ახალციხის ახალგაზრდულ ცენტრში, სამცხე-ჯავახეთის ახალგაზრდული ფორუმისათვის მოსამზადებლად, პედაგოგების შეხვედრა გაიმართა. მათ რეგიონში არსებულ პრობლემებსა  და მისი გადაწყვეტის გზებზე იმსჯელეს. პედაგოგები 20 და 24 აპრილს გამართულ ფორუმში მიიღებენ მონაწილეობას და მას ფასილიტირებას გაუწევენ.

14 აპრილს საქართველოში დედაენის დღე აღინიშნა. ისევე როგორც მთელი ქვეყნის მაშტაბით, ეს დღე ახალციხის მეხუთე საჯარო სკოლის მესამე კლასის მოსწავლებმაც აღნიშნეს. ბავშვებმა ღონისძიებაზე მშობლიურ ენას არაერთი სიმღერა და ლექსი მიუძღვნეს.

პირველი საჯარო სკოლის, სამოქალაქო კლუბის,  „ოცნებიდან რეალობამდე“–ს  წევრებმა საქველმოქმედო აქცია მოაწყეს. მოსწავლეები წმინდა ბარბარეს სახელობის ნინოწმინდის ბავშვთა სახლს ესტუმრნენ და აღსაზრდელებს საჩუქრად ტანსაცმელი და სურსათი გადასცეს. საქველმოქემდო აქციაში მონაწილეობა ახალციხის მეორე, მესამე და მეხუთე საჯარო სკოლების სამოქალაქო კლუბის წევრებმა მიიღეს. მათ სურსათ–სანოვაგე ქალაქში შეაგროვეს. მოსწავლეებმა ნინოწმინდის ბავშვთა სახლის აღსაზრდელებს კონცერტი და შემეცნებითი გასართობი ღონისძიებებიც  შესთავაზეს. კლუბის წევრებმა აღნიშნეს, რომ მსგავსი აქციები მომავალშიც გაგრძელდება. საქველმოქმედო აქციას ორგანიზება ახალციხის ახალგაზრდულმა ცენტრმა გაუწია. იგი  ,,სამოქალაქო განათლებისა და პედაგოგთა გადამზადების“ პროგრამის ფარგლებში განხორციელდა.

ასპინძის მუნიციპალიტეტის სოფელ თმოგვის სკოლის პედაგოგები დახმარებას ითხოვენ. სასწავლო დაწესებულება  ნაქალაქევის სკოლასთან ოპტიმიზაციის შედეგად სტატუსის გარეშე დარჩა,  გარდა ამისა რთულია  ფინანსური მდგომარეობაც

სამცხე–ჯავახეთის სახელმწიფო სასწავლო უნივერსიტეტის ყოფილი ასოცირებული პროფესორი დღეს  ჟურნალისტიკის სპეციალობის სტუდენტებს შეხვდა.  გიგლა გობეჩიამ მათ უნივერსიტეტის დატოვების მიზეზები განუმარტა. სტუდენტების გარდა დიალოგის გამართვა მას სასწავლებლის ხელმძღვანელთანაც მოუწია. ლექტორი აცხადებს, რომ მისი გათავისუფლება მიზანმიმართულად მოხდა.

ახალციხის პირველი საჯარო სკოლის მოსწავლე თამარ ჯაფარიძე საქართველოს მასშტაბით 5 დელეგატს შორის მოხვდა და ერთკვირიანი ვიზიტით ბრიუსელში გაემგზავრა, სადაც ევროკავშირისა და ნატოს სხდომებს დაესწრო.

ეთნიკური უმცირესობების საბავშვო ბაღებისთვის ახალი სახელმძღვანელო გამოიცა.  პუბლიკაცია სკოლამდელი აღზრდის დაწესებულებებს  საქართველოს მეცნიერებისა და განათლების სამინისტროსგან უფასოდ გადაეცემათ.  სახელმძღვანელოებით სარგებლობას ქვეყნის მასშტაბით 700-ზე მეტი სკოლამდელი ასაკის ბავშვი შეძლებს.

პროექტის “ახალგაზრდა ჟურნალისტის” პრეზენტაცია ახალციხის პირველ საჯერო სკოლაში გაიმართა. პროექტი საზოგადოებაში არსებული პრობლემების განხილვასა და სიუჟეტების მომზადებას გულისხმობს.

ახალციხის მეორე საჯარო სკოლის პედაგოგები ანაზღაურების ჩარიცხვის დაგვიანებაზე საუბრობენ. მასწავლებლები მუნიციპალიტეტის გამგებელს შეხვდნენ და დახმარება სთხოვეს.  როგორც პედაგოგები განმარტავენ, სკოლას ხელფასის გასაცემად ვაუჩერული სისტემით 90 პროცენტი ჩაერიცხა, დანაკლისი კი სამინისტროს უნდა აენაზღაურებინა.  იანვრის თვეში მათ ხელფასების გასაცემად 2518 ლარი დააკლდათ. სამინისტროს მიერ დანარჩენი თანხის გადმორიცხვა კი პედაგოგთა მტკიცებით ამ დრომდე არ მომხდარა. ახალციხის მუნიციპალიტეტის გამგებელი მასწავლებლებს დახმარებას დაპირდა. ბესიკ ხითარიშვილის განცხადებით, შესაბამის სტრუქტურებში დარეკვის შემდეგ გაარკვა, რომ სამინისტრო ხელფასების დანამატს დაახლოებით 10 დღეში გადმორიცხავს. ახალციხის მეორე საჯარო სკოლა დეფიციტურია და აქ 365 მოსწავლე ქართულ და რუსულ სექტორებზე  სწავლობს.

სამცხე-ჯავახეთის სახელმწიფო სასწავლო უნივერსიტეტის მეორე კორპუსში შეხვედრა გაიმართა. უმაღლესი სასწავლო დაწესებულების ადმინისტრაციამ რეგიონში მცხოვრებ აბიტურიენტებს უმასპინძლა. პროფესორ-მასწავლებლებმა, ახალგაზრდებს უნივერსიტეტში არსებული მდგომარეობა გააცნეს და მათ კითხვებს უპასუხეს.

ახალციხის მუნიციპალიტეტის გამგეობის შენობაში 20 თებერვალს, სკოლამდელი აღზრდის დაწესებულების ახალი კადრებისათვის გამოცდები  ჩატარდა. ქალაქის ოთხი საბავშო ბაღის ახალი ჯგუფებისათვის ტესტირება 42 მსურველიდან  37 გაიარა, ხუთი მათგანი გამოცდაზე არ გამოცხადდა. როგორც სკოლამდელი აღზრდის დაწესებულებათა გაერთიანების დირექტორი ამბობს, საბავშო ბაღებისათვის  ვაკანსია ორი თვის წინ გამოცხადდა და ადგილობრივ თვითმართველობაში, დიდი რაოდენობით განცხადებები შევიდა, თუმცა მათ მხოლოდ დაწყებითების  სპეციალობის მქონე პირები შეარჩიეს. საბავშო ბაღებში პედაგოგობის მსურველებმა 15 კითხვარს გასცეს პასუხი, შედეგები კი კვირის ბოლოს გახდება ცნობილი. სკოლამდელი აღზრდის დაწესებულებათა გაერთიანების დირექტორის ნანა გელაშვილის თქმით, ამ ეტაპზე საბავშო ბაღებში ვაკანსიის გამოცხადება არ იგეგმება,  იმ შემთხვევაში თუ ახალი ჯგუფების დამატება არ გახდა საჭირო.

ინგლისური ენის სასტიპენდიო პროგრამა ახალციხეში. დღეს ზრდასრულთა განათლების ცენტრის ორგანიზებით 13–დან 16 წლამდე მოსწავლეებისათვის პროგრამა, სახელწოდებით ,,ექსესი” დაიწყო. მასში მონაწილეობას ახალციხის სკოლის 25 მოსწავლე იღებს. პროექტის მიზანს მოზარდების ცოდნის გაუმჯობესება და ამერიკული კულტურისა და წეს-ჩვეულებების უკეთ შესწავლა წარმოადგენს. სხვადასხვა აქტივობებს ახალგაზრდები 2 წლის განმავლობაში შეასრულებენ. პროექტის ფარგლებში მათ უფასო სახელმძღვანელოები დაურიგდებათ, თვეში ერთხელ კი ინგლისური ენის ცოდნის გაუმჯობესებაზე იმუშავებენ და მათთვის აუცილებელი, გასამდიდრებელი ღონისძიებები ჩაუტარდებათ. გარდა ამისა, პროექტი წელიწადში ერთხელ საზაფხულო, ერთ კვირიან ბანაკს ითვალისწინებს, სადაც მთელი დღის განმავლობაში მოსწავლეებს 6 საათიანი მეცადინეობები ჩუტარდებათ. აღნიშნულ პროექტს ახალციხეში ზრდასრულთა განათლების ცენტრი და ამერიკული ორგანიზაცია ,,ჰარმონია” ერთობლივად ახორციელებენ. ეს პროექტის მეორე ეტაპია, პირველი ნაკადის მოსწავლეებმა სწავლა გასული წლის დეკემბრის თვეში დაასრულეს. ამჯერად, ინგლისური კულტურისა და ენის უკეთ გაცნობაში ახალგაზრდებს სერტიფიცირებული პედაგოგი დაეხმარება. სასტიპენდიო პროგრამა ,,ექსესი” 2015 წელს დასრულდება.

,,ვანო მერაბიშვილის დედამ სკოლის მოსწავლეები და დამლაგებელი სცემა”, ამ სათაურით მასალა სამცხე–ჯავახეთის რეგიონული გაზეთის ,,სამხრეთის კარიბჭეს” ვებგვერდზე 14 თებერვალს გამოქვეყნდა. რა წერია სტატიაში და რა საპასუხო არგუმენტები მოყავს ახალციხის მეხუთე საჯარო სკოლის დირექტორს, აღნიშნულთან დაკავშირებით მხარეებს ,,ექოს” გადამღები ჯგუფი ესაუბრა. ფაქტს უკვე გამოეხმაურა საქართველოს განათლებისა და მეცნიერების სამინისტრო.

განათლებისა და მეცნიერების სამინისტრომ  ქვეყნის  საკანონმდებლო ორგანოსთან ერთად,  საქართველოს მასშტაბით,  სკოლებში არსებული მდგომარეობის შესწავლა დაიწყო. პარლამენტარები და სამინისტროს წარმომადგენლები სამცხე–ჯავახეთსაც სტუმრობენ. რა პრობლემები მოგვარდება სასწავლო დაწესებულებებში და როდის დაიწყება პირველი ეტაპი.