2015 წლის 28 ოქტომბერს, სამცხე-ჯავახეთის სახელმწიფო უნივერსიტეტის 25 წლის იუბილესთან დაკავშირებით, სრულიად საქართველოს კათოლიკოს პატრიარქი ილია II, საპატრიარქოს რეზიდენციაში, სამცხე-ჯავახეთის სახელმწიფო უნივერსიტეტის რექტორს, პროფესორ-მასწავლებლებსა და სტუდენტებს შეხვდა. როგორც შეხვედრაზე უნივერსიტეტის რექტორმა, პროფესორმა მერაბ ბერიძემ აღნიშნა, უმაღლესი სასწავლებელი ახალციხეში საქართველოს ეკლესიის მეთაურის ილია II-ის ლოცვა–კურთხევით დაარსდა, ამიტომ მართებულად თვლის, რომ უნივერსიტეტის ხელმძღვანელობამ, პროფესურამ და სტუდენტებმა პატრიარქს ერთგვარი ანგარიში წარუდგინონ, 25 წლის მანძილზე უნივერსიტეტის განვლილ გზაზე, მიღწევებზე, პრობლემებსა და სამომავლო პერსპექტივებზე. კათოლიკოს პატრიარქმა სამცხე-ჯავახეთის უნივერსიტეტის წარმომადგენლები დალოცა და წარმატებები უსურვა.

არასამთავრობო ორგანიზაცია world vision-ის ახალგაზრდული საბჭოს წევრები სამცხე–ჯავახეთის გუბერნატორს შეხვდნენ. მოსწავლეებმა აკაკი მაჭუტაძეს თანატოლები პრობლემები გააცნეს და მათი აღმოფხვრის მიზნით საკუთარი ინიციატივები წარუდგინეს. ამასთან ახალგაზრდებმა,  სპორტული შეჯიბრებების გამართვასა და ლაშქრობების მოწყობაში მხარდაჭერა ითხოვეს. მხარის გუბერნატორმა მათ დახმარება აღუთქვა. ერთობლივი ძალებით, რეგიონში ტურნირების გამართვა 2016 წლის მაისისთვის დაიგეგმა.

მწერალი დათო ტურაშვილი ადიგენში საჯარო სკოლების მოსწავლეებს შეხვდება. შეხვედრა 21 ოქტომბერს, 14:00 საათზე გაიმართება. შეხვედრის ორგანიზატორია აიპ „კონფლიქტებისა და მოლაპარაკებების საერთაშორისო კვლევითი ცენტრი“, რომელიც Mercy Corps-თან ერთად, USAID-ის ფინანსური მხარდაჭერით სამცხე–ჯავახეთსა და ქვემო ქართლში ახორციელებს პროექტს „ჰორიზონტის გაფართოება – გაუმჯობესებული არჩევანი ქალთა და გოგონათა პროფესიული და ეკონომიკური განვითარებისათვის“. ღონისძიება ადიგენის კრეატიულ ოთახში ჩატარდება

ახალციხის სკოლამდელი  აღზრდის დაწესებულებებში გათბობა ჩაირთო. უკვე სამი დღეა, პატარები ცენტრალური გათბობით, ან შეშის ღუმელით თბებიან. პრობლემა იყო ნომერ მეხუთე საბავშო ბაღში, სადაც  გათბობა,  16 ოქტომბერს  მას შემდეგ ჩაირთეს, რაც თემით „მეცხრე არხი“ დაინტერესდა. ცივი ამინდების მიუხედავად, ახალციხის ნომერ მეხუთე საბავშვო ბაღში გათბობა  დღეს ჩაირთო. ა(ა)იპ „სკოლამდელი აღზრდის დაწესებულების“ ხელმძღვანელი აცხადებდა, რომ გათბობასთან დაკავშირებული პრობლემა არცერთ ბაღში იყო.  ინფორმაციის გადამოწმების შემდეგ კი ნანა ბერიძემ  „მეცხრე არხთან“  განმარტა, რომ  მეხუთე საბავშვო ბაღში  ტექნიკური ხარვეზები იყო. აქ ჯერ  წყალი  მოწყდა, შემდეგ კი  ელექტროენერგია გამოირთო, რის გამოც  ბაღს  გათბობა არ მიეწოდებოდა. 16 ოქტომბრიდან პატარებს სკოლამდელი აღზრდის ყველა დაწესებულებაში  სითბო დახვდებათ.

ღვაწლმოსილი პედაგოგებისა და ნიჭიერი ახალგაზრდების გასაცნობად, დღეს სპეციალური ღონისძიება გაიმართა. 31 სოფლის ყველაზე ასაკიან მასწავლებელესა და ნიჭიერ ახალგაზრდებს, რომლებიც საკუთარ ლექსებს, ჩანახატებსა და ცნობილი ქართველი პოეტების ლექსებზე სიმღერებს ქმნიან, ახალციხის მუნიციპალიტეტის გამგეობამ უმასპინძლა. მოსწავლეებმა აუდიტორიის წინაშე საკუთარი შემოქმედება წარადგინეს და სასიმღერო ნომრები შეასრულეს. ღონისძიება ახალციხის გამგეობის კულტურის სამსახურის ინიციატივით გაიმართა. საღამოს დასასრულს, ღვაწლმოსილ პედაგოგებსა და ნიჭიერ ახალგაზრდებს სიმბოლური საჩუქრები გადაეცათ.

სახელმწიფო სასწავლებლებში, პროფესიულ პროგრამებზე მისაღები გამოცდა დარეგისტრირებულმა აპლიკანტებმა დღეს, 11 ოქტომბერს ჩააბარეს. საგამოცდო ცენტრები ახალციხის რამდენიმე სკოლაში იყო გახსნილი. პროცესს გამოცდების ეროვნული ცენტრის წარმომადგენლები აკვირდებოდნენ. სრული სახელმწიფო დაფინანსების მისაღებად კონკურსანტს მინიმალური კომპეტენციის ზღვარი უნდა გადაელახა და კითხვების 25%  სწორი პასუხი უნდა გაეცა. აპლიკანტებისთვის, გამოცდის შედეგები მოგვიანებით გახდება ცნობილი. პროფესიულ პროგრამებზე სტუდენტთა მიღება, რეგიონში, საზოგადოებრივ კოლეჯ ,,ოპიზარს“ და სამცხე–ჯავახეთის სახელმწიფო უნივერსიტეტს ჰქონდა გამოცხადებული. სამცხე–ჯავახეთის სახელმწიფო უნივერსიტეტში 8 სპეციალობის 101 ადგილზე, 350 განაცხადი შევიდა. აქ ძირითადი მიმართულებები ფარმაცია, საბუღალტრო საქმე და ბაგა–ბაღის აღმზრდელია. ახალციხის საზოგადოებრივმა კოლეჯმა წელს მიღება 18 სპეციალობის 338 ადგილზე გამოაცხადა. კოლეჯში 268 განაცხადი შევიდა. ყველაზე მაღალი კონკურსი ბუღალტრის, თმის სტილისტისა და ვებსპეციალისტის პროგრამებზეა. პროფესიულ პროგრამებზე შემდეგი მიღება გაზაფხულზე გამოცხადდება.

ახალციხის საჯარო სკოლების მასწავლებლები პედაგოგთა სასერტიფიკაციო გამოცდებისათვის რეგისტრირდებიან. მეექსვე სკოლაში ამბობენ, რომ სერტიფიცირება მნიშვნელოვანია, რათა ამ კუთხით მათი კვალიფიკაციის ამაღლებდა და პროფესიული ზრდა მოხდეს. კანონის თანახმად გამოცდაზე გასვლის უფლება აქვს პრაქტიკოს მასწავლებელს, ბაკალავრის, მაგისტრის ან მასთან გათანაბრებული აკადემიური ხარიხსის მქონე პირს, რომელსაც მიღებული აქვს ეროვნული სასწავლო გეგმის შესაბამისი საგნის ხარისხი და მასწავლებლობის მსურველს, რომელსაც დიპლომის საფუძველზე პედაგოგობის უფლება აქვს. ისინი გამოცდას ეროვნული სასწავლო გეგმით გათვალისწინებულ საგნებში ჩააბარებენ.

გახდი პროფესიონალი და დასაქმდი. სახელმწიფო სასწავლებლებში პროფესიულ პროგრამებზე სწავლის მსურველთა რეგისტრაცია დასრულდა. აღნიშნულ პროგრამებზე სწავლა რეგიონში საზოგადოებრივ კოლეჯ ,,ოპიზარში“ და სამცხე–ჯავახეთის სახელმწიფო უნივერსიტეტშია შესაძლებელი. რეგისტრაცია 10–დან 27 სექტემბრამდე საგანმანათლებლო რესურსცენტრსა და სასწავლებლებში მიმდინარეობდა. სამცხე–ჯავახეთის სახელმწიფო უნივერსიტეტმა მიღება 8 სპეციალობის 101 ადგილზე გამოაცხადა. ძირითადი მიმართულებები ფარმაცია, საბუღალტრო საქმე და ბაგა–ბაღის აღმზრდელია. უნივერსიტეტში 350 განაცხადი შევიდა.

როგორ უნდა შეარჩიოთ სწორად პროფესია? – ახალციხის მუნიციპალიტეტის სკოლების დამამთავრებელი კლასების მოსწავლეებს სამცხე–ჯავახეთის  სახელმწიფო უნივერსიტეტისა და პროფესიული კოლეჯის წარმომადგენლები ესაუბრნენ.

მეუფე თეოდორე, სამცხე–ჯავახეთის სახელმწიფო უნივერსიტეტის პირველი საპატიო დოქტორი გახდა.  ახალციხისა და ტაო–კლარჯეთის მიტროპოლიტს, აღნშნული  წოდება  უმაღლესი საგანმანათლებლო დაწესებულების ადმინისტრაციამ მიანიჭა და სპეციალური სიგელი გადასცა. როგორც  რექტორმა, მერაბ ბერიძემ განმარტა, უნივერსიტეტს მეუფესთან 25 წლიანი თანამშრომლობა აკავშირებს, თუმცა, ამიერიდან მათი ურთიერთობა უფრო გახშირდება.

ახალი სასწავლო წელი და ძველი სახელმძღვანელოები – ახალციხის საჯარო სკოლებში სწავლა დაიწყო. განათლების სამინისტროს გადაწყვეტილებით, უკვე მეორე წელია მოსწავლეები უფროსკლასელების მიერ გამოყენებული  უფასო სახელმძღვანელოებით სარგებლობენ. სკოლებში განმარტავენ,  რომ წიგნები უმნიშვნელოდაა დაზიანებული და  მისი გამოყენება შესაძლებელია. წიგნებით სრულად უზრუნველყოფილი არ არის ახალციხის სომხურენოვანი სკოლები. დირექტორთა განმარტებით, მშობლიური ენის სახელმძღვანელო დაწესებულებებს ამ დრომდე არ მიუღიათ. მათივე თქმით, მოთხოვნა აღნიშნულის შესახებ განათლების სამინისტროს დროულად გადაეცა.

სასწავლო წლის დაწყება თემის საჯარო სკოლის მოსწვალეებს ახალციხის  გამგეობის წარმომადგენლებმა  მიულოცეს. საჯარო მოხელეები მუნიციპალიტეტის 32 სკოლას ესტუმრნენ და პირველკლასელებს სასკოლო ინვენტარი გადასცეს. ახალციხის გამგებლის თქმით,  საჩუქრებისათვის ადგილობრივი ბიუჯეტიდან  1 800 ლარი გამოიყო.

საქართველოს მასშტაბით, საჯარო სკოლებში სწავლა 14 სექტემბერს დაიწყება, – ამის შესახებ საქართველოს განათლებისა და მეცნიერების მინისტრის მოადგილე ლია გიგაურმა 19 აგვისტოს გამართულ პრესკონფერენციაზე განაცხადა. რაც შეეხება კერძო სკოლებს, ისინი სწავლის დაწყების თარიღს თავად განსაზღვრავენ. ლია გიგაურის ინფორმაციით, 2015-2016 სასწავლო წლის ეროვნული სასწავლო გეგმის ადმინისტრაციულ ნაწილში შევიდა გარკვეული ცვლილებები. მათ შორის კერძო სკოლებისთვის სასწავლო კვირების მინიმალური რაოდენობა 34 კვირით განისაზღვრა. კერძო სკოლები თუ სწავლას გვიან დაიწყებენ სასწავლო წლის დამთავრება მათ საკმაოდ გვიან მოუწევთ. დღეის მდგომარეობით, საჯარო და კერძო სკოლებში სულ დარეგისტრირებულია 46 660 მოსწავლე. განათლების სამინისტროს 820-მა მშობელმა მიმართა, რომელთაც შვილების დარეგისტრირება ვერ მოახერხეს, ანუ სხვადასხვა მიზეზის გამო, ეს პერიოდი გამორჩათ, ამიტომ 1 და 2 სექტემბერი პირველკლასელთა დამატებითი რეგისტრაციის ვადად განისაზღვრა.

 1 და 2 სექტემბერი პირველკლასელთა დამატებით სარეგისტრაციო ვადად განისაზღვრა. იმ ბავშვებისთვის, რომელთა ასაკი კანონით განსაზღვრულ მოთხოვნებს შეესაბამება, მაგრამ სკოლაში დღემდე არ არიან დარეგისტრირებულნი, განათლებისა და მეცნიერების სამინისტრო დამათეით დროს გამოყოფს. რეგისტრაცია განხორციელდება ელექტრონული ფორმით განათლების მართვის საინფორმაციო სისტემის ვებგვერდზე http://registration.emis.ge  მხოლოდ იმ სკოლებში, სადაც განსაზღვრული ლიმიტის ფარგლებში ვაკანტური ადგილებია.რეგისტრირებული მოსწავლის ჩასარიცხად აუცილებელი დოკუმენტების მიღება განხორციელდება ზოგადსაგანმანათლებლო დაწესებულებებში 3 და 4 სექტემბერს. საქართველოს ზოგადსაგანმანათლებლო დაწესებულებაში მოსწავლის პირველ კლასში ჩასარიცხად წარსადგენი აუცილებელი დოკუმენტების ნუსხა: 1. მოსწავლის კანონიერი წარმომადგენლის განცხადება, რომელიც უნდა შეიცავდეს კანონიერი წარმომადგენლის საცხოვრებელი ადგილისა და ტელეფონის ნომრის თაობაზე ინფორმაციას 2. დაბადების მოწმობის ან პირადობის დამადასტურებელი დოკუმენტის სანოტარო წესით დამოწმებული ასლი. 3. საჯარო სამართლის იურიდიული პირის – სახელმწიფო სერვისების განვითარების სააგენტოს ან მისი ტერიტორიული სამსახურის მიერ გაცემული დოკუმენტი, რომლითაც დასტურდება მოსწავლისათვის პირადი ნომრის მინიჭება. სკოლას უფლება აქვს დამატებით მოითხოვოს მოსწავლის ფოტოსურათის და სხვა დოკუმენტაციის წარდგენა. საქართველოს განათლებისა და მეცნიერების სამინისტრომ 2015-2016 სასწავლო წლისათვის პირველკლასელთა რეგისტრაციის ვადებად 2015 წლის 23 აპრილილიდან 11 ივლისამდე პერიოდი განსაზღვრა. რეგისტრაცია 3 ეტაპად განხორციელდა და დღეისათვის საჯარო და კერძო სკოლების პირველ კლასებში 46 660 მოსწავლეა დარეგისტრირებული. მიუხედავად იმისა, რომ რეგისტრაციის პერიოდი საკმაოდ ხანგრძლივი იყო, ვადის ამოწურვის შემდეგ სამინისტროში რამოდენიმე ასეული მომართვა შევიდა იმ მშობლებისაგან, რომელთაც სხვადასხვა მიზეზების გამო გამორჩათ პირველკლასელთა რეგისტრაციის პერიოდი და ვერ დაარეგისტრირეს ბავშვები. სწორედ ამიტომ, სამინისტრომ დამატებითი დრო განსაზღვრა.

ერთიანი ეროვნული გამოცდები  ქიმიის საგნით დასრულდა. გამოცდების ეროვნული ცენტრის ინფორმაციით, შედეგები რამდენიმე დღეში გამოქვეყნდება. ერთიანი ეროვნული გამოცდები დასრულდა. დღეს, 22 ივლისს აბიტურიენტებმა ბოლო გამოცდა ქიმიის საგანში ჩააბარეს. შეფასებისა და გამოცდების ეროვნული ცენტრის ინფორმაციით,  საქართველოს მასშტაბით, ქიმია დამატებით საგნად დაახლოებით 1500–ზე მეტმა აბიტურიენტმა აირჩია, თუმცა ტესტირებაზე  2% არ გამოცხადდა. ახალციხის საგამოცდო ცნეტრში, სამცხე–ჯავახეთის მასშტაბით 29 აბიტურიენტი იყო დარეგისტირებული, აქედან ტესტირება ყველა მათგანმა გაიარა. აპლიკანტების  თქმით, დავალებები საშუალო სირთულის იყო და პროცესმა მშვიდ გარემოში ჩაიარა.

2015–2016 სასწავლო წელს, სწავლის მსურველი ახალგაზრდებსისთვის სახელმწიფო რამდენიმე ფაკულტეტს დააფინანსებს.  სიახლე  უმაღლეს საგანმანათლებლო დაწესებულებებს ეხება. სამინისტროს 100 %–იანი დაფინანსებით სარგებლობა სამცხე–ჯავახეთის სახელმწიფო უნივერსიტეტის სტუდენტებსაც შეეძლებათ. ეკონომიკის სპეციალობა  ერთ–ერთია, იმ სამ მიმართულებას შორის, რომელზეც  სამცხე–ჯავახეთის სახელმწიფო უნივერსიტეტში  ახალი სასწავლო წლიდან სწავლა უასო იქნება. დაფინანსებული ადგილების რაოდენობა სულ 120, მათგან 70 ახალციხის, ხოლო 50 ახალქალაქის კორპუსისთვის განისაზღვრა. ეკონომიკის სპეცილობისთვის ბიზნესის ადმინისტრირების ფაკულტეტმა სპეციალური პროგრამა შეიმუშავა.

პედაგოგთა სასერტიფიკაციო გამოცდები დაიწყო. მათ ტესტირება დღეს სამოქალაქო განათლებაში, ფიზიკაში, ბიოლოგიასა და ხელოვნებაში გაიარეს.  სასერტიფიკაციო გამოცდები საქართველოს ყველა საგამოცდო ცენტრში დილის 9:00 საათზე დაიწყო. აპლიკანტებს კითხვებზე პასუხის გასაცემად დრო 5 საათი ჰქონდათ. მასწავლებლების თქმით, ტესტირების წარმატებით გასავლელად, გადამზადება და სხვადასხვა პროექტში ჩართვაა საჭირო. ამიტომ თუ პედაგოგი სასერტიფიკაციო გამოცდებისათვის სპეციალურად არ მოემზადება, მოცემულ საკითხებს ვერ დაძლევს. ახალციხის საგამოცდო ცენტრში ამბობენ, რომ დარეგისტრირებული 72 პედაგოგიდან 22 მათგანი არ გამოცხადდა.

მაგისტრანტები საერთო სამაგისტრო გამოცდებს აბარებენ. ახალციხის საგამოცდო ცენტრის ადმინისტრატორის განმარტებით, ტესტები ოთხ ნაწილს მოიცავს. დღეს მათ ძალები ლოგიკურ და რაოდენობრივ მსჯელობაში მოსინჯეს. მაგისტრანტების გამოცდები 9 ივლისს  წაკითხულის გააზრებისა და ანალიტიკური წერის ტესტებით დაიწყო. მათთვის გამოყოფილი დრო 2 საათსა და 20 წუთს შეადგენს.

მასწავლებელთა პროფესიული განვითარების ეროვნულმა ცენტრი პროგრამის „ასწავლე საქართველოსთვის“ ფარგლებში კონსულტანტ-მასწავლებლის პოზიციაზე კონკურსს აცხადებს. კონკურსის ფარგლებში 148 ვაკანსიაზე ეროვნული სასწავლო გეგმით გათვალისწინებული 14 საგნის სპეციალისტი შეირჩევა. შერჩეული კანდიდატები სამცხე-ჯავახეთის, აჭარის, გურიის, იმერეთის, კახეთის, მცხეთა-მთიანეთის, რაჭა-ლეჩხუმის, სამეგრელო-ზემო სვანეთის, ქვემო ქართლისა და შიდა ქართლის საჯარო სკოლებში განაწილდებიან. კონსულტანტ-მასწავლებლების ფუნქცია-მოვალეობა ეროვნული სასწავლო გეგმით გათვალისწინებული შესაბამისი საგნის სწავლება, არაფორმალური სწავლების ხელშეწყობა იქნება, რაც საგნობრივი წრის შექმნას, დამატებითი გაკვეთილის ჩატარებას, შემეცნებითი და საგანმანათლებლო პროექტებისა და სხვადასხვა აქტივობის განხორციელებას მოიცავს. გარდა ამისა, კონსულტანტ-მასწავლებელმა უნდა იზრუნოს როგორც საკუთარ, ისე ადგილობრივი მასწავლებლის პროფესიულ განვითარებაზე. კონკურსის მონაწილე უნდა იყოს მინიმუმ ბაკალავრი და უნდა ჰქონდეს მასწავლებლის დამადასტურებელი სერტიფიკატი შესაბამის საგანში ან 60-კრედიტიანი მასწავლებლის მომზადების საუნივერსიტეტო პროგრამის დამადასტურებელი სერტიფიკატი. ეთნიკური უმცირესობებით კომპაქტურად დასახლებული რეგიონების ზოგადსაგანმანათლებლო სკოლაში დასაქმების შემთხვევაში, პროგრამის კონსულტანტ-მასწავლებელი სავალდებულოა, ფლობდეს რუსულ, სომხურ ან აზერბაიჯანულ ენას. პროგრამის “ასწავლე საქართველოსთვის” მიზანია კვალიფიციური კადრების მოზიდვის გზით სწავლა-სწავლების პროცესის ხელშეწყობა და განათლების მიღების თანაბარი შესაძლებლობების უზრუნველყოფა საქართველოს ყველა სკოლაში. დაინტერესებული პირებს ვაკანსიის შესახებ ინფორმაციის მიღება HR.GOV.GE-სა და TPDC.GE-ზე შეუძლიათ.

ერთიანი ეროვნული გამოცდები გრძელდება. დღეს აბიტურიენტებმა ტესტირება ინგლისურ ენაში გაიარეს. ახალციხის საგამოცდო ცენტრში დღევანდელ სესიებზე 540  აბიტურიენტი იყო დარეგისტრირებული, თუმცა  გამოცდაზე 10 მათგანი  არ გამოცხადდა. ცენტრის ადმინისტრატორის გელა ინსარიძის თქმით, ტესტირებამ ხარვეზების გარეშე ჩაიარა.