ტელეკომპანია „მეცხრე არხის“ თოქ–შოუ „დიალოგში“ გაკეთებული განცხადების გამო, ჯიმშერ გოგოლაური ქალაქის მერს პროკურატურაში უჩივის. „გაერთიანებული დემოკრატიული მოძრაობიდან“  საკრებულოს დეპუტატის განცხადებით, გადაცემაში გიორგი კოპაძემ, მას ბრალი დასდო, რომ ძალოვან უწყებაში მუშაობის პერიოდში პატიმრებს აწამებდა და მათგან სასურველი ჩვენების მიღებას ძალისმიერი მეთოდებით ცდილობდა. ჯიმშერ გოგოლაური ამბობს, რომ ქალაქის მერისგან მის მიმართ, მსგავსი ბრალდება უკვე მეორედ გაისმა. იგი აღნიშნული საკითხით ძალოვანი უწყების დაინტერესებასა და გიორგი კოპაძის პასუხისმგებლობის საკითხის დაყენებას მოითხოვს. როგორც გოგოლაურმა „მეცხრე არხთან“ განაცხადა, კონსულტაციას ადვოკატთან გაივლის და პროკურატურას საჩივრით მიმართავს. „გაერთიანებული დემოკრატიული მოძრაობის“ წევრისა და  ქალაქის მერის დაპირისპირება, 10 დეკემბერს, გადაცემა „დილოგის“ პირდაპირ ეთერში, ახალციხის მომავალი წლის ბიუჯეტის განხილვას მოჰყვა.

შსს-ს სამცხე-ჯავახეთის პოლიციის დეპარტამენტის უბნის ინსპექტორების სამმართველოსა და ახალქალაქის რაიონული სამმართველოს თანამშრომლებმა, სოფელ კარწახში  შრი-ლანკის რესპუბლიკის 6 მოქალაქე საქართველოში სამართლებრივი საფუძვლის გარეშე ყოფნის ბრალდებით დააკავეს. გამოძიებამ დაადგინა, რომ დაკავებულებს პიროვნების იდენტიფიკაციის დამადასტურებელი დოკუმენტები თან არ ჰქონდათ და საქართველოს ტერიტორიაზე სამართლებრივი საფუძვლის გარეშე იმყოფებოდნენ.

გარემოსდაცვითი ზედამხედველობის დეპარტამენტის სამცხე-ჯავახეთის სამმართველოს თანამშრომლებმა ხე-ტყის უკანონო მოპოვების 3 ფაქტი გამოავლინეს. ადიგენის მუნიციპალიტეტის სოფელ საღრძის მიმდებარედ ნანახი იქნა მორები, რომელთა საერთო რაოდენობამ  51 ერთეული შეადგინა. ამ დროისთვის სამართალდამრღვევების ვინაობა უცნობია. გარდაა ამისა სამმართველოს თანამშრომლებმა საღრძის მიმდებარედ, ხე-ტყის უკანონო მოპოვების და ტრანსპორტირების ფაქტი გამოავლინეს. გადამოწმების მიზნით გაჩერებული სატვირთო ავტომანქანის ძარაზე უკანონოდ მოპოვებული მრგვალი მორი აღმოაჩინეს. აღნიშნული სატრანსპორტო საშუალება დაილუქა. შედგა შესაბამისი ოქმი.  ასევე, სამმართველოს თანამშრომლებმა ბორჯომის მუნიციპალიტეტის სოფელ წაღვერში, ერთ-ერთი საცხოვრებელი სახლის ეზოში უკანონოდ მოქმედი სახერხი საამქრო აღმოაჩინეს. სახერხის ტერიტორიაზე ნანახი იქნა უკანონოდ მოპოვებული მრგვალი მორი და პირველადი გადამუშავების პროდუქტი – ფიცარი. აღნიშნული სახერხი დალუქეს და ფინანსთა სამინისტროს მომსახურების სააგენტოში გადაიტანეს.

ბუნებრივი აირის გაჟონვის გამო, ერთი ადამიანი გარდაიცვალა, ორი კი მოიწამლა. უბედური შემთხვევა ახალქალაქის მუნიციპალიტეტის სოფელ კულიკამში, 9 დეკემბერს მოხდა. ახალქალაქის მუნიციპალიტეტის გამგებლის, ედუარდ აღასარიანის თქმით, ორივე დაზარალებულს პირველადი დახმარება რაიონულ საავადმყოფოში აღმოუჩინეს, რის შემდეგაც ისინი თბილისში გადაიყვანეს. მათი მდგომარეობა სტაბილურად მძიმეა. შსს–ს საზოგადოებასთან ურთიერთობის სამსახურში ამბობენ, რომ გამოძიება სსკ–ის 240 მუხლით მიმდინარეობს, რაც უსაფრთხოების წესის დარღვევას გულისხმობს, რამაც გამოიწვია ადამიანის სიცოცხლის მოსპობა.

ახალქალაქში მომხდარი მკვლელობის შეუტყობინებლობის საქმეზე სასამართლო სხდომა გრძელდება. დღეს ბრალდების მხარემ სასამართლოს, სარქის აკოფიანის სიკვდილის გამომწვევ მიზეზებთან დაკავშირებით, საექსპერტო დასკვნა წარუდგინა, რაც დაცვის მხარემ უდავოდ ცნო. მაიზერ ბაბლუანი აცხადებს, რომ ამის შესახებ მან ჯერ კიდევ წინასასამართლო სხდომაზე ისაუბრა და მისთვის გაურკვეველია, რატომ წარადგინა პროკურორმა აღნიშნული მტკიცებულება. სასამართლომ, წინა სხდომაზე გამოუცხადებლობის გამო, მაიზერ ბაბლუანი 100 ლარით დააჯარიმა, რადგან ადვოკატს მოსამართლისთვის სხდომის გაცდენის მიზეზი არ აუხსნია.

ახალციხის რაიონულ სასამართლოში, პოლიციელზე  თავდასხმაში ბრალდებულთა საქმის განხილვა ერთი საათის დაგვიანებით დაიწყო. მიზეზი ერთ–ერთი ბრალდებულის ჯანმრთელობის მდგომარეობის გაუარესება გახდა. ბესიკ ხარშილაძისთვის პირველადი დახმარების აღმოსაჩენად, სასწრაფო–სამედიცინო დახმარების გამოძახებაც გახდა საჭირო. დღეს, ბრალდებისა და დაცვის მხარეებმა საქმეში არსებული მტკიცებულებების დასაშვებობის საკითხზე იმსჯელეს. დაკავებულის ადვოკატმა, მოსამართლეს, სამი შუამდგომლობით მიმართა.

ახალციხის რაიონულმა სასამართლომ, ადიგენის გამგეობის ყოფილი თანამშრომლების სარჩელის განხილვა დაიწყო. მოსამზადებელ  სხდომაზე მოსარჩელემ გამგეობის წინააღმდეგ პრეტენზიები კიდევ ერთხელ გამოთქვა. იქიდან გამომდინარე, რომ სარჩელში რატი ტატალაშვილი და ჯემალ იაკობაძე სამსახურში აღდგენას ითხოვენ, ადმინისტრაციულ სამართალწარმოებაში მესამე პირის ჩართვაც გახდა საჭირო. ამიტომ შემდეგ სასამართლო სხდომებს ადგიგენის გამგებლის მოქმედი მოადგილეები და საფინანსო–საბიუჯეტო სამსახურის უფროსიც დაესწრებიან. შემდეგი სხდომა 23 დეკემბერს ჩაინიშნა.

ახალციხეში ავტოსაგზაო შემთხვევის შედეგად, ერთი ადამიანი დაშავდა. რუსთაველის ქუჩაზე, მარკეტთან “იაფი”, ნივა და მერსედესის მარკის ავტომობილი ერთმანეთს შეეჯახა. ადგილზე  ამ დრომდე მობილიზებულია საპატრულო პოლიცია. შემთხვევის გამო, შეფერხებულია სატრანსპორტო საშუალებების გადაადგილება. დაშავებული  სამედიცინო დაწესებულებაშია გადაყვანილი. შსს–ს ინფორმაციით, გამოძიება საქართველოს სსკ–ის 276–ე მუხლის პირველი ნაწილით მიმდინარეობს. რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება. ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.  

დღეს, ახალციხის რაიონულ სასამართლოში, დანაშაულის შეუტყობინებლობაში ბრალდებულების – ნალბანდიანის, კარაპეტიანისა და იგიტიანის  სასამართლო პროცესი გაიმართა.  საქმეზე ორი მოწმე, ექსპერტ–კრიმინალისტი ირაკლი წვერავა და გამომძიებელი  ლევან ნებაძე დაიკითხნენ. გამომძიებელი იხსენებს, რომ არმენ ნალბანდიანი, გამომძიებელ ელგუჯა ტაბატაძესთან დაკითხვაზე დაბარების შემდეგ მივიდა, სადაც ნალბანდიანი, ნებაძეს და მის ორ თანამშრომელს, აგრესიულად ესაუბრა, რაც ფიზიკურ დაპირისპირებაში გადაიზარდა.

შპს ,,სამცხე XXI“–ს დირექტორისა და ახალციხის გამგეობის ყოფილი თანამშრომლების საქმეზე მიღებულ სასამართლო გადაწყვეტილებას, ადვოკატი სააპელაციო სასამართლოში გაასაჩივრებს. ე.წ. სახურავის ორივე საქმეში ბრალდებულების უფლებებს, შემდგომ ინსტანციაში, ირაკლი ბარძიმაძე დაიცავს. ადვოკატი მიიჩნევს, რომ მოსამართლის გადაწყვეტილება, რომლის მიხედვითაც,  ქასრაშვილსა და მერაბიშვილს გულგრილობაში ედებათ ბრალი, უსაფუძვლოა. ბარძიმაძეს საეჭვოდ მიაჩნია ის გარემოება, რომ ერთსა და იმავე საქმეზე ბრალდებული პირებიდან, ერთს 8–წლიანი პატიმრობა შეეფარდა, ორს კი მხოლოდ 1 700ლარიანი ჯარიმა დაეკისრა. ბარძიმაძე ფიქრობს, რომ მოსამართლე გიორგი ლონდარიძისგან განსხვავებით, გოჩა ჯეირანაშვილი ვერ შეაშინეს. მისივე თქმით, მოსამართლე გიორგი ლონდარიძეს, ფარცახაშვილის საქმეზე დასაბუთებული განაჩენი ჯერ არ გაუვრცელებია, მიუხედავად ამისა, პროკურორმა ქასრაშვილი–მერაბიშვილის ბოლო პროცესზე, ფარცახაშვილის განაჩენზე ისაუბრა.

რევაზ მერაბიშვილი და გიორგი ქასრაშვილი, ახალციხის რაიონულმა სასამართლომ დამნაშავედ მხოლოდ ერთი მუხლით ცნო. სამსახურეობრივი გულგრილობისთვის ისინი 1 700 ლარით დაჯარიმდნენ. გოჩა ჯეირანაშვილმა გამგეობის ყოფილი თანამშრომლები, ორი მუხლით, რომელიც სამსახურეობრივი უფლებამოსილების გადამეტებასა და სიყალბეს გულისხმობს,  უდანაშაულოდ ცნო. სხდომას არ ესწრებოდა მსჯავრდებულების ადვოკატი ირაკლი ბარძიმაძე.

   რევაზ მერაბიშვილსა და გიორგი ქასრაშვილს, ახალციხის რაიონულ სასამართლოში, განაჩენი დღეს, გოჩა ჯეირანაშვილმა გამოუტანა. მოსამართლემ ახალციხის გამგეობის ყოფილი თანამშრომლები, ორ მუხლში, სამსახურეობრივი უფლებამოსილების გადამეტებასა და სიყალბეში უდანაშაულოდ ცნო.სამსახურეობრივი გულგრილობისთვის კი, 1 700ლარიანი ჯარიმა დაეკისრათ. სხდომას არ ესწრებოდა მსჯავრდებულების ადვოკატი. გიორგი ქასრაშვილმა ,,მე–9 არხთან” განაცხადა, რომ ჯერჯერობით არ გადაუწყვეტიათ, გაასაჩივრებენ თუ არა მოსამართლის გადაწყვეტილებას. შეგახსენებთ, რომ  ახალციხის მუნიციპალიტეტის გამგეობის ყოფილ თანამშრომლებს გიორგი ქასრაშვილსა და რევაზ მერაბიშვილს ბრალად  სამსახურეობრივი უფლებამოსილების გადამეტება, სამსახურეობრივი სიყალბე და დიდი ოდენობით თანხის მითვისება ედებოდათ.

ასპინძის ქუჩის 28–ე კორპუსის სახურავის საქმის განხილვა ახალციხის რაიონულ სასამართლოში დასრულდა. მოსამართლე გოჩა ჯეირანაშვილი ახალციხის გამგეობის ყოფილ თანამშრომლებს, რევაზ მერაბიშვილსა და გიორგი ქასრაშვილს განაჩენს ხვალ, 1 დეკემბერს გამოუტანს. გამგეობის თანამშრომლების საქმეზე ამ დრომდე ბრალდების მხარის რეპლიკა იყო დარჩენილი. პროკურორმა თამარ ზურაბაშვილმა გონივრული ვადა რეპლიკისათვის რამდენჯერმე ითხოვა და სხდომა გადადო. ქასრაშვილისა და მერაბიშვილის საქმეს ზურაბაშვილმა შპს “სამცხე XXI”–ს დირექტორის გურამ ფარცახაშვილის განაჩენი დაურთო. იგი მოსამართლე გიორგი ლონდარიძემ, ყველა წარდგენილ ბრალდებაში დამნაშავედ ცნო და 8 წლით თავისუფლების აღკვეთა მიუსაჯა. კომპანიის დირექტორი სასამართლო დარბაზში დააკავეს. შეგახსენებთ, რომ  ახალციხის მუნიციპალიტეტის გამგეობის ყოფილ თანამშრომლებს გიორგი ქასრაშვილსა და რევაზ მერაბიშვილს ბრალად  სამსახურეობრივი უფლებამოსილების გადამეტება, სამსახურეობრივი სიყალბე და დიდი ოდენობით თანხის მითვისება ედებათ.

გარემოსდაცვითი ზედამხედველობის დეპარტამენტის სამცხე-ჯავახეთის სამმართველოს თანამშრომლებმა უკანონოდ მოქმედი 2 სახერხი საამქრო გამოავლინეს. სამართალდამრღვევებს უკანონო სახერხი საამქროები ბორჯომის მუნიციპალიტეტის სოფელ საკირესა და სოფელ ჭობისხევში საცხოვრებელი სახლების ეზოებში ჰქონდათ განთავსებული. სახერხების ტერიტორიაზე ნანახი იქნა დაუფირნიშებელი მორები და პირველადი გადამუშავების პროდუქტი – ფიცარი. მოხდა სახერხი საამქროების დემონტაჟი, რომლებიც ფინანსთა სამინისტროს მომსახურების სააგენტოში გადაიტანეს.

საქართველოს ფინანსთა სამინისტროს საგამოძიებო სამსახურმა, ქრთამის აღების ფაქტზე, საბაჟო გამშვებ პუნქტ „ვალეს“ მებაჟე ოფიცერი თ.ნ. და დანაშაულში მონაწილე კიდევ სამი თანამზრახველი დააკავა. გამოძიებამ დაადგინა, რომ ბრალდებულებმა, ერთ-ერთ მოქალაქეს, თურქეთიდან საქართველოში, საბაჟო გამშვებ პუნქტ „ვალეს“ გავლით, სამი კილოგრამი ოქროს განუბაჟებლად შემოტანის სანაცვლოდ,  5 400 აშშ დოლარი მოსთხოვეს, ხოლო წინასწარ აიღეს მოთხოვნილი თანხის ნაწილი. დანაშაულებრივ ფაქტზე გამოძიება საქართველოს სისხლის სამართლის კოდექსის 338 – ე მუხლის პირველი ნაწილით მიმდინარეობს, რაც  თავისუფლების აღკვეთას 6 დან 11 წლამდე ვადით ითვალისწინებს.

ახალციხეში რუსთაველის ქუჩაზე მსუბუქი მარკის ავტომობილი დაიწვა, რომელიც მფლობელს ავტოფარეხში ეყენა. როგორ გაუჩნდა ცეცხლი ავტომობილს, მიზეზი უცნობია. შემთხვევის შედეგად არავინ დაშავებულა. ადგილზე მობილიზებული იყო საპატრულო პოლიციისა და სახანძრო სამაშველო სამსახურის ჯგუფები. შინაგან საქმეთა სამინისტროს ინფორმაციით, გამოძიება საქართველოს სსკ–ის 187–ე მუხლით მიმდინარეობს, რაც ნივთის დაზიანებას, ან განადგურებას გულისხმობს.

„18 უარი“– ამ სახელწოდებით  განცხადება, ახალციხის რაიონულ სასამართლოს, ორი პოლიციელის მკვლელობაში ბრალდებულმა გამოუგზავნა, სადაც იგი პროცესზე გამოუცხადებლობის მიზეზებზე საუბრობს. მათ შორის,  საპყრობილეში არაადამიანურ მოპყრობაზე, საკუთარი თავის დაცვისათვის შესაბამისი იურიდიული ლიტერატურის არქონასა და სასამართლოსათვის უნდობლობის გამოცხადებაზე. შალვა აბულაძე განცხადებაში  განმარტავს, რომ აღნიშნულ მდგომარეობაზე  რეაგირებისათვის,  სასამართლოს 18–ჯერ მიმართა,  თუმცა უშედეგოდ. ორი პოლიციელის მკვლელობის საქმეზე მტკიცებულებების გამოკვლევა დასრულებულია, რადგან  ადვოკატის თქმით, ბრალდებული არცერთ სასამართლო სხდომაზე აღარ გამოცხადდება. შესბამისად, შალვა აბულაძე არც ჩვენებას მისცემს.

საქართველოს სახელმწიფო საზღვრის უკანონოდ, ჯგუფურად გადაკვეთის მცდელობის ბრალდებით 11 პირი დააკავეს. ფაქტი შსს-ს სასაზღვრო პოლიციის საგამოძიებო-ოპერატიული მთავარი სამმართველოსა და სახმელეთო საზღვრის დაცვის დეპარტამენტის თანამშრომლებმა, მეორე სამმართველოს (ახალციხე) N2 სასაზღვრო სექტორის, ვალეს დასაცავ მონაკვეთზე გამოავლინეს. გამოძიება საქართველოს სახელმწიფო საზღვრის უკანონოდ, ჯგუფურად გადაკვეთის მცდელობის ფაქტზე მიმდინარეობს. ძიებას სასაზღვრო პოლიციის საგამოძიებო-ოპერატიული მთავარი სამმართველო აწარმოებს.

ახალციხის რაიონული სასამართლო სამცხე–ჯავახეთის მუფთის საქმეს განიხილავს. მამუკა ვაშაყმაძეს ბრალი ცემაში ედება, იგი დანაშაულს აღიარებს. წინასასამართლო სხდომა მართლმსაჯულების ორგანოში დღეს გაიმართა, სადაც ბრალდების მხარემ გამოსაკვლელვი მტკიცებულებები წარადგინა, აღნიშნული კი დაცვის მხარემ უდაოდ ცნო. სამცხე–ჯავახეთის მუფთს ბრალი მეზობლისა და ოჯახის ახლობლის ცემაში ედება.

სოფელ ურაველში 40 წლის მამაკაცმა თავი ჩამოიხრჩო. შემთხვევა 23 ნოემბერს, დაახლოებით, სამ საათზე მოხდა.  ბ.მ. ჩამომხრჩვალი სახლთან ახლოს შვილმა გამთენიისას იპოვა. ურაველში სუიციდის გამომწვევ სავარაუდო მიზეზად სოციალურ პრობლემებს ასახელებენ. გარდაცვლილს მეუღლე და ოთხი შვილი დარჩა. ფაქტი ცნობილია შინაგან საქმეთა სამინისტროსთვის. საზოგადოებასთან ურთიერთობის სამსახურში აცხადებენ, რომ გამოძიება სისიხლის სამართლის კოდექსის 115–ე მუხლით მიმდინარეობს, რაც თვითმკვლელობამდე მიყვანას გულისხმობს.