კოალიცია „ქართული ოცნება” მოსახლეობასთან შეხვედრებს აგრძელებს. წინასაარჩევნო კამპანიის ფარგლებში დღეს ისინი ახალციხის მუნიციპალიტეტის სოფლებში  – ურაველსა და ხეოთში იმყოფებოდნენ. კოლიციის ადგილობრივი შტაბის წარმომადგენლებმა მაცხოვრებლებს საარჩევნო პროგრამა გააცნეს.

საარსებო მინიმუმის გაზრდა, ერთსქესიანი ქორწინება და ბოლო დღეებში სოფელ დვანში, ოკუპირებულ ტერიტორიაზე განვითარებული მოვლენები– ეს ის მთავარი თემები იყო, რაზეც ქრისტიან დემოკრატიული მოძრაობის პრეზიდენტობის კანდიდატმა ბორჯომში მოსახლეობასთან შეხვდრისას ისაუბრა. გიორგი თარგამაძე, თანაგუნდელებთან ერთად ბორჯომს დღის ორი სათისათვის ესტუმრა.  „დღეს ქართული სახელმწიფო უმოქმედო და უსუსურია, შეაჩეროს მცოცავი აგრესია, რომელიც ქვეყნის მიმართ რუსეთის მხრიდან ხორციელდება“–განაცხადა  ქრისტიან– დემოკრატიული მოძრაობის პრეზიდენტობის კანდიდატმა. წინა საარჩევნო კამპანიის ფარგლებში გამართულ შეხვედრაზე გიორგი თარგამაძე საქათველოს ეკონომიკურ მდგომარეობასაც შეეხო.  მისი თქმით, ქვეყნის საარსებო მინიმუმი ხელახლა უნდა გადაიხედოს და სოციალური დახმარებებისა და საპენსიო ფონდის ზრდაზე აისახოს. გიორგი თარგამაძე წინა საარჩევნო კამპანიის ფარგლებში რეგიონებში შეხვედრებს გააგრძელებს.

საპრეზიდენტო კანდიდატთათვის ხელმოწერების შეტანის ვადა ამოიწურა.  ცენტრალურ საარჩევნო კომისიაში კანდიდატებს მხარდამჭერთა სია 17 სექტემბერს, 18 საათამდე უნდა წარედგინათ. საპრეზიდენტო კანდიდატთა უმრავლესობის შესახებ ახალციხეში მოსახლეობას ინფორმაცია არ აქვს. პრეზიდენტობის მსურველებს არ იცნობენ სომხურ დასახლებებშიც.

წინასაარჩევნო კამპანიის ფარგლებში ახალქალაქის მუნიციპალიტეტს ,,ერთიანი ნაციონალური მოძრაობის” პრეზიდენტობის კანდიდატი ესტუმრა. დავით ბაქრაძე ადგილობრივ მოსახლეობას შეხვდა და საკუთარი სამოქმედო გეგმები გააცნო. გარდა ამისა, მან ახალქალაქში ,,ნაციონალური მოძრაობის” ადგილობრივი შტაბი ოფიციალურად გახსნა.

    კოალიცია “ქართული ოცნების” წინასაარჩევნო კამპანიის ფარგლებში გამართული აქცია ახალციხის შტაბის ხელმძღვანელმა შეაფასა. მალხაზ ჟუჟუნაძის თქმით, აქციაზე დაახლოებით, 4 000–მდე ადამიანი იმყოფებოდა. მისივე განმარტებით, შტაბს საზოგადოების ჩამოსაყვანად არანაირი რესურსი არ გამოუყენებია. მოსახლეობა მუნიციპალიტეტის სოფლებიდან საკუთარი სურვილითა და ტარანპორტით ჩამოვიდა. “სიამაყით ვიყავი განწყობილი, ამდენი ხალხი რომ დავინახე. აქციაზე დაახლოებით, 3500– 4000 ადამიანი იმყოფებოდა. ის განწყობა მქონდა , რომ ხალხი გამოვიდა შიშის სინდრომიდან. ერთი ეტაპი გადალახულია, ჩვენ ტესტი ჩავაბარეთ მთელი ქვეყნის წინაშე. საქართველოს აღარ ეშინია. ამიტომ ახლა დაგვრჩა რამდენიმე ეტაპი გასავლელი და ძირითადი ეტაპი ის რომ 27 ოქტომბერს საპრეზიდენტო არჩევნებში ხმა მივცეთ კოალიცია “ქართული ოცნების” პრეზიდენტობის კანდიდატს გიორგი მარგველაშვილს. ეს ის ადამიანია, რომელიც არის ბიძინა ივანიშვიილს ფავორიტი ადამიანი, რომლიც ხელმძღვანელობითაც ჩვენ შევძლებთ საქართველო მივიყვანოთ საბოლოო გამარჯვებამდე და ავაღორძინოთ ჩვენი ქვეყანა” – განუცხადა “ექოს” მალხაზ ჟუჟუნაძემ. შეგახსენებთ, რომ “ქართული ოცნების” ახალციხის წარმომადგენლებმა გიორგი მარგველაშვილის ვიზიტის შესახებ რამდენიმე დღის წინ დააანონსეს და მუნიციპალიტეტის მოსახლეობას აქციზე დასწრებისკენ მოუწოდეს.

    გიორგი მარგველაშვილმა გამოსვლა დაასრულა. მისი თქმით,  51% მანდატი საკმარისი არ არის და საზოგადოებას გაერთიანებისკენ მოუწოდა. “გამარჯვების შემდეგ მე აქ უფრო ხშირად ვიქნები, ვიდრე ახლა და ჩვენ ვისაუბრებთ იმის შესახებ, თუ რა არის გასაკეთებელი. ხშირად ჩამოვალ და თქვენგან ავიღებ ძალას. მივცეთ ამ ქვეყანას ახალი განვითარების შესაძლებლობა” – განაცხადა კოალიცია “ქართული ოცნების” პრეზიდენტობის კანდიდატმა. თავის გამოსვლაში გიორგი მარგველაშვილმა მესხეთზეც ისაუბრა: “ეს არის არაჩვეულებრივი მხარე. ეთნიკურად და რელიგიურად მრავალფეროვანი კუთხე. მას გააჩნია ეკონომიკური პოტენციალი” მან განცხადება ქვეყნის ამჟამინდელ პრეზიდენტზეც გააკეთა. გიორგი მარგველაშვილმა მიხეილ სააკაშვილი  მოურავს შეადარა, რომელმაც საქართველო ეკონომიკურად დაჩაგრა, ხალხი  დააშანტაჟა და დააპატიმრა, ტერიტორიების ნაწილი კი მეზობლებს მიატაცებინა. გიორგი მარგველაშვილს ამ წუთებში მხარდამჭერები აცილებენ, რომელიც წინასაარჩევნო კამპანიის ფარგლებში მოსახლეობას ასპინძაში შეხვდება.

   კოალიცია “ქართული ოცნების” პრეზიდენტობის კანდიდატი წინასაარჩევნო კამპანიის ფარგლებში უკვე ახალციხეში იმყოფება. გიორგი მარგველაშვილთან ერთად იმყოფება რეინტეგრაციის საკითხებში სახელმწოფო მინისტრი პაატა ზაქარეიშვილი, რომელმაც მოსახლეობას პირველმა მიმართა: “ის ნამდვილად წარმოადგენს ღირსეულ კანდიდატს. ჩვენ გვეყოლება ძლიერი და მშრომელი პრეზიდენტი” – განაცხადა პაატა ზაქარეიშვილმა. რეინტეგრაციის მინისტრს სხვადასხვა პიროვნებები ცვლიან, რომლებიც საზოგადოებას მიმართავენ. “დამთავრდა უკანონობის დრო. დრო როდესაც დაჩაგრულები ვიყავით. ბატონ გიორგის თავისი პლუსები აქვს. მისი ცხოვრება და მოღვაწეობა ხალხის თავლწინ მიდიოდა” “გიორგი მარგველაშვილი  არის გარანტი, რომ ყველა მოქალაქის უფლება თანაბრად იქნება დაცული. ერთად ავაშენებთ ჩვენ ძლიერ სახელმწიფოს” – აცხადებენ გამომსვლელები.

“გადაწყვეტილება შენზეა” – ამ სახელწოდების შეხვედრა, დღეს ახალციხის დემოკრატიული ჩართულობის ცენტრში გაიმართა. სემინარი არასამთავრობო ორგანიზაცია „განვითარებისა და დემოკრატიის ცენტრის” ორგანიზებით მოეწყო, რომლის მთავარ მიზანს სამოქალაქო საზოგადოების ცხოვრებაში ახალგაზრდების ჩართვა წარმოადგენს.

წინასაარჩევნო კამპანია ახალციხეში. საპრეზიდენტო არჩევნებამდე 2 თვით ადრე პოლიტიკური პარტიების უმრავლესობას ქალაქში ადგილობრივი შტაბი ჯერ კიდევ არ გაუხსნია. ამ დროისათვის აქტივობას მხოლოდ 3 პოლიტიკური ძალა ახორციელებს. საორგანიაციო საკითხების მოგვარების შემდეგ კი ახალციხეში პოლიტიკური ლიდერების ჩამოსვლასაც ელოდებიან.