ახალციხის მუნიციპალიტეტის სოფელ წნისში ვაშლის პირველი მოსავალი აიღეს, რომელმაც 2 ჰექტარზე დაახლეობით 10 ტონა შეადგინა. შპს „ჯორჯიან ბიზნეს ზონის“ წარმომადგენელი ირწმუნება, რომ ახალი ჯიშები, რომელიც საერთაშორისო ბაზრის სტანდარტებს აკმაყოფილებს, საუკეთესო გემური თვისებებითა და მოსავლიანობით  გამოირჩევა. ზაური ნეფარიძის თქმით, სრული მსხმოიარობის პერიოდში, აღნიშნულ ჯიშებს, 1 ჰექტარზე 60 ტონა მოსავლის მიღების პოტენციალი აქვს.

ადიგენის მუნიციპალიტეტში დაავადება ბრუცელოზი ყოველდღიურად ვრცელდება. დაავადება დაფიქსირდა, როგორც ცხოველებში, ასევე, ადამიანებშიც. ადგილობრივი საზოგადოებრივი ჯანდაცვის ცენტრის ინფორმაციით,  ბრუცელოზი სოფელ უდეში 1 ადამიანს დაუდასტურდა. მისი ჯანმრთელობის მდგომარეობა ამ დროისათვის დამაკმაყოფილებელია.

    ადიგენის მუიციპალიტეტში ბრუცელოზის შემთხვევა ადამიანებსა და ცხოველებში დაფიქსირდა. ადგილობრივი საზოგადოებრივი ჯანდაცვის ცენტრის ინფორმაციით,  ბრუცელოზი სოფელ უდეში 2 ადამიანს დაუდასტურდა. მათი ჯანმრთელობის მდგომარეობა ამ დროისათვის დამაკმაყოფილებელია და მკურნალობას ოჯახის პირობებში გადიან. ჯანდაცვის ცენტრის ეპიდემიოლოგის მაყვალა მეტრეველის განმარტებით მათთან 7 საეჭვო შემთხვევაზე შევიდა ინფორმაცია. მათგან ბრუცელოზი მხოლოდ ორს დაუდასტურდა. 3 კვლავ საეჭვოა, რადგან მათ თბილისში შესაბამისი ლაბორატორიული გამოკვლევა არ ჩაიტარეს, 3 მათგანს კი დაავადება არ დაუდასტურდა. სურსათის ეროვნული სააგენტოს სამცხე–ჯავახეთის რეგიონული სამმართველოს ინფორმაციით , დაბა ადიგენსა და სოფელ უდეში რამდენიმე შინაურ პირუტყვს ბრუცელოზი დაუდასტურდა. აღნიშნული ზონიდან  სისხლის 410 სინჯი ახალციხის ზონალურ–დიაგნოსტიკურ ცენტრში  2 ოქტომბერს ჩააბარეს. სპეციალისტები სინჯების გამოკვლევას რამდენიმე დღეში დაამთავრებენ და დაავადებული პირუტყვის რაოდენობა სწორედ ამის შემდეგ გახდება ცნობილი. სპეციალისტების განმარტებით, ბრუცელოზი ზოონოზური ინფექციურ-ალერგიული დაავადებაა.  გამომწვევი მდგრადია გარემოში, ასევე საკვებ პროდუქტებში. დასნებოვნება ხდება ალიმეტური გზით ან კანის მიკროდაიზანებით. გამომწვევი ჰემატოგენურად ვრცელდება მთელს ორგანიზმში,  სხვადასხვა ორგანოებსა და სისტემებში  ალერგოპათიასა და კერების ფორმირებას იწვევს. დაავადება გადაიცემა ცხოველიდან ადამიანზე.

კარტოფილის ახალი ჯიშები და სასოფლო სამეურნეო კულტურის სასარგებლო თვისებები – წნისის სადემონსტრაციო ნაკვეთში “მოსავლის დღე” გაიმართა. ახალციხის სასოფლო–საკონსულტაციო სამსახურის წარმომადგენლებმა სტუმრებს უმასპინძლეს და მათ კარტოფილის სხვადახვა ჯიშის შესახებ ინფორმაცია მიაწოდეს. ასევე შესთავაზეს დეგუსტაციაც.

ახალციხის მუნიციპალიტეტის სოფლებში გაზიფიცირების სამუშაოები მიმდინარეობს. შპს. ინტერგაზმა ბუნებრივი აირის შეყვანის პროცესი სოფელ ნაოხრებიდან დაიწყო. მიწისქვეშა სამუშაოების მიმდინარეობას დღეს სამცხე-ჯავახეთის გუბერნატორი აკაკი მაჭუტაძე და ინტერგაზის ხელმძღვანელი ვასილ აბულაძე ადგილზე გაეცნენ.

საქართველოს სოფლის მეურნეობის მინისტრი  სამცხე-ჯავახეთს ესტუმრა, ოთარ დანელიამ სოფელ წნისში ყველის, ხორბლისა და სხვა მრავალპროფილიანი საწარმო დაათვალიერა და მის მუშაობას გაეცნო. მინისტრმა სოფელში ასევე ვაშლის ბაღი და თევზსაცავიც მოინახულა.

     დღეს, ადიგენის მუნიციპალიტეტში სოფლის მეურნეობის სამინისტროს კოოპერატივების განვითარების სააგენტოს წარმომადგენელებმა საინფორმაციო შეხვედრა გამართეს და მუნიციპალიტეტის მასშტაბით კოოპერატივების ჩამოყალიბებისა და მათი სამომავლო განვითარების გეგმებზე იმსჯელეს. სამცხე–ჯავახეთის გუბერნატორის ადმინისტრაციის ინფორმაციით, შეხვედრას სოფლების რწმუნებულები, სოფლის მეურნეობის სამინისტროს ადიგენის საკონსულტაციო-საინფორმაციო სამსახურის წარმომადგენლები და აღნიშნული საკითხით დაინტერესებული მოქალაქეები დაესწრნენ. სასოფლო-სამეურნეო კოოპერაციის ხელშეწყობა სოფლის მეურნეობის განვითარების პროგრამის ერთ-ერთი პრიორიტეტია, რომელიც მთავრობის ინიციატივით ხორციელდება. კოოპერატივების განვითარების სააგენტოს წარმომადგენელების განცხადებით, საქართველოში ამ დროისთვის 160 კოოპერატივია დარეგისტრირებული.

საქართველოში მაღალპროდუტიული საქონელი სომხეთიდან შემოვა. ამასთან დაკავშირებით,  26 ივლისს,   საქართველოს ფერმერთა ასოციაციასა და სომხეთის, არზნის საჯშე მეურნეობას შორის მემორანდუმი გაფორმდა. პირუტყვის შეძენა ნებისმიერ მსურველს შეეძლება. როგორც არზნის ფიქრმის პრეზიდენტი განმარტავს, აღნიშნულ საქონლისგან შესაძებელია  3–ჯერ მეტი რძის მიღება, ვიდრე იმ ჯიშის პირიტყვისგან, რომლებიც საქართველოშია გავრცელებული.

ფერმერების ან  მეწარმეების მიერ ყველის ჩაბარებასთან დაკავშირებით კანონი მკაცრდება. მარკეტები ლაბორატორიულად შეუმოწმებელ ყველს აღარ ჩაიბარებენ. ქართულ ბაზარზე ასეთი მოთხოვნები ახალია. სურსათის უვნებლობის სააგენტოს  წარმომადგენლები ამბობენ, რომ სამომხმარებლო ბაზარზე შესაბამისი კონტროლი საქართველოს კანონმდებლობითაა გათვალისწინებული.

რწყვის სეზონის დადგომასთან ერთად, ირიგაციასთან დაკავშირებული  პრობლემები  ფერმერებისათვის უფრო აქტუალური ხდება. ახალციხის მუნიციპალიტეტის სოფლების უმეტეს ნაწილში სისტემა მწყობრიდან არის გამოსული ან  საერთოდ არ არსებობს, რაც ფერმერების თქმით, ნათესებზე უარყოფითად ისახება.  ისინი ხელისუფლებისაგან  საირიგაციო სისტემის  მოწესრიგებას ითხოვენ.

   სოფლის მეურნეობის მინისტრის პირველი მოადგილე ოთარ დანელია ხრიდოლის აკადემიის მიერ ორგანიზებულ პროექტში „საზოგადოებრივი ცნობიერების ამაღლება სოფლის მეურნეობის კუთხით“ მონაწილე სტუდენტებს შეხვდა. პროექტი შვეიცარიის განვითარების ფონდისა და მერსი კორპის მხარდაჭერით  ხორციელდება და  მიზნად  სოფლის მეურნეობის დარგის პოპულარიზაციას ისახავს, მასში ახალგაზრდების ჩართულობის ხელშეწყობას. თბილისისა და სამცხე-ჯავახეთის უმაღლესი სასწავლებლებიდან პროექტში მონაწილეობისათვის  36 სტუდენტი შეირჩა, რომლებმაც დაინტერესება გამოთქვეს სოფლის მეურნეობის დარგში არსებული ვითარებას და მიმდინარე პროექტებს გაცნობოდნენ. ,,დღეს, პრაქტიკულად, ყველა მიმართულებით სოფლის მეურნეობის დარგის რეაბილიტაცია მიმდინარეობს. მოხარული ვარ, რომ ახალგაზრდები დაინტერესებული ხართ სოფლის მეურნეობით და გსურთ თქვენი სამომავლო საქმიქნობა დაუკავშიროთ ამ ერთ-ერთ ყველაზე მნიშვნელოვანი დარგს. მისასალმებელია, რომ დღეს უკვე ინგრევა წლების განმავლობაში ჩამოყალიბებული სტერეოტიპი, აგრარული სპეციალობების ნაკლებად პრესტიჟულობასთან დაკავშირებით. სოფლის მეურნეობის ეფექტიანად განვითარებისათვის სასიცოცხლო მნიშვნელობა ენიჭება ახალგაზრდების მაქსიმალურ ჩართულობას. ჩვენ მზად ვართ შევქმნად სათანადო პირობები, რომ თქვენი სპეციალობების მიხედვით სოფლის მეურნეობის სამინისტროს დაქვემდებარებაში არსებულ სხვადასხვა უწყებებში გაიაროთ სტაჟირება“, – განაცხადა ოთარ დანელიამ. შეხვედრაზე საქართველოს ევროკავშირთან ასოცირების შესახებ შეთანხმების მნიშვნელობა განიხილეს. ოთარ დანელიას განცხადებით, ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) გაფორმება მნიშვნელოვანია არა მხოლოდ იმ თვალსაზრისით, რომ საქართველოსთვის ევროკავშირის შიდა ბაზარი გაიხსნება, რაც თავისთავად დიდად წაახალისებს ადგილობრივ წარმოებას, არამედ მნიშვნელოვანია ისიც, რომ DCFTA-ის ამოქმედებით, საქართველოში წარმოების ევროპული სტანდარტი დამკვიდრდება, რაც თავის მხრივ გაზრდის სასურსათო უსაფრთხოების დონეს.

სამცხე-ჯავახეთში კოოპერატივების ჩამოყალიბების პროცესი მიმდინარეობს. ახალციხისა და ასპინძის მასშტაბით ამ დროისათვის 10 კოოპერატივია რეგისტრირებული. მათგან 8 ახალციხის მუნიციპალიტეტში მდებარეობს, სადაც  4 გაერთიანება მეცხოველეობის, 3 -მემცენარეობისა და 1 მეფუტკრეობის მიმართულებით ფუნქციონირებს. გარდა ამისა, მათ რიცხვს კიდევ ერთი შეემატება.  

შეღავათიანი აგროკრედიტი და მის ფარგლებში დაფინანსებული საწარმოები — დღეს  სოფლის მეურნეობის სამინისტრომ სახელმწიფო პროგრამის ფარგლებში გახსნილი  74 ახალი საწარმოს პრეზენტაცია გამართა. შეღავათიანი აგროკრედიტით ახალციხის მუნიციპალიტეტში 172 ბენეფიციარი სარგელობს.

ახალციხეში სამთავრობო პროგრამის  პრეზენტაცია გაიმართა. იგი შეღავათიან პირობებში ახალი საწარმოების შექმნას გულისხმობს. პროექტის ბიუჯეტი 46 მილიონ ლარს შეადგენს. მის ფარგლებში მეწარმეს საშუალება აქვს პროექტში ჩართული რომელიმე ბანკიდან შეღავათიანი სესხი აიღოს, საწარმოს ამოქმედების პირობით კი  უძრავი  ქონება მას სახელმწიფოსგან სიმბოლურ ფასად გადაეცემა.

  საქართველოს ეკონომიკისა და მდგრადი განვითარების სამინისტროსა და სამცხე-ჯავახეთის სამხარეო ადმინისტრაციის ორაგნიზებით ახალციხეში დღეს  საინფორმაციო შეხვედრა გაიმართება, რომელიც მიზნად  ადგილობრივი მეწარმეებისა და ყველა დაინტერესებული პირისათვის  ახალი სამთავრობო პროგრამის “აწარმოე საქართველოში”-ს გაცნობას ისახავს . პროგრამა ,,აწარმოე საქართველოში” საქართველოს მთავრობის ინიციატივით ხორციელდება და მისი მიზანი საქართველოში მეწარმეობის განვითარება, მეწარმე სუბიექტების მხარდაჭერა, ახალი საწარმოების შექმნის ხელშეწყობა, ამასთანავე კერძო სექტორის კონკურენტუნარიანობისა და საექსპორტო პოტენციალის ზრდაა. პროგრამის ფარგლებში მეწარმეებს შესაძლებლობა ეძლევათ ისარგებლონ ფინანსური, ინფრასტრუქტურული და საკონსულტაციო მხარდაჭერით. პროგრამა  ორ მიმართულებას – სოფლის მეურნეობასა და ინდუსტრიას მოიცავს. შეხვედრაზე საქართველოს ეკონომიკისა და მდგრადი განვითარების და სოფლის მეურნეობის სამინისტროების წარმომადგენლები  პროგრამის დეტალებზე ისაუბრებენ. ღია კარის დღეს დაესწრებიან პროგრამაში მონაწილე მხარეები -კომერციული ბანკები, მეწარმეობის განვითარების სააგენტო და სოფლის მეურნეობის პროექტების მართვის სააგენტო, ასევე სამხარეო ადმინისტრაციისა და მხარის მუნიციპალიტეტების წარმომადგენლები. შეხვედრა სამცხე–ჯავახეთის სახელმწიფო უნივერსიტეტის მე-2 კორპუსში 13:00 საათზე გაიმართება. სამთავრობო პროგრამა “აწარმოე საქართველოში“ 1 ივნისიდან ამოქმედდა, რისთვისაც სახელმწიფო ბიუჯეტიდან 46 მლნ ლარია გამოყოფილი. აქედან სასოფლო-სამეურნეო პროდუქციის წარმოება-გადამუშავებაზე დაიხარჯება 30 მლნ ლარი, ინდუსტრიული პროდუქციის წარმოებაზე კი 16 მლნ ლარი.

    სახელმწიფო პროგრამის ფარგლებში ცოფზე პროფილაქტიკური ვაქცინაცია მიმდინარეობს. სურსათის ეროვნული სააგენტოს სამცხე–ჯავახეთის რეგიონული სამმართველოს ინფორმაციით,  რეგიონის მასშტაბით ძაღლები და კატები იცრება. ასევე, სახელმწიფო პროგრამის ფარგლებში ჩატარდა ვაქცინაცია დაავადება  “თურქულზეც”.  “ეპიზოოტიური კეთილსაიმედოობის” ფარგლებში 123 000 მსხვილფეხა  და  70 000 წვრილფეხა  პირუტყვი აიცრა. სურსათის ეროვნული სააგენტოს სამცხე–ჯავახეთის რეგიონული სამმართველოს უფროსის ინფორმაციით, “თურქულის” საწინააღმდეგო ვაქცინაცია, რეგიონის ოთხ მუნიციპალიტეტში დასრულდა, ხოლო ახალქალაქსა  და ბორჯომში ამ დრომდე მიმდინარეობს. სამმართველოს უფროსის თქმით, პროცესი აღნიშნულ  ორ მუნიციპალიტეტში  რამდენიმე დღეში დასრულდება. რაც შეეხება ჯილეხის საწინააღმდეგო აცრებს, ამ ეტაპზე დასრულებულია და  ვაქცინაცია 15 000 მსხვილფეხა პირუტყვს   ჩაუტარდა. როგორც რეგიონულ  სამმართველოში აცხადებენ,  ჯილეხისა და თურქულის საწინააღმდეგო უფასო პროფილაქტიკური აცრები სახელმწიფო პროგრამის ფარგლებში წელიწადში ორჯერ – გაზაფხულსა და შემოდგომაზე ტარდება. თურქულზე შინაური ცხოველი ყველა მუნიციპალიტეტსა და სოფელში იცრება, ხოლო ჯილეხზე – მხოლოდ მანიფესტურ კერებში.    

ასპინძის მუნიციპალიტეტის სოფელ რუსთავში ბრუცელოზი კიდევ ორ ადამიანს დაუდასტურდა.  როგორც სოფლის ექთანი განმარტავს ორივე პაციენტის მდგომარეობა დამაკმაყოფილებელია.  რაც შეეხება ბრუცელოზის შინაურ ცხოველში გავრცელების ფაქტებს,  მიმდინარე წელს დაავადება სამ სოფელში დაფიქსირდა: ოშორაში — 77, ივერიაში — 4 და რუსთავში — 18 შემთხვევა. ვეტერინარები განმარტავენ, რომ ამ ეტაპზე ახალი შემთხვევა გამოვლენილი  არ არის.

რუსეთის ბაზარზე ქართული საექსპორტო პროდუქციის ჩამონათვალი იზრდება. ორი ქვეყნის მოლაპარაკებების შედეგად, გასატანი პროდუქციის ჩამონათვალს რამდენიმე სახეობის ხოლ–ბოსტნეული ემატება.

მცირემიწიან ფერმერთა 2014 წლის საგაზაფხულო სამუშაოების ხელშეწყობის პროექტის” იმ ბენეფიციართა საჭიროების გათვალისწინებით, რომლებიც ხვნის სამუშაოებს შემოდგომაზე ახორციელებენ, მთავრობის გადაწყვეტილებით, ხვნის ბარათის გამოყენების ვადა 1 ნოემბრამდე გახანგრძლივდა.

სურსათის ეროვნულმა საააგენტომ შინაური ცხოველის დაავადება თურქულის პროფილაქტიკური ვაქცინაცია დაიწყო. ღონისძიება სახელმწიფო მიზნობრივი პროგრამის – „ეპიზოოტიური კეთილსაიმედოობის” ფარგლებში ხორციელდება. ცხოველთა იმუნიზაცია მოსახლეობისთვის უფასოა. აღნიშნული პროგრამით მთელი ქვეყნის მასშტაბით 1 528 000–ზე მეტი სული წვრილფეხა და მსხვილფეხა პირუტყვი აიცრება. მათ შორის: სამცხე-ჯავახეთში – 203 814 სული შინაური ცხოველი. ასევე, მანიფესტურ კერებში იწყება ვაქცინაცია დაავადება ჯილეხზეც.