ვარძიის არქიტექტურული კომპლექსის გადარჩენის პროგრამა ამოქმედდა. ამასთან დაკავშირებით, 20 ნოემბერს, სამცხე–ჯავახეთში პრემიერ–მინისტრი იმყოფებოდა. ირაკლი ღარიბაშვილმა მიმდინარე სამუშაოები დაათვალიერა და მის მნიშვნელობაზე ისაუბრა.

ახალციხელი მოცეკვავეების კიდევ ერთი წარმატება ქვეყნის მაშტაბით. 14 და 15 ნოემბერს დედაქალაქში გამართულ კონკურსში, რომელშიც საქართველოს სხვადასხვა რეგიონიდან ათობით მოცეკვავე მონაწილეობდა,  ახალციხელმა სპორტსმენებმა   მოწინავე ადგილები დაიკავეს.   სტუდია „სიხარულის“ მოსწავლეები საერთაშორისო ჩემპიონატისთვის ემზადებიან, რომელიც დეკემბრის თვეში სომხეთში ჩატარდება.

ახალციხის მუნიციპალიტეტში აქტიური ტურისტული სეზონი დასრულდა.  რაბათის ისტორიული  კომპლექსის ადმინისტრაცია  მომავალი სეზონისთვის  ემზადება. ციხის ხელმძღვანელობა დამსვენებლებისათვის სრული კომფორტის შექმნასა და ინფრასტრუქტურის მოწესრიგებას საერთაშორისო სტანდარტების  გათვალისწინებით გეგმავს.  

მესხეთის  თეატრმა მაყურებელს მორიგი პრემიერა შესთავაზა. “კარუსელი” – ასე ჰქვია კომედიური ჟანრის სპექტაკლს, რომელიც თანამედროვე ფრანგული კომედიების სიუჟეტების მიხედვით დაიდგა.

საქართველოში, კულტურულ  მემკვიდრეობებსა  და ლანდშაფტურ ძეგლებზე ინოვაციული საინფორმაციო დაფები განთავსდება. პროექტთან  დაკავშირებით, რაბათის ისტორიულ კომპლექსში პრეზენტაცია  გაიმართა. მას, როგორც ადგილობრივი ხელისუფლების, ასევე პარტნიორი ქვეყნების წარმომადგენლები დაესწრნენ.  

მესხეთის სახელმწიფო დრამატული თეატრის სცენაზე რიგით მერვე პრემიერა გაიმართა. სპექტაკლი სახელწოდებით „ძახილი“ თეატრის სამხატვრო ხეწლმძღვანელმა, ნოდარ დუმბაძის სამი ცნობილი ნაწარმოების მიხედვით დადგა.  

    ადიგენის მუნიციპალიტეტში “ზარზმობის” დღესასწაულისთვის ემზადებიან. ადგილობრივი ხელისუფლების წარმომადგენლები აცხადებენ, რომ წელს დღესასწაული  გრანდიოზული ღონისძიებით აღინიშნება. სოფელ ზარზმაში ადგილობრივი ფოლკლორული ანსამბლების მონაწილეობით  გაიმართება კონცერტი, რომელში მონაწილეობას, ხალხური სიმღერისა და ცეკვის სახელმწიფო აკადემიური ანსამბლი “ერისიონიც” მიიღებს.  გარდა ამისა, მოეწყობა ხელნაკეთი ნივთების გამოფენა. სტუმრებს, ასევე, საშუალება მიეცემათ მესხური სამზარეულო დააგემოვნონ. დღესასწაულზე ადიგენის მუნიციპალიტეტში მინისტრებს ელოდებიან. “ზარზმობაზე” მიწვეულია ქვეყნის პრემიერ მინისტრი ირაკლი ღარიბაშვილიც.   დღესასწაული  10:00 საათზე, ზარზმის ტაძარში წირვით დაიწყება, 13:00 საათზე კი ამ დღისადმი მიძღვნილი ღონისძიებით გაგრძელდება, რისთვისაც ადგილობრივი ბიუჯეტიდან 15 ათას ლარამდე გამოიყო. “ზარზმობა” სახალხო-რელიგიური დღესასწაულია, რომელიც ყოველი წლის 11 ნოემბერს,  ცნობილი საეკლესიო მოღვაწის სერაპიონ ზარზმელის ხსენების დღეს აღინიშნება.

     მესხეთის პროფესიული სახელმწიფო დრამატული თეატრი  პრემიერისათვის ემზადება. “ძახილი” –ასე ჰქვია სპექტაკლს, რომელიც  თეატრის სამხატვრო ხელმძღვანელის  რეჟისორობით იდგმება. დღეს მსახიობებმა გენერალური რეპეტიცია გაიარეს. ლია სულუაშვილი „მეცხრე არხთან“ განმარტავს, რომ სპექტაკლის დადგმა ნოდარ დუმბაძის სამი ნაწარმოების „ძაღლის,“ „სისხლისა“ და „დიდროს“ მიხედვით გადაწყვიტა. სპექტაკლი ერთმოქმედებიანია და იგი ტრაგიკომედიური ჟანრისაა. მასში, როგორც თეატრის ძველი დასი, ასევე, დამწყები მსახიობებიც  მონაწილეობენ. პრემიერა 11 ნოემბერს 19 საათზე დაიწყება. მისი ნახვის საშუალება  მაყურებელს 12 ნოემბერსაც ექნება.

ახალციხის სამხატვრო სკოლაში, მუნიციპალიტეტის 13 საჯარო სკოლის  ახალგაზრდების ნამუშევრების გამოფენა მოეწყო.  ღონისძიების პირველ ნაწილში  სოფელ გურკელის  სკოლის მოსწავლეებმა  სხვადასხვა თემაზე შექმნილი 100 ნახატი და  ხელნაკეთი ნივთები წარმოადგინეს.

რეგიონებში კინოჩვენებების პროგრამა გრძელდება. საქართველოს კულტრისა და ძეგლთა დაცვის მინისტრი პროგრამის ფარგლებში  ნინოწმინდას ესტუმრა და კინოჩვენებისთვის საჭირო ტექნიკური აპარატურით აღჭურვილი კინოკლუბი საზეიმოდ საზეიმოდ გახსნა.

სტუდია “სიხარულის” მორიგი წარმატება.  კონკურსზე,  „შემოდგომის თბილისი“, ახალციხელმა მოცეკვავეებმა საპრიზო ადგილები დაიკავეს. მათ ოთხ კატეგორიაში პირველი, მეორე და მესამე ადგილები მოიპოვეს და დედაქალაქიდან სიგელებითა და მედლებით დაბრუნდნენ.

მესხეთის პროფესიულ სახელმწიფო დრამატულ თეატრში კომპოზიტორ ნოდარ ნიკოლაიშვილის საიუბილეო საღამო გაიმართა.  ღონისძიებაზე ქართული ესტრადის ცნობილმა მომღერლებმა კომპოზიტორის მიერ დაწერილი და საზოგადოებისათვის კარგად ნაცნობი სიმღერები შეასრულეს. ადგილობრივი მაყურებლის წინაშე, ნუგზარ კვაშალი, ზურა მანაგაძე, ქეთი გომართელი, ტატო გოდერძიშვილი, გურამ ჯაში  წასდგნენ.

29 ოქტომბერს, მესხეთის პროფესიულ სახელმწიფო დრამატულ თეატრში, კომპოზიტორ ნოდარ ნიკოლაიშვილის შემოქმედებითი საღამო გაიმართება. ღონისძიებაზე ქართული ესტრადის ცნობილი მომღერლები კომპოზიტორის მიერ დაწერილ სიმღერებს შეასრულებენ. საღამო ახალციხის მუნიციპალიტეტის მერიის ინიციატივით ეწყობა. მასზე დასწრება ნებისმიერ მსურველს შეეძლება.  მერიის კულტურის სამსახურის სპეციალისტის ინფორმაციით, ღონისძიება 18:00 საათზე დაიწყება. მარინა მერაბიშვილის თქმით, ნოდარ ნიკოლაიშვილის შემოქმედებითი საღამო ახალციხის გარდა, რამდენიმე ქალაქში უკვე გაიმართა. ღონისძებაზე დასწრება უფასოა.

შემთხვევითობა,  სიყვარულის ისტორია, უცნაურად განვითარებული მოვლენები და ქორწინებით დაგვირგვინებული ამბავი–ახალციხელმა მაყურებელმა დღეს მესხეთის სახელმწიფო პროფესიულ დრამატულ თეატრში პრემიერა იხილა.  „მაცეკვე ტანგო“, ერთმოქმედებიანი კომედიაა. მისი ხილვა მაყურებელს 28 ოქტომბერსაც შეეძლება.

ქართული არამატერიალურ–კულტურული მემკვიდრეობის დაცვაში გამორჩეული ღვაწლისათვის და ტრადიციების შენარჩუნებისათვის, სოფელ მუსხში მცხოვრებ მარიამ ჟუჟნაძესცოცხალი საუნჯის წოდება მიენიჭა. მარო ბაბოს სიგელი კულტურული მემკვიდრეობის დაცვის ეროვნული სააგენტოს გენერალურმა დირექტორმა გადასცა.

ქართული არამატერიალურ, კულტურულ  მემკვიდრეობის დაცვაში გამორჩეული ღვაწლისატვის და ახალგაზრდა თაობის ტრადიციების შესახებ ცოდნის გადაცემისათვის, სოფელ მუსხში მცხოვრებ მარიამ ჟუჟუნაძეს ცოცხლი საუნჯის წოდება მიენიჭება. ტიტულს დღეს, კულტურული მემკვიდრეობის დაცვის ეროვნული სააგენტოს გენერალური დირექტორი მიანიჭებს. ნიკოლოზ ანთიძე ახალციხის მუნიციპალიტეტში, სოფელ მუსხს თავად ესტუმრება. მარიამ ჟუჟუნაძე უკვე 70 წელზე მეტია ხალიჩებსა და ფარდაგებს ქსოვს, მას მას ქვეყნის მასშტაბისთ არაერთ კულტურულ ღონისძიებაში აქვს მონაწილეობა მიღებული.  

აწყურის ციხეზე ფასდის ნაწილი ჩამოინგრა.  ძეგლიდან ჩამოცვენილმა ქვებმა საავტომობილო გზა ჩახერგა.  სოფლის მაცხოვრებელები  ამბობენ,  რომ აღნიშნულ მონაკვეთზე გავლა საშიში გახდა.  ადგილობრივი მოსახლეობა დახმარებას ცენტრალური ხელისუფლებისგან ითხოვს. კულტურის სამინისტროდან  სპეციალისტები ძეგლზე უკვე იმყოფებოდნენ, თუმცა დაიწყება თუ არა გამაგრებითი სამუშაოები  ახლო მომავალში ჯერჯერობით უცნობია.

მესხეთის პროფესიული სახელმწიფო დრამატული  თეატრი პრემიერისთვის ემზადება. 9 ოქტომბერს ახალციხელი მაყურებელი საქართველოს დამსახურებული არტისტის ვაჟა ნიკოლაშვილის საბენეფისო სპექტაკლს „იეთიმ გურჯს“ იხილავს.  თეატრის სამხატვრო ხელმძღვანელის და დამდგმელი რეჟისორის  განმარტებით ვაჟა ნიკოლაშვილი გამორჩეული მსახიობია,  რომელიც საბენეფისო წარმოდგენას იმსახურებს.  ლია სულუაშვილის  თქმით,  წლების წინ დადგმული სპექტაკლი ადგილობრივებში წარმატებით სარგებლობდა .  ამიტომ იგი იმედოვნებს, რომ პრემიერას მაყურებელთა ნაკლებობა არ შეეტყობა.

ახალციხის მერმა დღეს სამადლობელი სერტიფიკატებითა და სამახსოვრო საჩუქრებით სახალხო არტისტები ვახტანგ კვესელაძე და ნათელა იაძე დააჯილდოვა. გიორგი კოპაძემ ხელოვანები საკუთარ კაბინეტში მიიპატიჟა და მათ სამცხე-ჯავახეთში კულტურის დარგში გაწეული ღვაწლისათვის  მადლობა გადაუხადა. ხელოვანი ცოლ-ქმარი  სცენაზე  50 წლის განმავლობაში ერთად იდგნენ.

სახალხო დღესასწაული „შოთაობა” თანამედროვე მუსიკის შემსრულებელი ბენდის ,,ნალი“ და ფოლკლორული ანსამბლის „თამარისი“ კონცერტით გაიხსნა. ამის პარალელურად ვარძიის მიმდებარე ტერიტორიაზე ხალხური რეწვის ოსტატთა გამოფენა-გაყიდვა და სპორტული ღონისძიებები: მკლავჭიდი, ქართული ჭიდაობა, საჯილდაო ქვის აზიდვა მოეწყო, სპორტულ ღონისძიებებში გამარჯვებულებს საჩუქრად ისევე როგორც ყოველ წელს ცხვარი გადაეცათ. სტუმრებს მთელი დღის განმავლობაში შესაძლებლობა ჰქონდათ გაცნობოდნენ სახალხო დღესასწაულისათვის საგაგებოდ მოწყობილ მესხურ ოდებში ასპინძის მუნიციპალიტეტში არსებული სოფლების სამზარეულოს, ტრადიციებსა და ადათ-წესებს. ადგილზე მზადდებოდა როგორც მესხური ტრადიციული ისე ეროვნული კერძები.