ახალციხის მეხუთე საჯარო სკოლაში პედაგოგები პროტესტს აგრძელებენ. ამ დროისათვის მასწავლებლები კლასებში იმყოფებიან, თუმცა გაკვეთილებს არ ატარებენ. ყველა კლასის კარი ღიაა და პედაგოგები მოსწავლეებს თავისუფალ თემებზე ესაუბრებიან. ისინი აცხადებენ, რომ ამ სახით პროტესტს მანამდე გააგრძელებენ, სანამ განათლებისა და მეცნიერების სამინისტრო მათ მოთხოვნებს არ დააკმაყოფილებს. შეგახსენებთ, რომ მეხუთე სკოლის პედაგოგებმა 86–ვე მასწავლებლის მიერ ხელმოწერილი განცხადება განათლების სამინისტროს გაუგზავნეს, სადაც ისინი სკოლის დირექტორის მოვალეობის შემსრულებლის თანამდებობაზე ნანა დათაშვილს მოითხოვენ. პედაგოგიური კოლექტივის პროტესტი მას შემდეგ დაიწყო, რაც ახალციხის საგანმანათლებლო რესურსცენტრმა დირექტორის მოვალეობის ახალი შემსრულებელი წარადგინა. ინგა ვარდიძე აღნიშნულ თანამდებობაზე 12 მარტს სამინისტრომ დაამტკიცა. 13 მარტს კი იგი სამსახურში გამოცხადდა, რასაც პედაგოგთა მხრიდან პროტესტი მოჰყვა. მიუხედავად იმისა, რომ ნანა დათაშვილმა სკოლის ბეჭედი და დოკუმენტაცია უკვე გადასცა, მასწავლებლები ინგა ვარდიძესთან მუშაობას არ აპირებენ.

ახალცხის მეხუთე საჯარო სკოლის გარშემო ხმაური გრძელდება. 14 მარტს დაწესებულებაში პედაგოგებმა სამეურვეო საბჭოს გაფართოებული სხდომა მოიწვიეს და სამოქმედო გეგმა დასახეს. მათი თქმით, იმ შემთხვევაში თუ განათლებისა და მეცნიერების სამინისტრო მათ მოთხოვნას არ დააკმაყოფილებს, პედკოლექტივი სასწავლო პროცესს ჩაშლის.

ხმაური ახალციხის მეხუთე საჯარო სკოლაში. დირექტორის მოვალეობის ახალი შემსრულებლის დანიშვნას სასწავლო დაწესებულებაში პედაგოგებისა და მოსწავლეების მხრიდან პროტესტი მოჰყვა. მასწავლებლები განათლებისა და მეცნიერების სამინისტროს გადაწყვეტილებას არ ეთანხმებიან და მოითხოვენ, რომ თანამდებობაზე ნანა დათაშვილი დარჩეს.

მეხუთე საჯარო მეხუთე საჯარო სკოლას დირექტორის ახალი მოვალეობის შემსრულებელი ჰყავს. სოფელ არლის მკვიდრი ინგა ვარდიძე განათლებისა და მეცნიერების სამინისტოროს 167–ე ბრძანების მიხედვით “ზოგადი განათლების შესახებ” საქართველოს კანონის 41–ე მუხლის მეოთხე პუნქტისა და 44–ე მუხლის მესამე პუნქტის შესაბამისად პირადი განცხადების საფუძველზე დაინიშნა. იგი ოფიციალურად დღეს სკოლის ადმინისტრაციასა და პედაგოგებს რესურსცენტრის დირექტორმა წარუდგინა. აღნიშნულს სკოლის მასწავლებლების მხრიდან პროტესტი მოჰყვა. პედაგოგები დილიდან სკოლაში გაკვეთილების ჩაშლით იმუქრებოდნენ.. მიუხედავად სასწავლო დაწესებულებაში ხმაურისა, როგორც “მეცხრე არხის” კორესპონდენტი იუწყება  სასწავლო  პროცესი არ ჩაშლილა. მეხუთე საჯარო სკოლის ახალი დირექტორი ინგა ვარდიძე 1993 წლიდან დღემდე სოფელ არლის სკოლაში დაწყებითი კლასების პედაგოგი იყო. მან მიმდინარე წელს დირექტორთა სასერთიფიკატო გამოცდები წარმატებით გაიარა. დღემდე მეხუთე საჯარო სკოლას ნანა დათაშვილი ხელმძღვანელობდა, რომელიც შიდა ბრძანებით დირექტორის მოვალეობის შემსრულებლად 2013 წლის 1 მაისს დაინიშნა. მისი განმარტებით, განათლების სამინისტროს ახალი მოვალეობის შემსრულებლის დანიშვნა კანონის მიხედვით 60 დღის ვადაში შეეძლო. ნანა დათაშვილი კი აღნიშნულ პოსტზე 11 თვის განმავლობაში იმყოფებოდა. ამ დროისათვის მეხუთე სკოლაში რესურსცენტრის დირექტორი ხათუნა ხმალაძეც იმყოფება, რომელიც სიტუაციის დარეგულირებას ცდილობს. როგორ განვითარდება მოვლენები სკოლაში, “ექო” დეტალებს მოგვიანებით მოგაწვდით.

ადიგენის მუნიციპალიტეტის  ორი სკოლა და მსგავსი პრობლემები. დაბა ადიგენისა და ხევაშენის საჯარო სკოლების მოსწავლეები გაუსაძლის პირობებზე საუბრობენ. მათი თქმით  სასწავლო დაწესებულებაში სწავლისთვის შესაბამისი  პირობები არ არის შექმნილი და  შენობაშიც სასწრაფოდ სარეაბილიტაციო სამუშაოებია ჩასატარებელი.

ახალციხის პირველ საჯარო სკოლის მოსწავლეებმა შაკო გიორგაძემ და გიორგი გელაშვილმა ფიზიკოს ექსპერიმენტატორთა კონკურსში გაიმარჯვეს.თავისუფალი უნივერსიტეტის მიერ გამოცხადებული პროექტის ფარგლებში, მათ ორი ინოვაციური ნამუშევარი – ჰიდრო ჰალდერი და ეკო ერთი წარადგინეს. ახალციხელი გამომგონებლების თქმით, მსგავის ტიპის მოწყობილობა საქართველოში ამ დრომდე არავის გამოუგონებია.

უმაღლესი სასწავლებლების წარჩინებული სტუდენტები პრეზიდენტის სტიპენდიებს აღარ მიიღებენ. ჯერ კიდევ 1996 წელს, ედუარდ შევარდნაძის პრეზიდენტობის დროს დაარსებული სტიპენდიები გიორგი მარგველაშვილის პრეზიდენტობისას აღარ გაიცემა. განათლებისა და მეცნიერების სამინისტროს ინფორმაციით, წარმატებული სტუდენტებისთვის თანხა არა პრეზიდენტის სარეზერვო ფონდიდან, არამედ სამინისტროს ბიუჯეტიდან გაიცემოდა. “გიორგი მარგველაშვილმა, განათლების მინისტრობის პერიოდში, სტუდენტური სტიპენდიების პროგრამის მასშტაბები გაზარდა. პროგრამა 2012 წლის ბოლოს გადაიხედა და 2013 წლისათვის გაორმაგებული ბიუჯეტითა და განახლებული სახელწოდებით ამუშავდა. დღეისთვის პროგრამა ორჯერ მეტ სტუდენტს ეხება. ამავე პერიოდშივე მოხდა სხვა პროგრამების შინაარსის, ბიუჯეტისა და სახელწოდებების გადახედვაც, რათა უზრუნველყოფილი ყოფილიყო ამ პროგრამების მაქსიმალური ეფექტურობა. აგრეთვე დავიწყეთ სრულიად ახალი პროგრამები, რომლის პირდაპირი ბენეფიციარებიც ჩვენი სტუდენტები არიან (ზაფხულისა და ზამთრის სკოლები, დოქტორანტების დაფინანსება, სამაგისტრო სამეცნიერო პროგრამები, ბიბლიოთეკების განახლების პროგრამები და სხვა.) რაც შეეხება 2007 წლის პრეზიდენტის განკარგულებით განხორციელებულ პროგრამას, მას დაერქვა პრეზიდენტის სტიპენდია და ამისათვის პრეზიდენტის სარეზერვო ფონდიდან გამოიყო დაფინანსება. 2008 წლიდან სარეზერვო ფონდიდან სტიპენდიების დაფინანსება შეწყდა. მომდევნო წლებში სტიპენდიები ფინანსდებოდა სახელმწიფო ბიუჯეტიდან (განათლებისა და მეცნიერების სამინისტროს ბიუჯეტიდან). შესაბამისად, ეს გარემოება გავითვალისწინეთ და სტიპენდიების განახლებულ პროგრამას დაერქვა სახელმწიფო სტიპენდიის პროგრამა, რაც ადეკვატურია დაფინანსების წყაროდან გამომდინარე”,-ნათქვამია საქართველოს განათლების სამინისტროს განცხადებაში.

იღებდა თუ არა ქრთამს ადიგენის მუნიციპალიტეტის რესურსცენტრის დირექტორი?– ამ საკითხით საქართველოს განათლებისა და მეცნიერების სამინისტროს შიდა აუდიტის დეპარტამენტი დაინტერესდა. მუნიციპალიტეტის საგანმანათლებლო რესურსცენტრში სამკაციანი მონიტორინგის ჯგუფი შევიდა და საჯარო სკოლის ხელმძღვანელები დაკითხა. ძიების დასრულების შემდეგ დაწესებულების დირექტორმა თანამდებობა დატოვა.

ახალციხის რესურსცენტრმა დღეს მუნიციპალიტეტის საჯარო და კერძო სკოლების წარჩინებული მოსწავლეები დაჯილდოვა. ახალგაზრდებისათვის ვერცხლისა და ოქროს მედლების გადაცემა ადმინისტრაციული შენობის საკონფერენციო დარბაზში მოხდა. ახალციხისა რესურსცენტრის ხელმძღვანელი განმარტავს, რომ წაჩინებული მოსწავლეების დაჯილდოება მათი მოტივაციის ამაღლების მიზნით მოხდა.

საქართველოს მასშტაბით საჯარო სკოლების დირექტორების მორიგი სერთიფიცირების პროცესი დაიწყო. ამასთან დაკავშირებით ინფორმაცია განათლებისა და მეცნიერების სამინისტრომ გაავრცელა.

ახალციხელმა მოსწავლეებმა, განათლებისა და მეცნიერების მინისტრის მოადგილესთან ონლაინკონფერენცია გამართეს. კონფერენცია ახალციხის ახალგაზრდულ ცენტრში, სამოქალაქო განათლებისა და პედაგოგთა გადამზადების პროგრამის, სოციალური მედიის ფარგლებში ჩატარდა.

საჯარო სკოლების დირექტორთა მორიგი სერტიფიცირების პროცესი იწყება. ამ თემაზე დღეს, საქართველოს განათლებისა და მეცნიერების მინისტრმა, თამარ სანიკიძემ ბრიფინგი გამართა. კანდიდატთა რეგისტრაცია მიმდინარე წლის 4 მარტს დაიწყება და 16 მარტს დასრულდება. კონკურსში მონაწილეობის საშუალება ნებისმიერ მსურველს აქვს, რომელიც კანონმდებლობით განსაზღვრულ საკვალიფიკაციო მოთხოვნებს აკმაყოფილებს. მათ შორის, იმ პირებსაც, რომლებმაც წინა სერტიფიცირების პროცესი წარუმატებლად დაასრულეს. სერტიფიცირების მიზანია კონკურსანტის პროფესიული კომპეტენციებისა და უნარების შეფასება. პროცესი ორ ეტაპად განხორციელდება – ტესტირება და გასაუბრება. ტესტირება 29-30 მარტს, ელექტრონული ფორმით ჩატარდება. დაინტერესებულ პირებს, რეგისტრაციის გავლა შეეძლებათ 4 მარტიდან ვებგვერდზე http://directors.mes.gov.ge/. საგამოცდო ცენტრები საქართველოს ყველა რეგიონში გაიხსნება. შეფასება ტესტზე მუშაობის დასრულებისთანავე მოხდება. სერტიფიცირებულ დირექტორებს საშუალება ექნებათ მონაწილეობა მიიღონ დირექტორების შესარჩევ კონკურსში. სერტიფიცირების პროცესისა და დირექტორების შესარჩევი კონკურსის დასრულებამდე, დირექტორის მოვალეობის შემსრულებლები მუშაობას ჩვეულ რეჟიმში აგრძელებენ. http://mes.gov.ge/

სამცხე-ჯავახეთის სახელმწიფო უნივერსიტეტმა ავტორიზაცია გაიარა. სასწავლებელში ბაკალავრიატი, მაგისტრატურა და დოქტორანტურა იფუნქციონირებს. უნივერსიტეტში არსებული სიახლეები დღეს პროფესორ–მასწავლებლებმა აბიტურიენტებს გააცნეს.

საქართველოს განათლებისა და მეცნიერების სამინისტრო კლასებში მოსწავლეთა შემცირებას გეგმავს. ამის შესახებ მინისტრმა ჟურნალისტებს განუცხადა. თამარ სანიკიძე მიიჩნევს, რომ მოსწავლეთა სიმცირის ფონზე სკოლებში სწავლის ხარისხი გაუმჯობესდება. საქართველოს განათლებისა და მეცნიერების სამინისტროს ინიციატივას ახალციხის საჯარო სკოლებშიც აფასებენ.

როგორ მიმდინარეობს საგაკვეთილო პროცესი, რა ნაკლოვანებებია და რა სიახლეების დანერგვას ისურვებდნენ სამომავლოდ მასწავლებლები – ამ თემაზე ახალციხის საგანმანათლებლო რესურსცენტრში სამოქალაქო განათლების პედაგოგებთან შეხვედრა გაიმართა. სამოქალაქო განათლების პედაგოგთა ასოციაციის ტრენინგი, ძირითადად, პროფესიული განვითარების საჭიროებებსა და აღნიშნული საგნის სკოლებში სწავლების სპეციფიკას შეეხო.

მომავალი წლიდან შესაძლოა 5 წლის ასაკის ბავშვები საგანმანათლებლო დაწესებულებაში აღარ მიიღონ. შესაბამისი რეკომენდაცია განათლებისა და მეცნიერების სამინისტრომ შეიმუშავა.

სტუდენტის შეჩერებული სტატუსი და საკანონმდებლო ინიციატივა– უმაღლეს სახელმწიფო დაწესებულებებში სწავლის საფასურის გადაუხდელობის გამო ახალგაზრდები სასწავლო პროცესს ეთიშებიან. სამცხე–ჯავახეთის სახელმწიფო სასწავლო უნივერსიტეტში, პირველ სემესტრში, სტატუსი 142 სტუდენტს შეუჩერდა. აღნიშნულთან დაკავშირებით ,,ერთიანი ნაციოანალური მოძრაობა“ პარლამენტის საგაზაფხულო სესიაზე საგანმანათლებლო ინიციატივით შევიდა.

დირექტორთა სასერტიფიკაციო გამოცდის შედეგები ცნობილია. საქართველოს განათლებისა და მეცნიერების სამინისტრო იმ პირთა სიას აქვეყნებს, რომლებმაც წარმატებით დაძლიეს 2013 წლის საჯარო სკოლის დირექტორის შესარჩევი კონკურსის სერტიფიცირების ეტაპი და დირექტორობის უფლება მოიპოვეს. მინისტრის #162 ბრძანება სამინისტროს გვერდზე დღეს გამოქვეყნდა. “ბრძანება შეიძლება გასაჩივრდეს მისი გამოცემიდან ერთი თვის ვადაში, თბილისის საქალაქო სასამართლოში” – ნათქვამია დოკუმენტში. ახალციხის სკოლებიდან სასერტიფიკაციო გამოცდების მეორე, გასაუბრების ეტაპში მონაწილეობა ახალციხის პირველი სკოლის დირექტორმა მაკა ჯანაშვილმა, მეხუთე საჯარო სკოლის დირექტორის მოვალეობის შემსრულებელმა ნანა დათაშვილმა და მეექვსე საჯარო სკოლის დირექტორმა ზაზა თამარაშვილმა მიიღეს. აქედან სერტიფიცირების ეტაპი წარმატებით ზაზა თამარაშვილმა გაიარა. “იმდენად მოულოდნელი იყო ეს პასუხი ჩემთვის, რომ მგონია, ტექნიკური ხარვეზი გაიპარა” – აცხადებს “მეცხრე არხთან” მეხუთე საჯარო სკოლის დირექტორის მოვალეობის შემსრულებელი ნანა დათაშვილი. მან სასერტიფიკაციო გამოცდების პირველ ეტაპზე 90 ქულა დააგროვა.