ფრენბურთის ტურნირში სამცხე-ჯავახეთის გამარჯვებული გუნდი ცნობილია. ახალციხის მუნიციპალიტეტის ინფორმაციით, რეგიონული ჩემპიონატის ფინალში ვალისა და ბორჯომის გუნდებმა იასპარეზეს. გამარჯვება ვალის გუნდმა მოიპოვა, რომელიც სამცხე-ჯავახეთის სახელით საქართველოს პირველობისთვის იბრძოლებს. მანამდე კი გამარჯვებული გუნდის ახალგაზრდები 20 დღის განმავლობაში ანაკლიაში დაისვენებენ. ფრენბურთის ტურნირში მონაწილეობა ბორჯომის, ნინოწმინდის, ასპინძის, ადიგენის, ქალაქ ახალციხისა და ახალციხის მუნიციპალიტეტის გუნდებმა მიიღეს. ტურნირი სასკოლო სპორტული ოლიმპიადის ფარგლებში სპორტისა და განათლების სამინისტროების ეგიდით მოეწყო. სპორტული ღონისძიების მიზანი ახალგაზრდებში ჯანსაღი ცხოვრების პოპულარიზაციაა.

ახალციხელი კარატისტები საერთაშორისო ჩემპიონატიდან სამი საპრიზო ადგილით დაბრუნდნენ. შიტორიუ კარატე დოს ახალციხის სკოლის “საფარის” სპორტსმენებმა ტურნირზე, სახელწოდებით “Open Tbilisi” სამი ბრინჯაოს მედალი მოიპოვეს. სამცხე–ჯავახეთის რეგიონის მთავარი ხელმძღვანელის მამუკა ზუმბაძის თქმით, ჩემპიონატზე უძლიერესმა სპორტსმენებმა იასპარეზეს. ტურნირი სახელწოდებით “Open Tbilisi” 17 აპრილს თბილისში გაიმართა. მასში მსოფლიოს მასშტაბით, ათამდე ქვეყანა მონაწილეობდა. ახალციხიდან ჩემპიონატზე იასპარეზეს როგორც გამოცდილმა , ასევე დამწყებმა სპორტსმენებმაც. სამომავლოდ, შიტორიუ კარატე დოს ახალციხის სკოლის კარატისტები ბათუმში საერთაშორისო ჩემპიონატზე გაემგზავრებიან, რომელიც  19, 20 და 21 მაისს გაიმართება. თიკო კურტანიძე

ახალციხელი კარატისტები ტურნირისთვის ემზადებიან. შიტორიუ კარატე დოს სკოლის „საფარის“ სპორტსმენები საერთაშორისო ჩემპიონატზე იასპარეზებენ. ტურნირში მონაწილეობას მიიღებენ, როგორც გამოცდილი, ასევე დამწყები კარატისტებიც. „Open Tbilisi“ 17 აპრილს საქართველოს დედაქალაქში გაიმართება. ტურნირში მსოფლიოს მასშტაბით ათამდე ქვეყანა ჩაერთვება. ჩემპიონატის საპრიზო ფონდი 5 000 ლარია. ავტორები: თიკო კურტანიძე, ბექა ზდგინიძე, რამაზ ალავიძე

ახალციხის სასპორტო სკოლაში „მხიარული სტარტების ფინალი“ გაიმართა. მასში მონაწილეობა  ოთხი სკოლის გუნდმა მიიღო. პირველი ადგილისთვის მუსხის, ვალის, ახალციხის მეხუთე საჯარო სკოლისა და „მზექას“ გუნდებმა იბრძოლეს. მუნიციპალიტეტის მასშტაბით, პირველობა 37 ქულით ახალციხის მეხუთე სკოლის გუნდმა მოიპოვა. მეორე ადგილზე – მუსხის გუნდი გავიდა, ხოლო მესამე ადგილს „მზექას“ სკოლა დასჯერდა. გამარჯვებული გუნდის მონაწილეებს შესაბამისი კატეგორიის მედლები და სიგელები გადაეცათ. პირველადგილოსანი სკოლის გუნდმა კი „მხიარული სტარტების“ თასიც მიიღო.

ახალციხეში ,,მხიარული სტარტების“ შესარჩევი ტური ჩატარდა. მასში მონაწილეობა თემის შვიდმა, ხოლო ქალაქის ოთხმა სკოლამ მიიღო.  თითოეული გუნდი 12 მოსწავლით იყო დაკომლექტებული, რომლის შემადგენლობაშიც 11–დან 15–წლამდე ასაკის გოგონები და  ვაჟები შედიოდნენ. ,,მხიარული სტარტების“ კოორდინატორის მამუკა გონაშვილის თქმით, შესარჩევი ტურიდან ქულების მიხედვით 4 გუნდი შეირჩევა, რომლებიც 10 აპრილს ფინალურ შეხვედრაზე პირველობისთვის იასპარეზებს.

დღეს, პირველ აპრილს მიხეილ იაძის სახელობის ცენტრალურ სტადიონზე მძლეოსნობაში ახალციხის ღია პირველობა ჩატარდა. ღონისძიებაში მონაწილეობის მისაღებად სპორტსმენები სხვადასხვა ქალაქიდან ჩამოვიდნენ. ტურნირში მონაწილეობა 12–დან 17 წლამდე ასაკის გოგონებმა და ბიჭემა მიიღეს, რომლებიც 4 ასაკობრივ ჯგუფად იყვნენ წარმოდგენილნი.

ახალციხის მძლეოსნობის სპორტული კლუბი ჩემპიონატისთვის ემზადება. პირველ აპრილს, მიხეილ იაძის სახელობის ცენტრალურ სტადიონზე ახალგაზრდები კროსში, ახალციხის ღია პირველობისთვის იასპარეზებენ. ღონისძიებაში მონაწილეობას სხვადასხვა ქალაქის მძლეოსნობის კლუბის წევრები მიიღებენ.

შინაგან საქმეთა სამინისტროს თანამშრომლებმა 27 მარტს თბილისში, სპორტულ კლუბ „შატილის“ დარბაზში გამართულ, ძალისმიერ წოლჭიმში საქართველოს ღია ჩემპიონატზე 2 ოქროს და 1 ვერცხლის მედალი მოიპოვეს. შსს-ს სახელით, ტურნირში მონაწილეობდნენ სამცხე-ჯავახეთის პოლიციის დეპარტამენტის დირექტორი თეიმურაზ კალანდაძე, საპატრულო პოლიციის სამცხე-ჯავახეთის მთავარი სამმართველოს უფროსის მოადგილე კობა კობახიძე და საპატრულო პოლიციის დეპარტამენტის თანამშრომელი, პოლიციის მაიორი ლევან გილიგაშვილი. შსს–ს ინფორმაციით, კობა კობახიძემ 120 კგ წონით კატეგორიაში, ვეტერანების ჯგუფში იასპარეზა, 145 კილოგრამიანი შტანგა ასწია, რითაც თავის ჯგუფში რეკორდი დაამყარა, პირველ ადგილზე გავიდა და ოქროს მედალი მოიპოვა. ლევან გილიგაშვილმა, 83 კგ წონით კატეგორიაში, 200 კილოგრამიანი შტანგის აწევა შეძლო და ასევე ოქროს მედალი მოიპოვა. თეიმურაზ კალანდაძემ კი 74 კგ წონით კატეგორიაში იასპარეზა, 135 კილოგრამიანი შტანგა ასწია, მეორე ადგილი დაიკავა და ვერცხლის მედალს დაეუფლა. საქართველოს ღია ჩემპიონატი ძალისმიერ წოლჭიმში პროფესიონალ სპორტსმენებს შორის ყოველწლიურად იმართება

ახალციხეში გოგონათა საფეხბურთო გუნდი ჩამოყალიბდა. ძველი და ახალი წევრებისათვის  დემოკრატიული ჩართულობის ცენტრში სამუშაო შეხვედრა გაიმართა. ამ დროისათვის გუნდში  50–მდე გოგონა ირიცხება.  სამცხე–ჯავახეთის ფეხბურთის ფედერაციის პრეზიდენტის განმარტებით, მსურველთა რაოდენობა ბევრად მეტია, ამიტომ  მათ გუნდში ეტაპობრივად დაიმატებენ. გელა მაისურაძის თქმით, ფეხბურთელები აქტიურ ვარჯიშს უკვე შეუდგნენ და მალე ჩემპიონატებშიც ჩაერთვებიან. 

2016 წლის მსოფლიო საჯომარდო კალენდარში  ევრო–თასის გათამაშების თარიღი და ადგილი ჩაინიშნა. ჩემპიონატი საქართველოში, კერძოდ კი ბორჯომის ხეობაში,  25–29 მაისს გაიმართება. ტურნირი მდინარე მტკვარზე, ქალებსა და ვაჟებში 6 კაციანი ნავების კატეგორიაში, მსოფლიო ფედერაციის საყოველთაოდ მიღებული წესებისა და ინსტრუქციის მიხედვით ჩატარდება. ბორჯომის ადმინისტრაციის ინფორმაციით, ამ დროისთვის, ღონისძიებაში მონაწილეობისთვის უკვე 12 ქვეყანაა დარეგისტრირებული. ევრო–თასის გათამაშებისთვის გათვალისწინებულია ფულადი საპრიზო ფონდი. ღონისძიებას მხარს უჭერენ საქართველოს სპორტისა და ახალგაზროდობის საქმეთა სამინისტრო და ბორჯომის მუნიციპალიტეტის გამგეობა. 

19-20 მარტს “ბაკურიანობა” 2016 გაიმართება. მას ორგანიზებას ბორჯომის მუნიციპალიტეტი გაუწევს. ადმინისტრაციის ინფორმაციით, დღესასწაულის ფარგლებში სხვადასხვა სახის სპორტული და კულტურული ღონისძიება ჩატარდება. 19 მარტს სპორტულ შეჯიბრებებს უმასპინძლებს დიდველი, სადაც  გიგანტური სლალომი მოეწყობა. სლალომის დამთავრებისთანავე ჩატარდება შეჯიბრება სნოუბორდისტებს შორის. 20 მარტს გაიმართება შემდეგი სპორტული ღონისძიებები: 11:00 სთ-თხილამურებით სირბილი ( ე.წ “ოცდახუთიანების ტრასა”); 12:00სთ -ტრამპლინიდან თხილამურებით ხტომა (ტრამპლინი, “ოცდახუთიანების” მიმდებარედ); 14:00 სთ- კვადროციკლებით შეჯიბრი (“ოცდახუთიანების” მიმდებარედ); 15:00სთ – ცხენებით ჯირითი (“ოცდახუთიანების” მიმდებარედ) დაჯილდოვების ცერემონია 17:00 საათზე ცენტრალურ მოედანზე გაიმართება. დღესასწაული გალაკონცერტით დაიხურება, რომელიც ასევე ცენტრალურ მოედანზე,  18:00 საათზე დაიწყება. 

შიტორიუ კარატე დოს ახალციხელი სპორტსმენები ჩემპიონატებისთვის ემზადებიან. აპრილის თვეში ესპანეთში ევროპის ღია ჩემპიონატი გაიმართება, სადაც ახალციხელი კარატისტებიც არიან მიწვეულნი. გარდა ამისა, სპორტსმენები ახლო მომავალში სკოლებს შორის მსოფლიო ჩემპიონატზეც იასპარეზებენ, რომელიც თბილისის სპორტის სასახლეში ჩატარდება.   ჩემპიონატებისთვის მზადების პარალელურად, ახალციხეში გამოცდა–სემინარები ჩატარდა.  სპორტსმენების შესაძლებლობები შიტოკაი კარატე დოს ასოციაციის წარმომადგენლებმა შეაფასეს.

კიევის საერთაშორისო ტურნირზე მესხმა სპორტსმენმა ვერცხლის მედალი მოიპოვა. გოგა აფრიამაშვილმა  71 კგ. წონით კატეგორიაში ბერძნულ-რომაული სტილით იასპარეზა. საქართველოს ჭიდაობის ეროვნული ფედერაციის ინფორმაციით, მან მოლდოველი დანიელ კატარაგა და უკრაინელი ოლეგ ანტონოვი 8-0 დაამარცხა, ნახევარფინალში,  თანაგუნდელ გიორგი ჯავახიას  ანგარიშით 3-2 მოუგო. გოგა აფრიამაშვილი ადიგენიდან, სოფელ არლიდან არის. 2005 წლიდან იგი ეროვნულ ნაკრებში  ჭიდაობს. კიევის საერთაშორისო ტურნირზე სპორტსმენი ეროვნული ფედერაციის სახელით იმყოფებოდა. 13 თებერვალს,  კიევის საერთაშორისო ტურნირის პირველ დღეს საქართველოს ბერძნულ-რომაული სტილით, ხალიჩაზე 5 მოჭიდავე გავიდა, აქედან ოთხმა მედალი მოიპოვა. ვერცხლის მედლები მფლობელები  გოგა აფრიამაშვილმა (71) და ვასილ იმერლიშვილმა (98),  ბრინჯაოს მედლების კი გიორგი ჯავახია (71) და თორნიკე ძამაშვილი (80) გახდნენ. საერთაშორისო ტურნირში მონაწილეობა 20–მა ქვეყანამ მიიღო.

ბაკურიანმა, ტრაგიკულად გარდაცვლილი სნოუბორდისტის, ნუგზარ დიაკონაშვილის სახელობის ტურნირს უმასპინძლა. მასში მონაწილეობა 70–მდე წამყვანმა სპორტსმენმა მიიღო. მესტიიდან, გუდაურიდან, თბილისიდან და ბაკურიანიდან ჩამოსული სნოუბორდისტები, ბიჭების ორ და გოგონების ერთ ასაკობრივ გუნდში გადანაწილდნენ. ორგანიზატორების თქმით, ნუგზარ დიაკონაშვილის სახელობის ტურნირი ყოველწლიურად გაიმართება.

  ახალციხელმა სპორტსმენებმა ევროპის ჩემპიონატზე ექვსი ოქროს მედალი მოიპოვეს. ,,ბრძოლა წესების გარეშე”, სადაც მათ მონაწილეობა მიიღეს, თბილისში „დეკადის“ დარბაზში გაიმართა. ქალაქ ახალციხის ადმინისტრაციის მიერ გავრცელებული ინფორმაციით, გამარჯვებულ სპორტსმენებს, 16 იანვარს, მერი გიორგი კოპაძე  შეხვდა და წარმატება მიულოცა. „ ვამაყობ, რომ ახალციხელმა სპორტსმენებმა ესეთ დიდ წარმატებას მიაღწიეს და ჩვენი ქალაქი ასახელეს“– აღნიშნა ქალაქის პირველმა პირმა. სპორტსმენების წარმატება მოულოდნელი იყო უნივერსალური ორთაბრძოლების კლუბ მე-13 ლეგიონის პრეზიდენტისათვის. „გახარებულები დავბრუნდით, არავინ არ ელოდა , რომ ახალციხელი სპორტსმენები ესეთ წარმატებას მიაღწევდნენ. ყველა ჩემს მეგობარს სპორტულ კარიერაში წარმატებას ვუსურვებ“– განაცხადა მიხეილ მესხმა. კიდევ ერთი წარმატება, აღნიშნული გუნდის წევრმა გიორგი აკოშვილმა ქალაქ კიევში გამართულ აღმოსავლეთ უკრაინის რეგიონულ ტურნირში, ხელჩართულ ორთაბრძოლაში მოიპოვა და მეორე ადგილის, ვერცხლის მედლის მფლობელი გახდა.

რევაზ ლაშხი ბერძნულ-რომაული სტილით ჭიდაობაში, საქართველოს ჩემპიონი 59კგ წონით კატეგორიაში გახდა. მან მოწინააღმდეგე დაამარცხა და პირველი ადგილი დაიკავა. რევაზ ლაშხს გამარჯვების მოსაპოვებლად ბრძოლა ირაკლი შავაძესთან (აჭარა) მოუწია. საქართველოს 2016 წლის ჩემპიონატი თავისუფალი და ბერძნულ-რომაული სტილით ჭიდაობაში, სპორტის ახალ სასახლეში ჩატარდა. რევაზ ლაშხი წარმოშობით ბორჯომიდანაა. ის 2011 წლის ევროპის ჩემპიონია. მონაწილეობა მიიღო 2012 წლის ლონდონის ოლიმპიურ თამაშებში 60 კილოგრამ წონით კატეგორიაში და ვერცხლის მედალი მოიპოვა. რევაზ ლაშხი ჭაბუკთა შორის ევროპისა (2004) და მსოფლიოს (2005) ვერცხლის პრიზიორია.   წყარო: ტელეკომპანია ,,ბორჯომი”

ბაკურიანში გარდაცვლილი სნოუბორდისტი ნუგზარ დიაკონაშვილი დღეს, 10 იანვარს  დაკრძალეს. სპორტსმენის დაკრძალვას სპორტისა და ახალგაზრდობის საქმეთა მინისტრის მოადგილე, უწყების წარმომადგენლები და სნოუბორდის ფედერაციის პირველი პირები დაესწრნენ. სნოუბორდოსტები ჩამოვიდნენ ყაზბეგიდან და გუდაურიდან და სპორტსმენი უკანასკნელ გზაზე გააცილეს.

ბაკურიანში ახალგაზრდა სნოუბორდისტი ნუგზარ დიაკონაშვილი გარდაიცვალა. იგი ვარჯიშის დროს ზვავმა მოიყოლა. შემთხვევა 5 იანვარს დღის პირველ საათზე მოხდა,  როგორც ჟურნალისტებთან საუბრისას სნოუბორდის ფედერაციის პრეზიდენტი აცხადებს,  სპორტსმენი ვარჯიშისას „ტატრაპუმის წვერიდან“, გაუკვალავ თოვლში „დიდველზე“ გადადიოდა, რა დროსაც ზვავი ჩამოწვა და ქვეშ მოიყოლა. ლევან მშვილდაძის თქმით, მაშველები ნუგზარ დიაკონაშვილს სამი საათის განმავლობაში ეძებდნენ, თუმცა მისი გადარჩენა ვერ მოხერხდა. ახალგაზრდა სპორტსმენი ბაკურიანის სნოუბორდის გუნდს ხელმძღვანელობდა. იგი საქართველოს მრავალგზის ჩემპიონი იყო. ერთ–ერთი ბოლო წარმატება 2015 წელს მოიპოვა, სადაც სნოუბორდ–კროსში საქართველოს ჩემპიონი გახდა.

ბაკურიანში, სამთო–სათხილამურო სპორტში, საქართველოს თასის გათამაშების პირველი ეტაპი დასრულდა. შეჯიბრში მონაწილეობა გოგონებმა და ვაჟებმა სამი სხვადასხვა ასაკობრივი ჯგუფიდან მიიღეს. ჩემპიონატში სპორტსმენები ჩაერთვნენ, როგორც ბაკურიანიდან,  ასევე, გუდაურიდან, თბილისიდან, მესტიიდან და აჭარის რეგიონიდან. გამარჯვებულები სამივე ასაკობრივ კატეგორიაში გამოვლინდნენ. მათ სამთო სათხილამურო ფედერაციისგან მედლები და სიგელები გადაეცათ.

ახალციხეში მცხოვრებ, 14 ვეტერან სპორტსმენს, ახალციხის მერმა დღეს უმასპინძლა. გიორგი კოპაძემ, სპორტის განვითარებაში შეტანილი წვლილისთვის მადლობა გადაუხადა და ამ სფეროს პოპულარიზაციაში დახმარებას დაპირდა. ქალაქის მერმა, სპორტსმენებს, წინასაახალწლოდ 500 ლარი და მადლობის სიგელები გადასცა. გიორგი კოპაძემ, ვეტერანი სპორტსმენების ნაწილისგან, არჩევნებში მხარდაჭერის პირობა მიიღო.