10 ივლისს საგანმანათლებლო რესურსცენტრის უფროსის თანამდებობზე ტესტირება გაიმართება.  საქართველოს განათლებისა და მეცნიერების სამინისტრო გამოცხადებულ  კონკურსში მონაწილეთა სიას ავრცელებს. ტესტირებაზე დაშვებული კონკურსანტები განათლების მართვის საინფორმაციო სისტემის შენობაში (მისამართი: ფანჯიკიძის #1ა.) უნდა გამოცხადდნენ და თან პირადობის დამადასტურებელი დოკუმენტი იქონიონ.

სამცხე–ჯავახეთის სახელმწიფო სასწავლო უნივერსიტეტის რექტორი არჩეულია. უმაღლეს სასწავლო დაწესებულებას მერაბ ბერიძე უხელმძღვანელებს. აკადემიური საბჭოს უმრავლესობის  გადაწყვეტილება ცნობილი 3 ივლისს,  13 საათსა და 25 წუთზე გახდა. აღნიშნულ თანამდებობაზე კენჭს მერაბ ბერიძის გარდა, ამავე უნივერსიტეტის ყოფილი ლექტორი, გურამ კუტალაძე იყრიდა.

   სამცხე–ჯავახეთის სახელმწიფო სასწავლო უნივერსიტეტის რექტორი სრული პროფესორი მერაბ ბერიძე გახდა. რექტორის არჩევნები სასწავლებელში დღეს გაიმართა.  კენჭისყრაში აკადემიური საბჭოს 8 წევრი მონაწილეობდა. ოქმი 13:25 საათზე შედგა. ხმის მიცემა ფარულად წარიმართა. 8 ხმიდან ერთი ბიულეტენი გაუქმდა, ერთი გურამ კუტალაძემ, 6 კი მერაბ ბერიძემ მიიღო. შეგახსენებთ, რომ უნივერსიტეტში, რექტორის არჩევნებისთვის, კონკურსში მონაწილეობას 2 კანდიდატი იღებდა.  უმაღლესი სასწავლებლის ხელმძღვანელის პოსტის დასაკავებლად  მერაბ ბერიძე და  გურამ კუტალაძე იბრძოდნენ.

1 ივლისს აბიტურიენტებმა გამოცდა ზოგად უნარებში ჩააბარეს. ახალციხის საგამოცდო ცენტრში პროცესი 2 სესიად წარიმართა. ორივე სესიაზე სულ 19 აბიტურიენტი არ გამოცხადდა.

გურამ კუტალაძე– ,,რექტორის მოვალეობის შემსრულებლად დაინიშნა ადამიანი, რომელიც კორუფციული მეთოდებით მართავდა უნივერსიტეტს“–  ამ სახელწოდების მასალას, რომელიც ტელეკომპანია ,,მეცხრე არხის“ ბლოგზე http://9arkhi.wordpress.com/    28 ივნისს გამოქვეყნდა და 3 ივლისის რექტორის არჩევნებს ეხებოდა– სამცხე–ჯავახეთის სახელმწიფო–სასწავლო უნივერსიტეტის თანამშრომლები გამოეხმაურნენ.  მასალაში რექტორობის ერთერთი კანდიდატი,  გურამ კუტალაძე საკუთარ შესაძლებლობებსა და კონკურენტის, ამჟამინდელი  რექტორის მოვალეობის შემსრულებლის,  მერაბ ბერიძის, უნივერსიტეტში მმართველობის 15 წლიან პერიოდზე საუბრობდა– ,,ჩემთვის და    ჩემი  კოლეგებისთვის  იყო აბსოლუტურად  მიუღებელი, კორუფციული  ატმოსფერო, რომელიც იქ სუფევდა. ამის შემდეგ მე წავედი უნივერსიტეტიდან. ძალიან ცუდი მოხდა, რომ რექტორის მოვალეობის შემსრულებლად დაინიშნა ადამიანი, რომელიც  15 წლის განმავლობაში კორუფციული მეთოდებით მართავდა უნივერსიტეტს. ჩემთვის მიუღებელია მსგავსი მეთოდები და მსგავსი წარსულისა და პერსპექტივის ადამიანი ხელმძღვანელობდეს ისევ  უნივერსიტეტს”  –განაცხადა ,,ექოსთან“ სატელეფონო საუბარში გურამ კუტალაძემ. გურამ კუტალაძის განცხადებას,  სასწავლებლის ასოცირებულმა პროფესორმა, ფილოლოგიის დოქტორმა,  მაკა კაჭკაჭიშვილმა–ბერიძემ, 28 ივნისის ,,ექოს“ პირდაპირ ეთერში უპასუხა. ,,მერაბ ბერიძეს ჩემი დასაცავი არაფერი არ სჭირს, მე აქ მის დასაცავად არ მოვსულვარ. მით უფრო ბატონი გურამ კუტალაძისგან. როდესაც მოვისმინე სიტყვები  ზნეობა,  ღირსება– მე ხმამაღლა ვაცხადებ, ბატონი გურამის სიტყვები შეურაცხყოფს პირადად ჩემს ღირსებას. მე ამ ეთერში მოვედი საკუთარი ღირსების დასაცავად. ის პერიოდი, რომელსაც ბატონი გურამი ახასიათებს, ჩემი სტუდენტობის, ჩემი ამ უნივერსიტეტში მუშაობის ხანაა და მეტსაც გეტყვით,  მისგან განსხვავებით, მე უნივერსიტეტი არცერთი დღით არ დამიტოვებია.  სწორედ ეს მაძლევს იმის ძალას, რომ ეს სიტყვები ვთქვა,  არ შემიძლია სერიოზულად მოვეკიდო იმ თემებს,  რომელზეც ბატონი გურამი საუბრობს, თუმცა უპასუხოდაც რომ დავტოვო არ შემიძლია,   მის მიერ გაცხადებულ სიტყვებზე მეტად,  მე ვგრძნობ პასუხისმგებლობას საკუთარ სიტყვებზე ‘’–განაცხადა ,,ექოს“ პირდაპირ ეთერში მაკა კაჭკაჭიშვილმა. იხილეთ ვიდეო :  http://www.youtube.com/watch?v=NWTkKoH1Ha0

    წიგნები,  რომელიც განადგურების პირას იყო სოფელ ზემო სხვილისის ბიბლიოთეკიდან დღეს,  ახალციხეში გადმოიტანეს.  ამჟამად, სახელმძღვანელოები მეექვსე საჯარო სკოლაში ინახება. დირექტორის თქმით, სხვილისიდან წიგნების გადმოტანა სკოლის სახსრებით, ადგილობრივ ხელისუფლებასთან შეთანხმებით მოხდა. „დღეს სხვილისიდან 3 000–ზე მეტი წიგნი გადმოვიტანეთ. მათი ნაწილი ნორმალურ მდგომარეობაშია,  ნაწილი კი ჩამოწერას ექვემდებარება. ხვალ გადავახარისხებთ და წიგნებს სკოლაში შევინახავთ.  შემდეგ კი სპეციალური კომისია გადაწყვეტს  რა ბედი ეწევა“–განაცხადა „ექოსთან“ სატელეფონო საუბარში ახალციხის მეექვსე საჯარო სკოლის დირექტორმა ზაზა თამარაშვილმა. ზემო სხვილისის ბიბლიოთეკა 2006 წელს გაუქმდა. იმისათვის, რომ სოფელი ბიბლიოთეკის გარეშე არ დარჩენილიყო, 2008 წელს,  სხვილისის წიგნადი ფონდი  ახალციხის მე–6 საჯარო სკოლის ბალანსზე გადავიდა. დირექტორი ამბობს, რომ წიგნებზე პასუხისმგებლობის აღება მისი ინიციატივა არ ყოფილა, რადგან სკოლას შენახვისათვის  საკმარისი სახსრები არ ჰქონდა.  მიუხედავად ამისა, იგი იძულებული გახდა პირობას დათანხმებოდა. წინააღმდეგ შემთხვევაში სოფელი  ბიბლიოთეკის გარეშე რჩებოდა. ზაზა თამარაშვილის თქმით,  სოფელში ბიბლიოთეკის ფუნქციონირების სურვილი ადგილობრივებს არ ქონიათ. ამიტომ, ამ პერიოდის მანძილზე წიგნადი ფონდი უყურადღებოდ დარჩა და სკოლამაც თავის სახსრებით ვერ შეინახა. სკოლის დირექტორი განმარტავს, რომ წიგნადი ფონდის რაოდენობა  ახლაც იგივეა, რაც მისი  ჩაბარებისას იყო. „შესაძლოა, მას მხოლოდ გარკვეული მიზეზების გამო მცირე ნაწილი აკლდეს“–ამბობს ზაზა თამარაშვილი. სოფელ სხვილისიდან გადმოტანილი წიგნები ახალციხის მე–6 საჯარო სკოლაში დარჩება, რომელსაც  სასწავლო დაწესებულების პედაგოგები და მოსწავლეები გამოიყენებენ.

სამცხე–ჯავახეთის სახელმწიფო–სასწავლო უნივერსიტეტში, რექტორის არჩევნებისთვის, კონკურსში მონაწილეობას 2 კანდიდატი მიიღებს.  უმაღლესი სასწავლებლის ხელმძღვანელის პოსტის დასაკავებლად  მერაბ ბერიძე და  გურამ კუტალაძე იბრძოლებენ.  რექტორის არჩევნები 3 ივლისს ჩატარდება, როგორც ერთერთი კანდიდატი გურამ კუტალაძე  ამბობს  მას უნივერსიტეტის განვითარების გეგმა უკვე წარდგენილი აქვს და გასაუბრებაზეც იმყოფებოდა,  მისი თქმით, მისი რექტორობა სასწავლებელს ბევრ სარგებელს მოუტანს. 

სამწლიანი  პაუზის შემდეგ ახალციხეში პროფკავშირების შეხვედრა  გაიმართა.   მუნიციპალიტეტის სკოლების წარმომადგენლებს  საქართველოს პედაგოგთა და მეცნიერთა თავისუფალი პროფკავშირის პრეზიდენტი შეხვდა.  მაია კობახიძემ მონაწილეებს ორგანიზაციის შესახებ ინფომაცია მიაწოდა, მათი პრობლემები მოისმინა  და სამომავლო გეგმებზეც ისაუბრა.  

იმიტირებული ევაკუაცია და საბავშვო ბაღის აღსაზრდელების თავდაცვა საშიში ბუნებრივი მოვლენებისაგან. დაბა ადიგენის საბავშვო ბაღში “ბუნებრივი კატასტროფების რისკის შემცირების ინკლუზიური პროგრამის” ფარგლებში ღონისძიება გაიმართა. მასში მონაწილეობა ადიგენის მუნიციპალიტეტის სკოლამდელი აღზრდის დაწესებულებებმა მიიღეს. პატარებმა სტუმრების წინაშე მიღებული ცოდნა სიმღერებით, თეატრალური დადგმებითა და ნახატებით წარმოაჩინეს.

დღეს, საქართველოს ზოგადსაგანმანათლებლო დაწესებულებებში სკოლის თვითმმართველობის უმაღლესი ორგანოს – სამეურვეო საბჭოს არჩევნები ჩატარდა. კანდიდატებს შორის მშობლებმა და პედაგოგებმა თავიანთი არჩევანი გააკეთეს. ახალციხის საგანმანათლებლო რესურსცენტრის უფროსის მოვალეობის შემსრულებლის დიანა ინასარიძის ინფორმაციით, საჯარო სკოლებში არჩევნებმა დარღვევების გარეშე ჩაიარა.

“აქცია–პროტესტი საქართველოს განათლებისა და მეცნიერების სამინისტროს წინააღმდეგ” – ამ სახელწოდების საპროტესტო აქცია  ჯავახეთში გამომცემლობა “ინტელექტის” დირექტორმა გამართა. კახა კუდავა ახალქალაქის პირველ და მეორე საჯარო სკოლებს ესტუმრა და მოსწავლეეებს საჩუქრად გამომცემლობების: “არტანუჯის”, “დიოგენესა” და “ინტელექტის” მიერ დაბეჭდილი წიგნები გადასცა.

სამცხე-ჯავახეთის სახელმწიფო  სასწავლო უნივერსიტეტში ბილინგვურ სწავლებასთან დაკავშირებით სამუშაო შეხვედრა გაიმართა. ტრენინგ-სემინარს  ჯავახიშვილის, ილიას, სამცხე-ჯავახეთის, ლატვიის, ლიტვის, გერმანიისა და უკრაინის  უნივერისტეტების წარმომადგენლები ესწრებოდნენ. მათ ბილინგვურ სწავლებასთან დაკავშირებით ერთმანეთს ცოდნა გაუზიარეს. ღონისძიებაზე მულტილინგვური თეორიული და პრაქტიკული ასპექტების განხილვა მოხდა.  

საქართველო, კითხვით უნარებში, მათემატიკასა და მეცნიერებებში 74 ქვეყანას შორის ყველაზე დაბალი შედეგების მქონე ქვეყნებს შორისაა. “მოსწავლეების საერთაშორისო შეფასების” შედეგები ეკონომიკური განვითარებისა და თანამშრომლობის ორგანიზაციამ წარმოადგინა.

მომავალ ლიდერთა გაცვლითი პროგრამა – „ფლექსის” ფარგლებში დემოკრატიული ჩართულობის ცენტრში შეხვედრა გაიმართა. ახალციხის პირველი საჯარო სკოლის მოსწავლემ, რომელიც აღნიშნული პროგრამით ამერიკაში იმყოფებოდა, დღეს თანატოლებს თავისი გამოცდილება გაუზიარა.

საქართველოს განათლებისა და მეცნიერების მინისტრი ჯავახეთს ესტუმრა. გიორგი მარგველაშვილმა ნინოწმინდის მუნიციპალიტეტის სოფელ ფოკაში სომხურენოვანი საჯარო სკოლის პედაგოგი კლარა ფოცხვერაშვილი სამკერდე ნიშნით – “ამაგდარით” დააჯილდოვა

ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრი ალექსანდრე პეტრიაშვილი სამცხე–ჯავახეთის სახელმწიფო სასწავლო უნივერსიტეტს სტუმრობს. მინისტრმა სასწავლებლის პირველ კორპუსში სტამბა, ბიბლიოთეკა და ამერიკის კუთხე მოინახულა. ალექსანდრე პეტრიაშვილი უნივერსიტეტის დათვალიერების შემდეგ, მეორე კორპუსში, 01:30 საათზე კონფერენციას გამართავს, სადაც ეროვნული ინტეგრაციის საკითხებზე ისაუბრებს.

ჰქონდა თუ არა პოლიტიკური სარჩული ჟენია მერაბიშვილის გათავისუფლებას -ამასთან დაკავშირებით საკუთარ მოსაზრებას ახალციხელები გამოთქვამენ. რას ასახელებენ ადგილობრივები ყოფილი დირექტორის უფლება-მოვალეობის შეწყვეტის მიზეზად, იყო თუ არა ეს პოლიტიკური დაპირისპირება ნაციონალური მოძრაობის გენერალური მდივნის დედასთან.

ახალციხის პირველ საჯარო სკოლაში დებატები გაიმართა. ოთხი სასწავლო დაწესებულების გუნდები ერთმანეთს სხვადასხვა თემის ირგვლივ არგუმენტირებულ მსჯელობაში, პრეზენტაციის უნარსა და ემოციის მართვაში შეეჯიბრნენ. სასკოლო დებატების პროექტს საერთაშორისო ასოციაცია „კივიტას გეორგიკა” ახორციელებს.

ახალციხის პირველმა საჯარო სკოლამ  ინტელექტუალურ თამაშს რა? სად? როდის? უმასპინძლა. მასში მონაწილეობა მუნიციპალიტეტის ათმა სასწავლო დაწესებულებამ მიიღო. თამაში მოსწავლეებისათვის ინტელექტუალური კლუბის  რა?სად? როდის?  ფედერაციის ორგანიზებითა და პროექტის  „ინტელექტის დღე საქართველოში”  ფარგლებში, მთელი ქვეყნის მაშტაბით ჩატარდა.

ვარძიის კომპლექსმა სტუდენტ-არქეოლოგთა საერთაშორისო კონფერენციას უმასპინძლა. შეხვედრა ისტორიულ ადგილზე ივანე ჯავახიშვილის სახელობის თბილისის სახელმწიფო უნივერსიტეტის ეგიდით გაიმართა. მასში მონაწილეობა უცხოეთის სხვა უმაღლეს სასწავლებლებთან ერთად ოქსფორდის უნივერსიტეტმაც მიიღო. კონფერენციის შემდეგ მონაწილეებმა ასპინძის მუნიციპალიტეტში არსებული ნასოფლარი ბერთაყანა მოინახულეს.