამართლომ იარაღის უკანონოდ შეძენა-შენახვისათვის, გიორგი კაპანაძეს 6 წლითა და 6 თვით თავისუფლების აღკვეთა მიუსაჯა. სააპელაციო სასამართლომ კი სასჯელის ვადა ორი წლით შეუმცირა. გიორგი კაპანაძის საქმე ირაკლი  ბარძიმაძემ უზენაეს სასამართლოში გაასაჩივრა. ადვოკატი პატიმრობის მოხსნას მოითხოვს. გიორგი კაპანაძე, ორ მეგობართან ერთად, 2014 წლის 23 ივლისს, სამცხე-ჯავახეთის სამხარეო მთავარი სამმართველოს თანამშრომლებმა, ახალციხის მუნიციპალიტეტის სოფელ სხვილისში დააკავეს. თუმცა მისი ორივე მეგობარი ადმინისტრაციული სამართალდარღვევის ოქმის შედგენის შემდეგ მალევე გაათავისუფლეს. კაპანაძეს კი ბრალი საქართველოს სისხლის სამართლის კოდექსის 236-ე მუხლის მეორე ნაწილით წარუდგინეს. თიკო კურტანიძე

ახალცხის დემოკრატიული ჩართულობის ცენტრში „ახალგაზრდები მდგრადი განვითარების მიზნებისათვის Youth For SDGs“ ფარგლებში სემინარი გაიმართა. შეხვედრას ახალგაზრდობის განვითარების ცენტრ – XXI–სა და საქართველოს ახალგაზრდების განვითარებისა და განათლების ასოციაციის (GYDEA) წარმომადგენლები გაუძღვნენ. ღონისძიების მიზანს ახალგაზრდებში ცნობიერების ამაღლება წარმოადგენდა. ტრენერები მოსწავლეებს ესაუბრნენ თუ რას ნიშნავს იყო საქართველოს ახალგაზრდობის წარმომადგენელი გაეროში, აგრეთვე რას საქმიანობს გაერო ეროვნულ და საერთაშორისო დონეებზე და რა არის მდგრადი განვითარების მიზნები.

რომანოვების სასახლის რესტავრაცია/კონსერვაციის პოექტის მომზადებაში მაღალი კვალიფიკაციის მქონე სპეციალისტები ჩაერთვებიან. რესტავრაციის შემდეგ დაცული იქნება ობიექტის ძეგლის სტატუსი – აღნიშნულის თაობაზე განცხადებას საპარტნიორო ფონდი ავრცელებს. განცხადებაში ნათქვამია, რომ ბორჯომ-ლიკანის ტერიტირიაზე მდებარე რომანოვების სასახლე და ყოფილი სამთავრობო რეზიდენცია განვითარებისთვის და სამართავად საპარტნიორო ფონდს ეკონომიკის სამინისტრომ 25 წლიანი მართვის უფლებით გადასცა. ფონდის ინფორმაციით, პროექტის განხორციელების პროცესი იქნება ღია და გამჭვირვალე. რაც შეეხება “საყდრისის დაცვის საზოგადოებრივი კომიტეტის” მოთხოვნას, რომანოვების სასახლე სამართავად  ეროვნულ მუზეუმს გადაეცეს, ფონდის შეფასებით, ეს საკითხი საპარტნიორო ფონდის კომპეტენციას სცილდება. მათივე განცხადებით, საპარტნიორო ფონდის აღმასრულებელი დირექტორი დავით საგანელიძე მზად არის ბორჯომ–ლიკანის ტერიტორიაზე მდებარე რომანოვების სასახლესთან დაკავშირებული ყველა მნიშვნელოვანი საკითხი დარგის სპეციალისტებთან და დაინტერესებულ ორგანიზაციებთან განიხილოს.

მართლმადიდებელი ეკლესია 7 აპრილს ყოვლადწმინდა ღვთისმშობლის ხარების დღესასწაულს აღნიშნავს. რაბათის წმინდა მარინეს სახელობის ეკლესიაში სადღესასწაულო ღვთისმსახურება ახალციხისა და ტაო–კლარჯეთის მიტროპოლიტმა შეასრულა. ხარება ერთ-ერთი უდიდესი საუფლო დღესასწაულია. ამ დღეს ყოვლადწმინდა მარიამთან ერთად მთელ კაცობრიობას ეუწყა, რომ ღმერთმა ადამიანი სიკვდილისა და ცოდვის სამუდამო ტყვეობისგან იხსნა.