15 ივნისს, 11:00სთ- დან 17:00სთ-მდე, თბილისიდან მოწვეული „ბავშვთა ახალი კლინიკის“ პროფესიონალი ბავშვთა სპეციალისტები, ატარებენ უფასო კონსულტაციებს შემდეგი მიმართულებით: პედიატრია, ენდოკრინოლოგია, ოფთალმოლოგია, ქირურგია, ორთოპედ-ტრავმატოლოგია,  ნეფროლოგია. „ახალციხის რეფერალური ჰოსპიტალი“, რუსთაველის ქ#105ა. წარმოებს წინასწარი ჩაწერა: 2 55 05 05

ადიგენის მუნიციპალიტეტის სოფელ უდეში ღვთისმშობლის მიძინების სახელობის ტაძარში,  დღეს, 9 ივნისს,  ამაღლების დღესასწაული ადგილობრივებთან ერთად რუმინეთის დელეგაციამაც აღნიშნა. სადღესასწაულო წირვა ახალციხისა და ტაო–კლარჯეთის მიტროპოლიტმა თეოდორემ აღავლინა. ლიტურგიის შესრულებაში მონაწილეობა მიიღეს ზუგდიდისა და ცაიშის მიტროპოლიტმა გერასიმემ და რუმინეთის სასულიერო პირებმაც. წირვაზე იმყოფებოდნენ რუმინეთის ელჩი საქართველოში დიმიტრუ ბადეა, კულტურის მინისტრი იონუც ვულპესკუ, რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე და რუმინეთის დელეგაციის სხვა წევრები. სტუმრებმა წირვის დასრულების შემდეგ ზარზმისა და საფარის ეკლესია–მონასტრებიც მოილოცეს. გიორგი გასიტაშვილის ფოტოები. თიკო კურტანიძე

ყოფილი პრემიერ-მინისტრი საქართველოს რეგიონებში შეხვედრებს გეგმავს. ბიძინა ივანიშვილი რეგიონებში პირველი სექტემბრიდან ჩავა. როგორც კოალიცია “ქართული ოცნების” დამფუძნებელმა ჟურნალისტებს განუცხადა, ჯერჯერობით არ იცის, ვიზიტს ქვეყნის რომელი კუთხიდან დაიწყებს. „ვფიქრობ, კვირაში ორი შეხვედრა გავაკეთო – ორშაბათს და ხუთშაბათს, რომ მოვასწრო ათივე რეგიონში და ალბათ, თბილისშიც მომიწევს ერთი ან ორი სატელევიზიო გამოსვლა და აქტივთან შეხვედრა“, – განაცხადა ბიძინა ივანიშვილმა.

“გამოუვალი მდგომარეობის”კონცერტი ახალციხეში დაახლოებით, ორი საათით გადაიდო. ღონისძიება სპექტაკლის შემდეგ გაიმართება. პლათფორმა „დაიცავი თავისუფლებას“ აქტივისტი თამარ ჩერგოლეიშვილი მოსახლეობაში სპექტაკლის ბილეთებს უფასოდ არიგებს. მისი თქმით, თეატრალური წარმოდგენის ჩაშლა ღონისძიების ორგანიზატორებს რომ არ დაბრალებოდათ, ამიტომ სპექტაკლის 200 ბილეთი შეიძინეს და მოსახლეობას დასწრებისკენ მოუწოდებს, იმ პირობით, რომ თეატრალური წარმოდგენის შემდეგ, კონცერტზე აუცილებლად დარჩებიან. მესხეთის სახელმწიფო დრამატული თეატრი დღეს მაყურებელს პრემიერას “უსახელო ვარსკვლავი” სთავაზობს, რომლის დასრულების შემდეგაც ჯგუფი “გამოუვალი მდგომარეობა” ადგილობრივებისთვის იმღერებს. თიკო კურტანიძე

ახალციხეში სილამაზის კონკურსი “მისტერ და მის ახალციხე” 2016 ტარდება. მონაწილეობა შეუძლიათ მიიღონ 4–დან 18 წლამდე ასაკის ბავშვებმა. პირველი ტურის რეგისტრაციის საფასური არის 20 ლარი. პირველი ტური გაიმართება მე–6 საჯარო სკოლის დარბაზში, 17 ივნისს, 14:00 საათზე.

ახალციხის საკრებულომ მუნიციპალიტეტის სიმბოლიკის მისაღებად კონკურსი მეორედ გამოაცხადა. ნამუშევრების წარდგენა მსურველებს 30 მაისიდან -24 ივნისის ჩათვლით, 9:00 სთ-დან – 18:00-სთ-მდე, ახალციხის მუნიციპალიტეტის საკრებულოს აპარატში შეუძლიათ. კონკურსის დასრულებიდან ხუთ სამუშაო დღეში კომისია მიღებულ განაცხადებს განიხილავს. კონკურსში  მონაწილეობის მიღება საქართველოს ყველა მოქალაქეს შეუძლია, გარდა სიმბოლიკის შექმნის მიზნით, ჩამოყალიბებული დროებითი სამუშაო ჯგუფის წევრებისა.

სამცხე–ჯავახეთის სახელმწიფო უნივერსიტეტმა ავსტრიელ მწერალს უმასპინძლა. შეხვედრა ლუდვიგ ლაჰერთან  პროფესორ–მასწავლებლებმა და სტუდენტებმა სასწავლებლის ბიბლიოთეკაში გამართეს. ღონისძიებას უნივერსიტეტის ასოცირებული პროფესორი ლალი ბერიძე გაუძღვა. მან რამდენიმე წლის წინ ქართველ მკითხველს ავსტრიელი მწერალი პირველმა გააცნო თარგმანით რომანიდან „შიშველი ნატურა.“ შეხვედრაზე სტუდენტებმა ლუდვიგ ლაჰერის სხვადასხვა რომანიდან და ლექსიდან ნაწყვეტები გერმანულ და ქართულ ენებზე წაიკითხეს.

სურსათის ეროვნული სააგენტოს მიერ სამცხე–ჯავახეთში ბრუცელოზის საწინააღმდეგო ღონისძიებები  მიმდინარეობს.

სურსათის ეროვნული სააგენტოს მიერ სამცხე–ჯავახეთში ბრუცელოზის საწინააღმდეგო ღონისძიებები  მიმდინარეობს.  რამდენიმე წლიანი სტრატეგიული გეგმის ფარგლებში, პირველ ეტაპზე, სააგენტოს თანამშრომლებმა სისხლის აღება მოახდინეს. სერომონიტორინგი რეგიონში სოფელ რუსთავიდან დაიწყო.  გამოკვლევებით დადგინდა, რომ სოფელში  40–მდე სული დაავადებულია. ადგილობრივები ბრუცელოზის საწინააღმდეგო ღონისძიებებს იმედით უყურებენ, თუმცა ამბობენ, რომ თუ დროული ვაქციანაცია არ ჩატარდება სოფელში დაავადებული პირუტყვის რაოდენობა კიდევ გაიზრდება. როდის დაიწყებს სურსათის ეროვნული სააგენტო პრევენციული ღონისძიებების მომდევნო ეტაპს და რაში ხედავენ თავად ადგილობრივები გამოსავალს – “ფერმერის საათის” კითხვებს სურსათის ეროვნული სააგენტოს სამცხე–ჯავახეთის რეგიონული სამმართველოს უფროსი ლია ბექაური პასუხობს.

ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დღეს სამცხე–ჯავახეთს ეწვია. დავით ბაქრაძემ, სამცხე–ჯავახეთის სახელმწიფო უნივერსიტეტთან მემორანდუმი გააფორმა და სტუდენტებისთვის საჯარო ლექცია წაიკითხა. ევროპის დღეების ფარგლებში, მინისტრის შეხვედრის მთავარი თემა, ქვეყნის ევროატლანტიკური ინტეგრაციის პროცესი იყო. ბაქრაძე შეხვდა ახალციხისა და ტაო–კლარჯეთის მიტროპოლიტს, მეუფე თეოდორესაც.

18 მაისს, მუზეუმების საერთაშორისო დღე აღინიშნება. თარიღი მცირე ღონისძიებით აღნიშნეს ივანე ჯავახიშვილის სახელობის სამცხე–ჯავახეთის რეგიონულ მუზეუმში. ისტორიკოსებმა ახალციხის პირველი საჯარო სკოლის მე–6 კლასის მოსწავლეებს უმასპინძლეს და მესხი საზოგადო მოღვაწეების, მამა–შვილი ივანე და კონსტანტინე გვარამაძეების ღვაწლზე ესაუბრნენ. სამცხე–ჯავახეთში, მუზეუმის შექმნა XIX საუკუნის 80–იან წლებში, ივანე გვარამაძის სახელს უკავშირდება. ცნობილმა მესხმა საზოგადო მოღვაწემ, მის მიერ, რეგიონის მასშტაბით მოძიებული ნივთები და მასალები საკუთარ სახლში განათავსა, სადაც დამთვალიერებელს მასპინძლობდა.

ოჯახის სიმტკიცისა და სიწმინდის დაცვის დღის აღნიშვნას, ახალციხის მერიაც შეუერთდა. ახალციხეში მცხოვრებ მრავალშვილიან და სოციალურად დაუცველ 30 დედას, ქალაქის მერმა საჩუქრად მცირე საოჯახო ტექნიკა და ტკბილეული გადასცა. მერიაში ამბობენ, რომ ახალციხეში რეგისტრირებული მრავალშვილიანი და სოციალურად დაუცველი ოჯახები, სოციალური მომსახურების სააგენტოს ინფორმაციის საფუძველზე შეირჩა.

17 მაისთან დაკავშირებით საქართველოს საპატრიარქო განცხადებას ავრცელებს. ოჯახში სიმტკიცისა და სიწმინდის დაცვის დრეს თბილისში აწყურის ყოვლადწმინდა ღვთისმშობლის ხატით მსვლელობა მოეწყობა. “მეცხრე არხი” საპატრიარქოს განცხადებას უცვლელად გთავაზობთ: “ა.წ. 17 მაისს, ოჯახის სიმტკიცისა და სიწმინდის დაცვის დღეს, საქართველოს დედაქალაქში, თბილისში, შემობრძანდება აწყურის ღვთისმშობლის ხატი. უკვე მეორე წელია, რაც ამ ხატით 7 დღიანი მსვლელობა ხორციელდება ოფიდან (დღევანდელი თურქეთის ტერიტორია) თბილისამდე. წირვა-ლოცვები აღევლინება ბათუმში, ხულოში, აწყურში, ბორჯომში, სურამში, ხაშურში, გორში, სვეტიცხოველში. თბილისში ხატით მსვლელობა დაიწყება შუადღისას, 1200 სთ-ზე, რესპუბლიკის მოედნიდან სამების საკათედრო ტაძრისაკენ, სადაც უწმინდესი და უნეტარესი ილია II  გადაიხდის პარაკლისს და დალოცავს ერს. ეს მსვლელობა არის საქართველოს ეკლესიის ახალგაზრდული ცენტრის „დავითიანის“ მიერ ორგანიზებული და მას აქვს მხოლოდ მშვიდობიანი და  ლოცვითი დატვირთვა. სასურველია, რომ მრევლმა  თან იქონიოს  მაცხოვრის, ღვთისმშობლის და წმ. ანდრია პირველწოდებულის ხატები (ან რომელიმე მათგანი), რადგან წმ. ანდრია პირველწოდებული იესო ქრისტეს კურთხევით გამოაგზავნა ყოვლადწმინდა ღვთისმშობელმა საქართველოში და გამოატანა აწყურის ღვთისმშობლის სახელწოდებით ცნობილი თავისი ხატი, რომელიც ფიცარზე ღვთისმშობლის სახის მიდებით გამოისახა. ეს ხატი საუკუნეების მანძილზე დაბრძანებული იყო აწყურში და მისი სასწაულთმოქმედი ძალა და მადლი აქედან ეფინებოდა ჩვენს ქვეყანას. იგი არის მაცხოვრის მიერ ჩვენს შემწედ და მცველად მოვლენილი პირველი უდიდესი  სიწმინდე და მისდამი განსაკუთრებული პატივისცემა უნდა აღდგეს ჩვენს ერში” – ნათქვამია საპატრიარქოს მიერ გავრცელებულ განცხადებაში.  

მართლმადიდებელი ეკლესია 12 მაისს ანდრია პირველწოდებულის საქართველოში შემოსვლის დღეს აღნიშნავს. ამ დღის აღსანიშნავად, ყველა ტაძარში საზეიმო წირვა სრულდება. სადღესასწაულო ღვთისმსახურება რაბათის წმინდა მარინეს სახელობის ეკლესიაში ახალციხისა და ტაო–კლარჯეთის მიტროპოლიტმა აღავლინა. უფალმა მოციქულთა შორის პირველად ანდრიას მოუწოდა. ამიტომაც მას პირველწოდებული ეწოდა.

ახალციხეში პირველი ფოტო–ვიდეო სტუდია  ,,S & S” გაიხსნა. სერგო ფიდანიანმა და სოსო ჩლაჩიშვილმა დაფინანსება პროგრამის ,,აწარმოე საქართველოში“– ფარგლებში მოიპოვეს. მეპატრონეები მომხმარებელს ვიდეო კლიპების, სარეკლამო რგოლებისა და დოკუმენტური ფილმების მომზადებას,  ასევე ადგილზე და შიდა სტუდიურ მომსახურებას სთავაზობენ.

წყალთბილა-ნაოხრების გზის მონაკვეთის რეაბილიტაცია დასრულდა. ახალციხის გამგეობის ინფორმაციით, პროექტის ფარგლებში 430 მეტრზე ბეტონის საფარი დაიგო. სარწყავი არხების გადაკვეთის ადგილებზე კი მილხიდები მოეწყო. წყალთბილა-ნაოხრების გზის მონაკვეთი, წლების განმავლობაში მწყობრიდან იყო გამოსული, რის გამოც მოსახლეობას გადაადგილება უჭირდა. გზის რეაბილიტაცია რეგიონული განვითარების ფონდიდან გამოყოფილი თანხით დაფინანსდა.  

      ერთიანი ეროვნული გამოცდების ჩატარების გრაფიკი უკვე ცნობილია. განრიგი შეფასებისა და გამოცდების ეროვნულმა ცენტრმა დღეს გამოაქვეყნა. გამოცდები 1 ივლისს დაიწყება და 21–ში დასრულდება.

ახალციხის მუნიციპალიტეტის სიმბოლოების შესარჩევი კონკურსი ჩაიშალა. საკრებულოს აპარატში განაცხადი არ შევიდა. გერბისა და დროშის შესარჩევად კონკურსი მიმდინარე წლის 1 აპრილს გამოცხადდა. მასში მონაწილეობის მიღება ნებისმიერ მსურველს შეეძლო, გარდა კომისიაში შემავალი პირებისა. კონკურსანტებს საკრებულოს აპარატში ნამუშევრების წარდგენის უფლება 1 აპრილიდან 6 მაისის ჩათვლით, 18:00 საათამდე ჰქონდათ.

ახალციხეში ფაშიზმზე გამარჯვების დღე აღნიშნეს. მემორიალი ახალციხის მერმა და სამცხე–ჯავახეთის სამხარო ადმინისტრაციის წარმომადგენლებმა გვირგვინით შეამკეს. მერიის კულტურის სამსახურმა ვეტარანებისთვის კონცერტი გამართა. 9 მაისის მემორიალთან მისვლა მხოლოდ 5–მა ვეტერანმა შეძლო. ჯანმრთელობის მდგომარეობის გამო, წელს მათ ერთი მათგანი ვეღარ შეუერთდა. მეორე მსოფლიო ომის ვეტერანებს 600 ლარი, ომში გარდაცვლილთა ოჯახებს კი 300 ლარი – 9 მაისთან დაკავშირებით, ერთჯერადი ფულადი ჯილდო მათ საქართველოს პრემიერ–მინისტრმა ჩაურიცხა. 600 ლარი სამცხე–ჯავახეთის მასშტაბით 72 –მა ვეტერანმა მიიღო. ხოლო 300 ლარი – 36–მა ოჯახმა. ექვს ვეტერანს პირად ანგარიშზე ახალციხის მერიისგან 200–200 ლარი ჩაერიცხათ.

ათობით მეწარმის პროტესტი რუსთაველის ქუჩაზე, საგზაო ნიშნის დამონტაჟებას მოჰყვა. ახალციხის მერიის გადაწყვეტილებთ, მეხუთე საშუალო სკოლიდან, ავერსის აფთიაქამდე, ავტომანქანის გაჩერება აიკრძალა. შესაბამისი საგზაო ნიშანი, რამდენიმე დღის წინ დადგეს. მას შემდეგ მძღოლი, რომელიც ნიშნის მოქმედების ზონაში იდგა, 10 ლარით ჯარიმდებოდა.   რუსთაველის ქუჩის იმ მონაკვეთზე, სადაც ავტომანქანის გაჩერება და დგომა აიკრძალა, რამდენიმე კომერციული ობიექტი მდებარეობს. მათი მეპატრონეები ამბობენ, რომ ამის გამო, მოსახლეობას დისკომფორტი ექმნება და საგზაო ნიშნის დამონტაჟების შემდეგ,  მომხმარებლის რაოდენობა შემცირდა.