ახალციხის მერმა მოყვარული ხელოვანები დააჯილდოვა.  ცერემონია ადმინისტრაციულ  შენობაში გაიმართა, რომელსაც ქალაქის პირველი პირები დაესწრნენ.

ლევან წულაძის სპექტაკლი, ახალციხის ციხის ნაცვლად, მესხეთის თეატრში გაიმართება. ადგილის შეცვლის მიზეზი ამინდის მოსალოდნელი გაუარესებაა.

ახალციხის ციხის ამფითეატრში, მარჯანიშვილის თეატრი სპექტაკლს “როგორც გენებოთ” გამართავს. მსურველებისთვის დასწრება უფასოა.

ახალციხის სამუსიკო სკოლაში კომპოზიტორ ვაჟა აზარაშვილის საიუბილეო საღამო გაიმართა. 80 წლის იუბილე სკოლის მოსწავლეებმა და პედაგოგებმა მიულოცეს. 

ახალციხეში სახალხო–საეკლესიო დღესასწაული აღინიშნა.

ბოლივუდი ახალციხის ციხეზე ფილმის სცენას იღებს. ქალაქის მერიის ინფორმაციით, ფილმის მუსიკალურ და ქორეოგრაფიულ ნომრებში მონაწილეობას ქართველი მსახიობებიც იღებენ. ორი დღის განმავლობაში ფილმის სცენების გადაღება „ახალციხის ციხის“ ზედა ნაწილში მოხდება. ინდური კინემატოგრაფია საქართველოში ერთ-ერთ მასშტაბურ კინოპროექტზე “Machine” მუშაობს. ეს პირველი შემთხვევაა, როდესაც ბოლივუდი ფილმის ყველა სცენას საქართველოში იღებს. “Machine” ბოლივუდის ყველაზე მასშტაბური კინოპროექტია საქართველოში, რომელზეც „Betterfly Production” და „Abbas Mustan” ერთობლივად მუშაობენ.

საქართველოს ფოლკლორის ეროვნულ ფესტივალზე, ახალციხის მუნიციპალიტეტიდან მონაწილეობა, მუსხის მკვიდრმა მარიამ ჟუჟუნაძემ მიიღო. ხალხური რეწვის ოსტატი, აუდიტორიის წინაშე ამჯერად მესხური ხალხური სიმღერით წარსდგა, მან მაყურებლისათვის მესხური იავნანა შეასრულა. ახალციხის გამგეობის ინფორმაციით, ფესტივალის ორგანიზატორებმა, ცოცხალ საუნჯედ აღიარებულ მარიამ ჟუჟუნაძეს ლაურეატის წოდება მიანიჭეს. საქართველოს კულტურისა და ძეგლთა დაცვის მინისტრმა კი “მარო ბაბო” სიგელით დააჯილდოვა. დასკვნითი ტური დღეს, 28 ივნისს ქალაქ თბილისში, შოთა რუსთაველის სახელობის პროფესიულ დრამატულ თეატრში გაიმართა. მუსიკის, ქორეოგრაფიისა და ზეპირსიტყვიერების გარდა, ფესტივალში მონაწილეობა სახვითი და გამოყენებითი ხელოვნების წარმომადგენლებმაც მიიღეს. ფესტივალზე 36 ნომერი იყო წარმოდგენილი. ფოლკლორის ეროვნულ ფესტივალს ორგანიზება, “საქართველოს ფოლკლორის სახელმწიფო ცენტრმა” გაუწია. შეგახსენებთ, რომ საქართველოს ფოლკლორის ეროვნული ფესტივალის პირველი ტური ახალციხეში, 2015 წლის 16 ივლისს გაიმართა. მასში მონაწილეობა, მუნიციპალიტეტების წარმომადგენლებმა ფოლკლორის სხვადასხვა სახეობაში მიიღეს. მეორე ტურში კი ის მონაწილეები გადავიდნენ, რომლებიც ჟიურის წევრებმა შეარჩიეს. ფოლკლორის ეროვნული ფესტივალის მიზანი, ეროვნული იდენტობის შენარჩუნება და მისი წარმოჩენაა.

ახალციხის უბნების ხატვის იდეა ჩაიშალა. 25 ქართველი მხატვარი დღეს, 24 ივნისს რაბათის უბანში იმყოფებოდა, თუმცა ხელოვანებმა მიზნის განხორციელება ვერ შეძლეს. მიზეზი წვიმიანი ამინდი გახდა. მხატვრები 25 ივნისს ვარძიას დახატავენ. შეგახსენებთ, რომ 25 ქართველი მხატვარი სამცხე–ჯავახეთს კულტურის სამინისტროსა და მხატვართა კავშირის ერთობლივი პროექტის ფარგლებში ესტუმრნენ. „მხატვრის თვალის დანახული საქართველო“ მაღალმთიან რეგიონებს მოიცავს.ახალციხემდე მხატვრები პანკისში იმყოფებოდნენ, სამცხე–ჯავახეთის შემდეგ, ხელოვანები ხულოს ესტუმრებიან. დასკვნით ნაწილში საქართველოს დედაქალაქში სიმპოზიუმი გაიმართება, სადაც საქართველოს სხვადასხვა კუთხეში შექმნილი ნამუშევრების გამოფენა მოეწყობა. პროექტი „მხატვრის თვალით დანახული საქართველო“ პირველად ხორციელედება. თიკო კურტანიძე

25 ქართველი მხატვარი ახალციხის სხვადასხვა უბანს დახატავს. ღონისძიება ქალაქში 24 ივნისს გაიმართება.  აღნიშნულს ორგანიზებას მხატვართა კავშირი და კულტურის სამინისტრო ერთობლივი პროექტი ფარგლებში ახორციელებს. „მხატვრის თვალის დანახული საქართველო“ მაღალმთიან რეგიონებს მოიცავს. ახალციხემდე მხატვრები პანკისში იმყოფებოდნენ, სამცხე–ჯავახეთის შემდეგ, ხელოვანები ხულოს ესტუმრებიან.

ახალციხის ციხეზე ,,ვეფხისტყაოსნის“ ზეპირად მცოდნეთა კონკურსის გამარჯვებულები დააჯილდოვეს. პირველი და მეორე ადგილი ახალციხელმა თემურ ხუციშვილმა და ტყიბულელმა ანრო ცირეკიძემ გაინაწილეს. მესამე ადგილზე კი გურჯაანელი მანანა ნესუაშვილი გავიდა. ვეფხისტყაოსნის ზეპირად მცოდნეთა კონკურსი 22 ივნისს სამცხე–ჯავახეთის სახელმწიფო უნივერსიტეტში ჩატარდა. მასში მონაწილეობა ცხრა კონკურსანტმა მიიღო. ღონისძიება ვეფხისტყაოსნის 850 წლისთავს მიეძღვნა.

ახალციხეში, “ვეფხისტყაოსნის” 850 წლისთავის აღსანიშნავად, მისი ზეპირად მცოდნეთა კონკურსი გაიმართა, რომელსაც ორგანიზებას საქართველოს კულტურული მემკვიდრეობის დაცვის ეროვნული სააგენტო და სამცხე–ჯავახეთის სახელმწიფო უნივერსიტეტი უწევდა. კონკურსში საქართველოს სხვადასხვა  კუთხისა და ასაკის ცხრა წარმომადგენელი მონაწილეობდა. კონკურსის მიზანია ახალგაზრდა თაობის დაინტერესება წიგნის მიმართ.

ქალაქ ახალციხის მერია წმინდანისა და ეროვნული გმირის, შალვა ახალციხელის ხსენების დღისთვის ემზადება. ახალციხელობა 30 ივნისს, ახალციხის ციხეზე, სხვადასხვა ღონისძიებებით აღინიშნება. თვითმმართველობაში განმარტავენ, რომ მთელი დღის განმავლობაში, მოეწყობა გამოფენები, გაიმართება კულტურული და სპორტული ღონისძიებები და კონცერტი ადგილობრივი ფოლკლორული ანსამბლების მონაწილეობით. ამ დღესვე გამოვლინდება სამი საპატიო ახალციხელი. საღამოს კი, გალა–კონცერტზე, მესხი მაყურებლის წინაშე ანსამბლი შვიდკაცა, ბორის და სოფო ბედიები, თემურ ყვითელაშვილი და ქორეოგრაფიული ანსამბლი სუხიშვილები წარსდგებიან.

ვალეში ქართული ცეკვის ფესტივალი ჩატარდა. ღონისძიებას ახალციხის თემმა უმასპინძლა. მასში მონაწილეობა ათმა ქორეოგრაფიულმა ანსამბლმა მიიღო, რომლებიც მესხეთში, საქართველოს სხვადასხვა რეგიონიდან, სპეციალურად ამ დღისთვის ჩამოვიდნენ. ქართული ცეკვის ფესტივალი სამცხე-ჯავახეთში პირველად ჩატარდა. ღონისძიება ქალაქ ვალის კულტურის სახლში, ქართული ხალხური შემოქმედების ეროვნული ცენტრის ორგანიზებით გაიმართა.

ვიზიტორებისთვის, ახალციხეში, ერთ–ერთი ყველაზე მიმზიდველი ადგილი რაბათის დასახლებში მდებარე ციხეა.

ახალციხის ციხეზე ხალიჩების საერთაშორისო ფესტივალი ჩატარდა. ღონისძიებას საქართველოს კულტურის სამინისტროს წარმომადგენლები, ახალციხის მერი, ხალიჩების საერთაშორისო ფესტივალისა და კავკაზ ჯაზ-ფესტივალის ორგანიზატორები და მოწვეული სტუმრები დაესწრნენ. ფესტივალის ოფიციალური გახსნის შემდეგ სტუმრებმა ხალიჩების საერთაშორისო ფესტივალის პავილიონები დათვალიერეს. ხალიჩების საერთაშორისო ფესტივალი „რაბათი“ წელს, საქართველოს ხალხური და გამოყენებითი ხელოვნების მუზეუმის ორგანიზებით მოეწყო.

ახალციხის ციხეზე ხალიჩების საერთაშორისო ფესტივალი იმართება. ოფიციალური გახსნა, 11 ივნისს 15:00 საათზეა დაგეგმილი. ფესტივალის ფარგლებში ღონისძიებები დღეს, 10 ივნისსაც გაიმართა. ციხის ციტადელზე აბრეშუმის სახელმწიფო მუზეუმისა და ხალხური და გამოყენებითი ხელოვნების მუზეუმის ორგანიზებით,  კონფერეცია მოეწყო, რომელსაც 10 ქვეყნის წარმომადგენელი დაესწრო.

ხალიჩების საერთაშორისო ფესტივალი „რაბათი“, ოფიციალურად, 11 ივნისს, 15:00 საათზე გაიხსნება, რომელსაც საქართველოს კულტურისა და ძეგლთა დაცვის მინისტრის მოადგილე მამა ბერიკაშვილი, ქალაქ ახალციხის მუნიციპალიტეტის მერი გიორგი კოპაძე, ხალიჩების საერთაშორისო ფესტივალისა და კავკაზ ჯაზ ფესტივალის ორგანიზატორები და სტუმრები დაესწრებიან. ახალციხის მერიის ინფორმაციით, ოფიციალური გახსნის შემდეგ ფესტივალის პავილიონების დათვალიერება მოხდება. წელს, ფესტივალი საქართველოს ხალხური და გამოყენებითი ხელოვნების მუზეუმის ორგანიზებით, „Check In Georgia”–ს ფარგლებში იმართება.

ახალციხეში „გამოუვალი მდგომარეობის“  კონცერტი გაიმართა.  მოსახლეობას თავდაპირველად  თამარ ჩერგოლეიშვილმა მიმართა და აღნიშნა, რომ ხელისუფლების მცდელობის მიუხედავად, ღონისძიება არ ჩატარებულიყო კონცერტი მაინც შედგა, რადგან გამოუვალი მდგომარეობა არ არსებობს. ჯგუფი მაყურებლის წინაშე ნაცნობი და ახალი რეპერტუარით წარსდგა.  

ახალციხის მერია პლატფორმა „დაიცავი თავისუფლებას“ მიერ ღონისძიების გამართვასთან დაკავშირებით განცხადებას ავრცელებს, რომელსაც “მეცხრე არხი” უცვლელად გთავაზობთ. “პლატფორმა „დაიცავი თავისუფლება“ ორაგნიზატორების მიერ ადგილობრივ და ცენტრალურ მედია– საშუალებებით გავრცელებულ ინფორმაციას, თითქოსდა ახალციხის მერია ხელს უშლის ევროინტეგრაციისადმი მიძღვნილი ღონისძიებების ჩატარებას, ახალციხის მერია კატეგორიულად ემიჯნება და უარყოფს აღნიშნულ ფაქტს. ახალციხის მერიაში შემოსულ – ა(ა)იპ სამოქალაქო განათლების ფონდის მიმართვაში არ იყო მითითებული ღონისძიებების მიზანი. მერიისთვის არ იყო ცნობილი , ეძღვნებოდა თუ არა პლატფორმა „დაიცავი თავისუფლება“–ს მიერ ორგანიზებული კონცერტი რაიმე კონკრეტულ საკითხს, ამ შემთხვევაში – ევროინტეგრაციის თემებს, ანტირუსულ პროპაგანდას თუ რაიმე სხვა მიზანს. წინამდებარე საკითხის წარმოდგენის ვალდებულება ეკისრებოდათ ღონისძიების ორგანიზატორებს, რაც მათ მიერ არ იქნა განხორციელებული. ორგანიზატორს მითითებული ჰქონდა მხოლოდ ჯგუფი „გამოუვალი მდგომარეობის“ კონცერტის გამართვა. გვაქვს საფუძვლიანი ეჭვი იმისა, რომ გარკვეული ძალები თუ მედია–საშუალებები განზრახ ცდილობენ აღნიშნული საკითხის სხვა კონტექსტში განხილვას და საზოგადოების შეცდომაში შეყვანას. ხაზგასმით აღვნიშნავთ, რომ ქალაქ ახალციხის მუნიციპალიტეტის მერია ხელს უწყობს ევროინტეგრაციას და საქართველოსა და ქართველი ხალხის სწრაფვას ვიყოთ ევროპის ნაწილი და აღნიშნულის მხარდასაჭერად თვითმართველობის ჩამოყალიბებიდან დღემდე არაერთი ღონისძიება გაიმართა მერიის ეგიდით, მაგალითად : ევროინტეგრაციის კვირეულის ფარგლებში სახელწოდებით „გავაცნოთ ევროკავშირი სკოლებს“; „ესეების’ კონკურსი ევროკავშირის შესახებ; ინტელექტუალური თამაში რა? სად? როდის? , სადაც კითხვები იყო ევროკავშირის შესახებ; “ახალციხის ციხეზე“ ჩატარდა „ფორტ ბოიარდი“ და ა.შ. ახალციხის მერია ასევე საზეიმო ვითარებაში შეხვდა ვიზალიბერალიზაციის საკითხის გადაწყვეტას და მხარდამჭერი აქციით შეუერთდა. აღნიშნულთან დაკავშირებით, ახალციხის მერია საზოგადოებას და კონცერტის ორგანიზატორებს მიმართავს, თავი შეიკავონ რაიმე სახის პროვოკაციის მოწყობისა და დაძაბული ფონის შექმნისგან, რათა არ მოხდეს სიტუაციის ესკალაცია და ღონისძიებამ მშვიდ გარემოში ჩაიაროს” – ნათქვამია განცხადებაში. 

ახალციხის ცენტრალური პარკის ტერიტორიაზე, სცენის მონტაჟი მიმდინარეობს. მიუხედავად იმისა, რომ პლათფორმას “დაიცავი თავისუფლება” კონცერტის გასამართად ახალციხის მერიისგან ოფიციალური ნებართვა არ მიუღია, ჯგუფი „გამოუვალი მდგომარეობა“ ახალციხეში მაინც იმღერებს. პლათფორმის წარმომადგენელი აცხადებს, რომ კანონის შესაბამისად, მერიას არ აქვს უფლება, მათ უფასო კონცერტის ჩატარებაზე უარი უთხრას. პლათფორმის წარმომადგენელთა მტკიცებით, ახალციხის ციხემ  რაბათში, ანტიდასავლური პროპაგანდის წინააღმდეგ  უფასო კონცერტის ჩატარების სანაცვლოდ იჯარა 300–დან 5 000 ლარამდე გაუძვირა. პირობების მოულოდნელად შეცვლა ადმინისტრაციამ მხოლოდ იმით ახსნა, რომ ჯგუფი „გამოუვალი მდგომარეობა” მოთხოვნადია.