სამცხე-ჯავახეთში რეგიონული კლუბი „ ტაო“ დაფუძნდა. იგი საქართველოში პირველი სარაგბო გუნდია, რომელიც რეგიონის ყველა მუნიციპალიტეტის ფინანსური მხარდაჭერით დაარსდა. ბაზა დაბა ასპინძაში მდებარეობს, სადაც 17 წლამდე 300 მოზარდი ივარჯიშებს. კლუბ „ტაოს“ დაფუძნება, ახალციხის, ასპინძისა და ადიგენის ბავშვთა გუნდების სარაგბო ფესტივალით დაიწყო.

ახალციხის მუნიციპალიტეტის პირველობაზე ფეხბურთში ტურნირი დაიწყო. ჩემპიონატი აწყურის სტადიონზე მიმდინარეობს. შეხვედრის პირველ დღეს ოთხი საფეხბურთო მატჩი გაიმართა. წნისის აწყურის, ვალისა და წყრუთის გუნდებმა მოწინააღმდეგე აგარის, სვირის, ორალისა და მინაძის გუნდები დაამარცხეს. ტურნირში მონაწილეობას ახალციხის მუნიციპალიტეტში შემავალი სოფლების ახალგაზრდებით დაკომპლექტებული თექვსმეტი გუნდი იღებს. თამაში წრიული სისტემით მიმდინარეობს. 

სამცხე-ჯავახეთში  რეგიონული კლუბი „ ტაო“ ფუძნდება. იგი პირველი სარაგბო გუნდი იქნება საქართველოში, რომელსაც  ადგილობრივი მუნიციპალიტეტები უჭერენ მხარს. გუნდის დაფუძნებასთან დაკავშირებით,  12 მაისს, 15:00 საათზე, ასპინძაში ღონისძიებები გაიმართება. იგი  ახალციხის, ასპინძისა და ადიგენის ბავშვთა  გუნდების სარაგბო ფესტივალით დაიწყება. მის ყველა მონაწილეს რაგბის კავშირის პრეზიდენტი – გოჩა სვანიძე, სამახსოვრო სიგელებს გადასცემს. ღონისძიება კლუბ „ტაოს“ წარდგენით გაგრძელდება. მოწვეულ სტუმრებს და კლუბის დამფუძნებლებს – სამცხე-ჯავახეთის გუბერნატორს, ახალციხის მერს, ახალციხის ადიგენის, ბორჯომის, ნინოწმინდის, ასპინძის გამგებლებს „ტაოს“  პრეზიდენტი, ირაკლი გვენეტაძე სამომავლო გეგმებს გააცნობს. კლუბის დაფუძნების მიზანია სამცხე-ჯავახეთის რეგიონში რაგბის ახალ საფეხურზე აყვანა და პოპულარიზაცია. ამ კლუბის დაარსებით საქართველოში  ახალ ტრადიციას ეყრება საფუძველი – რეგიონული სარაგბო გუნდი მუნიციპალიტეტების მიერ ადგილობრივი ბიუჯეტიდან იქნება მხარდაჭერილი.  

ჰიუნდაის მარკის სამი ავტომობილიდან ერთი ადიგენის მუნიციპალიტეტის სოფელ არალის მკვიდრმა, ერთი ნინოწმინდის მუნიციპალიტეტის სოფელ სპასოვკის მაცხოვრებელმა  და ერთიც რუსეთში მცხოვრებმა, წარმოშობით სხვილისელმა  მოჭიდავემ მოიგო. 90 კილოგრამ წონით კატეგორიაში წარმატებით გოგა აფრიამაშვილმა იასპარეზა, 75 კილოგრამ წონით კატეგორიაში – ზვიად მეკეიძემ, ხოლო აბსოლუტურ წონით კატეგორიაში არუთუნ ბილბარიანმა. შეჯიბრი ჭიდაობაში, სოფელ პამაჯში სახალხო დღესასწაულთან დაკავშირებით გაიმართა. მასში სპორტსმენები და მოყვარული მოჭიდავეები სამცხე–ჯავახეთიდან ჩაერთვნენ. პირველობისათვის სამი დღის განმავლობაში 400–მდე ახალგაზრდა სხვადასხვა წონით კატეგორიაში იბრძოდა. სახალხო დღესასწაული სურბ გევორქი წელს გრანდიოზულად აღინიშნა. სოფელ პამაჯში სპორტული და კულტურული ღონისძიებები მოეწყო, გარდა ამისა, სტუმრებს ადგილობრივი კერძების დაგემოვნება უფასოდ შეეძლოთ. სპორტული აქტივობისთვის დაწესებული პრიზებიდან ყველაზე მიმზიდველი, პირველ ადგილზე გასული მოჭიდავეებისთვის „ჰიუნდაის“ მარკის ავტომობილები იყო. სახალხო დღესასწაულს ორგანიზება და სპონსორობა წარმოშობით ადგილობრივმა ბიზნესმენმა აშოტ ბაბოიანმა გაუწია. მისივე ინიციატივით დაწესდა აღნიშნული  პრიზებიც. თიკო კურტანიძე

სამი ჰიუნდაი, ველოსიპედები, კომპიუტერები და კერძები  – სახალხო დღესასწაული სურბ გევორქი სოფელ პამაჯში  გრანდიოზულად აღინიშნება. სპორტულ ღონისძიებაში გამარჯვებულთათვის არაერთი პრიზი თამაშდება, თუმცა სამ კატეგორიაში გამოვლენილ მოჭიდავეს ყველაზე სასურველი პრიზი – “ჰიუნდაის” მარკის ავტომობილები გადაეცემა. სახალხო დღესასწაულს ორგანიზება და სპონსორობა წარმოშობით ადგილობრივმა ბიზნესმენმა აშოტ ბაბოიანმა გაუწია. მისივე ინიციატივით დაწესდა აღნიშნული გრანდიოზული პრიზებიც.

ახალციხის ღია პირველობა მძლეოსნობაში. მიხეილ იაძის სახელობის სტადიონმა, საქართველოს სხვადასხვა ქალაქიდან, 170–მდე მძლეოსანს უმასპინძლა. სხვადასხვა ასაკობრივი კატეგორიის სპორტსმენები ერთმანეთს მძლეოსნობის რამდენიმე სახეობაში შეეჯიბრნენ. გოგოებისა და ბიჭების გუნდებმა, რამდენიმე დისტანციაზე ირბინეს. სირბილის გარდა, ჩემპიონატი ჩატარდა უროს ტყორცნაში, ბირთვის კვრასა და ბადროს ტყორცნაში. ახალციხის გუნდმა 14 საპრიზო ადგილი მოიპოვა, აქედან ოთხი, მესხმა სპორტსმენებმა, ოქროს მედალი მიიღეს. ახალციხის ღია პირველობაზე, საქართველოს ორი და სტადიონის ერთი რეკორდი მოიხსნა.

ახალციხეში სამსახურებს შორის მინიფეხბურთში ჩემპიონატი დასრულდა. ტურნირში გამარჯვება კომპანია „დელტა ნეტის“ გუნდმა მოიპოვა. დასკვნით მატჩში  მათ,  მოწინააღმდეგე სუპერმარკეტ „სმარტის“ გუნდი, დამაჯერებელი სხვაობით დაამარცხეს. შეხვედრის ბოლოს ღონისძიების ორგანიზატორმა გელა მაისურაძემ პირველსა და მეორე ადგილზე გასული გუნდები თასებით, მედლებითა და სერტიფიკატებით დააჯილდოვა. ასევე გამოვლინდნენ სხვადასხვა ნომინაციაში გამარჯვებული ფეხბურთელები, რომლბსაც საჩუქრები გადაეცათ.

საბრძოლო ხელოვნების საერთაშორისო ტურნირში  MMA ახალციხელმა სპორტსმენებმა წარმატებას მიაღწიეს. ბრძოლა წესების გარეშე თბილისში აღმოსავლეთ ევროპის უნივერსიტეტის დარბაზში ჩატარდა. ახალციხის მერიის ინფორმაციით, ათი მონაწილიდან ქალაქს წარმატება ცხრა სპორტსმენმა მოუტანა. მათ 4 ოქროს, 4 ვერცხლის და 1 ბრინჯაოს მედალი მოიპოვეს. „ჩვენმა მონდომებამ და ფიზიკურად მომზადებამ შდეგი გამოიღო. გვასახელს ჩვენმა ბიჭებმა და წარმატებით დავბრუნდით“ -აცხადებს მეცამეტე ლეგიონის პრეზიდენტი და მთავარი მწვრთნელი მიშა მესხი.

ფრენბურთის ტურნირში სამცხე-ჯავახეთის გამარჯვებული გუნდი ცნობილია. ახალციხის მუნიციპალიტეტის ინფორმაციით, რეგიონული ჩემპიონატის ფინალში ვალისა და ბორჯომის გუნდებმა იასპარეზეს. გამარჯვება ვალის გუნდმა მოიპოვა, რომელიც სამცხე-ჯავახეთის სახელით საქართველოს პირველობისთვის იბრძოლებს. მანამდე კი გამარჯვებული გუნდის ახალგაზრდები 20 დღის განმავლობაში ანაკლიაში დაისვენებენ. ფრენბურთის ტურნირში მონაწილეობა ბორჯომის, ნინოწმინდის, ასპინძის, ადიგენის, ქალაქ ახალციხისა და ახალციხის მუნიციპალიტეტის გუნდებმა მიიღეს. ტურნირი სასკოლო სპორტული ოლიმპიადის ფარგლებში სპორტისა და განათლების სამინისტროების ეგიდით მოეწყო. სპორტული ღონისძიების მიზანი ახალგაზრდებში ჯანსაღი ცხოვრების პოპულარიზაციაა.

ახალციხელი კარატისტები საერთაშორისო ჩემპიონატიდან სამი საპრიზო ადგილით დაბრუნდნენ. შიტორიუ კარატე დოს ახალციხის სკოლის “საფარის” სპორტსმენებმა ტურნირზე, სახელწოდებით “Open Tbilisi” სამი ბრინჯაოს მედალი მოიპოვეს. სამცხე–ჯავახეთის რეგიონის მთავარი ხელმძღვანელის მამუკა ზუმბაძის თქმით, ჩემპიონატზე უძლიერესმა სპორტსმენებმა იასპარეზეს. ტურნირი სახელწოდებით “Open Tbilisi” 17 აპრილს თბილისში გაიმართა. მასში მსოფლიოს მასშტაბით, ათამდე ქვეყანა მონაწილეობდა. ახალციხიდან ჩემპიონატზე იასპარეზეს როგორც გამოცდილმა , ასევე დამწყებმა სპორტსმენებმაც. სამომავლოდ, შიტორიუ კარატე დოს ახალციხის სკოლის კარატისტები ბათუმში საერთაშორისო ჩემპიონატზე გაემგზავრებიან, რომელიც  19, 20 და 21 მაისს გაიმართება. თიკო კურტანიძე

ახალციხელი კარატისტები ტურნირისთვის ემზადებიან. შიტორიუ კარატე დოს სკოლის „საფარის“ სპორტსმენები საერთაშორისო ჩემპიონატზე იასპარეზებენ. ტურნირში მონაწილეობას მიიღებენ, როგორც გამოცდილი, ასევე დამწყები კარატისტებიც. „Open Tbilisi“ 17 აპრილს საქართველოს დედაქალაქში გაიმართება. ტურნირში მსოფლიოს მასშტაბით ათამდე ქვეყანა ჩაერთვება. ჩემპიონატის საპრიზო ფონდი 5 000 ლარია. ავტორები: თიკო კურტანიძე, ბექა ზდგინიძე, რამაზ ალავიძე

ახალციხის სასპორტო სკოლაში „მხიარული სტარტების ფინალი“ გაიმართა. მასში მონაწილეობა  ოთხი სკოლის გუნდმა მიიღო. პირველი ადგილისთვის მუსხის, ვალის, ახალციხის მეხუთე საჯარო სკოლისა და „მზექას“ გუნდებმა იბრძოლეს. მუნიციპალიტეტის მასშტაბით, პირველობა 37 ქულით ახალციხის მეხუთე სკოლის გუნდმა მოიპოვა. მეორე ადგილზე – მუსხის გუნდი გავიდა, ხოლო მესამე ადგილს „მზექას“ სკოლა დასჯერდა. გამარჯვებული გუნდის მონაწილეებს შესაბამისი კატეგორიის მედლები და სიგელები გადაეცათ. პირველადგილოსანი სკოლის გუნდმა კი „მხიარული სტარტების“ თასიც მიიღო.

ახალციხეში ,,მხიარული სტარტების“ შესარჩევი ტური ჩატარდა. მასში მონაწილეობა თემის შვიდმა, ხოლო ქალაქის ოთხმა სკოლამ მიიღო.  თითოეული გუნდი 12 მოსწავლით იყო დაკომლექტებული, რომლის შემადგენლობაშიც 11–დან 15–წლამდე ასაკის გოგონები და  ვაჟები შედიოდნენ. ,,მხიარული სტარტების“ კოორდინატორის მამუკა გონაშვილის თქმით, შესარჩევი ტურიდან ქულების მიხედვით 4 გუნდი შეირჩევა, რომლებიც 10 აპრილს ფინალურ შეხვედრაზე პირველობისთვის იასპარეზებს.

დღეს, პირველ აპრილს მიხეილ იაძის სახელობის ცენტრალურ სტადიონზე მძლეოსნობაში ახალციხის ღია პირველობა ჩატარდა. ღონისძიებაში მონაწილეობის მისაღებად სპორტსმენები სხვადასხვა ქალაქიდან ჩამოვიდნენ. ტურნირში მონაწილეობა 12–დან 17 წლამდე ასაკის გოგონებმა და ბიჭემა მიიღეს, რომლებიც 4 ასაკობრივ ჯგუფად იყვნენ წარმოდგენილნი.

ახალციხის მძლეოსნობის სპორტული კლუბი ჩემპიონატისთვის ემზადება. პირველ აპრილს, მიხეილ იაძის სახელობის ცენტრალურ სტადიონზე ახალგაზრდები კროსში, ახალციხის ღია პირველობისთვის იასპარეზებენ. ღონისძიებაში მონაწილეობას სხვადასხვა ქალაქის მძლეოსნობის კლუბის წევრები მიიღებენ.

შინაგან საქმეთა სამინისტროს თანამშრომლებმა 27 მარტს თბილისში, სპორტულ კლუბ „შატილის“ დარბაზში გამართულ, ძალისმიერ წოლჭიმში საქართველოს ღია ჩემპიონატზე 2 ოქროს და 1 ვერცხლის მედალი მოიპოვეს. შსს-ს სახელით, ტურნირში მონაწილეობდნენ სამცხე-ჯავახეთის პოლიციის დეპარტამენტის დირექტორი თეიმურაზ კალანდაძე, საპატრულო პოლიციის სამცხე-ჯავახეთის მთავარი სამმართველოს უფროსის მოადგილე კობა კობახიძე და საპატრულო პოლიციის დეპარტამენტის თანამშრომელი, პოლიციის მაიორი ლევან გილიგაშვილი. შსს–ს ინფორმაციით, კობა კობახიძემ 120 კგ წონით კატეგორიაში, ვეტერანების ჯგუფში იასპარეზა, 145 კილოგრამიანი შტანგა ასწია, რითაც თავის ჯგუფში რეკორდი დაამყარა, პირველ ადგილზე გავიდა და ოქროს მედალი მოიპოვა. ლევან გილიგაშვილმა, 83 კგ წონით კატეგორიაში, 200 კილოგრამიანი შტანგის აწევა შეძლო და ასევე ოქროს მედალი მოიპოვა. თეიმურაზ კალანდაძემ კი 74 კგ წონით კატეგორიაში იასპარეზა, 135 კილოგრამიანი შტანგა ასწია, მეორე ადგილი დაიკავა და ვერცხლის მედალს დაეუფლა. საქართველოს ღია ჩემპიონატი ძალისმიერ წოლჭიმში პროფესიონალ სპორტსმენებს შორის ყოველწლიურად იმართება

ახალციხეში გოგონათა საფეხბურთო გუნდი ჩამოყალიბდა. ძველი და ახალი წევრებისათვის  დემოკრატიული ჩართულობის ცენტრში სამუშაო შეხვედრა გაიმართა. ამ დროისათვის გუნდში  50–მდე გოგონა ირიცხება.  სამცხე–ჯავახეთის ფეხბურთის ფედერაციის პრეზიდენტის განმარტებით, მსურველთა რაოდენობა ბევრად მეტია, ამიტომ  მათ გუნდში ეტაპობრივად დაიმატებენ. გელა მაისურაძის თქმით, ფეხბურთელები აქტიურ ვარჯიშს უკვე შეუდგნენ და მალე ჩემპიონატებშიც ჩაერთვებიან. 

2016 წლის მსოფლიო საჯომარდო კალენდარში  ევრო–თასის გათამაშების თარიღი და ადგილი ჩაინიშნა. ჩემპიონატი საქართველოში, კერძოდ კი ბორჯომის ხეობაში,  25–29 მაისს გაიმართება. ტურნირი მდინარე მტკვარზე, ქალებსა და ვაჟებში 6 კაციანი ნავების კატეგორიაში, მსოფლიო ფედერაციის საყოველთაოდ მიღებული წესებისა და ინსტრუქციის მიხედვით ჩატარდება. ბორჯომის ადმინისტრაციის ინფორმაციით, ამ დროისთვის, ღონისძიებაში მონაწილეობისთვის უკვე 12 ქვეყანაა დარეგისტრირებული. ევრო–თასის გათამაშებისთვის გათვალისწინებულია ფულადი საპრიზო ფონდი. ღონისძიებას მხარს უჭერენ საქართველოს სპორტისა და ახალგაზროდობის საქმეთა სამინისტრო და ბორჯომის მუნიციპალიტეტის გამგეობა. 

19-20 მარტს “ბაკურიანობა” 2016 გაიმართება. მას ორგანიზებას ბორჯომის მუნიციპალიტეტი გაუწევს. ადმინისტრაციის ინფორმაციით, დღესასწაულის ფარგლებში სხვადასხვა სახის სპორტული და კულტურული ღონისძიება ჩატარდება. 19 მარტს სპორტულ შეჯიბრებებს უმასპინძლებს დიდველი, სადაც  გიგანტური სლალომი მოეწყობა. სლალომის დამთავრებისთანავე ჩატარდება შეჯიბრება სნოუბორდისტებს შორის. 20 მარტს გაიმართება შემდეგი სპორტული ღონისძიებები: 11:00 სთ-თხილამურებით სირბილი ( ე.წ “ოცდახუთიანების ტრასა”); 12:00სთ -ტრამპლინიდან თხილამურებით ხტომა (ტრამპლინი, “ოცდახუთიანების” მიმდებარედ); 14:00 სთ- კვადროციკლებით შეჯიბრი (“ოცდახუთიანების” მიმდებარედ); 15:00სთ – ცხენებით ჯირითი (“ოცდახუთიანების” მიმდებარედ) დაჯილდოვების ცერემონია 17:00 საათზე ცენტრალურ მოედანზე გაიმართება. დღესასწაული გალაკონცერტით დაიხურება, რომელიც ასევე ცენტრალურ მოედანზე,  18:00 საათზე დაიწყება. 

შიტორიუ კარატე დოს ახალციხელი სპორტსმენები ჩემპიონატებისთვის ემზადებიან. აპრილის თვეში ესპანეთში ევროპის ღია ჩემპიონატი გაიმართება, სადაც ახალციხელი კარატისტებიც არიან მიწვეულნი. გარდა ამისა, სპორტსმენები ახლო მომავალში სკოლებს შორის მსოფლიო ჩემპიონატზეც იასპარეზებენ, რომელიც თბილისის სპორტის სასახლეში ჩატარდება.   ჩემპიონატებისთვის მზადების პარალელურად, ახალციხეში გამოცდა–სემინარები ჩატარდა.  სპორტსმენების შესაძლებლობები შიტოკაი კარატე დოს ასოციაციის წარმომადგენლებმა შეაფასეს.