სოფელი სარო სამცხისა და ჯავახეთის გასაყარზე მდებარეობს და უძველეს მატერიალურ თუ არამატერიალურ მემკვიდრეობას, დღემდე ინახავს. მიუხედავად ამისა, ტურისტები მას იშვიათად სტუმრობენ. სპეციალისტთა ნაწილი, ამის მიზეზად, იმას ასახელებს, რომ სამცხე–ჯავახეთის ტურისტულ მარშრუტებში, სარო შეტანილი არ არის. სხვა შემთხვევაში, ეგვიპტის პირამიდების პერიოდში აგებული ეს ციკლოპური ნაგებობები ყველა უცხოელი თუ ადგილობრივი დამთვალიერებლისთვის საინტერესო და ეგზოტიკური უნდა იყოს. ეს ნაგებობა ჩვენს წელთაღრიცხვამდე მესამე–მეორე ათასწლეულით თარიღდება. მისი უნიკალურობა იმაში მდგომარეობს, რომ ქვები  მშრალად დაწყობილია და ერთმანეთთან სხვა მასალა არ აკავშირებთ. საროს კიდევ ერთი  მემკვიდრეობა, მესხური დარბაზებია. სოფელში ყველაზე კარგად ასპანიძეების საგვარეულო ოდაა შემორჩენილი. სპეციფიურად დახურული ჭერით, მიდგმული მესხური ფურნითა და ბუხრით იგი 150 წელს ითვლის. 

მსოფლიოს ერთ-ერთი უდიდესი სასტუმროების კომპანია, InterContinental Hotels Group-ი ბორჯომში ცნობილი ბრენდით – Crowne Plaza შემოვიდა. ხუთვარსკვლავიანი სასტუმრო „Crowne Plaza Borjomi“ დღეს ოფიციალურად გაიხსნა. ღონისძიებას საქართველოს პრემიერ-მინისტრი დაესწრო. გიორგი კვირიკაშვილმა მთავრობის წევრებთან და მოწვეულ სტუმრებთან ერთად ახლადგახსნილი სასტუმრო დაათვალიერა. “32 მილიონი აშშ დოლარის ინვესტიცია ჩაიდო ამ სასტუმროს მშენებლობაში, დასაქმებული იყო 250 ადამიანი, აქედან 150-ზე მეტი იყო ადგილობრივი მცხოვრები. სასტუმროს მართვაში მონაწილეობს 150 ადამიანი. ეს სასტუმრო კიდევ უფრო უსვამს ხაზს, ბორჯომის, როგორც საქართველოს ერთ-ერთი უმნიშვნელოვანესი ტურისტული მიმართულების მნიშვნელობას. ტურიზმი ჩვენი ქვეყნისთვის ყველაზე სტრატეგიული დარგია. ტურიზმისგან მივიღებთ ყველაზე მეტ შემოსავალს, ტურიზმი დაასაქმებს ყველაზე მეტ ადამიანს საქართველოში. სასიხარულოა, რომ ბოლო თვეების განმავლობაში შეიმჩნევა ვიზიტორების რიცხვის ზრდა, 23 პროცენტით არის გაზრდილი ვიზიტორთა რაოდენობა ბოლო თვეების მანძილზე, გასულ წელთან შედარებით. შარშან, მიუხედავად საქართველოს ირგვლივ არსებული არასახარბიელო ეკონომიკური მდგომარეობისა, ჩვენ გვქონდა ვიზიტორების თითქმის ათ პროცენტამდე ზრდა,” – განაცხადა პრემიერმა სიტყვით გამოსვლისას. მისივე თქმით, სახელმწიფომ მეტი ყურადღება უნდა დაუთმოს ბორჯომში ინფრასტრუქტურის მოწყობას, რაც კურორტს საერთაშორისო მნიშვნელობის ტურისტულ ცენტრად აქცევს. ” სულ რამდენიმე დღის წინ ჩვენ დავაანონსეთ, რომ პროგრამას “აწარმოე საქართველოში” დაემატა ახალი კომპონენტი “უმასპინძლე საქართველოში,” რაც ხელს შეუწყობს რეგიონებში სასტუმროების ქსელის განვითარებას. დიდი მადლობა კომპანია „დიზონ ლიმითედს” ამ სასტუმროს პროექტის განხორციელებისთვის. კომპანიამ ასევე აღადგინა ბორჯომის გოგირდის აუზები, რომლებსაც ხანგრძლივი ისტორია აქვთ და ამ კურორტისთვის უმნიშვნელოვანესი იყო მათი აღდგენა,” – აღნიშნა პრემიერმა. სიტყვით გამოსვლისას გიორგი კვირიკაშვილმა იმ ინფრასტრუქტურულ პროექტებზე ისაუბრა, რომელთა პროექტირება და განხორციელება ინტენსიურად მიმდინარეობს.

ახალციხის პირველი საჯარო სკოლის, მეექვსე კლასისი მოსწავლეები  ასპინძელ მწერალს შეხვდნენ.ზელიმხან მაღრაძემ ახალგაზრდებს  საკუთარი ბიოგრაფია გააცნო და მათთან ერთად ნაწარმოებები განიხილა. ღონისძიება დემოკრატიული ჩართულობის ცენტრში, კლასის ხელმძღვანელის ნინო ნადირაძისა  და ისტორიკოსის ნატო ყრუაშვილის ინიციატივით, პროექტის „უკეთ გავიცნოთ ჩვენი მხარე“ ფარგლებში  გაიმართა.

წიგნის – ,,მესხური ფოლკლორის“ პრეზენტაცია ახალციხეში. ახალციხის ცენტრალური ბიბლიოთეკის ორგანიზებით, გაზეთ ,,ლიტერატურული მესხეთის“ რედაქტორის, ავთანდილ ბერიძის წიგნი, მესხ საზოგადოებას დღეს წარუდგინეს. წიგნში  თავმოყრილია მესხური ფოლკლორის ნიმუშები. კრებულში ხალხურ ლექსებს, აშუღურ პოეზიასა და თანამედროვე სახალხო მთქმელებს შეხვდებით. ავთანდილ ბერიძე სქელტანიან წიგნზე ხუთი წელი მუშაობდა. მასალები სამცხე–ჯავახეთის რეგიონში, ადგილობრივებისგან შეაგროვა. წიგნში ასევე შესულია არქივებსა და მუზეუმებში დაცული ნაშრომები. წიგნი კულტურის სამინისტროს მხარდაჭერით გამოიცია, სადაც  მისი პრეზენტაცია უკვე გაიმართა. ავთანდილ ბერიძე მესხური ფოლკლორის შესახებ, კიდევ ერთ წიგნზე მუშაობს.

კულტურისა და ძეგლთა დაცვის მინისტრი ბორჯომში კულტურის სტრატეგიის დოკუმენტის სამუშაო ვერსიის საჯარო პრეზენტაციას დაესწრება. შეხვედრა გამგეობის სხდომათა დარბაზში 18 თებერვალს 11:00 საათზე გაიმართება. პრეზენტაციას უწყების პირველ პირთან ერთად მინისტრის მოადგილე ლევან ხატიაშვილი, სამცხე–ჯავახეთის გუბერნატორი აკაკი მაჭუტაძე და ბორჯომის მუნიციპალიტეტის გამგებელი დიმიტრი ყიფიანი გაუძღვებიან. შეხვედრას რეგიონის სხვადასხვა სახელოვნებო დაწესებულების, არასამთავრობო ორგანიზაციების, შემოქმედებითი სექტორისა და საინიციატივო ჯგუფების წარმომადგენლები დაესწრებიან. კულტურის სტრატეგიის დოკუმენტის სამუშაო ვერსია საქართველოს კულტურისა და ძეგლთა დაცვის სამინისტროს მიერ შემუშავდა. დოკუმენტის დამტკიცებამდე, მისი სრულყოფის მიზნით, სამინისტრო სამუშაო ვერსიის საჯარო პრეზენტაციებს თბილისსა და რეგიონებში მართავს. კულტურის სტრატეგიის მიზანი, საქართველოში კულტურისა და შემოქმედებითი სექტორის განვითარების გრძელვადიანი ხედვის განსაზღვრაა, რომელიც წარმოაჩენს როგორც კულტურის თანდაყოლილ ღირებულებას, ასევე, მის მნიშვნელობას ეროვნული იდენტობისა და სოციალური ერთობის განმტკიცებასა და ქვეყნის მდგრად განვითარებაში.

ახალციხეში „რუსთავი ორის“ პროექტის „X ფაქტორის“  პრე–კასტინგი  ჩატარდა.  სიმღერის ნიჭით დაჯილდოებული ახალგაზრდები რაბათში,  ახალციხის ციხეზე, ამჯერად პროექტის პროდიუსერებისა და ჟურნალისტების წინაშე წარსდგნენ, რომლებმაც მონაწილეთა მიერ შესრულებული ნომრები ვიდეოზე ჩაიწერეს.  მათი შერჩევა თებერვლის ბოლომდე მოხდება, დადებითი პასუხის შემთხვევაში მონაწილეებს დაუკავშირდებიან.  ამის შემდეგ ისინი ფილარმონიის საკონცერტო დარბაზში ჟიურის წინაშე წარსდგებიან. „X ფაქტორის“ მონაწილეთა  შესარჩევი კასტინგი 6 თებერვალს ახალციხესა და გორში გაიმართა. შვიდ თებერვალს კი სიმღერის ნიჭით დაჯილდოებულებს თელავსა და ლაგოდეხში შეარჩევენ.

სამცხე–ჯავახეთისა და შირაქის ოლქში ტურისტული პოტენციალის განვითარებისათვის ახალი პროექტი იწყება. მისი პრეზენტაცია დღეს ახალციხის დემოკრატიული ჩართულობის ცენტრში მოეწყო. პროექტის მიხედვით,  საზღვრისპირა რეგიონებში 20 ახალგაზრდა შეირჩევა, რომლებიც  საერთაშორის ბანაკის ფარგლებში, ორი რეგიონის, გეოგრაფიის, ისტორიისა და  ტურისტული პოტენციალის შესახებ ცოდნას გაიღრმავებენ და  მოწვეულ ექსპერტებთან ერთად, ტურისტული სახელმძღვნალოების, რუკებისა და მარშუტების შედგენაში მონაწილეობას მიიღებენ.

რაბათში, კულტურული მემკვიდრეობის ძეგლის, ისტორიული აბანოს გაწმენდითი სამუშაოები დაიწყო. 6 ადამიანი კომპლექსს, ჩახერგილობისა და ნაშალისგან წმენდს. შენობის დიდი ნაწილი, მამაკაცთა და ქალთა აუზები და ოთახები მიწითაა ამოვსებული. გაწმენდითი სამუშაოები არქეოლოგის მეთვალყურეობის ქვეშ ხორციელდება.   ეროვნული მნიშვნელობის კატეგორიის ძეგლის გაწმენდითი სამუშაოების ჩასატარებლად, ახალციხის მერიამ ტენდერი 1 დეკემბერს, 34 ათას ლარზე გამოაცხადა. მასში მონაწილეობა მხოლოდ ერთმა პრეტენდენტმა მიიღო და სამუშაოების შესრულებაც მას, ააიპ ,,ჭულეს“ დაეკისრა. მას ტერიტორიის გაწმენდისთვის 4თვიანი ვადა აქვს.

კუმურდოს საეპისკოპოსო ტაძრის აღდგენისთვის პროექტი მომზადდა. კულტურული მემკვიდრეობის დაცვის ეროვნული სააგენტოს ინფორმაციით, 2015 წელს მომზადდა პროექტი, რომელიც ტაძრის სრულ რეაბილიტაციას ითვალისწინებს. ტაძარი მნიშვნელოვანია, როგორც მხატვრული, ისე ევოლუციური თვალსაზრისით. XI საუკუნეში, ბაგრატ IV-ის დროს ტაძარს სტოა მიაშენეს, რომელიც შესაძლოა, თავდაპირველად, სამივე მხრიდან უვლიდა გარს დასავლეთ მკლავს. ახლა მისი მხოლოდ სამხრეთი ნაწილია გადარჩენილი; აღარ არსებობს გუმბათი, დაზიანებულია დასავლეთის მკლავი. ძეგლის გადაუდებელი სარესტავრაციო სამუშაოები 1975 წელს დაიწყო და ინტერვალებით 80-იანი წლების ბოლომდე მიმდინარეობდა. კუმურდოს ეკლესია იმ იშვიათ ქართულ ძეგლთა რიცხვს მიეკუთვნება, რომელზეც მრავალი წარწერაა განთავსებული, მათ შორის სამშენებლოც, რომელშიც მოხსენიებულია ქტიტორი, ხუროთმოძღვარი და მითითებულია აგების თარიღი – 964 წელი.  

ლია სულუაშვილი ,,საუკეთესოდ შესრულებული ქალის როლისათვის” დაჯილდოვდა. მესხეთის სახელმწიფო პროფესიული დრამატული თეატრის სამხატვრო ხელმძღვანელს პრემია საქართველოს თეატრალური საზოგადოების პრეზიდიუმმა 14 იანვარს – ქართული თეატრის დღეს  გადასცა. კონკურსი ჭიათურის სახელმწიფო თეატრში გაიმართა. ,,წლის საუკეთესოდ შესრულებული ქალის როლის” ტიტული ლია სულუაშვილს, რეჟისორ გიორგი შალუტაშვილის სპექტაკლში სახელწოდებით ,,მშვიდი ღამე” დედის როლის შესრულებისათვის მიენიჭა.

ბაკურიანში ,,ყინულის ქანდაკებების ფესტივალის“ დასკვნითი საღამო გაიმართა. 15–მა  ვეტერანმა მოქანდაკემ საკუთარი ნამუშევარი წარმოადგინა. თითოეული  ქანდაკება   ,,მშვიდობის“ თემატიკას ატარებდა. ავტორებმა მათი შექნისათვის მუშაობა 2 იანვარს დაიწყეს და ძველით ახალი წლის ღამეს დაასრულეს. ,,ყინულის ქანდაკებების“ ფესტივალი ბაკურიანში წელს პირველად აღინიშნა. მას ორგანიზაერბა ვეტერანების საქმეთა სახელმწიფო სამსახურმა გაუწია. ეს იყო პირველი ფესტივალი, სადაც გამარჯვებული არ გამოვლინდა და სიმბოლური საჩუქარი ყველა მონაწილემ მიიღო. ღონისძიების დასკვნით ნაწილში კონცერტი გაიმართა, სადაც ადგილობრივებისა და დამსვენებლებისათვის დედაქალაქიდან ჩამოსულმა ფოლკლორულმა ჯგუფმა, ,,ბანმა“ იმღერა.  აღნიშნულ ფესტივალს საფუძველი 1999 წელს ჩეყარა. მას შემდეგ იგი ყოველწლიურად გუდაურში აღინიშნებოდა.

მესხეთის სახელმწიფო თეატრის შენობის სახურავზე შესრულებულ  სამუშაოებს საექსპერტო ჯგუფი სწავლობს. ,,ოპტიმალ გრუპ +“–ის ოთხკაციანმა შემადგენლობამ სახურავი, დაწესებულების ადმინისტრაციასა და სამუშაოების შემსრულებლებთან  ერთად დაათვალიერა. რა გახდა მიზეზი იმისა, რომ შენობაში წყალი ჩავიდა და თეატრის რესურსი დააზიანა, ამის შესახებ ექსპერტები დასკვნას რამდენიმე დღეში დადებენ. როგორც მესხეთის თეატრის დირექტორი, ირაკლი ათუნაშვილი ამბობს, ინდ. მეწარმე ,,ქრისტინე სარაშვილის“ წარმომადგნლებმა სამუშაოები უხარისხოდ შეასრულეს, რის გამოც დაწესებულება დაზიანდა. დირექტორი ხარვეზის გამოსწორებას მოითხოვს და აღნიშნავს, რომ ხელშეკრულებისა და სატენდერო დოკუმენტაციის მიხედვით, ნუგზარ სარაშვილი იგივე ინდ. მეწარმე ,,ქრისტინე სარაშვილის“ წარმომადგნელი, ვალდებულია, მის მიერ შესრულებულ სამუშაოზე  10 წლის განმავლობაში თუ რაიმე ხარვეზი წარმოიშვა აღმოფხვრას.

,,ტალიტა კუმში“ საშობაო–საახალწლო ზეიმი მოეწყო. შშმ პირებმა მშობლებსა და მოწვეულ სტუმრებს მინი სპექტაკლი შესთავაზეს. არტ–თერაპიისა და არტ–მუსიკის პედაგოგებთან ერთად კი აუდიტორიას წლის განმავლობაში შესწავლილი სიმღერები და ცეკვები წარმოუდგინეს. ბენეფიციარებისათვის სასიმღერო და საცეკვაო ნომრები შეასრულეს ახალციხის მრევლის პატარა წევრებმაც. ღონისძიების დასასრულს, მონაწილეებს სიმბოლურად სანტა კლაუსი, იგივე წმინდა ნიკოლოზი ესტუმრა და საჩუქრები გადასცა.

ყინულის ქანდაკებების ფესტივალის 12 წლიან ტრადიციას წელს ვეტერანები აგრძელებენ. 15 მონაწილე საზოგადოებას „მშვიდობის“ თემაზე შექმნილ ნამუშევრებს წარუდგენს. ბორჯომის ადმინისტრაციის ინფორმაციით, ფესტივალი მიზნად, მომავალი თაობისთვის ვეტერანების საქმიანობის გაცნობას ისახავს. ღონისძიებას ორგანიზებას წელს ვეტერანების საქმეთა სახელმწიფო სამსახური უწევს. „ მნიშვნელოვანია და სიმბოლურია ის, რომ ქვეყნის ტეროტორიული მთლიანობისთვის მებრძოლები შექმნიან ქანდაკებებს მშვიდობის თემაზე. საზოგადოების თვალსაჩინო წარმომადგენლები – ვეტერანები,რომლებიც ყოველთვის მზად არიან სამშობლო საკუთარი სიცოცხლის ფასად დაიცვან, ასევე არიან ბრწყინვალე ხელოვანები: მხატვრები, ფერწერები, მოქანდაკეები“ – განაცხადა ვეტერანების საქმეთა სახელმწიფო სამსახურის დირექტორმა ირაკლი შიხიაშვილმა. ფესტივალი ბაკურიანში 6 იანვარს გაიხსნა და მისი დახურვა საღამოს 19:00 საათზე კონცერტითა და სხვადასხვა გასართობი ღონისძიებით მოხდება. მონაწილეებს პრიზებსა და სიგელებს ირაკლი შიხიაშვილი გადასცემს.

პრემიერ–მინისტრობის კანდიდატმა, ბაკურიანში, განახლებული კოხტა გახსნა. გიორგი კვირიკაშვილის განცხადებით, უპრეცედენტოდ მოკლე დროში, მოხდა განახლებული კოხტას პროექტის დაწყება და დამთავრება. კოხტას გახსნაზე კვირიკაშვილმა ისაუბრა, თუ როგორ გაჩნდა პროექტის განხორციელების იდეა.

ფერწერა, გრაფიკა,  კომპოზიცია, კერამიკა, ვიტრაჟი, მინაზე და თიხაზე შესრულებული ნამუშევრები –  ახალციხის სამხატვრო სკოლაში საახალწლო თემაზე  სემესტრული გამოფენა გაიმართა. ღონისძიება სამხატვრო სკოლის დირექტორის ინიციატივით მოეწყო.  მასში მონაწილეობა  220 მოსწავლიდან 50-მა მათგანმა მიიღო. ნანა ნათენაძის თქმით, სრული ნამუშევრების ჩვენება, დარბაზის სიმცირის გამო, ვერ მოხერხდა.

მუსიკალური ცენტრი, ნაძვის ხის მოსართავები, საოფისე სკამები და წიგნები – ახალციხის მუნიციპალიტეტის სოფლებში არსებულ ბიბლიოთეკებსა და კულტურის სახლებს წინასაახალწლო საჩუქრები გადაეცა.

ორი მეორე და ორი მესამე ადგილი – ახალციხის სპორტული ცეკვების სტუდია “სიხარული” ჩემპიონატიდან წარმატებით დაბრუნდა. საქართველოს თასის გათამაშებაზე ახალგაზრდა მოცეკვავეებმა წარმატებით იასპარეზეს. სპორტული ცეკვების ტურნირი ქვეყნის მასშტაბით ჩატარდა. მასში მონაწილეობა საქართველოს რეგიონებმა მიიღეს.

უკვე გადაწყდა, ვინ იმღერებს 31 დეკემბრის ღამეს ახალციხეში. კულტურის სამინისტროს გადაწყვეტილებით, მესხ მაყურებელს ახალ წელს ტრიო ,,სიმი“, თბილისური კვარტეტი, კახა კუხიანიძე, ნუკრი კაპანაძე და ნატო გელაშვილი მიულოცავენ. სამინისტროს პრესსამსახურის ინფორმაციით, ხუთ შემსრულებელს კიდევ სამი ცნობილი მომღერალი დაემატება, თუმცა მათი ვინაობა ჯერ გარკვეული არ არის. ,,მე–9 არხთან“ საუბრისას ქეთი ებანოიძემ განმარტა, რომ ქართული ესტრადის წარმომადგენლები ახალციხის მერიის მოთხოვნის მიხედვით შეარჩიეს. კულტურის სამინისტროს ინფორმაციით, საახალწლო კონცერტი 31 დეკემბერს, საღამოს 10–ის ნახევარზე დაიწყება და 12:00 საათზე ფოიერვერკით დასრულდება. ყველა ხარჯს კულტურის სამინისტრო დაფარავს.