„აღდგომიდან – ამაღლებამდე“ – ამგვარი სახელწოდების გამოფენა ახალციხის სამხატვრო სკოლაში  გაიხსნა.ფერწერა, გრაფიკა, კომპოზიცია – ამ და სხვა სახეობაში შესრულებული ნამუშევრების დათვალიერება ნებისმიერ მსურველს დღეს 13;00 საათიდან დღის ბოლომდე შეეძლო.  სკოლის დირექტორის თქმით,  ნამუშევრები სწავლების პროცესში, დაახლოებით ერთი თვის ვადაშია შექმნილი. მისივე განმარტებით,  სხვადასხვა შემოთავაზების გათვალისწინებით,  შესაძლოა  გამოფენა ახალციხის ფარგლებს გარეთაც მოეწყოს. ნანა ნათენაძის თქმით, სამხატვრო სკოლას საგამოფენო დარბაზი არ გააჩნია, რის გამოც ნამუშევრები მხოლოდ ერთი დღის განმავლობაში გამოიფინა.

საქართველოს ეროვნული ბიბლიოთეკის პროექტს  „ციფრულ  ფოტომატიანეს“ სამცხე–ჯავახეთიც  შეუერთდა. ორი დღის განმავლობაში მობილურმა ჯგუფმა ახალციხეში ძველი ფოტოები გააციფრულა და საკუთარ არქივში შეინახა.  საქართველოს ეროვნული ბიბლიოთეკის წარმომადგენლები მესხეთის სახელმწიფო პროფესიულ დრამატულ თეატრს ესტუმრნენ და უძველესი ფოტარქივიდან ამოღებული სურათები გააციფრულეს.  „ციფრული ფოტომატიანე“ ეროვნული ბიბლიოთეკის და ჯეოსელის ერთობლივი პროექტიის ფარგლებში ხორციელდება, რომლის მიზანს უძველესი ფოტოების შენახვა და გადარჩენა წარმოადგენს.  ფოტოები სპეციალურად პროექტისთვის შექმნილ ვებ–გვერდზე http://www.photomatiane.ge/–ზე განთავსდება.  აღნიშნული პროექტი ორი წელია ხორციელდება. საქართველოს მასშტაბით დაახლოებით 60.000 ძველი ფოტო ციფრულ ფორმატში ინახება.

15 აპრილს საქართველოში სიყვარულის დღეს აღნიშნავენ,  რომელსაც საფუძველი 21  წლის წინ ჩაეყარა.  მრავალწლიანი ისტორიის მიუხედავად, ბევრმა დღემდე არ იცის როგორ დაწესდა აღნიშნული თარიღი. ასე გამოიყურებოდა 15 აპრილს ახალციხის ცენტრალური სკვერი. ახალგაზდრების სიმრავლის მიუხედავად, ქუჩებში ნაკლებად შეინიშნებოდნენ  ყვავილების თაიგულით მოსიარულე გოგონები და შეყვარებული წყვილები.

ბექა ჯაყელის ძეგლისათვის წარმოდგენილი ყველა საკონკურსო ნამუშევარი კომისიამ დაიწუნა. ქალაქ ახალციხის მერის განმარტებით, სამცხის მმართველისა და პირველი სამართლის წიგნის ავტორის, ბექა პირველის ძეგლისათვის ტენდერი კიდევ ერთხელ, უახლოეს დღეებში გამოცხადდება, რადგან კონკურსის შედეგად წარმოდგენილმა, 4 ავტორის ნამუშევარმა, საკონკურსო პირობები ვერ დააკმაყოფილა. ბექა პირველი ჯაყელი სამცხეს 1285-1306 წლებში მართავდა, მისი ძეგლის რაბათის ისტორიული კომპლექსის ტერიტორიაზე დადგმა ახალციხის მერის იდეაა. მის განსახორციელებლად ტენდერი 150 000 ლარის ფარგლებში გამოცხადდა. საპროექტო სამუშოებისთვის 30 000, ხოლო ძეგლის შექმნისთვის 120 000 ლარი დაიხარჯება.

კულტურის სტრატეგიაზე მუშაობის პროცესი გრძელდება. საქართველოს კულტურისა და ძეგლთა დაცვის მინისტრმა, საზოგადოების ინფორმირებულობისა და ჩართულობის მიზნით მორიგი შეხვედრა სამცხე–ჯავახეთში გამართა. სამცხე–ჯავახეთის სახელმწიფო უნივერსიტეტში კონფერენცია სახელწოდებით, „ საქართველოს კულტურის სტარატეგია: ადამიანები, პროცესები, პრიორიტეტები“ მოეწყო, რომელსაც კულტურის მინისტრთან, მიხეილ გიორგაძესთან ერთად რეგიონის პირველი პირები უძღვებოდნენ. კონფერენციაზე კულტურის სტრატეგიის შემუშავების გზამკვლევის პრეზენტაციაც გაიმართა. გზამკვლევში გათვალისწინებულია ევროკომისიის აღმოსავლეთ პარტნიორობის პროგრამის ფარგლებში ჩატარებული შეხვედრების შედეგად მიღებული რჩევები და კულტურის სფეროს სხვადსხვა ორგანიზაციების  რეკომენდაციები. 

ბორჯომის თოჯინების სახელმწიფო პროფესიული თეატრის ყოფილი თანამშრომლები სამსახურში აღდგენას ითხოვენ. მათ შრომითი ხელშეკრულებები აღარ გაუგრძელეს. მსახიობების უკმაყოფილება გამოიწვია ბოლო პრემიერამაც, რომელშიც მონაწილეობა უკვე ახალმა მსახიობებმა მიიღეს. შესარჩევ კონკურსში დაწუნებული თუ პირადი ანგარიშსწორების გამო გათავისუფლებული თანამშრომლები? – დეტალები ტელეკომპანია “ბორჯომის” სიუჟეტში.

ნატურმორტები, პორტრეტები, პეიზაჟები, ტილოზე შერულებული ნამუშევრები –სამცხე–ჯავახეთის სახელმწიფო უნივერსიტეტში  ახალგაზრდა ხელოვანის  თამარ თამარაძის პერსონალური გამოფენა მოეწყო. მან დამთვალიერებელს ერთი წლის განმავლობაში შექმნილი ნამუშევრები  შესთავაზა.   გამოფენის ნახვა და კომპოზიციების შეფასება ნებისმერი მსურველს შეეძლო.

საქართველოს კულტურისა და ძეგლთა დაცვის სამინისტრო, ქვეყნის მასშტაბით საზოგადოების მაქსიმალური ინფორმირებისა და ჩართულობის მიზნით, რეგიონებში გასვლით სამუშაო შეხვედრებს მართავს. 28 მარტს, 10:00 საათზე ახალციხეში, სამცხე-ჯავახეთის სახემწიფო უნივერსიტეტში  კონფერენცია თემაზე „საქართველოს კულტურის სტრატეგია: ადამიანები. პროცესები. პრიორიტეტები“ მოეწყობა . მასში მონაწილეობის მისაღებად, კულტურისა და ძეგლთა დაცვის სამინისტრო იწვევს სამცხე – ჯავახეთის რეგიონში მომუშავე არასამთავრობო ორგანიზაციებს, შემოქმედებითი სექტორის წარმომადგენლებს, საინიციატივო ჯგუფებს და კულტურის სფეროთი დაინტერესებულ პირებს

ახალციხის სამხატვრო სკოლის აღსაზრდელები აღდგომის დღესასწაულისიათვის გამოფენას მოაწყობენ. ღონისძიებისათვის მზადება მათ  უკვე დაიწყეს. მოზარდები ადგილობრვებს თექის, კერამიკის, თიხის, და  სხვადასხვა ფერწერულ ნამუშევრებს შესთავაზებენ.გამოფენისათვის  სკოლის აღსაზრდელები სპეციალურ კალათებსაც დაამზადებენ, სადაც სააღდგომო მოხატულ კვერცხებს ჩააწყობენ. სკოლის დირექტორის თქმით, დამთვალიერებელს ასევე ვიტრაჟის ნახვაც შეეძლება, რომელიც სამხატვრო სკოლაში ახლახანს დაინერგა. ნანა ნათენაძის განმარტებით, ახალციხელებს  სიურპრიზიც ელით.

ყველაზე ეროვნული პროექტი ახალციხელ მოზარდებს სპეციალურ გადაცემას მიუძღვნის. ამასთან დაკავშირებით ინფორმაცია „ეტალონის“ წამყვანმა ახალციხეში სტუმრობისას გაავრცელა. გოჩა ტყეშელაშვილმა შეხვედრა ადგილობრივ მოზადრებთან გამართა. მან პროექტის მნიშვნელობაზე ისაუბრა და ახალგაზრდებს ცოდნის გაღრმავებისკენ მოუწოდა. ახალციხელებმა კი ეტალონის წამყვანს, საკუთარი ლექსები წაუკითხეს და ფოლკლორული ნომრები შესთავაზეს. შეხვედრის დასასრულს „ეტალონის“ წამყვანმა გადაცემაზე მომზადებული ვიდეო–რგოლის ჩვენება მოაწყო.

ახალგაზრდული ფესტივალის „ჩემი თავისუფალი დროს“ ფარგლებში ახალციხეში სხვადასხვა აქტივობა გაიმართა.  ახალციხის ცენტრალური პარკიდან სამცხე-ჯავახეთის სახელმწიფო უნივერსიტეტის II კორპუსამდე  მსვლელობა მოეწყო, სადაც სამოქალაქო კლუბის წევრებმა ტრანსფარანტებით   მოსახლეობას ფესტივალის მიზნები გააცნეს. შემდეგ კი უნივერსიტეტის საკონფერენციო დარბაზში,  თემაზე „ჩემი თავისუფალი დრო“, დისკუსია გამართა. აღნიშნულთან  დაკავშირებით,  ფოტო და ვიდეოკონკურსიც მოეწყო, სადაც სამ–სამი გამარჯვებული გამოვლინდა. ფოტოკონკურსის პრიზიორები ახალციხის ახალგაზრდული ცენტრის ხელმძღვანელებმა დაასახელეს.

ნორჩი პოეტების მორიგი საღამო ახალციხეში. დღეს  მუნიციპალიტეტის გამგეობის ადმინისტრაციულ შენობაში პოეზიის საღამო მოეწყო. მასში  მონაწილეობა,  ქალაქში არსებული ყველა საჯარო სკოლის მოსწავლეებმა მიიღეს. დამწყებმა პოეტებმა დამსწრე აუდიტორიას საკუთარი ლექსები გააცნეს და პოეზიის სიყვარულზე ისაუბრეს.

სამცხე–ჯავახეთის სახელმწიფო უნივერსიტეტმა თემურ ჭკუასელს უმასპინძლა. მწერალი, ჟურნალისტი, პოლიტიკოსი და  “ქართული ხმების” დამფუძნებელი, ახალციხეს, უმაღლესი საგანამნათლებლო დაწესებულების მოწვევით ესტუმრა. ღონისძიებას სტუდენტები და პროფესორ–მასწავლებლები დაესწრნენ. მათ თემურ ჭკუასელის პროზაიკული საქმიანობს შესახებ რამდენიმე მოხსენება მოისმინეს, რის შემდეგაც ავტორმა საკუთარ  შემოქმედებაზე თავადვე ისაუბრა. ,,ოსტატი ქართული სიტყვისა“,– ასე უწოდა სტუმარს სამცხე–ჯავახეთის სახელმწიფო უნივერსიტეტის რექტორმა. მისი შემოქმედება ,,ჭეშმარიტ ქართულ საქმედ“ შეაფასეს ღონისძიების სხვა სტუმრებმაც.

ახალციხელმა  ახალგაზრდებმა გამოჩენილი ავიაკონსტრუქტორისა და  ამერიკის სამხედრო ავიაციის პიონერის ალექსანდრე ქართველის შესახებ მნიშვნელოვანი ინფორმაცია მიიღეს.  ღონისძიებას მისივე სახელობის საერთაშორისო საზოგადოების“ დამფუძნებელი  და პრეზიდენტი გაუძღვა.  ლელა ქართველიშვილმა ავიაკონსტრუქტორის  ცხოვრებასა და მოღვაწეობაზე ისაუბრა  და ახალგაზრდებს მის შესახებ მომზადებული ფილმიც აჩვენა. „იგი გახლდათ მსოფლიო დონის გენიოსი, რომელიც ამერიკაში მოღვაწეობდა და პრაქტიკულად, მან შექმნა ამერიკის სამხედრო ავიაცია. ის ამერიკის ენციკლოპედიაში მოხსენიებულია, როგორც ამერიკის სამხედრო ავიაციის პიონერი. “, – განმარტა  ლელა ქართველიშვილმა. ღონისძიებას ორგანიზება ახალციხის ახალგაზრდულმა ცენტრმა გაუწია,

ახალციხის ცენტრალურ ბიბლიოთეკაში, მესხ შემოქმედთა მორიგი საღამო გაიმართა.  ღონისძიება ხალხური სიმღერების შემსრულებლის, ფოლკლორისტისა და პედაგოგის , ლელა ნაროზაულის 70 წლის იუბილეს მიეძღვნა. მონაწილეებმა და მოწვეულმა სტუმრებმა მის დამსახურებებზე ისაუბრეს. ღონისძიებაზე ანსამბლმა “მესხეთმა” საკუთარი რეპერტუარიდან სიმღერები შეასრულა, ხოლო ფოლკლორისტის აღსაზრდელებმა, პედაგოგს ფოლკლორული ნომრები მიუძღვნეს. ლელა ნაროზაული ხევსურეთში, არხოტში, სოფელ ულათაღუში მრავალშვილიან ოჯახში, 1945 წელს დაიბადა. 1968 წელს თბილსიში სერგო ზაქარიაძის სახელობის კულტურულ–საგანმანათლებლო სასწავლებელი, მუსიკალური განხრით, წარმატებით დაამთავრა.

ახალციხის მუნიციპალიტეტის გამგეობისა და  მერიის თანამშრომლებმა  ქალაქში მცხოვრებ ქალბატონებს  საჩუქრები მიართვეს. სპორტსმენებმა კი დღესასწაული  მანდილოსნებს განსხვავებულად მიულოცეს.

მესხეთის პროფესიულმა სახელმწიფო დრამატულმა თეატრმა სეზონი პრემიერით გახსნა. ადგილობრივებმა დღეს „სამი გოჭის ამბავი“ იხილეს. სპექტაკლი, რომელიც ერთ მოქმედებიანი იყო 19:00 საათზე დაიწყო და ერთი საათის განმავლობაში გარძელდა.

 დღეს, 1 მარტს, სოფელ არალში ტრადიციული ,,ბერობანა” გაიმართა. ადგილობრივებმა  მონღოლების საქართველოში ბატონობის პერიოდი კიდევ ერთხელ გაიხსენეს. მათ ყადის ანუ მთავარი ბერის, მისი დამცველების, ლაზების, აჭარლების, ბოშების, ექიმებისა და ,,ბერობანასათვის” დამახასიათებელი სხვა პერსონაჟების ფორმები მოირგეს, რის შემდეგაც სოფლის ცენტრში სახალხო სანახაობა დაიწყო. ,,ბერობანა” ანუ ,,ყეენობა”, როგორც მას ეთნოლოგთა ნაწილი უწოდებს, თეატრალიზებული სანახაობაა. იგი სოფელ არალში სათავეს XVII საუკუნის დასაწყისიდან იღებს და თითქმის ყოველწლიურად იმართება. ტრადიციულად, სანახაობაში მონაწილეობას დაახლოებით 60-მდე მამაკაცი იღებს. წარმოდგენის მთავარი გმირები ნეფე-პატარძლი და სოფელში შემოსული ყადია, რომელიც ,,ხაზინაში” ანუ საგანგებოდ მომზადებულ ყუთში გადასახადებს აგროვებს. გარდა ამისა, მონაწილეები სოფლებში  ყაენის მიერ ჩატარებულ სადამსჯელო ეპიზოდებს თამაშობენ. როგორც ადგილობრივები განმარტავენ, ,,ბერობანა” სოფელში ყველიერის კვირაში, ანუ დიდმარხვამდე ერთი კვირით ადრე იმართებოდა. მას წინ ჭიდაობის ტრადიცია უძღვოდა, სადაც ადგილობრივები ერთმანეთს ეჯიბრებოდნენ, თუმცა წლების განმავლობაში ტრადიციამ სახე იცვალა. ბოლო პერიოდში, ტრადიციული ,,ბერობანა” ძველ მესხურ სოფლებში: არალში, უდესა და ვალეში იმართება. ,,ბერობანას” მსგავსი თეატრალიზებული წარმოდგენა საქართველოს სხვადასხვა რეგიონებშიც ,,ბერიკაობის” სახელწოდებით არის შემორჩენილი.

სამცხე-ჯავახეთის სახელმწიფო უნივერსიტეტთან არსებული  ქორეოგრაფიული ანსამბლი „ახალციხე“  ბორჯომში გაემგზავრა, სადაც იგი მონაწილეობას საერთაშორისო ფესტივალში მიიღებს.  ქორეოგრაფის განმარტებით,  მაყურებლის წინაშე ისინი ცეკვა აჭარულით  წარსდგებიან და იმედოვნებენ, რომ საპრიზო ადგილებსაც მოიპოვებენ. ანსამბლ ახალციხეს“ ფესტივალში მონაწილეობისთვის ფინანსური მხარდაჭერა სამცხე-ჯავახეთის სახელმწიფო უნივერსიტეტის ადმინისტრაციამ გაუწია. საერთაშორისო ფესტივალი  „ოქროს ცერი“ ბორჯომში 27- 28 თებერვალს და 1 მარტს გაიმართება.

ბატის ჭუკი დოროთე, მელა, ზღარბი, მწყემსი გოგონა და თეატრალურ წარმოდგენაში ჩართული მოსწავლეები – ახალციხის მეშვიდე საჯარო სკოლა-პანსიონის აღსაზრდელებისთვის თოჯონების თეატრმა სპექტაკლი სახელწოდებით „ბატის ჭუკი“ გამართა. ღონისძიება მერიის კულტურის სამსახურის ორგანიზებით მოეწყო.  სპექტაკლის დასრულების შემდეგ მერიის თანამშრომლებმა სკოლის მოსწავლეებს ტკბილეული და სამახსოვრო ნივთები გადაცსეს. ამ დროისათვის მეშვიდე საჯარო სკოლა-პანსიონში 30 აღსაზრდელი ირიცხება.