ამ წუთებში, ,,ახალციხის ციხის” ტერიტორიაზე  ანსამბლ ,,რუსთავის” კონცერტი მიმდინარეობს, რაც ისტორიულ კომპლექსში ტურისტული სეზონის გახსნას უკავშირდება. ცოტა ხნის წინ  კი კონცერტის პარალელურად, ,,ახალციხის ციხეზე” მცირე ინცინდენტი მოხდა, ,,ნაციონალური მოძრაობის” მხარდამჭერმა პლაკატი გაშალა, სადაც ეწერა ,,თავისუფლება ვანო მერაბიშვილს”.   დაცვამ პიროვნებას  პლაკატი გამოართვა, თუმცა მას ტერიტორია არ დაუტოვებია და კონცერტს ესწრება. ,,ეს კომპლექსი ვანო მერაბიშვილის აშენებულია, დღეს აქ კონცერტი მიმდინარეობს, სეზონი იხსნება საზეიმოდ, ის კი ამ ხელისუფლების წარმომადგენლებმა ციხეში ჩასვეს, სწორედ ამ ფაქტს ვაპროტესტებ, ვანო მერაბიშვილმა ახალციხისთვის და საქართველოსთვის ბევრი რამ გააკეთა”–განაცხადა ,,ექოსთან”  ნიკოლოზ ხიზაძემ.  შეგახსენებთ, რომ დღეს ახალციხის ციხეზე” ტურისტული სეზონი ოფიციალურად გაიხსნა. სპეციალურად ამ დღისათვის, ახალციხეში ანსამბლი ,,რუსთავი” კონცერტს მართავს, გარდა ამისა, ღონისძიებას ჯაყელთა საგვარეულოს წარმომადგენლები და სხვა საპატიო სტუმრები ესწრებიან.  ახალციხის ციხის ტერიტორიაზე ,,ექოს” გადამღები ჯგუფი იმყოფება, დეტალებს მოგვიანებით მოგაწვდით.

ახალციხის მუნიციპალიტეტის სოფელ თისელში ნანგრევებად ქცეული გუმბათოვანი ტაძრის აღდგენა იწყება. ეკლესიას გაწმენდითი სამუშაოები ჯერ კიდევ გასულ წელს ჩაუტარდა. მისი რეაბილიტაციისთვის პროექტი მუნიციპალიტეტის კულტურის სამსახურის სპეციალისტებმა, მემკვიდრეობის სააგენტოსა და კულტურისა და ძეგლთა დაცვის სამინიოსტროს წარმომადგენლებთან ერთად შეიმუშავეს.

27 მარტს თეატრის საერთაშორისო დღე აღინიშნება. თარიღი მესხეთის პროფესიულმა სახელმწიფო დრამატულმა თეატრმა სპექტაკლით აღნიშნა. მაყურებელმა დათო ტურაშვილის პიესა ,,დოდოს მოლოდინში” იხილა. სადაც ქართველი ემიგრანტი ქალბატონები და მათი ცხოვრების მტკივნეული დეტალები, მესხეთის თეატრის სცენაზე ახალგაზრდა რეჟისორმა, ვახტანგ ბერიძემ გააცოცხლა.

ახალციხის მკვიდრის მარი გიორგაძის დასახმარებლად ახალციხეში საქველმოქმედო კონცერტი გაიმართა. ღონისძიებას ორგანიზება “თბილისის სითიმ” გაუწია. მასში მონაწილეობა ადგილობრივმა და დედაქალაქიდან ჩამოსულმა მომღერლებმა მიიღეს. კონცერტი მესხეთის სახელმწიფო პროფესიულ დრამატულ თეატრში გაიმართა. ორგანიზატორების განმარტებით, ღონისძიებიდან დაახლოებით 8 000 ლარი შეგროვდა. შეგახსენებთ, რომ მარი გიორგაძეს ლეიკემიის მწვავე ფორმა აღმოაჩნდა. მას გადაუდებელი ოპერაცია ესაჭიროება, რომელიც 200 000 ევრო ჯდება. მსურველებს დახმარება კვლავაც შეუძლიათ თანხის გადარიცხვით, შემდეგ საბანკო რეკვიზიტებზე: ბანკი კონსტანტა GE34CN0000036101444446 GEL, ლიბერთი ბანკი GE65LB0711177415987000GEL/USD/EVR, საქართველოს ბანკი GE59BG0000000340257900, პრივატბანკი GE88TPU249067354997696. ტელეფონის ნომერი – 0901700076, რომელზე დარეკვაც მაგთისა და ბილაინის აბონენტებს შეუძლიათ. ზარის ღირებულება 1 ლარია.

მეორე გადაცემა

ქალთა საერთაშორისო დღეს ახალციხეში აქცია გაიმართა. მუნიციპალიტეტის გამგეობის კულტურის სამსახურმა, 8 მარტთან დაკავშირებით ქალბატონები ყვავილებით დაასაჩუქრა. ყოჩივარდების თაიგული ქალაქში ასობით მანდილოსანმა მიიღო. ღონისძიებისათვის ადგილობრივი თვითმმართველობიდან 300 ლარი გამოიყო, აღნიშნული თანხით კი გამგეობის კულტურის სამსახურმა 600 თაიგული შეიძინა. მსგავს აქციებს მუნიციპალიტეტის გამგეობა 4 წელია ტრადიციულად აწყობს. ქალთა საერთაშორისო დღე, 8 მარტი  მთელი მსოფლიოს მასშტაბით აღინიშნება. დღესასწაულის დაწესების იდეა პირველად მე–20  საუკუნის დამდეგს გაჩნდა.

,,ბაკურიანობა 2014″ სამთო–სათხილამურო კურორტზე, სხვადასხვა სპორტული და კულტურული ღონისძიებებით დატვირთული სამი დღე ზამთრის მიწურულს. რიგით 36 –ე ,,ბაკურიანობა” სამცხე–ჯავახეთში.

მესხეთის თეატრმა 2014 წლის სეზონი, გასვლითი ტურით გახსნა. ადგილობრივი მსახიობების 12 კაციანი დასი ნინოწმინდის ბავშვთა სახლში გაემგზავრა. მათ აღსაზრდელებს, ხალხური ზღაპრის „ნაცარქექიას “ გმირები გაუცოცხლეს. პიესის ავტორი გიორგი ნახუცრიშვილია, ხოლო დამდგმელი რეჟისორი ლია სულიაშვილი. თეატრის ადმინისტრაციაში ამბობენ, რომ სპექტაკლი საქველმოქმედო ხასიათისაა და მსგავსი ტიპის გასვლითი ტურები მომავალშიც გაგრძელდება. მესხეთის პროფესიულ სახელმწიფო დრამატულ თეატრში ამ ეტაპზე სოსო ნემსაძის რეჟისორობით ოთხი სპექტაკლის მზადდება მიმდინარეობს. რომელსაც თეატრალური დასი გორელ მაყურებელს უჩვენებს. გასვლითი ტურნე 1–დან 5 მარტამდე გაგრძელდება. ადგილობრივი მაყურებლისათვის კი თეატრალური სეზონი მას შემდეგ გაიხნება, როდესაც ტემპერატურა მოიმატებს. თეატრის ადმინისტრაციაში აცხადებენ, რომ სიცივის გამო ამ ეტაპზე, სცენაზე გაჩერება შეუძლებელია.

მესხეთის პროფესიული სახელმწიფო დრამატული თეატრის 2014 წლის ბიუჯეტი 80 000 ლარით გაიზარდა. თუმცა თეატრის ადმინისტრაციაში აცხადებენ, რომ აღნიშნული თანხა პრობლემების მოსაგვარებლად საკმარისი არ არის. ადგილობრივ მსახიობებს ახალი სეზონისათვის მზადება კვლავ სიცივეში უწევთ.

არლის სამრევლო სკოლამ სასწავლო წლის სემესტრი შეაჯამა. ამასთან დაკავშირებით მათ ადგილობრივებს საახალწლო ღონისძიება შესთავაზეს. მაყურებლის წინაშე ისინი სხვადასხვა პროგრამით წარსდგნენ. მთიულური, აჭარული, ხორუმი, თუ რაჭული ახალგაზრდებმა თავიანთი თანატოლების მიერვე შესრულებული სიმღერების ფონზე წარმოადგინეს. პედაგოგები მოსწავლეებს ღონისძიებისთვის ერთი თვის განმავლობაში ამზადებდნენ.

სადღესასწაულო გარემო და შობა–ახალი წლისათვის მიძღვნილი საკონცერტო ნომრები– ასე შეზღუდული შესაძლებლობების მქონე პირებმა ღონისძიება მოაწყეს. მათ ლექსები, სიმღერები და მინი სცენები სტუმრების წინაშე წარმოადგინეს. ცენტრის 6 აღსაზრდელი ღონისძიებისათვის დაახლოებით ორი კვირის განმავლობაში ემზადებოდა.

ბაკურიანში ზამთრის ტურისტული სეზონი გასართობი ღონისძიებით გაიხსნა. ტურიზმის ეროვნული ადმინისტრაციის ორგანიზებით ბაკურიანის პარკის ტერიტორიაზე ზამთრის სეზონის გახსნის ღონისძიება გაიმართა. მუსიკალური გაფორმების ფონზე წარმოდგენილი იყო სხვადასხვა სახის მხიარული შეჯიბრებები, მათ შორის ციგით სრიალი, გუნდის მიზანში სროლა, კეგლი და სხვა. ღონისძიებაში მონაწილეობის მიღების შესაძლებლობა ყველა მსურველს ადგილზე წინასწარი რეგისტრაციის საშუალებით ჰქონდა . გამარჯვებულები ტურიზმის ადმინისტრაციის მიერ წინასწარ მომზადებული სასაჩუქრე ნაკრებით დაჯილდოვდნენ. სადღესასწაულო დეკორაციით მორთულ ტერიტორიაზე ბარმენები სტუმრებს გლინტვეინით, კარამელში ამოვლებული ვაშლითა და კაკაოთი მთელი დღის განმალობაში უმასპინძლდებოდნენ. დღის ბოლოს გაიმართა ნაძვისხის სახალხო მორთვა. ღონისძიება ფეიერვერკით დასრულდა.

მესხეთის სახელმწიფო პროფესიული თეატრში საქართველოს მხიარულთა და საზრიანთა ფედერაციამ ტურნირი ჩაატარა. მონაწილეები ერთმანეთს იუმორში, სიმღერებში, ცეკვებში და სწრაფად მოფიქრებულ კითხვა–პასუხში შეეჯიბრნენ. ღონისძიებაში ახალციხის მუნიციპალიტეტის თითქმის ყველა საჯარო სკოლა მონაწილეობადა.

საშობაო სცენა, საახალწლო სიმღერები და საცეკვაო ნომრები- ასე ,,ტალიტა კუმში” საშობაო ღონისძიება გაიმართა. ახალციხის კათოლიკურ სამრევლოსთან არსებული შეზღუდული შესაძლებლობების მქონე პირთა ცენტრში, საშობაო წარმოდგენისთვის, დაახლოებით ერთი თვის განმავლობაში ემზადებოდნენ. არტ თერაპიისა და მუსიკის პედაგოგებთან ერთად ცენრტის 11-მა აღსაზრდელმა საკუთარი შესაძლებლობები სტუმრებსა და ფართო აუდიტორიას წარუდგინა.

13 დეკემბერს ახალციხეს ცნობილი ტრიო “სიმი” ეწვევა. ჯგუფი, მესხეთის პროფესიული დრამატული თეატრის სცენაზე, ახალციხელი მაყურებლისათვის კონცერტს გამართავს, რომელიც 18:00 საათზე დაიწყება. შეგახსენებთ, რომ მუსიკალურმა ჯგუფმა სოლო კონცერტი სამცხე–ჯავახეთის სახელმწიფო სასწავლო უნივერსიტეტის პროფესორ მასწავლებლებისა და სტუდენტებისათვის 22 ნოემბერსაც გამართა. უმაღლესი სასწავლო დაწესებულების ადმინისტრაციის მოწვევით ტრიომ ცნობილი კომპოზიტორების არაერთი სიმღერა შეასრულა.

ახალციხის სამუსიკო სკოლას საქართველოს კულტურისა და ძეგლთა დაცვის სამინისტროსგან საჩუქრად გიტარა, ფლეიტა და ვიოლინო გადაეცა. სამინისტროს ინიციატივით სკოლამ ის მუსიკალური ინსტრუმენტები მიიღო, რაც ამ ეტაპზე ყველაზე მეტად ესაჭიროებოდა.

„კავკასიის ინიციატივათა ქსელის“ ფარგლებში დღეს ახალციხეში სხვადასხვა კულტურული ღონისძიება გაიმართა. “კაუკულტის” აქცია კედლების მოხატვით დაიწყო და ფლეშმობით გაგრძელდა. აქტივობის ორგანიზებაში დახმარება ახალციხის ახალგაზრდულმა ცენტრმა და ადგილობრივი მუნიციპალიტეტის გამგეობის კულტურის სამსახურმა გაუწია.

ქართველი ემიგრანტი ქალბატონები და მათი ცხოვრების მტკივნეული დეტალები – პრემიერა, რომელიც საზღვარგარეთ ემიგრანტთა ყოფას ასახავს მესხეთის სახელმწიფო პროფესიულ თეატრში ადგილობრივმა მსახიობებმა წარმოადგინეს. პიესა, სახელწოდებით ,,დოდოს მოლოდინში” დათო ტურაშვილს ეკუთვნის. ნაწარმოები რეალურ ფაქტებს ემყარება, რომელიც დრამატურგმა საბერძნეთში მოგზაურობის შემდეგ დაწერა.

,, როგორც უფალი სამშობლოც ერთია ქვეყანაზედა“– ამ სახელწოდებით დღეს ახალციხის სამხატვრო სკოლაში გამოფენა გაიმართა. 15–მდე მოსწავლემ რელიგიურ და პატრიოტულ თემაზე შექმნილი ნამუშევრები წარმოადგინეს. ჯვრები, ტაძრები, წმინდანები, საქართველოს დროშა, ქვეყნის ტერიტორიული საზღვრები, ვაზი – მსგავსი გამოსახულებები მოზარდებმა ნამუშევრებზე საკუთრი ფანტაზიით განალაგეს.