დილის 8 საათზე გაიხსნა სამხურენოვანი საარჩევნო უბნებიც ახალციხის მუნიციპალიტეტში. ეთნიკურად სომეხი მოსახლეობისთვის ორენოვანი ბიულეტენები დაიბეჭდა. სოფელ სხვილისის 2 უბანზე ადგილი ჰქონდა მცირე ექსცესებს, თუმცა საბოლოოდ მხოლოდ 1 საჩივარი დაიწერა.  

ბოლო მონაცემებით, #40-ე ახალქალაქის საარჩევნო ოლქში მოსახლეობის  აქტვობამ 48,6% შეადგინა, რაც დაახლოებით 18 474 ამომრჩეველია. როგორც ოლქში განმარტავენ, მთელი დღის განმავლობაში მათთან საჩივარი არ შესულა. თუმცა #10–ე სოფელ ვარევნის უბანზე ინციდენტი დაფიქსირდა. სოფლის რწმუნებულსა და საუბნო საარჩევნო კომისიის თავმჯდომარეს შორის შელაპარაკება მოხდა, რაც ფიზიკურ დაპირისპირებაში გადაიზარდა. ამასთან დაკავშირებით #10-ე უბანზე სამართალდამცავთა გამოძახება გახდა საჭირო.

ახალციხისა და ადიგენის მსგავსად, საკუთარი არჩევანი დღეს ასპინძის გამგებლობის კანდიდატებმაც დააფიქსირეს. არასაპარლამენტო ოპოზიციის, ბურჯანაძე–ერთიანი ოპოზიციისა და ნაციონალური მოძრაობის კანდიდატებმა კომენტარი მეცხრე არხთანაც გააკეთეს და კენჭისკრის პროცესი  შეაფასეს. რაც შეეხება  „ქართული ოცნების” კანდიდატს, ლევან ცაბაძემ მედიასთან კომენტარი არ გააკეთა.

     „სალომე ზურაბიშვილი – საქართველოს გზის“ წარმომადგენელის საჩივარი #37–ე საოქო საარჩევნო კომისიამ დააკმაყოფილა. ნინო ბაღდოშვილის განცხადების მიხედვით,  „ქართული ოცნების წარმომადგენელი   ნაირა სამსონიძე 30–ე უბანზე პარტიის დამკვირვებლისა და არასამთავრობო ორგანიზაცია „სამოქალაქო საზოგადოებისა და დემოკრატიის განვითარების ცენტრის”  წარმომადგენლის სტატუსით იმყოფებოდა, რაც კანონმდებლობით დაუშვებელია. საოლქო კომისიის გადაწყვეტილებით, ნაირა სამსონიძეს არასამთავრობო ორგანიზაციის დამკვირვებლის პოზიცია ჩამოერთვა. სამსონიძე ირწმუნება, რომ გაუგებრობა მოხდა და მას არასამთავრობო ორგანიზაციამ აკრედიტაცია მასთან შეთანხმების გარეშე გაუკეთა. ნინო ბაღდოშვილი მოითხოვს, რომ აღნიშნულ პიროვნებას ადმინისტრაციული სასჯელი დაეკისროს.

   #37–ე ახალციხის საარჩევნო ოლქის 20:00 საათის მონაცემებით, ახალციხის მუნიციპალიტეტში საკუთარი არჩევანი 16 869 ამომრჩევლმა გააკეთა, რომელმაც საერთო რაოდენობის 48,94 %  შეადგინა. ოლქის თავმჯდომარის თეა გავაშელის განმარტებით, შეიძლება თქვას, რომ კენჭისყრის პროცესმა მშვიდ გარემოში ჩაიარა. საოლქოში 6 საჩივარია შესული. აქედან ორი “სამართლიანი არჩევნებისა და საერთაშორისო დემოკრატიული საზოგადოების”  წარმომადგენელმა დააფიქსირა, სამი – “ნაციონალური მოძრაობის”, ხოლო ერთი – “სალომე ზურაბიშვილი–საქართველოს გზის” წარმომადგენელმა.

ადგილობრივი თვითმმართველობის არჩევნებში მონაწილეობა ადიგენის მუნიციპალიტეტის გამგებლობის სამივე კანდიდატმა მიიღო. მათ საკუთარი პოზიცია #38–ე საარჩევნო ოლქის სხვადასხვა უბანზე დააფიქსირეს.

ასპინძის #39 საარჩვენო ოლქში უბნები უკბე დაიხურა. 20:00 საათის მონაცემებით კენჭისყრის პროცესში მონაწილეობა 6 694–მა   ამომრჩველმა მიიღო, რაც  69%–ს შეადგენს. ოლქის თავმჯდომარის როსტომ მაგრაქველიძის განმარტებით, ეს რეგისტრატორების მიერ დათვლილი ხმებია და ზუსტი რაოდენობა ჯერ გარკვეული არ არის. ამომრჩეველთა აქტივობის მიხედვით, 2014 წლის თვითმართველობის არჩევნებში ასპინძის მოსახლეობის 31%–მა მონაწილეობა არ მიიღო. ხმათა რაოდენობით, რომელი პოლიტიკური პარტია ან კანდიდატი ლიდერობს, ეს საარჩვენო ყუთების გახსნისა და ბიულეტენების დათვლის შემდეგ გახდება ცნობილი.

   #37–ე ახალციხის ოლქში საარჩევნო უბნები ზუსტად 20:00 საათზე დაიხურა. აღნიშნული დროის  პირველადი მონაცემებით, ახალციხის მუნიციპალიტეტში 15 407 ამომრჩეველი დაფიქსირდა, რამაც  44,7% შეადგინა.  საჩივრების რაოდენობა კი ამ ეტაპზე ისევ ექვსია. საოლქო კომისიის წარმომადგენელთა ინფორმაციით, ამომრჩეველთა რაოდენობა არ არის მიწოდებული ჯერჯერობით  ურავლისა და მინაძის უბნებიდან. ახალციხის მუნიციპალიტეტში ერთიანი საარჩევნო სიის მიხედვით,  34,467 ამომრჩეველია რეგისტრირებული  

საკუთარი არჩევანი დააფიქსირეს ახალციხის მუნიციპალიტეტის გამგებლობის კანდიდატებმა. ,,ნინო ბურჯანაძე ერთიანი ოპოზიციის“ კანდიდატი ოლეგ ძოწენიძე სხვილისის 34–ე უბანზე დღის პირველ ნახევარში გამოცხადდა. ,,ნაციონალური მოძრაობის“ კანდიდატმა ხმა ახალციხის მე–2 უბანზე მისცა. ,,დავით თარხან მოურავი – საქართველოს პატრიოტთა ალიანსის“ კანდიდატი მამუკა გოგოლაძე ახალციხის მუნიციპალიტეტში არ არის რეგისტრირებული, შესაბამისად, ხმას თბილისში აძლევს. ,,არასაპარლამენტო ოპოზიციის“ გამგებლობის კანდიდატმა ბახვა გელაშვილმა კომენტარზე უარი მოუცლელობის გამო თქვა.  ,,ქართული ოცნების“ კანდიდატმა ზაზა მელიქიძემ კი ,,მე–9 არხთან“ კომენტარის გაკეთება არ ისურვა.

    „სამართლიანი არჩევნებისა და დემოკრატიის საერთაშორისო საზოგადოებამ” 17:00 საათის მონაცემებით, ახალციხეში 2 დარღვევა გამოავლინა. ანგარიშიც მიხედვით,  მარკირების შემოწმების გარეშე ხმის მიცემის  1 ფაქტი დაფიქსირდა ახალციხის  #6 საარჩევნო უბანზე, ხოლო ბიულეტენის არ დამოწმების ერთი შემთხვევა ახალციხის #8 უბანზე;    17:00 საათისთვის, ,,სამართლიანი არჩევნების’’ ინფორმაციით, ახალციხეში  ამომარჩეველთა 33% დაფიქსირდა.    ,,სამართლიანი არჩევნების’’ PVT მონაცემებით,  მთელი ქვეყნის მასშტაბით ამომრჩეველთა აქტივობამ 17:00 საათისთვის  34.4%  შეადგინა. აღსანიშნავია, რომ ეს მაჩვენებელი 6%-ით დაბალია 2010 წლის ადგილობრივი თვითმმართველობის არჩევნების აქტივობასთან (40.4%) შედარებით.     “სამართლიანი არჩევნების“ შემდეგი განცხადება  21:30 საათზე გამოქვეყნდება.

#38–ე ადიგენის საოლქო საარჩევნო კომისიაში ამ დროისათვიოს ერთი საჩივარი შევიდა. ,,სამართლიანი არჩევნებისა და დემოკრატიის საერთაშორისო საზოგადოების“ დამკვირვებლებმა დარღვევა უდის #12–ე უბანზე დააფიქსირეს. როგორც არასამთავრობო ორგანიზაციის, ადიგენის კოორდინატორი, თეა დანგაძე განმარტავს, 15:00 საათისათვის უბანზე ხმების დათვლის პროცესში, ერთ–ერთი რეგისტრატორის მიერ დაფიქსირებული ამომრჩეველთა ხელმოწერები, გაცემული ბიულეტენების რაოდენობას არ დაემთხვა. მას 6 ბიულეტენით ზედმეტი ჰქონდა გაცემული. #38–ე ადიგენის საოლქო საარჩევნო კომისიის თავმჯდომარე, ჯაბა მაჭარაშვილი განმარტავს, რომ აღნიშნულთან დაკავშირებით რეგისტრატორი ახსნა–განმარტებას დაწერს, რომელსაც თან დაურთავენ შემაჯამებელ ოქმს. შესაბამისად, იგი ხმების დათვლის პროცესში გათავლისწინებული იქნება. ასევე ცნობილია ადიგენის ოლქში ამომრჩეველთა აქტივობა. 17:00 საათისათვის უბანზე 7497 ამომრჩეველი მივიდა, რაც საერთო რაოდენობის 48%–ს შეადგენს.

#37-ე ახალციხის საარჩევნო ოლქში კიდევ სამი საჩივარი დაიწერა.  „სალომე ზურაბიშვილი – საქართველოს გზის“ წარმომადგენელის ნინო ბაღდოშვილის თქმით, „ქართული ოცნების წარმომადგენელი  ნაირა სამსონიძე 30–ე უბანზე პარტიის დამკვირვებლისა და არასამთავრობო ორგანიზაცია „სამოქალაქო საზოგადოებისა და დემოკრატიის განვითარების ცენტრის წარმომადგენლის სტატუსით იმყოფებოდა.  ბაღდოშვილი აცხადებს, რომ სამსონიძეს ადმინისტრაციული კოდექსის შესაბამისი მუხლის მე–4 ნაწილის „თ“ ქვეპუნქტით უნდა მოეთხოვოს პასუხი, რომელიც გულისხმობს შემდეგს: „ადგილობრივი დამკვირვებელი ორგანიზაციის დამკვირვებლად არ შეიძლება იყოს საარჩევნო სუბიექტი და მისი წარმომადგენელი. მეორე საჩივარი   ,,სამართლიანი არჩევნებისა და დემოკრატიის საერთაშორისო საზოგადოების“ წარმომადგენლის მიერ დარეგისტრირდა, რომლის მიხედვითაც სოფელ ნაოხრებში, ახალციხის 26–ე საარჩევნო უბანზე ქალბატონმა არჩევნებშ იმონაწილეობა მარკირების პროცედურის გავლის გარეშე მიიღო.  ხარვეზი კაბინიდან გამოსვლის შემდეგ აღმოიფხვრა, ამომრჩეველს მარკირება მოგვიანებით გაუკეთდა. ,,სამართლიანი არჩევნებისა და დემოკრატიის საერთაშორისო საზოგადოების“ დამკვირვებელმა კიდევ ერთი დარღვევა ახალციხის მე–8 უბანზე,  დააფიქსირა. რეგისტრატორს მოგვიანებით გაახსენდა, რომ ერთ–ერთ ამომრჩეველს ბიულეტენები ხელმოწერისა და ბეჭდის გარეშე გადასცა. შესაბამისად, ამომრჩევლის ბიულეტენები გაბათილდება. კომისიის თავმჯდომარე აღნიშნულ ფაქტზე ხმის მიცემის პროცესის დასრულების შემდეგ ახსნა–განმარტებით ბარათს შეადგენს. #37–ე ახალციხის საარჩევნო ოლქის 15:00 საათის მონაცემებით, კი ოლქში 3 საჩივარი იყო შესული: #23–ე ფერსისა და #12–ე აგარის საარჩევნო უბნებზე “ერთიანი ნაციონალური მოძრაობის” წარმომადგენელს არ მიეცა საშუალება ჩაენაცვლებინა ამავე პარტიის წარმომადგენელი, რომელიც გადასატან ყუთს გაჰყვა. გარდა ამისა, მათ აუკრძალეს ფოტო–ვიდეო გადაღება, რაც ცესკოს 2012 წლის 24 სექტემბრის #42 დადგენილებას ეწინააღმდეგება. მესამე საჩივარი 14 ივნისს დაიწერა, რომელიც  მე–15 უბანზე, ასევე “ნაციონალური მოძრაობის” წარმომადგენელმა შეადგინა. საჩივრის მიხედვით კომისიის თავმჯდომარემ ბიულეტენები სახლში წაიღო. 17:00 საათის მონაცემებით, არჩევნებში მონაწილეობა ახალციხეში   13 279–მა პირმა მიიღო, რაც ამრჩეველთა 38, 53 %–ს შეადგენს.

,მე–9 არხის” გადამღებმა ჯგუფმა დარღვევის ფაქტები დააფიქსირა ადიგენის #38–ე ოლქში. ერთ–ერთ უბანზე 5 სოფლის მოსახლეობა ამბობს, რომ  ხმის მისაცემად მუნციპალიტეტის მიერ დაქირავებული ტრანსპორტით გადაადგილდებოდა. შედის თუ არა გამგეობის კომპეტენციაში ამომრჩეველთა აქტიურობაზე ზრუნვა და მოხდა თუ არა ადიგენში ადმინისტრაციული რესურსის გამოყენების ფაქტები.

 ხუთი საათის მონაცემებით, ასპინძის #39 –ე საარჩევნო ოლქში  ამომრჩეველთა აქტივობამ  59% შეადგინა. კომისიის თავმჯდომარის როსტომ მაგრაქველიძის განმარტებით, კენჭისყრაში მონაწილეობა  ამ დროისათვის 5 720–მა ადამიანმა მიიღო. #39 –ე საარჩევნო ოლქის თავმჯდომარე ამბობს, რომ ამ დროისთვის უბნებზე კენჭისყრის პროცესი მშვიდ გარემოში მიმდინარეობს და არცერთი საჩივარი არ დაწერილა.

   ცესკოს სპიკერის, ეკა აზარაშვილის განცხადებით 15:00 საათის მონაცემებით არჩევნებში მონაწილეობა ქვეყნის მასშტაბით,   992 712-მა ამომრჩეველმა მიიღო, რაც საერთო რაოდენობის 28.94 %-ია.  2013 წლის საპრეზიდენტო არჩევნებზე 15:00 საათის მდგომარეობით ამომრჩეველთა აქტივობა  32% იყო. ცესკოს სპიკერმა ეკა აზარაშვილმა 16:00 სთ-ზე გამართულ საინფორმაციო ბრიფინგზე ასევე განაცხდა,  რომ არჩევნების ჩაშლის გამო ზუგდიდის საარჩევნო ოლქის, ანაკლიის 32-ე უბანზე ხელახალი კენჭისყრა კანონით დადგენილ ვადებში ჩატარდება. ამომრჩეველთა აქტივობის შესახებ განახლებულ ინფორმაციას ცესკო 17:30 საათზე გამოაცხადებს.

30-ე ახალციხის უბანზე ,,სალომე ზურაბიშვილი – საქართველოს გზის” წარმომადგენელმა, ახალციხის მუნიციპალიტეტის საკრებულოს თავმჯდომარის მეუღლემ – ნინო ბაღდოშვილმა გაფრთხილება მიიღო. საუბნო საარჩევნო კომისიის თავმჯდომარის თქმით, მას სურდა უბანზე მთელი დღის განმავლობაში დარჩენილიყო, რასაც კანონი უკრძალავს. კომისიის წევრებმა რამდენჯერმე მიუთითეს, რომ უბანი დაეტოვებინა. ბაღდოშვილი ახალციხის საოლქო საარჩევნო კომისიის – თეა გავაშელისა და 30-ე უბნის თავმჯდომარის – ზურაბ ანანიაშვილის მოთხოვნას დაემორჩილა, თუმცა ცოტა ხნის შემდეგ იგივე უბანზე დაბრუნდა და სურდა, რომ მისი პარტიის წარმომადგენლი ჩაენაცვლებინა.  საარჩევნო კოდექსის 42-ე მუხლის პირველი ნაწილი პარტიის წარმომადგენელს მთელი დღის განმავლობაში უბანზე ყოფნის უფლებას უზღუდავს. მიუხედავად ამისა, ნინო ბაღდოშვილმა ,,მე-9 არხთან” განმარტა, რომ მას კანონი არ დაურღვევია.

  მცირე ინცინდენტი მოხდა სხვილისის 21–ე უბანში, სადაც ,,სამართლიანი არჩევნების“ წარმომადგენელი დიანა მერაბიშვილი ამტკიცებდა, რომ ერთ–ერთ ამომრჩეველს ფანრის დაშუქებისას მარკირება არ ემჩნეოდა. დამკვირვებელი ამბობს, რომ სითხე ვადაგასული იყო. აღნიშნულ ფაქტს შეესწრო და მომხდარი დაადასტურა კომისიის ერთ–ერთმა წევრმაც. როზა სარქისიანი ირწმუნება, რომ ფანრის დანათებისას, ერთ პირს მარკირება არ დაუფიქსირდა, მიუხედავად იმისა, რომ მან კენჭისყრის ყველა პროცედურა გაიარა. ამ შემთხვევამდე მარკირების პროცედურა 300–მდე ადამიანს ჰქონდა გავლილი. ინცინდენტის შემდეგ კი მსგავს ფაქტს ადგილი აღარ ჰქონია, რის გამოც დამკვირვებელმა საჩივარი აღარ დაწერა.

    ასპინძის მუნიციპალიტეტში 15:00 საათამდე არჩევნებზე 4 814 ამომრჩეველი მივიდა, რომლის პროცენტული მაჩვენებელიც ასე გამოიყურება: 49,58 %. #39–ე საოლქო კომისიის თავმჯდომარის განცხადებით, მოცემულ დრომდე ოლქში საჩივარი არ შესულა. როსტომ მაგრაქველიძე ირწმუნება, რომ არჩევნები მუნიციპალიტეტში მშვიდ გარემოში მიმდინარეობს. მისივე თქმით, გაფრთხილება მიიღო “ნინო ბურჯანაძე – ერთიანი ოპოზიციის” გამგებლობის კანდიდატმა გელა ლეკიშვილმა, რომელსაც სურდა, რომ კენჭისყრის პროცესს დაკვირვებოდა. აღნიშნული კანონმდებლობით აკრძალულია. შეგახსენებთ, რომ ასპინძის მუნიციპალიტეტში ერთიან საარჩევნო სიაში 9 710 ამომრჩეველია რეგისტრირებული  

   ადიგენის მუნიციპალიტეტში 15:00 საათის მდგომარეობით,  არჩევნებში მოსახლეობის აქტივობა 40 % შეადგენს. #38–ე ადიგენის საარჩევნო ოლქის აღნიშნული დროის მონაცემებით, სასურველ კანდიდატს ხმა  6 263 ამომრჩეველმა მისცა. კომისიის თავმჯდომარის ჯაბა მაჭარაშვილის განმარტებით, 15:00 საათის მონაცემებით,  ოლქში საჩივარი არ შესულა. ახალი მონაცემები ცნობილი 17:00 საათზე გახდება. ადიგენის მუნიციპალიტეტში ერთიან საარჩევნო სიაში 15,426 პირია დაფიქსირებული.

   15:00 საათის მონაცემებით,  არჩევნებში მონაწილეობა ახალციხეში 11 733–მა პირმა მიიღო, რაც ამრჩეველთა 34%–ს შეადგენს. #37–ე ახალციხის საოლქო კომისიის წარმომადგენელთა ინფორმაციით, ამ დროის მონაცემებით ოლქში 3 საჩივარია შესული: #23–ე ფერსისა და #12–ე აგარის საარჩევნო უბნებზე “ერთიანი ნაციონალური მოძრაობის” წარმომადგენელს არ მიეცა საშუალება ჩაენაცვლებინა ამავე პარტიის წარმომადგენელი, რომელიც გადასატან ყუთს გაჰყვა. გარდა ამისა, მათ აუკრძალეს ფოტო–ვიდეო გადაღება, რაც ცესკოს 2012 წლის 24 სექტემბრის #42 დადგენილებას ეწინააღმდეგება. მესამე საჩივარი 14 ივნისს დაიწერა, რომელიც  მე–15 უბანზე, ასევე “ნაციონალური მოძრაობის” წარმომადგენელმა შეადგინა. საჩივრის მიხედვით კომისიის თავმჯდომარემ ბიულეტენები სახლში წაიღო.