შსს-ს სამცხე-ჯავახეთის სამხარეო მთავარი სამმართველოს ბორჯომის რაიონული სამმართველოს უბნის ინსპექტორ-გამომძიებელი გიორგი ბერუაშვილი დღეს, 6 თებერვალს საავადმყოფოში გარდაიცვალა. ამის შესახებ ინფორმაციას ტელეკომპანია “ბორჯომი” ავრცელებს. შემთხვევა მიმდინარე წლის 23 იანვარს ლიკანში მოხდა. უბნის ინსპექტორ-გამომძიებლები გიორგი ბერუაშვილი და გიორგი მახარაშვილი სამსახურებრივი მოვალეობის შესრულებისას ფეხით პატრულირებას ახორციელებდნენ, რა დროსაც წარსულში მრავალჯერ ნასამართლევმა, ბორჯომში მცხოვრებმა, 1977 წელს დაბადებულმა შალვა აბულაძემ, დანახვისთანავე, შემხვედრ პოლიციელებს ცეცხლსასროლი იარაღიდან ცეცხლი გაუხსნა და შემთხვევის ადგილიდან მიიმალა. ეჭვმიტანილი შალვა აბულაძე დღემდე იძებნება.

სოფელ არალში ხანძარი იყო. აკოფაშვილების საქონლის სადგომს ცეცხლი დაახლოებით 12:00 საათისათვის გაუჩნდა. ცეცხლი ჯერ თივის ზვინს მოეკიდა, შემდეგ კი საქონლის სადგომის სახურავს მოედო. როგორც ადიგენის სახანძრო სამსახურის უფროსი “მეცხრე არხთან” სატელეფონო საუბარში განმარტავს, დაიწვა პირუტყვის სადგომის სახურავი და ერთ ტონამდე თივა. ავთანდილ ძაძამიას თქმით, ამ დროისათვის, ხანძარი ლიკვიდირებულია და საფრთხე აღარ არსებობს. რაც შეეხება ხანძრის გამომწვევ მიზეზს, ჯერ-ჯერობით უცნობია.

ახალციხის მუნიციპალიტეტის გამგეობის დარბაზში 3 თებერვალს ადგილობრივი პოეტისა და სახალხო მთქმელის, ვასილ კვინცხაძის წიგნის, “დამილოცეთ საქართველო”–ს პრეზენტაცია გაიმართება. ლექსების კრებულის გამოცემა ახალციხის გამგეობამ დააფინანსა. 120 ეგზემპლარის გამოსაცემად გამგეობის ბიუჯეტიდან 550 ლარი დაიხარჯა. ლექსების კრებულის პრეზენტაცია 15:00 საათზე გაიმართება.

სკოლამდელი აღზრდის  დაწესებულებების პედაგოგებისთვის ახალციხეში ტრენინგი გაიმართა.  მასში მონაწილეობა იმ აღმზრდელებმა მიიღეს, რომლებიც „ზოგადი განათლების პროფკავშირის“ წევრები არიან. ტრენერი მონაწილეებს აღსაზრდელებთან ურთიერთობის თავისებურებებზე ესაუბრა, გარდა ამისა, პედაგოგებმა ერთმანეთს თავიანთი გამოცდილებაც გაუზიარეს. 

შსს-ს სამცხე-ჯავახეთის სამხარეო მთავარი სამმართველოს ადიგენის რაიონული სამმართველოს თანამშრომლებმა, ჩატარებული საგამოძიებო ღონისძიებების შედეგად, 1982 წელს დაბადებული, წარსულში ნასამართლევი რევაზ ს. ქურდობის ფაქტზე ამხილეს. შსს–ს ინფორმაციით,

ახალციხის მუნიციპალიტეტის საკრებულომ სოციალურ პაკეტში შეტანილი ცვლილებები დაამტკიცა, რომლის თანახმადაც, ოჯახები 2015 წლის ახალციხის მუნიციპალიტეტის ბიუჯეტიდან პირველ და მეორე შვილზე 100 ლარის ნაცვლად 125 ლარს მიიღებენ, მესამე შვილზე 200, ხოლო მეოთხე და მეტ შვილზე 250 ლარს. გარდა ამისა, გაიზარდა უმწეოთა სასადილოთი მოსარგებლთა რაოდენობაც, რადგან ქულათა ზღვრმა 150 000–მდე აიწია.

ხმაურით ჩაიარა ახალციხის მერიის საკრებულოს სხდომამ. გატანილი 13 საკითხიდან 2–ის  განხილვას ოპოზიციის მხრიდან უკმაყოფილება მოჰყვა. მერიაში ორი სამსახურის გამოყოფის საკითხს არ დაეთანხმნენ „ბურჯანაძე–გაერთიანებული დემოკრატებისა“ და „ნაციონალური მოძრაობის“ წარმომადგენლები. მათი თქმით, სამსახურების გამოყოფის აუცილებლობა არ არსებობს, რადგან დაკისრებულ ფუნქციებს თავს სხვა თანამშრომლებიც გაართმევენ.

ახალციხის დემოკრატიული ჩართულობის ცენტრში USAID-ის მიერ დაფინანსებული   პროექტის პრეზენტაცია გაიმართა, რომელიც ფერმერული მეურნეობისა თუ მსხვილი აგრობიზნესის განვითარებას ემსახურება. “ საქართველოს სასოფლო–სამეურნეო წარმოების ეფექტიანობის აღდგენის პროექტი“   საგრანტო კონკურსს აცხადებს, რომლის ფარგლებშიც მხოლოდ ფერმერები და მექანიზაციის მომსახურების ცენტრები დაფინანსდებიან. შეხვედრას ფერმერები და სოფლის მეურნეობის სპეციალისტები დაესწრნენ. მათ საშუალება ჰქონდათ კითხვებზე შესაბამისი განმარტებები მოესმინათ.

შინაგან საქმეთა მინისტრ ვახტანგ გომელაურის გადაწყვეტილებით, 2008 წლის რუსეთ-საქართველოს ომში დაღუპული შსს-ს თანამშრომლების შვილები მთის კურორტზე, ბაკურიანში დაისვენებენ. შსს–ს ინფორმაციით, 12 ბავშვი ბაკურიანში, ერთ-ერთ სპორტულ სკოლაში, 10 დღის განმავლობაში დაისვენებს და სათხილამურო სპორტს დაეუფლება. მოზარდები, ასევე, მონაწილეობას სხვადასხვა შემეცნებით და სპორტულ ღონისძიებაში მიიღებენ . დასვენების ბოლო დღეს ბავშვებს შორის თხილამურებზე დგომაში შეჯიბრი გაიმართება. გამარჯვებულებს სამინისტროსგან საჩუქრები გადაეცემათ.

ადიგენში საბავშვო ბაღი საზეიმო ვითარებაში ოფიციალურად გაიხსნა. გახსნის ცერემონიას რეგიონისა და მუნიციპალიტეტის პირველი პირები დაესწრნენ. ბაღის რეაბილიტაციისთვის ადგილობრივი ბიუჯეტიდან 201.000 ლარი დაიხარჯა. ბაღის რეაბილიტაცია მას შემდეგ გახდა აუცილებელი, რაც შენობის ნაწილი სიძველის გამო ჩამოინგრა. 2013 წლის დეკემბრის თვიდან საბავშვო ბაღი დროებით ადგილობრივი ხელისუფლების მიერ ნაქირავებ ფართში გადავიდა.

სოციალური მომსახურების სააგენტოს რეგიონული საკოორდინაციო ცენტრის უფროსი დაკავებული თანამდებობიდან  გაათავისუფლეს. ზაალ ივანიძე თანამშრომლებს უკვე დაემშვიდობა. იგი რეგიონულ საკოორდინაციო ცენტრს 2010 წლის აგვისტოს თვიდან ხელმძღვანელობდა. როგორც სოციალური მომსახურების სააგენტოს პრესსამსახურში აცხადებენ, აღნიშნული სამსახური ყველა რეგიონში გაუქმდა. მის ბაზაზე კი ახალი სტრუქტურა ჩამოყალიბდება, რომელიც  რეგიონის მთავარ ქალაქებში ამოქმედდება. საზოგადოებასთან ურთიერთობის სამსახურში ასევე განმარტავენ, რომ ახალი ხელმძღვანელის დანიშვნის თაობაზე საუბარი არ არის, რადგან ჯერ თავად სტრუქტურა ჩამოყალიბების პროცესშია. დეტალები კი ახლო მომავალში დაზუსტდება. აღნიშნული რეორგანიზაცია სოციალური მომსახურების სააგანტოს ინიციატივით, საქართველოს მასშტაბით ხორციელდება, რომლის მიზანსაც რეგიონებში ეფექტური  სტრუქტურის ჩამოყალიბება წარმოადგენს.

ადიგენის მუნიციპალიტეტში სტიქიის შდეგად მიყენებული ინფრასტრუქტურული ზარალის ანაზღაურება დაიწყო. აღნიშნულისთვის ცენტრალურმა ხელისუფლებამ მუნიციპალიტეტს 35 000 ლარი გადაურიცხა. ადიგენის გამგებლის განმარტებით, ტენდერში გამარჯვებული შპს „ტყუპები 2013“ საჭირო მასალას უახლოეს დღეებში მოიმარაგებს, რის შემდეგაც დაზიანებული შენობა–ნაგებობების რეაბილიტაცია დაიწყება.  ზაქარია ენდელაძის თქმით, ცენტრალურ უწყებებში გადაგზავნილია  ზარალის ოდენობა სოფლის მეურნეობის კუთხითაც. შეგახსენებთ, რომ სტიქია ადიგენში 2014 წლის  14 სექტემბერს დაფიქსირდა. ძლიერმა ქარმა და სეტყვამ  ადიგენის მუნციპალიტეტის 9 სოფელი დააზარალა.

ინფრასტრუქტურული პროექტები, სოფლებში ქუჩების ნუმერაცია და თოვლის გამო შექმნილი მდგომარეობა გზებზე – ეს და სხვა საკითხები დღეს ახალციხის მუნიციპალიტეტის გამგეობის ყოველკვირეულ თათბირზე განიხილეს. მუნიციპალიტეტის გამგებლის განმარტებით, სოფლებში მისასვლელი გზები მოწესრიგებულია. ზაზა მელიქიძის თქმით, შესაბამისმა სამსახურმა ტექნიკური მარილი გზებზე დილითვე დაყარა.

შინაგან საქმეთა მინისტრმა ვახტანგ გომელაურმა საავადმყოფოში 23 იანვარს ლიკანში მომხდარი ინციდენტის დროს დაჭრილი პოლიციელები მოინახულა. მინისტრი პოლიციელების ჯანმრთელობის მდგომარეობით დაინტერესდა და განაცხადა, რომ საჭიროების შემთხვევაში დაჭრილ სამართალდამცველებს მკურნალობა და ოპერაცია საზღვარგარეთ ჩაუტარდებათ. ვახტანგ გომელაური ასევე შეხვდა და გაესაუბრა დაჭრილი პოლიციელების ოჯახის წევრებს.

საბაჟო გამშვებ პუნქტზე – „ნინოწმინდა“ – განსაკუთრებით დიდი ოდენობით ნარკოტიკული ნივთიერება კოკაინის შემოტანის ფაქტი აღკვეთეს. შემოსავლების სამსახურის ინფორმაციით, მებაჟე ოფიცრებმა, ეჭვის საფუძველზე, ბულგარეთის მოქალაქეების ს.ბ.პ.-ისა და გ.ვ.ა.-ის ფიზიკური დათვალიერების შედეგად, 6,295 გრამი კოკაინი აღმოაჩინეს. შემოსავლების სამსახურის თანამშრომლებმა კოკაინის შემოტანის ფაქტი 24 იანვარს დააფიქსირეს. საქმე შემდგომი რეაგირებისთვის შსს საპატრულო პოლიციის დეპარტამენტის სამცხე-ჯავახეთის მთავარი სამართველოს საგამოძიებო სამსახურს გადეცა. შსს–ს ინფორმაციით, სასაზღვრო კონტროლის გავლისას, დაკავებულებს სხეულზე წებოვანი ლენტით მიმაგრებული, 10 შეკვრად დაფასოებული, განსაკუთრებით დიდი ოდენობით ნარკოტიკული საშუალება კოკაინი აღმოაჩნდათ. სამართალდამცველებმა მათი პირადი ჩხრეკისას 8,5 კგ ნარკოტიკული საშუალება ამოიღეს, რომელიც ექსპერტიზის დასკვნით 6,295 კგ კოკაინს შეიცავს. გამოძიებამ დაადგინა, რომ დაკავებულებს ნარკოტიკული საშუალება სომხეთის რესპუბლიკიდან საქართველოში უკანონოდ შემოჰქონდათ. დადგინდა, რომ ამოღებული ნარკოტიკის ღირებულება 2 მილიონ 500 ათას დოლარს შეადგენს. გამოძიება წინასწარი შეთანხმებით ჯგუფის მიერ განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანის ფაქტზე მიმდინარეობს (საქართველოს სსკ-ის 262-ე მუხლის მე-2 და მე-4 ნაწილებით).

მართლმადიდებელი ეკლესია დღეს ნათლისღების დღესასწაულს აღნიშნავს. ისევე როგორც ქვეყნის ყველა მოქმედ ტაძარში, წირვა–ლოცვა ახალციხეშიც აღევლინა, რის შემდეგაც წყლი ეკურთხა. ნაკურთხ წყალს უფლის მიერ კურთხეული მდინარე იორდანეს მადლი ენიჭება და უხრწნელ თვისებებს იძენს. მორწმუნეებს მისი მიღება უზმოზე შეუძლიათ, განსაკუთრებით _ ავადმყოფობისა და განსაცდელების დროს. ნათლისღების დღესასწაული თორმეტ საუფლო დღესასწაულს შორის ერთ-ერთია. სხვაგვარად ამ დღეს ღვთის გამოცხადების დღესასწაულს უწოდებენ, რადგან ყოვლადწმინდა სამება გაცხადდა. ასევე ნათლობა დაწესდა. ყოველი წლის ამ დღეს მდინარე იორდანე აღმა იწყებს სვლას, როდესაც იერუსალიმის პატრიარქი მდინარეში სამჯერ ჯვარს გადააგდებს, როგორც ეს მოხდა უფლის მდინარეში ჩასვლის დოს. წმინდა სახარების მიხედვით, მდინარე იორდანეში წმინდა იოანე ნათლისმცემლის ხელიდან იესო ქრისტეს ნათლისღებისას მასზე სულიწმინდა მტრედის სახით გადმოვიდა და თავზე დაადგა, ხოლო ზეციდან ხმა გაისმა: “ეს არის ძე ჩემი საყვარელი, რომელიც მე სათნო ვიყავ”.

საქართველოს პრემიერ–მინისტრმა ბორჯომში 5 ვარსკვლავიანი სასტურმრო გახსნა. ირაკლის ღარიბაშვილი ,,რიქსოს–ბორჯომის“ გახსნის ცერემონიალს მთავრობის წევრებთან ერთად დაესწრო. ,,რიქსოსის“ 9 სართულზე 151 ნომერია განთავსებული. კომპლექსი თანამედროვე ინფრასტრუქტურით არის აღჭურვილი და საკონფერენციო დარბაზებს, ჩოგბურთისა და ფეხბურთის სათამაშო მოედნებს, საცურაო აუზს და სატრენაჟორო დარბაზს მოიცავს. ,,ეს მნიშვნელოვანი შენაძენი იქნება ამ რეგიონისთვს, ვინაიდან ხელს შეუწყობს რეგიონში ეკონომიკის გამოცოხლებას. მშენებლობაზე დასაქმებული იყო 600 ადამიანი, ხოლო ახალ სასტუმროში 200 –მდე ადამიანი იქნება დასაქმებული.“– განაცხადა ცერემონიალზე, პრემიერ–მინისტრმა. კომპლექსი საპარტნიორო ფონდისა და ყაზახური კომპანია “ყაზმუნაიგაზის“ ერთობლივი ინვესტიციით აშენდა. მისი ჯამური ღირებულება 48 მილიონ აშშ დოლარს შეადგენს. შენობა პირველი 5 ვარსკვლავიანი სასტუმროა სამცხე–ჯავახეთში და ასევე  “რიქსოსის“ ბრენდის პირველი ობიექტი საქართველოში.