მერის სტიპენდიანტები მათ ანგარიშზე დეკემბრის თვის 100 ლარის ჩარიცხვას ელოდებიან. სამცხე–ჯავახეთის სახელმწიფო უნივერსიტეტისა და პროფესიული კოლეჯის – ,,ოპიზარის“ 12 სტუდენტმა  ოქტომბრისა და ნოემბრის სტიპენდია უკვე აიღო. თვითმმართველობა დაპირდა, რომ ამჯერად ისინი ხუთი თვის სტიპენდიას მიიღებენ. მერის პირველი სტიპენდიანტები ამბობენ, რომ თავის დროზე მერია მათაც სემესტრის სტიპენდიას დაპირდა, თუმცა მხოლოდ ორი თვის მიიღეს.

მაღალმთიანის სტატუსის მქონე დასახლებები სამცხე–ჯავახეთში და მასთან დაკავშირებული პრობლემები– სხვილისის მოსახლეობა სტატუსის მინიჭების გამო, სოფლის ორად გაყოფას აპროტესტებს. სხვილისის მოსახლეობა სოფლის ორად გაყოფას  აპროტესტებს. მაღალმთიანის სტატუსი ქვემო სხვილისს მიენიჭა, ზემო სხვილისი კი სტატუსისა და შესაბამისი შეღავათების გარეშე დარჩა. ადგილობრივებისთვის გაუგებარია, რა კრიტერიუმით გაიყო სოფელი. 

ქსელის სარეაბილიტაციო სამუშაოების გამო, ახალქალაქის ნაწილსა და მიმდებარე სოფლებს ელექტროენერგიის მიწოდება შეეზღუდება. “ენერგო-პრო ჯორჯიას” ცნობით, ქსელის სარეაბილიტაციო სამუშაოების გამო, 29 იანვარს, 12:00 საათიდან 15:00 საათამდე ელექტროენერგიის მიწოდება შეეზღუდება 3460 აბონენტს ახალქალაქის ნაწილსა და მიმდებარე სოფლებში; ხოლო 15:00 საათიდან 18:00 საათამდე 7050 აბონენტს ახალქალაქში მთლიანად და მის მიმდებარე სოფლებში. “სარეაბილიტაციო სამუშაოების შედეგად მნიშვნელოვნად უმჯობესდება ქსელის ინფრასტრუქტურა და ელექტროენერგიის მიწოდების ხარისხი“, – ნათქვამია “ენერგო-პრო ჯორჯიას” მიერ გავრცელებულ ინფორმაციაში.

საქართველოში დოლართან მიმართებაში ლარის გაუფასურების ისტორიული მაქსიმუმი დაფიქსირდა. ეროვნული ბანკის ბოლო მონაცემებით, ეროვნული ვალუტის ოფიციალური გაცვლითი კურსი 2,50 თეთრს შეადგენს. ლარი, ბოლო რამდენიმე დღის განმავლობაში, დოლართან მიმართებაში რამდენიმე ერთეულით გაუფასურდა. მცურავი კურსის მიზეზებზე საუბრისას, ექსპერტებს სხვადასხვა არგუმენტი აქვთ.

ახალციხის თემის საკრებულომ, მუნიციპალიტეტის გერბისა და დროშის პროექტის შესარჩევი კონკურსის დებულება დაამტკიცა. წარმომადგენლობითი ორგანოს იურიდიული კომისიის თავმჯდომარე განმარტავს, რომ რამდენიმე დღეში შვიდკაციანი სამუშაო ჯგუფი შეიქმნება და კონკურსს გამოცხადებენ. საკრებულოს სხდომაზე, დეპუტატებმა, ბიუჯეტიდან სოციალური დახმარების გაცემის წესში ცვლილებების შეტანაზეც იმსჯელეს. დღესვე, გამგეობის საფინანსო–საბიუჯეტო სამსახურის უფროსმა, 2015 წლის ბიუჯეტის შესრულების ანგარიშიც წარმოადგინა, გელა ლომიძის თქმით, ხარჯვით ნაწილში ბიუჯეტის 88 პროცენტი შესრულებულია, დარჩენილი 12 პროცენტი კი გარდამავალი პროექტებია.

„პატარა და ლამაზი კუთხე“– ასე ჰქვია პროექტს, რომლის ფარგლებშიც  ნინოწმინდის სოფელ ეშტიის საჯარო სკოლის მოსწავლეები ახალციხის სამხატვრო სკოლას ესტუმრნენ. ახალგაზრდები სხვადასხვა სუვენირის დამზადების წესს გაეცნენ და პრაქტიკული გამოცდილებაც მიიღეს. ორი საგანმანათლებლო დაწესებულების პარტნიორობა,  სამოქალაქო განათლების პროგრამა „ მომავლის თაობის“ ფარგლებში მოეწყო, რომელსაც ორგანიზაცია PH Initenational–ი აშშ საერთაშორისო განვითარების სააგენტოს (USAID) დაფინანსებით ახორციელებს.

როგორ მუშაობს სახალხო დამცველის აპარატი, რა გზით არის შესაძლებელი მასთან დაკავშირება, რა საკითხებზე უნდა მიმართო აპარატს და რაზე მახვილდება ყურადღება?– ამ და სხვა მსგავს საკითხებზე არასამთვრობო ორგანიზაცია ,,ადამიანი, კანონი, თავისუფლების“ ახალგაზრდული საკრებულოს წევრებს სახალხო დამცველის აპარატის წარმომადგენელი  გულო კოხოძე ესაუბრა. დამამთავრებელი კლასის 15–მდე მოსწავლეს ინფორმაცია განსაკუთრებით გენდერისა  და არასრულწლოვანთა ქორწინების შესახებ დააინტერესდათ. შეხვედრა ახალციხის დემოკრატიული ჩართულობის ცენტში გაიმართა. საინფორმაციო ხასიათის შეხვედრის მიზანს, სახალხო დამცველის აპარატის შესახებ ახალგაზრდების ინფორმირება წარმოადგენდა.

27 იანვარს, მართლმადიდებელი ეკლესია წმინდა ნინოს ხსენების დღეს აღნიშნავს. დღესასწაულთან დაკავშირებით, ქრისტიანულ ტაძრებში წირვა აღევლინა. რაბათის წმინდა მარინეს სახელობის ეკლესიაში ღვთისმსახურება მამა გიორგიმ აღასრულა. ქადაგებისას, მრევლს წმინდა ნინოს შესახებ ესაუბრა და აღნიშნა, რომ ისტორიული კვლევების მიხედვით, ქრისტიანობა საქართველოში პირველ საუკუნეში შემოვიდა, თუმცა დროთა განმავლობაში მრევლი შემცირდა და გაიზარდა კერპთაყვანისმცემელთა რიცხვი. სწორედ ამიტომ, მეოთხე საუკუნეში, წმინდა ნინო უფალმა საქართველოში მოავლინა, რისი შედეგიცაა ის, რომ 326 წელს ქრისტიანობა სახელმწიფო რელიგიად გამოცხადდა.

    გრიპის ვირუსის გავრცელების პრევენციისა და უამინდობასთან დაკავშირებით, საქართველოს 400–მდე სკოლებში სასწავლო პროცესი, 3 დღით შეწყდა. აქედან, 195 სასწავლო დაწესებულება, ვირუსის გავრცელების თავიდან აცილების მიზნით დაიხურა. ამ მიზეზით, სწავლა შეწყდა სამცხე–ჯავახეთის 39 საჯარო სკოლაში. ახალციხის მუნიციპალიტეტში ანდრიაწმინიდის, გურკელის, საძელისა და დიდი პამაჯის საჯარო სკოლებში, ბორჯომის მუნიციპალიტეტში კი მხოლოდ ბალანთას საჯარო სკოლაში. ნინოწმინიდის მუნიციპალიტეტის 12 და ახალქალაქის მუნიციპალიტეტის  22 სასწავლო დაწესებულებაში. განათლებისა და მეცნიერების სამინისტრომ ეს გადაწყვეტილება დაავადებათა კონტროლის ეროვნული ცენტრიდან მიღებული რეკომენდაციების საფუძველზე მიიღო.  სასწავლო პორცესი  იმ კონკრეტულ სკოლებში შეწყდა, სადაც გაცდენების რაოდენობა 20%-ს აღემატება. თუმცა, გაცდენილი საათები შაბათი დღეების ხარჯზე ანაზღაურდება. განათლებისა და მეცნიერების სამინისტრო სკოლებს მოუწოდებს, დაიცვან ჯანდაცვის საერთაშორისო ორგანიზაციისა და საქართველოს დაავადებათა კონტროლის ეროვნული ცენტრის რეკომენდაციები, რომელიც ძირითადად პრევენციულ ღონისძიებებს უკავშირდება. კერძოდ, სკოლაში არ დაიშვას პირი, რომელსაც დაავადების ნიშნები აქვს, გაძლიერდეს შენობის სველი წესით დამუშავება, მერხებისა და იატაკების გაწმენდა შესაბამისი ხსნარებით, განიავდეს საკლასო ოთახები ყოველ შესვენებაზე, მაქსიმალურად მოხდეს პირადი ჰიგიენის, განსაკუთრებით ხელის დაბანის რეჟიმის დაცვა და ა.შ.

     ,,საერთაშორისო გამჭვირვალობა – საქართველომ” კვლევა სამხარეო ადმინისტრაციებში 2015 წელს გაცემული პრემიებისა და სახელფასო დანამატების შესახებ გამოაქვეყნა. შედეგების მიხედვით, გასულ წელს, პრემიებსა და დანამატებში 1 114 928.69 ლარი გაიცა, მათ შორის პრემია – 463 817.5 ლარი, სახელფასო დანამატი კი – 680 111.19 ლარი. კვლევაში აღნიშნულია, რომ 2015 წლის განმავლობაში სახელფასო დანამატი ყველა სამხარეო ადმინისტრაციაში ყოველთვიურად გაიცემოდა. ასევე ნათქვამია ისიც, რომ 2012-2014 წლებთან შედარებით, შემცირებულია პრემიების გაცემის სიხშირე და ოდენობა, თუმცა 2015 წელს მნიშვნელოვნად არის გაზრდილი სახელფასო დანამატის გაცემის მაჩვენებელი. სამცხე–ჯავახეთში უფრო მეტი პრემია გაიცა, ვიდრე დანამატი. ,,საერთაშორისო გამჭვირვალობა – საქართველოს” ინფორმაციით, სამცხე–ჯავახეთის გუბერნატორის ადმინისტრაციაში პრემიის რაოდენობამ 43,690 ლარი შეადგინა, დანამატმა კი – 35,400. ჯამში, პრემიებსა და დანამატებზე 2015 წელს 79.090 ლარი გაიცა.

ადიგენის მუნიციპალიტეტის გამგეობის პირველმა პირებმა სოფელ ხარჯამში ხანძრის შედეგად დაზარალებული გოჩა მორჩიაშვილის საცხოვრებელი სახლი მოინახულეს. შემთხვევის ადგილზე იმყოფებოდა ზარალის დამთვლელი კომისიაც. ადიგენის ადმინისტრაციის ინფორმაციით, ზიანის დადგენის შემდეგ ადგილობრივი ხელისუფლება დახმარების გაწევის შესახებ იმსჯელებს.   შეგახსენებთ, რომ საცხოვრებელ სახლს ცეცხლი 25 იანვარს დილის საათებში გაუჩნდა, რა დროსაც ოჯახის წევრები სახლში არ იმყოფებოდნენ. შემთხვევას მსხვერპლი არ მოჰყოლია.

სამცხე–ჯავახეთისა და შირაქის ოლქში ტურისტული პოტენციალის განვითარებისათვის ახალი პროექტი იწყება. მისი პრეზენტაცია დღეს ახალციხის დემოკრატიული ჩართულობის ცენტრში მოეწყო. პროექტის მიხედვით,  საზღვრისპირა რეგიონებში 20 ახალგაზრდა შეირჩევა, რომლებიც  საერთაშორის ბანაკის ფარგლებში, ორი რეგიონის, გეოგრაფიის, ისტორიისა და  ტურისტული პოტენციალის შესახებ ცოდნას გაიღრმავებენ და  მოწვეულ ექსპერტებთან ერთად, ტურისტული სახელმძღვნალოების, რუკებისა და მარშუტების შედგენაში მონაწილეობას მიიღებენ.

აბასთუმანში პირველი მაღალი კლასის სასტუმროს პროექტზე მუშაობენ. საპარტნიორო ფონდის ცნობით,  კომპანია „რედიქს ჯგუფთან“ ერთად,   4–ვარსკვლავიანი სასტუმრო დაბა აბასთუმანში, აღობილის დასახლებაში აშენდება. 160 ნომრიანი სასტუმრო მოიცავს კაფე-რესტორანს, საკონფერენციო დარბაზს, შეხვედრების ოთახს, აუზს, ბარსა და კლუბს, ფიტნეს კლუბსა და სპას. მშენებლობის დაწყების სავარაუდო თარიღი 2016 წლის გაზაფხულია, სასტუმროს მშენებლობა 2018 წელს დასრულდება. პროექტის საინვესტიციო მოცულობა კი 26 მლნ აშშ დოლარია. როგორც ფონდის საინვესტიციო დეპარტამენტის დირექტორი გიორგი ჩერქეზიშვილი აღნიშნავს, აბასთუმანში, რომელიც ერთ-ერთი სტრატეგიული საკურორტო დასახლებაა, დღესდღეისობით მხოლოდ საოჯახო ტიპის რამდენიმე სასტუმრო ფუნქციონირებს. მისივე თქმით, აბასთუმანში არსებობს მაღალი კლასის სასტუმროზე მოთხოვნა და ეს პროექტი ტურისტების რაოდენობასაც გაზრდის. სააქციო საზოგადოება საპარტნიორო ფონდი საქართველოს მთავრობამ 2011 წელს დააარსა. სახელმწიფო ფლობს ფონდის 100 პროცენტს. საპარტნიორო ფონდის აქტივები 5 მილიარდ ლარს აჭარბებს. ფონდის საკუთრებაშია „საქართველოს რკინიგზის“, „საქართველოს ნავთობისა და გაზის კორპორაციის“, „საქართველოს სახელმწიფო ელექტროსისტემის“, ელექტროსისტემების კომერციული ოპერატორისა“ და ნაწილობრივ „თელასის“ აქციები. ამჟამად, საპარტნიორო ფონდის დირექტორი საპარლამენტო უმრავლესობის ყოფილი ლიდერი დავით საგანელიძეა. რაც შეეხება რედიქს ჯგუფს, კომპანია საქართველოს უძრავი ქონების ბაზარზე 2007 წლიდან არის. 2008 წლიდან კომპანია ახალი, განსხვავებული ფუნქციური დანიშნულების ობიექტების მართვასა და განვითარებას ითავსებს. ჯგუფმა განახორციელა ინვესტიცია სიღნაღსა და ბათუმში  (სასტუმრო „კაბადონი“ და აპარტ-ოტელი „ლე პორტი“). ამჟამად ჯგუფის მიმდინარე პროექტების პორტფოლიო მოიცავს თბილისში სასტუმრო ჰილტონის მშენებლობას ჭავჭავაძის გამზირზე (გაიხსნება 2017 წელს) და A კლასის საოფისე უძრავი ქონების მშენებლობას ლეონიძის ქუჩაზე (გაიხსნება 2016 წლის ზაფხულში).

ადიგენის მუნიციპალიტეტის სოფელ წახანში,  უკანონოდ მოქმედი სახერხი სააქმრო აღმოაჩინეს. გარემოსდაცვითი ზედამხედველობის დეპარტამენტის სამცხე-ჯავახეთის სამმართველოს თანამშრომლებმა დაადგინეს, რომ საამქროში არსებული მორი უკანონოდ იყო მოპოვებული. სახერხი–საამქრო დემონტაჟის შემდეგ ფინანსთა სამინისტროს მომსახურების სააგენტოში გადაიტანეს. გარემოსდაცვითი ზედამხედველობის დეპარტამენტის ინფორმაციით, სამართალდარღვევის ფაქტი დაფიქსირდა ბორჯომის მუნიციპალიტეტის სოფელ ანდეზიტშიც, სადაც რეგისტრირებული სახერხი საამქროს მხრიდან არ იყო დაცული რეგლამენტით გათვალისწინებული პირობები. კერძოდ, სახერხი საამქრო არ იყო შემოღობილი და არ გააჩნდა სანარჩენე ორმო. ხე-ტყის უკანონო მოპოვებისა და ტრანსპორტირების ფაქტები გამოვლინდა ბორჯომსა და სოფელ ანდეზიტში. სამცხე-ჯავახეთის სამმართველოს თანამშრომლებმა უკანონოდ მპოვებული მორისა და ფიცრის გადატანის მცდელობა აღკვეთეს. აღნიშნული ავტომანქანები დაილუქა. გარდა ამისა, გარემოსდაცვითი ზედამხედველობის თანამშრომლებმა ხე-ტყის უკანონო მოპოვების 4 ფაქტი გამოავლინეს. ბორჯომის მუნიციპალიტეტის სოფელ მზეთამზეში, ტაძრისსა (2 ფაქტი) და საკირეში ნანახი იქნა უკანონოდ მოპოვებული მორები. სამართალდამრღვევების ვინაობა ამ ეტაპზე უცნობია. შედგენილია შესაბამისი აქტები.    

ხერთვისის მკვიდრი კახა გელიაშვილი პროკურატურას მიმართავს და მის საქმეზე გამოძიების დაწყებას მოითხოვს.  ამბობს, რომ დაზარალებულია და ამის სამართლებრივად დამტკიცებას, 9 თვეა ცდილობს.

    23 იანვარს, სომხეთის სამოციქულო ეკლესია, ქრისტიანობისთვის წამებული სურბ სარგის მხედართმთავრის, მისი ვაჟის – მარტიროსისა და მათი 14 თანამებრძოლის ხსენების დღეს აღნიშნავს. სომეხთა კათალიკოსის ინიციატივით, სარგის მხედართმთავრის დღესასწაული, ახალგაზრდების კურთხევის დღედაა გამოცხადებული. სურბ სარგისი სიყვარულის მფარველად მიიჩნევა. ხალხური ტრადიციის თანახმად, დღესასწაულის დადგომამდე, ახალგაზრდები მარილიან კვერებს ჭამენ, მათ სჯერათ, რომ ღამე სასიძო ან საპატარძლო დასიზმრებათ. დღესასწაული მოძრავია.    

ახალციხის თემის გაერთიანების 12 ბაგა–ბაღში სასწავლო პროცესი 25 იანვრამდე გადაიდო. სკოლამდელი აღზრდის დაწესებულებათა გაერთიანებაში, მიზეზად იმას ასახელებენ, რომ ვირუსული ინფექციების პრევენციის მიზნით, შენობებისა და ინვენტარის დაქლორვა მიმდინარეობს. მუნიციპალიტეტის მსგავსად, ვირუსების სეზონს მომზადებული ხვდებიან ქალაქ ახალციხის საბავშვო–ბაღებშიც. სკოლამდელი აღზრდის დაწესებულებათა გაერთიანების დირექტორის თქმით, მათთან კონტროლი გამკაცრდა. ბაღში მისულ ბავშვს ექთანი ამოწმებს, გრიპის რომელიმე სიმპტომის არსებობის შემთხვევაში, უკან აბრუნებენ.

       ადიგენის მუნიციპალიტეტის მოსახლეობას ელექტროენერგია დღეს, 11:00 საათიდან არ მიეწოდება. ,,ენერგო–პრო ჯორჯიას” სამხრეთ საქართველოს ფილიალის საზოგადოებასთან ურთიერთობის სამსახურში დენის გათიშვის მიზეზად, გეგმიურ სამუშაოებს ასახელებენ. გიორგი ბალახაშვილის თქმით, ელექტროენერგიის მიწოდება 5 000 აბონენტს, დღეს, 17:00 საათზე აღუდგება.

რაბათში, კულტურული მემკვიდრეობის ძეგლის, ისტორიული აბანოს გაწმენდითი სამუშაოები დაიწყო. 6 ადამიანი კომპლექსს, ჩახერგილობისა და ნაშალისგან წმენდს. შენობის დიდი ნაწილი, მამაკაცთა და ქალთა აუზები და ოთახები მიწითაა ამოვსებული. გაწმენდითი სამუშაოები არქეოლოგის მეთვალყურეობის ქვეშ ხორციელდება.   ეროვნული მნიშვნელობის კატეგორიის ძეგლის გაწმენდითი სამუშაოების ჩასატარებლად, ახალციხის მერიამ ტენდერი 1 დეკემბერს, 34 ათას ლარზე გამოაცხადა. მასში მონაწილეობა მხოლოდ ერთმა პრეტენდენტმა მიიღო და სამუშაოების შესრულებაც მას, ააიპ ,,ჭულეს“ დაეკისრა. მას ტერიტორიის გაწმენდისთვის 4თვიანი ვადა აქვს.

ბორჯომის საკრებულოს დეპუტატი, ,,ლეიბორისტული პარტიის“ წევრი დაკითხვაზე დღეს დაიბარეს. გიორგი გიუაშვილი სამცხე–ჯავახეთის საოლქო პროკურატურაში მისვლას, ბრიფინგის გამართვასა და ჟურნალისტებთან შეხვდრას აპირებდა, თუმცა როგორც ის ამბობს, დაკითხვამდე ცოტა ხნით ადრე დაურეკეს და უთხრეს, რომ მასთან გასაუბრება დღეს აღარ შედგებოდა. რა საკითხზე მოუწევს საუბარი პროკურატურაში – ამის შესახებ დეპუტატი დეტალურ ინფორმაციას არ ფლობს, თუმცა ამბობს, რომ საქმე 2013 წელს,  გამგებლის მოადგილის პოსტზე მუშაობის პერიოდს ეხება. მისივე ინფორმაციით, პროკურატურამ, სისხლის სამართლის საქმე, სახელმწიფო უსაფრთხოების სამსახურის მიმართვის საფუძველზე აღძრა.  გიუაშვილი აღნიშნულს, მის პოლიტიკურ საქმიანობას უკავშირებს, რადგან 2016 წლის საპარლამენტო არჩევნებში მონაწილეობის მიღებას აპირებს. იგი ბორჯომის  ,,ლეიბორისტული პარტიის“ მაჟორიტარობის კანდიდატი იქნება.